Tait Wara Long Mosambik—Ol Kristen i Helpim Ol Lain i Bin Kisim Hevi Long En
WANPELA MAN LONG MOSAMBIK I RAITIM DISPELA STORI BILONG KIRAP!
LONG kirap bilong las yia, ol lain i lukim nius long televisen ol i kirap nogut long lukim ol piksa bilong Mosambik long ol man i stap antap long han bilong ol diwai taim bikpela tait wara i kamap long hap bilong ol. Wanpela meri i karim pikinini taim em i stap antap long diwai na ol man i lukim piksa bilong em long televisen taim wanpela helikopta i kam kisim em i go. Inap planti de, planti tausen manmeri ol i stap nabaut nabaut—sampela i stap wantaim ol snek—inap long tait wara i pinis o helikopta i kam kisim ol.
Dispela bagarap i kirap taim bikpela ren i pundaun long Maputo, em biktaun bilong Mosambik. Insait long sampela aua tasol, tait wara i go karamapim biktaun na ol hap i stap klostu. Long sampela hap, wara i go antap inap long rup bilong ol haus. Ol rot i kamap olsem ol bikpela wara i ran strong. Ol bikpela baret i kamap long graun, na ol haus na ka na planti narapela samting i lus long tait wara. Tasol bikpela hevi moa yet i kamap.
Ren i pundaun yet na dispela i kamapim bikpela tait long hap saut bilong dispela kantri. Na ren i pundaun tu long ol kantri i stap klostu, em Saut Afrika, Simbabwe, na Botswana. Ol bikpela wara olsem wara Incomati, wara Limpopo, na wara Zambezi, ol i stap insait long ol dispela kantri na ol i ran i go insait long Mosambik na i go kamap long solwara, olsem na taim ol dispela wara i tait, ol i kapsait na dispela i kamapim tait wara long planti hap bilong Mosambik. Pasin ol Kristen i bin mekim bilong lukautim narapela narapela long dispela taim nogut em inap tru long strongim bilip bilong yumi.
Skelim Ol Bagarap
Las yia long Februeri 9, tupela mausman bilong brens-ofis bilong ol Witnes Bilong Jehova long Maputo ol i go bilong skelim ol bagarap i kamap long hap not bilong dispela kantri. Long 9 klok samting long moningtaim, ol i abrusim biktaun bilong Xinavane, na long dispela hap, mak bilong wara Incoluane i antap tru. Ol i laik i go moa long Xai-Xai, em biktaun bilong provins Gaza. Tasol ol i lukim olsem klostu long biktaun Chókwè, em hap ol bikpela tait i save kamap long en long taim bilong ren, i no gat mak olsem bagarap bai kamap. Olsem na ol i laik i go bek long Maputo.
Tasol taim ol i kamap long Xinavane, ol polis i banisim rot na ol i toksave olsem: “Bikpela tait long Saut Afrika i kam na i pasim rot. I no gat wanpela bas o trak inap long brukim dispela tait.” Hap bilong rot em ol i bin i go long en long moningtaim, nau wara i karamapim olgeta! Ol wara long hap not bilong Mosambik i solap i kam antap na i pasim rot bilong ol ka long i go long ol narapela hap bilong kantri.
Dispela tupela man i tingting long slip long Macia long dispela nait. Long nait, tait wara i kamap bikpela moa. Wara i karamapim olgeta hap bilong biktaun Xinavane na olgeta samting bilong ol manmeri i lus long wara. Ol i stretim rot bilong helpim ol Witnes long Xinavane long i go i stap long wanpela Haus Kingdom long Macia em ol i mekim i kamap olsem refiuji kem. Kwiktaim ol Witnes i go long ol bakstua na baim ol samting olsem rais, bin, plaua, na wel.
