Yu Tingim Gut Haus Yu Save Lotu Long En?

“Kirap long taim lotu Kristen i kamap nupela yet, ol Kristen i gat ples stret bilong lotuim God long en.”​—⁠“Primitive Christianity,” bilong William Cave.

LONG taim bilong ol aposel na long nau tu, lain bilong God i amamas long bung wantaim na lotuim em. Ol man bilong raitim ol buk na ol tisa bilong lotu long bipo tru, olsem Lusian, Klemen, Jastin Matir, Tetulian, ol i wanbel long tok, ol Kristen bilong bipo i gat haus ol i save lotu long en oltaim.

Planti taim Baibel tu i tok, ol Kristen i save bung bilong mekim miting. Ol i kolim dispela lain olsem kongrigesen. Long Baibel bilong pastaim ol i bin raitim long tok Hibru, dispela tok “kongrigesen” i olsem wanpela lain i bung wantaim bilong mekim wanpela wok.

Ol Haus Ol Kristen Bilong Bipo i Bin Lotu Long En

Baibel i stori long ol miting bilong ol Kristen bilong pastaim na i kamapim klia olsem wok bilong skulim man em bikpela hap wok bilong ol dispela miting. (Aposel 2:42; 11:26; 1 Korin 14:​19, 26) Bilong skulim ol Kristen, ol i save mekim ol bikpela tok, na kamapim ol gutpela stori bilong taim ol i bin autim tok, na ol i kaunim na toktok long ol pas ol i bin kisim long lain bilong bosim ol Kristen, em i stap long Jerusalem, o pas bilong wanpela aposel.

Aposel 15:​22-35 i tok, taim ol i kaunim wanpela pas long lain Kristen i stap long Antiok, “Judas wantaim Sailas . . . i givim planti gutpela tok long ol Kristen, na long dispela pasin tupela i strongim bel bilong ol.” Na taim Pol wantaim Barnabas i kamap long Antiok, “tupela i singautim ol manmeri bilong [kongrigesen] i kam bung. Na tupela i tokim ol long olgeta samting God i bin mekim long han bilong tupela.” Long ol dispela miting ol Kristen i save beten long Jehova, em wanpela bikpela samting bilong ol.​—⁠Aposel 14:⁠27.

Ol haus em ol Kristen bilong pastaim i bin bung long en bilong mekim lotu ol i no bikpela haus i gat planti bilas olsem ol haus lotu bilong ol misin long nau. Klostu olgeta dispela Kristen i bin bung long haus bilong man yet. (Rom 16:5; 1 Korin 16:19; Kolosi 4:15; Filemon 2) Planti taim ol i save bung long wanpela rum antap long haus. Taim Jisas i mekim Kaikai Bilong Bikpela, ol i bung long wanpela rum antap. Na taim ol 120 disaipel i kisim spirit holi long De Pentikos, ol i bin bung long wanpela rum antap.​—⁠Luk 22:​11, 12, 19, 20; Aposel 1:​13, 14; 2:​1-4; 20:⁠7, 9.

Long nau ol Witnes Bilong Jehova i bihainim pasin ol aposel i bin makim. Ol i save bung long ol haus ol i kolim Haus Kingdom. Long ol dispela miting ol i save lain long autim gutnius bilong Kingdom bilong God. (Matyu 24:14) Na long Haus Kingdom ol i save stadi long Baibel, na beten, na narapela i strongim bel bilong narapela. Dispela i stret wantaim tok bilong Baibel long Hibru 10:​24, 25 i tok: “Yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.”

Mekim Gut Long Haus Yumi Lotu Long En

Aposel Pol i bin tok: “God i save mekim stret olgeta wok bilong en. Em i no save mekim ol samting i paul nabaut. Em i laik bai yumi stap wanbel na wok gut wantaim.” Na em i tok, “Yupela i mas bihainim stret ol gutpela pasin bilong lotu.” Pol i toktok long pasin ol Kristen i mas bihainim bilong mekim miting bilong ol. Long nau tu ol Kristen i save bihainim stret gutpela pasin bilong mekim miting na bai olgeta samting i wok stret.​—⁠1 Korin 14:​26-40.

