Bikpela Tait Wara Long Ostrelia
LONG yia i go pinis, bikpela tait wara i bin kamap long Kwinslan, long Ostrelia. Wara i karamapim bikpela hap graun, inap olsem graun bilong Inglan na Frans na Jemani wantaim. Wanpela taun namel liklik long ples bikpela tait wara i bagarapim, em Salevil, na ol manmeri i mas lusim dispela taun. Planti manmeri bilong dispela taun, inap olsem 3 tausen, ol i go sindaun long ol haus sel long graun i antap olsem liklik maunten na i stap long ples balus. Sampela i go sindaun antap long ol rup bilong ol haus na helikopta i kam kisim ol.
I gat liklik kongrigesen bilong ol Witnes Bilong Jehova long Salevil, inap olsem 35 manmeri, na ol i go long graun bilong wanpela Witnes em graun i antap olsem liklik maunten na i stap longwe long taun inap 10-pela kilomita. Ol i mekim wok long dispela haus bilong helpim ol man em tait wara i bagarapim haus bilong ol.
Kwiktaim ol Witnes i redim ol samting bilong helpim ol man em bagarap i painim ol. Long Dalbi, em wanpela taun i stap longwe olsem 550 kilomita, sampela Witnes i volantia long klinim ol haus em tait wara i bagarapim. Long Roma, em wanpela taun i stap longwe olsem 270 kilomita, ol Witnes i bungim ol kaikai na ol narapela samting olsem blanket na klos samting bilong helpim ol man. Pastaim ol man i go long balus na skelim ples em tait wara i bagarapim, na bihain, kwiktaim tru planti brata, winim 100, ol i go bilong helpim ol man.
Ol i tok dispela ples em i “bagarap nogut tru.” Graun malumalum i karamapim olgeta samting na i go antap olsem 5 sentamita samting. Ol samting bilong ol haus i bruk na stap nabaut long ol rum, na ol mat bilong plua i bagarap na wara i karamapim ol samting i wok long paua, olsem bokis ais na stov samting, na tait wara i kapsaitim ol ka. Ol kaikai i bagarap na wara i bagarapim ol diwai na ol pipia i stap nabaut, olsem na smel nogut i pulap long olgeta hap.
Ol brata volantia i kirap mekim wok. Wanpela wik bihain long tait wara, olsem long Sarere, Epril 28, ol haus na ples bilong ol Witnes long Salevil i kamap gutpela gen na i klin. Ol brata i no mekim wok bilong klinim tasol ol haus, ol i putim gen paua i go long ol haus na stretim gen ol ka na ol bokis ais na stov samting. Ol i putim ol nupela mat long plua, na ol kamda i wokim ol nupela sarang bilong ol haus. Ol kamda na ol man bilong penim ol haus na ol man bilong mekim wok plama, ol i wok wantaim na stretim ol haus.
Wanem samting i kamap? Tupela wik bihain long tait wara, olgeta Witnes inap i go bek long haus bilong ol, long wanem ol brata i stretim pinis. Ol dispela Witnes i helpim ol wanlotu bilong ol, tasol ol i helpim ol narapela man tu. Sampela i klinim haus bilong wanpela Katolik, na em i kirap nogut long dispela, na planti taim em i stori long dispela samting long ol narapela man.
Wanpela redio-stesen long Brisben i litimapim nem bilong ol Witnes long wok ol i bin mekim long taim bilong tait wara, na ol i kamapim dispela long redio. Na long Salevil, planti man i stap long taun i kirap nogut long lukim ol Witnes i kirap kwik long helpim ol man em bagarap i painim ol. Wanpela man, bipo em i birua long ol Witnes, em i tingim gutpela wok ol Witnes i bin mekim, na em i tok: “Sori! Taim ol i kam autim tok long haus bilong yumi, yumi save rausim ol!”