Nau ol i tingting long helpim ol wanbilip Kristen long Chókwè na long ol narapela taun i stap klostu. Ol wasman bilong ol kongrigesen long Chókwè ol i bung na stretim rot bilong helpim olgeta Witnes long lusim dispela ples. Ol i salim toksave i go long olgeta Witnes long dispela hap: “Lusim dispela hap kwiktaim na go long Macia!” Tasol i no longtaim na ol i kisim save olsem planti brata long Xinavane ol i no kamap yet long Macia. Olsem na ol i salim sampela Witnes i go bilong painimaut na helpim ol dispela lain. Ol i kisim save tu olsem wanpela elda Kristen i dring wara na em i dai insait long haus bilong em. Ol i stretim rot bilong planim em na ol i painim ol narapela Witnes—sampela ol i stap antap long rup bilong ol haus—na helpim ol long i go long Macia.
Taim ol i stretim pinis ol dispela samting, dispela tupela mausman bilong brens-ofis i go long Bilene, em wanpela liklik taun i stap long nambis, na long dispela hap ol i satarim wanpela balus bilong i go long Maputo. Tait wara i go inapim olgeta hap. Ol i tok olsem long Gaza yet, inap 600,000 manmeri ol i kisim hevi long tait wara.
Bikpela Hevi Moa i Kamap
Insait long ol de bihain, ren i pundaun bikpela moa yet na i bagarapim tru sampela provins i stap insait long kantri Mosambik. Orait nau wanpela bikpela win ol i kolim Eline i kirap. Long Februeri 20, dispela bikpela win i mekim na bikpela ren tru i pundaun long ol provins bilong Inhambane, Sofala, na Manica. Dispela i kamapim tait wara long ol dispela hap na sampela man moa i dai na ol haus samting bilong ol i bagarap.
Klostu long pinis bilong mun Februeri, bikpela tait i karamapim biktaun bilong Chókwè na olgeta hap i stap klostu. Kain bikpela tait olsem i no bin kamap bipo. Klostu long biknait long Sarere, Februeri 26, bikpela tait wara i kamap wantu tasol olsem traipela si i bruk, na em i bagarapim planti samting. Luis Chitlango, em wanpela Witnes i gat 32 krismas, em i tok: “Mi kirap taim mi harim wanpela man i sindaun klostu long hap bilong mi em i kam long windo na singaut long mi.”
Chitlango i tok: “Taim mipela i kirap na lusim bet, mi inap harim bikpela pairap bilong wara. Na mipela i bungim planti snek taim mipela i wok long ranawe. Long 6 klok, mipela i kamap long hap graun i antap liklik, tasol bihain liklik, long moningtaim yet, tait wara i solap i kam antap, olsem na mipela i go antap long ol diwai. Inap 20 manmeri i insait long dispela lain bilong mipela.
“Pastaim ol man yet i go antap long ol diwai. Orait taim ol i stap antap pinis, ol meri i givim ol pikinini long ol na ol i pasim ol long ol han bilong diwai. Bihain ol meri i go antap long diwai wantaim ol bebi bilong ol. Mipela i save olsem ol man i bin planim ol pinat long dispela hap, olsem na sampela taim mipela i lusim diwai na go daun long graun na pulim ol pinat i stap aninit long wara.
“Bihain long tripela de, mipela i pasim tok olsem mipela olgeta i mas wokabaut i go long Chókwè. Mak bilong wara i kam antap inap long bros bilong mipela na mipela i mas strong long sakim tait bilong wara. Taim mipela i go, mipela i lukim planti manmeri i stap antap long ol diwai na long rup bilong ol haus. Long de antap, tait wara i slek liklik na ol trak inap long go long biktaun na kisim ol manmeri i go long Macia.”
Refiuji Kem Bilong Ol Witnes
Long de namba 4 bilong mun Mas, brens-ofis bilong ol Witnes Bilong Jehova i satarim wanpela balus na i kisim sampela mausman i go long ol hap i bin kisim bagarap. Planti manmeri ol i ranawe i go pinis long Macia na dispela hap i kamap olsem wanpela bikpela kem bilong ol refiuji. Planti bilong dispela lain ol i kisim strongpela kus, o ol i sot long kaikai na ol i gat sik long dispela, na ol i kisim sik malaria na ol narapela sik tu.