Wastaua tok Inglis bilong Oktoba 15, 1969 i bin tok, ‘Taim yu stap insait long Haus Kingdom, bai yu pilim tru olsem ol i save tingim tru ol samting bilong spirit. As bilong en, em ol i givim bel long lotu i tru na long kisim save long Baibel. Na lait i save kam insait long ol windo na ol samting i stap ples klia, na dispela i mekim na ol manmeri i save amamas na pren gut na toktok wantaim. Ol i no stap long tudak na pret long toktok, nogat.’ Tasol ol i save was gut na bai olgeta samting ol i mekim insait long Haus Kingdom i stret tasol na i kamapim klia olsem ol i tingim gut dispela haus ol i lotuim God long en.

Sampela misin i no tingim gut ol haus ol i mekim lotu long en. Ol i save mekim ol bung long en bilong kisim amamas. Ol i kisim ol lain bilong wokim musik rok bilong pilaim musik bilong lotu, na ol i gat ol rum bilong mekim ol eksasais samting, na ol tebol bilong paitim ol bal long en, olsem snuka, na i gat ples bilong lukautim ol liklik pikinini taim mama i go long wok, na i gat rum bilong kamapim ol piksa wokabaut. Long wanpela haus lotu ol i save wokim boksen. Tasol dispela i no wankain long pasin ol aposel i bin makim bilong tingim gut haus yumi mekim lotu long en.

Long taim bilong ol aposel, sapos wanpela kongrigesen i no bihainim gutpela pasin na ol i mekim nabaut, ol wasman i save stretim ol. Long kongrigesen bilong Korin, long taim bilong mekim Kaikai Bilong Bikpela, sampela i save karim ol kaikai na dring i kam na ol i kaikai taim miting i no kirap yet o ol i kaikai long taim bilong miting, na sampela i kaikai na dring planti tumas. Tasol i no stret ol i mekim olsem long miting bilong lotu. Aposel Pol i raitim pas long ol na i tok: “Olsem wanem? Ating yupela i no gat ol haus bilong kaikai na dring long en, a?”​—⁠1 Korin 11:​20-29.

Ol Witnes Bilong Jehova i bihainim tok bilong Pol na sapos ol i gat wok long stretim ol samting bilong ol yet ol i no save toktok long dispela insait long Haus Kingdom​—⁠ol i mekim long haus bilong ol o long narapela hap. Tru, long ol miting yumi inap lukim ol pren bilong yumi na toktok wantaim ol, tasol yumi no toktok wantaim ol long ol samting bilong wok bisnis o bilong mani samting; yumi tingim Haus Kingdom ol i bin dediketim long Jehova, olsem na em i bilong lotuim Jehova long en, na i no gat narapela wok.

Na kongrigesen i no save mekim ol bung bilong amamas insait long Haus Kingdom o sampela wok bilong kisim mani bilong helpim lotu o wok bilong lukautim ol liklik pikinini olsem pilai-skul samting. I gat ol narapela hap bilong mekim ol dispela samting.

Ol elda long wanpela kongrigesen ol i bin lukim olsem sampela manmeri i save kisim o bekim ol samting long ol narapela insait long Haus Kingdom, na ol i wok long senisim ol video-kaset bilong ol piksa nabaut. Tru, dispela i no samting bilong bisnis, tasol ol elda i helpim ol long save, i gutpela sapos ol i mekim ol dispela kain wok long haus bilong ol yet o long narapela hap.

Yumi tingim ol nupela man i kam long miting, na tu yumi laik mekim stretpela wok long Haus Kingdom, olsem na yumi wan wan i mas askim yumi yet: ‘Mi save mekim sampela wok bilong skin long Haus Kingdom em mi inap mekim long haus bilong mi?’ Olsem: Sapos yumi laik stretim tok long i go piknik o mekim bung bilong amamas, i gutpela yumi stretim dispela tok long haus bilong yumi, a? Yumi ken ring o go lukim ol manmeri yumi laik toktok wantaim ol long dispela samting. Yumi ken mekim tok olsem Pol i bin mekim: ‘Olsem wanem? Ating yumi no gat ol haus bilong mekim ol dispela samting, a?’

I Gat Taim na Ples Bilong Lotuim Jehova

Long Saveman 3:1 Baibel i tok: “Olgeta samting long dispela graun i save kamap long taim bilong em yet.” Taim yumi go long ol miting long Haus Kingdom, yumi tingting tasol long ol samting bilong wok Kristen. Dispela em i taim bilong lotuim Jehova.

