Jehova i Senisim Ol Samting Long Romenia
OLSEM win i save senis, olsem tasol ol samting long Isten Yurop i bin senis long 1989. Insait long sampela mun tasol sampela bikpela gavman i bin pundaun. Ol wok politik i senis, na sindaun bilong ol man tu, na ol samting bilong mani tu. Na sampela senis i kamap long ol samting bilong lotu tu, olsem na bikpela senis i painim ol Witnes Bilong Jehova long ol dispela hap. Ol nupela gavman i tekewe tambu i bin stap long ol Witnes long ol narapela narapela kantri, na nau i no gat moa na ol i stap fri long mekim wok bilong God long ples klia.
Tasol long Romenia i olsem ol samting i no ken senis hariap. Gavman i bosim strong ol man. Ol Witnes Bilong Jehova long Romenia i harim ol dispela senis i kamap long ol narapela hap bilong Isten Yurop, tasol long Romenia nogat. Bilong wanem? Ol i laik save, “Bai yumi inap kamap fri paslain long Armagedon, o nogat?” Ol i laik i stap fri na bai ol i ken bung wantaim long ol miting wantaim ol brata sista bilong ol, na raun long ples klia na autim tok, na stadi wantaim long Baibel long ples klia, na maski hait na mekim ol dispela samting.
Tasol bihain bikpela senis i kamap! Em i kamap long Disemba 1989. Ol man i kirap nogut. Gavman bilong Ceauşescu wantu i pundaun na bikpela hevi bilong ol dispela Kristen i pinis. Long Epril 9, 1990 nupela gavman i orait long ol Witnes Bilong Jehova i ken kamap olsem wanpela oganaisesen lotu long Romenia. Long dispela taim i gat 17,000 Witnes i stap long Romenia, na Jehova i opim rot long ol i ken kamap fri, em bikpela senis tru i painim ol!—Lukim Daniel 2:21.
Ol i Bin Stap Longpela Taim
Long yia 1911 Carol Szabo na Josif Kiss i lusim Amerika na i go bek long Romenia. Ol i bin kisim save long tok i tru bilong Baibel long Amerika na ol i dediketim laip bilong ol long Jehova bilong mekim wok bilong em. Ol i laik autim dispela gutpela tok long ol man long Romenia, na taim ol i kamap long dispela hap ol i kirap mekim olsem. Tasol taim Namba Wan Pait i kirap, gavman i kalabusim ol, long wanem, ol i bin autim tok bilong Baibel long ol man. Tasol wok ol i bin mekim i no lus. Long 1920 ol Witnes i kamap strong gen na i gat 1,800 pablisa bilong Kingdom ol i stap long Romenia.
Tasol long dispela taim sampela lain i kros long gavman long hap bilong Bolkan, na dispela hevi i kam insait long Romenia tu. Tasol maski em i taim bilong hevi, ol brata i mekim yet wok bilong Jehova. Long 1924 Sosaiti Was Taua i kirapim ofis bilong en long 26 Rejina Maria Strit long Klus-Napoka, em i bilong lukautim wok bilong ol Witnes long Romenia, Hangari, Balgeria, Yugoslavia, Albenia.
Tasol gavman i putim hevi long ol Witnes, na insait long lain bilong ol yet i gat hevi i kamap. Wanpela buk bilong ol Witnes (1930 Year Book) i tok: “Sosaiti i bin salim wanpela brata bilong lukautim wok long Romenia, tasol em i kamap bikhet, na lain bilong ol Witnes i bruk, na nau ol i no givim bel tumas long autim tok. Sosaiti i laik strongim gen wok long Romenia, tasol gavman i putim tambu long wok bilong yumi, na i olsem yumi mas wetim Jehova i kirapim gen dispela wok.” Tasol long 1930 Sosaiti i makim Martin Magyarosi bilong lukautim wok long Romenia. Em i wanpela Witnes Bilong Romenia na em bin kisim baptais long 1922. Bihain ol i senisim brens i go long 33 Krisana Strit long taun Bukares. Sosaiti i bin wok strong na bai gavman i ken rejistaim Sosaiti, na long 1933 gavman i mekim olsem na em i orait long Sosaiti i stap long Romenia.
