Ol Man i Askim . . .

Haus Kingdom Em Wanem Samting?

▪ Haus Kingdom em nem bilong haus we ol Witnes Bilong Jehova i save bung long en bilong mekim lotu. I gat planti tausen Haus Kingdom i stap long olgeta hap bilong graun. Long olgeta wan wan wik, winim 105,000 kongrigesen bilong ol Witnes Bilong Jehova i save bung long ol dispela Haus Kingdom.

Olgeta wan wan Haus Kingdom i gat hap we ol manmeri i ken sindaun na stadi long Baibel na harim ol gutpela tok. I gat pletfom em man i ken sanap long en bilong lukautim ol bung bilong lotu, em ol i kolim olsem ol miting. I gat ol sia o fom bilong planti manmeri i ken sindaun long en, namel long 100 na 300. Ol Haus Kingdom i gat ol rum bilong yusim olsem klasrum na ofis, na liklik laibreri we i gat ol buk na nius bilong Baibel em olgeta bilong kongrigesen i ken yusim bilong mekim wok painimaut.

Long Haus Kingdom, yu no inap lukim sampela samting bilong ol lotu Kristendom, olsem imis, piksa, alta, o kruse. Bilong wanem? Ol Witnes Bilong Jehova i bilip olsem pasin bilong yusim ol kain samting olsem i brukim lo bilong Baibel, em i tok yumi mas “stap longwe long pasin bilong lotu long ol giaman god.” (1 Korin 10:14; Jon 4:​24) Planti haus lotu na ol tempel i gat planti bilas tru na kain kain stail. Tasol ol Haus Kingdom i no olsem; i no gat olkain bilas, na ol i wokim long stail we i helpim ol Witnes long mekim gut ol miting. Ol Witnes i ting skul ol man i kisim long Baibel insait long Haus Kingdom i bikpela samting, winim stail bilong haus.

Bilong wanem ol Witnes i kolim haus lotu bilong ol olsem Haus Kingdom? Long ol bung i kamap long Haus Kingdom, ol i save skulim ol man long Baibel na long bikpela tok bilong en em “kingdom bilong God,” em tok Jisas i bin autim. (Luk 4:​43) Olsem na dispela nem Haus Kingdom, em ol i bin kamapim long 1935 samting, i makim stret wok bilong ol dispela haus​​—em long strongim lotu i tru na wok bilong autim “gutnius bilong kingdom.” (Matyu 24:14) Haus Kingdom i no bilong mekim ol bung bilong amamas o wok bisnis samting. Mani em ol manmeri i save givim long laik bilong ol yet, dispela i karamapim pe bilong wokim Haus Kingdom, baim pawa na wara samting na sapotim wok autim tok. Ol i no save salim plet bilong bungim mani. Nogat. Long wanpela hap bilong Haus Kingdom, i gat boks i stap na ol manmeri i ken putim kontribiusen long laik bilong ol yet.

Long olgeta hap bilong graun, ol Haus Kingdom i gat wankain wok, tasol ol i gat narapela narapela sais na stail. Ol samting i makim sais na stail bilong Haus Kingdom, em sindaun bilong ol Witnes Bilong Jehova long sait bilong mani, ol i stap long ples kol o ples hat, na ol i save wokim haus long wanem ol samting. Ol i wokim sampela Haus Kingdom long simen, timba, na ston. Na sampela Haus Kingdom i no gat wol long sait sait, na ol i wokim wol long fran na baksait long mambu na wokim rup long ol lip bilong diwai pam.

Oltaim ol visita i welkam long kam long ol miting i kamap long Haus Kingdom. (Hibru 10:25) Long olgeta wan wan wik i gat pablik miting i stori long wanpela bikpela tok bilong Baibel em ol lain bilong kongrigesen na ol visita i gat laik long kisim save long en. I gutpela moa sapos yu go lukim Haus Kingdom i stap klostu long hap yu stap long en.

[Piksa long pes 31]

Malawi, Afrika

[Ol Piksa long pes 31]

Inglan, Gret Briten