Sampela Tok i Kam Long Olgeta Hap

Pasin Bilong i Go long Ol Haus

Wanpela nius (El País) bilong Madrit i tok, ol pris na bisop bilong misin Katolik i gat bikpela hevi. Bel hevi i karamapim na daunim ol, olsem na sampela ol i lusim wok pris o painim rot bilong ol i ken pinis hariap long mekim dispela wok taim ol i no lapun yet. Wanpela as bilong ol i mekim olsem em misin bilong ol i tambuim ol long marit, olsem na ol i pilim olsem ol i stap wanpis na ol i bel hevi. Ol bisop i tingting planti tu long ol narapela misin i wok long go bikpela hariap. Dispela nius i stori long wanpela kadinal i laik bai ol man i skul long mekim wok pris ol i mas lain long ‘pasin bilong i go long ol haus olsem ol Witnes Bilong Jehova i save mekim, na long dispela rot bai ol inap toktok gut wantaim ol man bilong haus na bai ol i ken bilip na kam insait long misin Katolik.’ Dispela kadinal i tok moa olsem, Krais tupela aposel Pol i bin i go long haus bilong ol man na autim tok.

Ol Katolik i No Wanbel long Sampela Tok Bilong Misin

Wanpela nius (Le Figaro) bilong Frans i kamapim ripot bilong wanpela lain i bin skelim tingting bilong ol Katolik long Frans na nius i tok, planti (olsem 57 pesen) ol i no wanbel long ol lo bilong misin long ol samting bilong stretpela pasin olsem bilong marit samting. Taim ol i tokim ol long kamapim tingting bilong ol long ol pasin olsem stap gut long marit, na pasim bel, na rausim bel, na kisim bel long narapela rot, olsem long wanpela kain sut samting, 60 pesen ol i tok i no stret misin Katolik i putim lo long bosim ol dispela samting. Dispela ripot i tok, 69 pesen bilong ol Katolik long Frans i orait long man na meri i no marit yet ol i ken slip wantaim. Na 49 pesen ol i orait long pinisim lo i tambuim ol pris Katolik long marit, na 51 pesen i ting misin i mas orait long ol meri i mekim wok pris. Inap 8 pesen tasol i ting Misin Katolik i stap gut yet long ol tok bilong Jisas.

Lain Bataflai i Go Liklik

Long Yurop i gat 380 kain bataflai, na inap olsem 126 kain i stap long Yurop tasol. Wanpela nius (The European) i tok, ‘planti kain bataflai . . . i wok long pinis hariap hariap, na sampela kain bataflai i laik pinis olgeta.’ Dispela samting i kamap long ol kantri olsem, Netelan, na Jemani, na Swiselan, na Yunaitet Kingdom. Wanem as na lain bataflai i go liklik? Wanpela lain bilong gavman i bin strong long kirapim ol fama long kamapim planti ol bikpela bikpela gaden kaikai na planim ol narapela samting na kamapim ol animal samting, olsem na ples bilong ol bataflai i bagarap. Ol i bin brukim graun bilong ples kunai, na mekim i drai ol tais, na mekim bikpela wok long marasin bilong kilim ol binatang, na ol i bagarapim ol bus samting, na ol i no bin lukautim gut ples kunai​—ol dispela samting i mekim na lain bataflai i go liklik tru.

Namba Wan Samting Bilong Kilim Ol Diwai

Wanpela nius (Süddeutsche Zeitung) bilong Munik i tok, bikpela hevi i kisim pinis ol bus long Jemani​—ating bikpela hap bus (56 pesen samting) i kisim bagarap. Taim bagarap i kisim ol diwai ol i kolim fer, dispela i mekim nogut long ol maunten, long wanem, ol rop bilong dispela diwai i save go daun tru long graun na helpim maunten long i stap strong na bai graun i no ken bruk na pundaun o tekewe. Dispela nius i tok moa olsem, long Jemani i gat planti ka i tromoi smok nogut long win, olsem na ‘sampela lain i gat strongpela laik long ol man i no ken bagarapim ol samting long graun na ol i bin singautim gavman long mekim sampela wok bilong pasim “Namba wan samting bilong kilim ol diwai,” em ol ka.’