Hevi i Stap Yet
Tasol hevi i painim yet ol Witnes long Romenia. Buk bilong ol (1936 Year Book) i tok: “Ol brata long Romenia i gat planti hevi, winim bilong ol narapela hap bilong graun.” Tasol yia bilong wok bilong 1937 i gutpela, na i gat 75 kongrigesen na 856 pablisa, na i gat 2,608 i bin kam long Memorial.
Taim Namba 2 Pait i kirap, em i kisim Romenia tu. Long Septemba 1940 Jeneral Ion Antonescu i kirap bosim gavman, na em i bihainim pasin olsem Hitler i mekim. Gavman i mekim pasin nogut long ol man. Planti handet Witnes i kalabus, na ol man i paitim ol na bagarapim ol. Ol i kalabusim Brata Magyarosi long Septemba 1942, tasol em inap bosim yet wok long Transilvenia.
Ol ami bilong Hitler i daunim gavman bilong Romenia na kisim kantri bilong en long 1944. Wanpela ripot long Bukares i stori long ol hevi i kamap taim Hitler i bosim dispela hap, na i tok: “Ol man i mekim pasin nogut tru long ol Witnes Bilong Jehova. Ol i kalabusim ol wantaim ol Komyunis, na ol pris bilong helpim Hitler i tokim gavman, ol Witnes i winim ol Komyunis long biruaim gavman, olsem na gavman i mekim save long ol Witnes, na planti bilong mipela em kot i makim 25 yia kalabus, o ol i mas kalabus i go inap long taim ol i dai, na kot i makim sampela bilong kilim ol i dai.”
Pait i pinis long Jun 1, 1945, na Sosaiti i kisim bek ofis long Bukares, na wok bilong ol Witnes i kirap gen. Sosaiti i hatwok long kisim pepa bilong wokim ol buk, tasol ol i wokim 860,000 buklet na 85,000 Wastaua long tok Romenia na tok Hangari. Jehova i helpim gut ol, na inap long yia 1946 i gat 1,630 nupela manmeri i bin kisim baptais. Long Septemba 28 na 29 kibung nesenel i kamap long Bukares. Ol misin i wok strong long pasim ol na bai kibung i no ken kamap, tasol ol i no inap, na 15,000 manmeri i kam bung na harim pablik-tok. Em namba wan taim ol inap kibung olsem long Romenia.
Sosaiti i salim Brata Alfred Rütimann bilong brens bilong Swiselan i go long Romenia, na long Ogas 1947 em i raun i go long 16 hap na em i givim tok long 4,500 brata na strongim ol long karim hevi i laik painim ol gen. Bihain hevi i painim gen ol Witnes, em ol Komyunis i mekim long ol. Long Februeri 1948 gavman i tambuim ol Witnes long wokim ol buk samting na autim tok. Long Ogas 1949 ol polis i kam insait long brens-ofis long namba 38 Alion Strit, na ol i kalabusim planti brata, na Brata Magyarosi tu, na ol i tok, ol Witnes i laik kamapim narapela gavman, na ol i putim ol long ol haus kalabus. Inap 40 yia wok i stap tambu, na ol Witnes Bilong Jehova i karim bikpela hevi. Sampela birua insait long lain bilong ol yet, ol tu i as bilong sampela hevi bilong ol. Long 1989 gavman bilong Ceauşescu i pundaun, na nau ol brata i kamap fri! Nau ol bai mekim wanem?
Ol i Autim Tok Gen
No gat tambu moa, olsem na wantu ol Witnes i kirap raun long ol haus na autim gen tok bilong Baibel long ol man. Tasol i hatwok long ol i mekim olsem, long wanem, inap planti yia i gat tambu long ol i mekim kain wok olsem. Kirap long 1940 na i kam inap nau ol i bin mekim hait wok bilong autim tok. Ol i bin toktok hait long wan wan man tasol. Olsem na nau ol i pret liklik long autim tok long ples klia. Na planti ol i nupela tu na ol i no bin lain long raun long ples klia na autim tok bilong Baibel long ol man. Orait, yumi laik save, ol i mekim wanem?
