Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Ogas 25, 2003. Wasman skul bai mekim riviu inap 30 minit long ol tok i bin kamap insait long skul long wik i kirap long Julai 7 i go inap long Ogas 25, 2003. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Olsem wanem pasin bilong lukluk long pes bilong man taim yu autim tok inap helpim yu? [2, be p. 125 par. 1-2; p. 125 blok] Taim yu lukluk long pes bilong man long pasin i makim olsem yu tingim na laikim em, dispela kain pasin inap tokim man olsem yu wanem kain man na dispela bai helpim bel bilong em i stap isi taim yu toktok wantaim em. Na tu yu inap kisim tingting bilong man taim yu lukim ai bilong em, na dispela i ken helpim yu long save long samting yu mas mekim.
2. Sapos yu save pret taim yu laik autim tok, yu ken mekim wanem? [4, be p. 128 par. 4-5] Redim gut tok yu laik mekim na beten strong long Jehova, tingim bikpela pasin marimari Jehova i kamapim taim em i singautim ol man long kisim laip oltaim long Paradais; lain long tingim ol samting ol man i mas kisim. Na tingim tu olsem: Ol man i stap fri long skelim na makim ol samting ol i laik mekim, olsem na ol i ken harim o sakim tok yu autim. Wok bilong yumi em bilong autim tok, em tasol. (Mt. 24:14; Ap. 4:29)
3. Taim yu mekim tok long pletfom, wanem samting bai helpim yu long mekim tok long pasin bilong yu yet na mekim olsem yu toktok wantaim narapela? [5, be p. 129 par. 2; p. 129 blok] Taim yu redim wanpela tok, tingting long ol as tingting bilong tok, na no ken tingting long ol wan wan tok yu bai kolim. Sapos yu putim olgeta wan wan tok yu laik kolim long tingting o yu raitim long pepa planti tok tumas yu laik kolim, orait bai yu tingting tumas long dispela, na tok yu mekim bai kamap olsem yu gat pasin antap.
4. Ol stiatok i stap long Wok Pris 16:4, 24, 26, 28; Jon 13:10; na Kamapim Tok Hait 19:8 i mas mekim wanem long taim yumi skelim ol klos na bilas bilong yumi? Bilong wanem dispela em i bikpela samting? [7, be p. 131 par. 3; p. 131 blok] Baibel i kirapim yumi long stap klin long skin na long klos yumi pasim. Em i bikpela samting taim yumi go long hap bilong lotu o mekim wok autim tok. Pasin bilong yumi long bilas na klos yumi pasim inap givim tingting long ol man long ol bilip Kristen bilong yumi na long ol pasin yumi save bihainim.
5. Stori long ol pasin bilong man i gat pasin daun na stretpela tingting. (1 Ti. 2:9, 10) [8, be p. 132 par. 1] Man o meri i gat pasin daun i no laik mekim samting i bagarapim bel bilong ol narapela, na em i no laik pulim ai bilong ol man. Man i save bihainim stretpela tingting em i save tingting gut na skelim gut ol samting. Em i save daun long ol lo bilong God na em i amamas long bihainim ol tok bilong Baibel long laip bilong em.
TOK NAMBA WAN
6. Tru ol Kristen i mas isi long ol narapela Kristen taim ol i popaia o mekim pasin kranki, tasol dispela i no makim olsem ol i orait long wanem samting? (Kl. 3:13) [3, w01 7/15 p. 22 par. 6-7] Ol Kristen i no orait long ol pasin i no stret na i no olsem ol i no lukim popaia bilong ol narapela. (Ga. 6:1)
7. Tru o Giaman: Taim Baibel i mekim kain tok olsem “long namba 4 yia bilong man i stap king” dispela i makim olsem em i stap king 4-pela yia olgeta. Stori long dispela. [4, si p. 6 par. 24-25] Giaman. Sapos yumi kolim namba bilong wanpela samting na yumi tok em i namba wan o namba 2 o namba 3, dispela namba i makim tasol olsem dispela samting i paslain o bihain long narapela samting; em i no makim hamas samting olgeta i stap. Olsem na sapos yumi stori long namba 4 yia bilong man i stap king, dispela i no makim olsem em i stap king 4-pela yia olgeta, nogat. Dispela i makim olsem em i bin i stap king inap 3-pela yia olgeta na nau em i namba 4 yia bilong em i stap king. Sapos yumi stori long sampela samting na yumi laik makim hamas samting olgeta i stap, orait yumi no ken kolim namba olsem namba 3 o namba 4 o namba 5; yumi mas kolim namba olsem 3-pela o 4-pela o 5-pela, olsem.