Pikinini i Skul long Haus

Long Amerika planti handet tausen papamama i no salim pikinini bilong ol i go long skul​—ol i givim skul long ol long haus bilong ol yet. Wanpela nius (The New York Times) i tok, inap 500,000 pikinini i skul long haus. Planti papamama i orait long dispela samting, long wanem ol i tingting planti ‘long ol pasin nogut i kamap long ol skul bilong gavman, olsem brukim lo na kisim drak nogut, na tu, planti tisa i sot long save bilong lainim gut ol pikinini.’ Tasol ol tisa i tok, ‘sori tru long ol dispela pikinini​—tru papamama bilong ol i gat bikpela laik long helpim gut ol, tasol ol i no save long pasin bilong givim gutpela skul long ol,’ em dispela nius i tok olsem. Wanpela meri em maus bilong wanpela lain (National Homeschool Association) i tok, ‘tru, pasin bilong mekim skul long haus i no inap helpim sampela pikinini, tasol ol skul bilong gavman tu i no save helpim sampela pikinini.’

Gutpela Tok i Kam long Rasia

Long Mas 28, 1991 Minista Bilong Bosim Lo na Kot long gavman bilong Rasia i givim wanpela pepa long sampela mausman bilong ol Witnes Bilong Jehova. Dispela pepa i tok, nau gavman i orait long ol Witnes Bilong Jehova i mekim wok bilong ol long ples klia long kantri Rasia.

Gris Bilong Helpim Skin Bilong Man

Ol man i kisim save olsem, ol man i sindaun klostu long ol nambis bilong Japan, ol i no kisim sik bilong klok olsem ol man i sindaun longwe liklik long nambis. Wanem as bilong dispela samting? Wanpela nius (Asiaweek) i tok, sapos man i kaikai planti pis ‘dispela bai helpim em long abrusim sampela kain sik bilong klok.’ I gat wanpela kain gris ol i kolim omega-3, na ol pis olsem salmon na trout i gat planti bilong dispela kain gris i stap long skin bilong ol. Dispela nius i tok, ol saveman i ting dispela kain gris inap helpim blut na bai blut i no ken strong tumas​—sapos blut i strong tumas, ol rop bilong blut i go long klok inap pas na blut i no inap ron gut. Na sampela ol i ting dispela kain gris (omega-3) inap helpim ol man long abrusim ol narapela kain sik olsem skru bilong pinga o skru bilong lek samting i solap na pen (arthritis), na sik kensa bilong susu, na ol sik bilong kidni, na bikpela pen long het (migraine).

Ol Bikpela Haus Lotu​—Hatwok long Lukautim Gut

Misin Angliken i bos bilong planti hap graun long Inglan, tasol em i hatwok long lukautim gut planti bikpela haus lotu bilong ol. Wanpela nius (Guardian Weekly bilong Manchester) i tok ‘ol dispela gutpela haus lotu i wok long bagarap, na inap planti yia pinis ol man i bin givim mani bilong lukautim ol dispela haus lotu, tasol wanpela samting i kamap ples klia olsem: Nau ol dispela man i les pinis long givim mani bilong mekim dispela wok.’ Sampela bos bilong misin i tok, gutpela rot bilong kisim mani i olsem, kamapim haus kaikai insait long banis bilong ol haus lotu o skruim ol stua i stap pinis i go bikpela​—long taun Yok misin i gat sampela stua na nau ol i dabolim pinis pe bilong baim ol dispela stua long olgeta wik o mun samting. I no olgeta bos bilong misin i orait long dispela wok bilong kisim mani, nogat. Tasol Robert Runcie, bipo em i namba wan bisop, em i salim pas long gavman bilong Inglan na em i singaut long gavman i givim mani bilong helpim misin. Tasol bikpela haus lotu long taun Ili i save pinis long rot bilong kisim mani​—ol man i laik go insait na lukim dispela haus lotu ol i mas baim dua pastaim.

Ol Yangpela Raskol

Wanpela nius (The Daily Yomiuri) i tok, lain bilong bosim ol lo na kot long Japan i kisim save olsem, ‘57 pesen samting bilong ol man em polis i holim ol o polis i ting ol i gat asua na ol i givim askim long ol, em ol yangpela tasol.’ Long olgeta yia inap 10-pela yia samting, krismas bilong ol yangpela i kamap raskol i wok long i go daun. Dispela nius i tok moa olsem, ‘dispela lain i save olsem, 70 pesen samting bilong ol yangpela raskol, em ol i gat 13 i go inap 15 krismas tasol taim ol i brukim lo long namba wan taim. Ol yangpela, em polis i bin holim ol tupela taim samting, ol i no winim yet 10-pela krismas taim ol i brukim lo long namba wan taim.’ Dispela samting i kamapim long ples klia olsem, papamama bilong planti yangpela raskol long Japan i no bin skulim na stretim gut ol. Ol famili bilong ol i ‘no save liklik long pasin bilong toktok gut wantaim na helpim gut ol pikinini.’