Bukares em nambawan biktaun bilong Romenia, olsem na em i gutpela ples bilong autim tok pastaim long dispela hap, long wanem, i gat 2,500,000 man i stap long Bukares. Inap tupela yia bipo i gat 4-pela kongrigesen tasol long Bukares, tasol long nau i gat 10-pela i stap, na 2,100 manmeri i bin kam long Memorial bilong 1992. I gat planti Baibel-stadi i stap, na ol i wok long kamap strong, olsem na klostu nau ating bai sampela nupela kongrigesen i kamap.
Taun Kraiova i stap long hap bilong saut, na 300,000 manmeri i sindaun long dispela taun. Inap long yia 1990 i gat 80 Witnes tasol i stap long Kraiova, tasol ol i gat strongpela tingting long kirap mekim wok painia, na ol i mekim olsem na wok bilong Jehova i go bikpela. Long 1992 i gat 74 manmeri i kisim baptais, na i gat 150 Baibel-stadi. Nau i gat 200 pablisa i stap em ol i save autim tok, na ol i wok strong long painim wanpela hap bilong sanapim wanpela Haus Kingdom.
Long Tirgu-Mures wanpela sista Witnes na tupela brata Witnes ol i go lukim wanpela pris bilong Misin Otodoks. Sista i laik bai pris i rausim nem bilong em long dispela lotu. Pris i save bilong wanem ol i kam, na em i tokim ol long i kam insait na sindaun. Ol i autim tok long em, na em i harim gut na i mekim gutpela tok long ol. Em i tok: “Mi tu mi laik mekim olsem yupela i save mekim. Mipela Misin Otodoks tu i mas mekim dispela wok, tasol mipela i no mekim. Dispela misin i olsem wanpela bikpela strongpela man i slip i stap.” Pris i kisim buklet Gutpela Yu Bilip Long God Triwan o Nogat? na em i kisim wanpela Wastaua. Sista hia em i amamas, long wanem, nau em i lusim pinis dispela “bikpela strongpela man i slip i stap,” em dispela Misin Otodoks.—KTH 18:4.
Long nau planti ol yangpela i laik lainim tok i tru. Bilong wanem? Ating ol i bin ting nupela gavman bai kamapim gutpela samting, tasol em i no bin mekim olsem. Ol i amamas long save long Kingdom bilong Jehova tasol bai pinisim tru ol hevi bilong yumi.—Song 146:3-5.
Tok i Tru i Painim Ol Liklik Ples
Liklik ples Okolis i stap long hap bilong not. Ol Rasia i bin kisim wanpela man Katolik long dispela ples, em Pintea Moise, na ol i bin kalabusim em long Rasia long taim bilong pait. Em i lusim lotu Katolik na em i traim lotu Baptis. Em i kam bek long ples, na 3-pela wik bihain ol Witnes Bilong Jehova i bungim em. Ol i toktok wantaim em, na nau em i tok: “Nau mi painim pinis tok i tru bilong God!” Long 1924 i gat 35 Witnes long dispela ples.
Long nau, 473 manmeri i sindaun long ples Okolis, na 170 bilong ol em ol i pablisa bilong Kingdom. Ol wan wan pablisa i gat tupela haus tasol bilong autim tok long en, na ol i save go tu long ol narapela ples nabaut. Ol i strong long mekim wok bilong ol i go bikpela moa yet. Ol i wokim pinis wanpela gutpela Haus Kingdom, inap long 400 man, na ol Witnes bilong dispela hap yet i mekim olgeta wok bilong sanapim dispela haus.
Brata Szabo na Brata Kiss i bin sindaun long taun Valea Laga long 1914. Long 1991 i gat 3,700 man i stap long dispela taun, na 8-pela kongrigesen i stap, na 582 pablisa bilong Kingdom. Long Memorial long 1992 inap 1,082 manmeri i bung, em planti tru, olsem wanpela long olgeta 3-pela man i stap long dispela hap bilong ples daun.
Ol Painia Salim i Wokim Rot
Ol painia salim i mekim bikpela wok long bringim gutpela tok bilong Kingdom i go long ol man long ol longwe hap. Taim tambu i pinis, Brata Ionel Alban i kirap long autim tok long tupela taun. Long olgeta wik em i wok tupela de long taun Osova na 5-pela de long taun Turnu-Severin.