8. Wanem namba wan as na yumi laik ritim Baibel? Bilong wanem dispela em i bikpela samting? [5, be p. 24 par. 1] Pasin bilong laikim tru Jehova em i nambawan as na yumi laik ritim Baibel. Pasin bilong laikim tru Jehova long “tingting” olgeta bilong yumi, bai kirapim yumi long tingting strong long kisim save long God. (Mt. 22:37)
9. Olsem wanem man i gat gutpela tingting i save “wok long kisim olkain save”? (Snd. 10:14) [6, w01 7/15 p. 27 par. 3-4] Yumi mas putim ol gutpela save bilong God i go pulap long tingting bilong yumi, em “olgeta tok i stap long buk bilong God.” (2 Ti. 3:16, 17) Ol gutpela save bilong Baibel i mas i go daun long bel bilong man long rot bilong oltaim tingim tingim long bel ol tok em i lainim.
10. Bilong wanem yumi laik tingim ol gutpela pasin Jop i bin mekim? (Jop 1:1, 8; 2:3) [7, w01 8/1 p. 20 par. 4] Ol gutpela pasin Jop i save mekim oltaim i helpim em long stap “gutpela man tru na i no gat asua long ai bilong God.” Jop i save mekim wok olsem pris bilong famili na wokim ofa bilong helpim ol. (Jop 1:5) Long famili bilong Jop, ol pasin ol i bihainim bilong lotuim Jehova ol i bikpela samting.
BAIBEL RITIM BILONG WIK
11. Olsem wanem ol hetman bilong lain bilong bosim ol Kristen ol inap “wanbel” na tok ol bilipman bilong ol narapela lain i no gat wok long katim skin na bai God i ken kisim bek ol? (Ap. 15:25) Pastaim, Pita i stori olsem God i bin givim holi spirit long ol man bilong ol narapela lain husat ol i no katim skin; em stori long taim Kornilius na ol wanhaus bilong em ol i kamap Kristen. (Ap. 15:7-9) Bihain, Barnabas na Pol i bin stori long ol samting i painim ol taim ol i stap namel long ol man bilong ol narapela lain husat ol i kamap bilipman. (Ap. 15:12) Bihain yet, Jems i kolim tok bilong Amos 9:11, 12. (Ap. 15:13, 16) Olsem na ol samting i bin kamap na ol tok bilong Baibel i kamapim long ples klia long ol long ol samting ol i mas mekim. [1, w91 3/1 p. 10 par. 14-15]
12. Olsem wanem ol hetman bilong lain bilong bosim ol Kristen i ken tokim Pol long mekim sampela samting Lo Bilong Moses i makim long man i mas mekim maski Jehova i pinisim pinis Lo? (Ap. 21:20-26) [2, it-1-E p. 481 par. 3; it-2-E p. 1163 par. 6–p. 1164 par. 1] Lo Bilong Moses em i lo bilong kantri Judia. Sapos sampela pasin o kastam bilong Lo i no brukim ol stiatok Kristen o i makim olsem man i givim baksait long bilip Kristen, orait bilong ol i no ken skrapim nating bel bilong ol narapela, ol Kristen long bipo ol i save bihainim ol dispela pasin o kastam.
13. Wanem ol tok giaman ol i bin sutim long aposel Pol i kirapim yumi long tingim ol tok giaman ol man i bin sutim long ol Witnes Bilong Jehova long taim bilong yumi? (Ap. 24:5, 6) [3, w01 12/15 p. 23 par. 1-3] Ol birua bilong Pol i tok em i mekim ol samting bilong daunim gavman na em i laik kirapim ol Juda long bikhet long gavman long olgeta hap Rom i bosim. Ol i tok em i lida bilong ol man i bin lusim lotu Juda na i kamapim narakain lain. Na tu, ol i tok em i bin helpim wanpela man long brukim lo i tambuim ol man bilong narapela lain long go insait long hap bilong tempel.
14. Olsem wanem Pol i bin i stap olsem gutpela piksa long pasin bilong autim tok bilong Kingdom maski em i stap long haus bilong em olsem kalabus inap tupela yia? (Ap. 28:30, 31) Maski Pol i stap aninit long tambu, em i mekim olgeta samting em inap long mekim, em i autim tok na skulim ol man na em i “no pret.” Em i stap long kalabus na em i raitim ol pas long ol Efesus, ol Filipai, ol Kolosi, na ol Kristen Hibru, na tu long Filemon. [4, w91 3/1 p. 27 par. 20; Rbi8-E p. 13 lista]
15. Olsem wanem ‘God yet i bin putim olgeta gavman i stap’? Dispela i mas mekim wanem long ol Kristen? (Ro. 13:1, 2) [8, w00 8/1 p. 4 par. 5] God i larim ol gavman i stap inap long sampela taim tasol na ol i insait liklik long ol samting God i laik mekim. Ol Kristen i save daun long ol gavman na bihainim ol lo bilong ol sapos ol lo bilong gavman i no brukim lo bilong God.