Jems, em brata bilong Jisas, em i tok strong long yumi no ken mekim gut long sampela Kristen tasol insait long kongrigesen na sampela nogat. (Jems 2:​1-9) Olsem wanem yumi ken bihainim tok bilong Jems insait long Haus Kingdom? Sapos yumi givim pas long sampela bilong singautim ol long pati samting, ol narapela bai lukim na ol bai ting yumi no laikim ol. Long wanpela kongrigesen, sampela i save putim ol dispela kain pas insait long Baibel o paus bilong sampela brata sista. Tru, nau ol i no gat hatwok long salim pas long rot bilong posofis o long kisim i go long haus bilong ol. Tasol yumi mas tingting: Ol manmeri yumi no givim pas long ol long miting, ol bai ting olsem wanem? Nogut ol i ting yumi no laikim ol.

Tru, i no olsem kongrigesen i mas putim lo i tambu long givim wanpela pas o karamap long man insait long Haus Kingdom; na i no gat rong long toktok long wanpela samting yumi bin mekim o wanpela samting i bin kamap, o singautim wanpela long mekim ol samting bilong amamas wantaim yu. Tasol yumi mas bihainim gutpela tingting. Nogut yumi mekim long ai bilong ol narapela, o yumi mekim bikpela tok long en na ol i no tingim as tru bilong i kam bung long Haus Kingdom, em i bilong kisim strong long ol samting bilong spirit.​—⁠Matyu 6:33; Filipai 1:⁠10.

Ol Man i Stap Olsem Gutpela Piksa

Ol elda na wokman bilong kongrigesen ol i wok strong long i stap olsem gutpela piksa bilong mekim gut long Haus Kingdom. Ol i save makim wanpela o tupela elda na wokman long stretim wok bilong lukautim Haus Kingdom na stretim ol samting long en. Sapos tupela o 3-pela kongrigesen i save mekim wok long wanpela Haus Kingdom tasol, wanpela lain elda olsem komiti i save lukautim dispela wok.

Tasol maski ol i makim sampela elda na wokman long stretim dispela wok, ol narapela elda na wokman tu i mas tingting gut na mekim ol samting bambai Haus Kingdom i ken i stap gutpela. Ol i save, ol i bin dediketim Haus Kingdom long Jehova, na wok bilong en i bilong lotuim Jehova long en.

Sapos i gat wok long stretim sampela samting long Haus Kingdom, ol elda i mas mekim kwik dispela wok. (2 Stori 24:​5, 13; 29:3; 34:8; Nehemia 10:39; 13:11) Long sampela kongrigesen ol i save lukim gut Haus Kingdom, nogut sampela samting long en i laik bagarap na ol i mas stretim hariap. Ol i raitim lista bilong olgeta samting i stap long Haus Kingdom, na sapos sampela samting i laik pinis, ol i ken kisim sampela moa. Sapos i gat ples stret bilong putim ol tul na ol samting bilong klinim Haus Kingdom na ol narapela samting, olgeta elda na wokman i mas tingim ol dispela samting, ol i stap gut na i stap long ples bilong en o olsem wanem? Ol brata i lukautim ol magasin na buk samting, taim ol i kamautim long ol katon, nogut ol i larim ol katon i stap nabaut olsem pipia.

Sapos ol elda na wokman i stap olsem gutpela piksa, dispela bai helpim ol narapela long kongrigesen long givim bel long lukautim Haus Kingdom. (Hibru 13:⁠7) Olgeta wantaim i ken mekim sampela wok bilong klinim Haus Kingdom na em i ken i stap gutpela, na dispela bai kamapim klia olsem ol i tingim gut Haus Kingdom.

Jisas i tok long Matyu 18:20: “Sapos tupela o tripela man i kam bung long nem bilong mi, orait mi yet mi stap namel long ol.” Em nau, Jisas i tingim ol samting yumi mekim taim yumi bung wantaim bilong lotuim Jehova, maski yumi bung long haus bilong wanpela man o long ol bikpela bung olsem ol kibung.

Ol Witnes Bilong Jehova ol inap olsem sampela milion, na ol i save laikim tumas haus ol i save mekim lotu long en, em Haus Kingdom. Ol i save tingim gut, na ol i wok strong long lukautim gut, na oltaim ol i laik mekim ol gutpela wok tasol long dispela haus. Mipela laik bai yu tu yu ken bihainim tok Jehova i givim long yumi, olsem: “Yu mas tingting gut long pasin bilong yu long taim yu go long haus bilong God.”​—⁠Saveman 5:⁠1.