Taim Ionel i go long Osova pastaim, i no gat sampela Witnes i stap. Wanpela wik bihain em i kirapim Baibel-stadi long wanpela manki i gat 14 krismas. Insait long tupela mun manki i senisim planti pasin nogut bilong em, na pren bilong em wantaim wanpela man Katolik, em Roland, ol i lukim, na ol tu i kirap long stadi. Roland i kamap strong, na 6-pela wik bihain em i raun wantaim Ionel long autim tok, na 5-pela mun bihain em i kisim baptais. Kwiktaim em i kirap mekim wok painia. Mama bilong em i kirap long stadi, na mama i kisim baptais long 1992 long “Ol Man i Stap Olsem Lait” Kibung Distrik. Nau i gat 10-pela pablisa long taun Osova, na ol i mekim 30 Baibel-stadi.
Ionel i bin slip long hotel long Turnu-Severin, na em i autim tok i tru long wanpela wokman bilong dispela hotel, na em i bilip long dispela tok. Em i namba wan man bilong mekim olsem long dispela taun. Insait long tupela mun em i kamap pablisa i no baptais yet, na 3-pela mun bihain em i kisim baptais. Nau i gat 32 pablisa i stap, na i gat 84 Baibel-stadi.
Sista Gabriela Geica tu em i painia salim. Taim tambu i stap yet em i bin wok hait na mekim wok painia oltaim. Em i gat laik long i go mekim wok painia long wanpela hap i no gat planti Witnes i stap, na Sosaiti i salim em i go long wanpela bikpela hap. Sampela taim em i mas i go inap 100 o 160 kilomita bilong bungim ol man ol i laik harim tok. Em i go long taun Motru tu, em 4-pela Witnes tasol i stap long en. Em i tok: “Mipela mekim bikpela wok, olsem na ol pris na ol narapela lotu i putim hevi long mipela. Ol i grisim bos bilong taun na ol polis long toktok strong long ol famili i save givim ples slip long mi na bai ol i rausim mi. Em nau, ol i rausim mi na klostu olgeta mun mi mas painim narapela narapela ples slip.”
Wanpela meri bilong Osova i no bin bilip long God o long lotu o long Baibel, na Gabriela i kirapim stadi long em. Inap 4-pela mun bihain dispela meri i kirap long litimapim tok bilong Baibel taim ol man i laik daunim. Man bilong em i lokim dua long nait na bai meri i no ken kam insait, na man i tok em bai katim marit bilong tupela o kilim i dai meri, tasol meri i stap strong yet. Taim em i no baptais yet em i mekim 10-pela Baibel-stadi.
Planti Moa Bai Kam Insait
Long Ogas 1992 i gat 24,752 pablisa na 286 kongrigesen long Romenia. Inap 66,000 i bin kam long Memorial. Liklik brens-ofis i stap long Bukares, na 17 man i wok strong long lukautim ol brata long ol samting bilong spirit. Klostu nau bai ol i kirap long wokim bikpela haus brens.
Ol Witnes Bilong Jehova long Romenia i kirap nogut long bikpela senis i bin kamap long Romenia insait long sotpela taim tasol. Ol i amamas long God Jehova, long wanem, ol i bilong wanpela bikpela lain i gat nem bilong Jehova i stap long en, na dispela oganaisesen i givim stretpela save long ol man long Jehova na long laik bilong em. Hevi i bin stap long ol dispela Witnes inap planti yia, tasol nau ol i amamas long Jehova i bin senisim ol dispela samting long Romenia!
[Mep long pes 23]
(Bilong save ol dispela rait i stap we long pes, lukim buk o magasin)
HANGARI
ROMENIA
Bukares
Klus-Napoka
Kraiova
Tirgu-Mures
Osova
Turnu-Severin
Motru
Turda
BALGERIA
[Ol Piksa long pes 24, 25]
1. Inap 700 Witnes i bung long bus long 1947
2. Tanget bilong pablik-tok long 1946
3. Kibung long Alba Iulia long 1992
4. Autim tok long Klus-Napoka long nau
5. Haus Kingdom klostu long Turda
6. Lain bilong Betel long Bukares