Dispela hap i luk olsem wanpela hap bilong pait. Ol helikopta i kam long ol narapela narapela kantri na ol i pundaun long ol hap ol i bin stretim na ol i rausim ol kaikai samting em ol i bin karim i kam. Taim wanpela lain helpim bilong ol Witnes i kamap long Macia, ol i stretim rot bilong givim kaikai samting long ol refiuji, na tu, ol i wokim wanpela liklik haus sik. Tasol pastaim ol i kisim tok orait long ol lain bilong gavman, na lain bilong gavman i tok amamas long dispela wok ol i laik mekim.
Long olgeta moningtaim long kem bilong ol Witnes—i gat klostu 700 Witnes na ol narapela lain tu i stap long en—ol i save skelim wanpela tok bilong Baibel long 6:30 long moningtaim. Taim ol sista Kristen i redim pinis kaikai, ol i save kolim nem bilong ol het bilong famili. Olgeta wan wan het bilong famili i save soim pinga bilong makim hamas plet kaikai ol i mas kisim na ol i save bringim kaikai i go long ol.
Ol i stretim gut olgeta wok samting long dispela kem. Ol i makim sampela lain bilong baim kaikai; na sampela bilong stretim gut wara bilong dring, na klinim ol toilet, na long mekim ol narapela wok samting. Ol bikman bilong gavman i lukim dispela pasin bilong ol Witnes long stretim gut ol wok samting na ol i tok: ‘Dispela hap i wanpela gutpela hap tru bilong i stap long en. I no gat wanpela man i sot long kaikai, na i no gat man i kros.’ Wanpela bikman bilong gavman i tok: ‘Olgeta lain i mas i go lukim kem bilong ol Witnes na bai ol i ken save long pasin bilong stretim gut ol wok samting.’
Wanpela taim wanpela lain komiti bilong ol Witnes Bilong Jehova i gat wok long helpim ol brata long taim bilong bagarap, ol i bungim ol elda Kristen na toksave long ol olsem brens-ofis i stretim rot bilong wokim gen ol haus na Haus Kingdom na helpim ol brata long ol bikpela samting ol i mas i gat. Long de antap long moningtaim, taim ol i skelim teks bilong de, ol elda i toksave long ol brata sista long dispela samting. Ol brata i amamas tru na ol i paitim han inap longpela taim.
Lain bilong gavman i givim tupela bikpela haus sel long ol, tasol planti long dispela kem ol i slip nating long ausait. Olsem na ol i bungim sampela brata refiuji bilong wokim wanpela bikpela Haus Kingdom long hap graun bilong kongrigesen long Macia. Ol i wokim Haus Kingdom long ol pitpit na ol hap kapa samting—em pasin bilong wokim haus long Mosambik—na em i bikpela inap long 200 manmeri i ken i stap long en. Insait long tupela de tasol ol i pinisim wok bilong wokim dispela Haus Kingdom!
Painim Ol Lain i Lus
Long Mas 5, taim tait wara i slek liklik, ol i makim wanpela lain helpim bilong i go long Aldeia da Barragem, em wanpela taun i stap long hap em tait wara i bin kamap pastaim long en. I gat olsem 90 Witnes i insait long kongrigesen long dispela hap na ol brata i no bin kisim sampela tok long ol.
Taim ol i go, ol i abrusim Chihaquelane, em wanpela bikpela refiuji kem i gat 100,000 manmeri i stap long en. Tait wara i bin bagarapim sampela hap bilong rot na ol i lukim olsem tait wara i karamapim dispela hap olgeta. Wanpela brata i tok: “Taim mipela i kamap long Chókwè, mipela i lukim samting nogut tru. Tait wara i solap i go antap inap long rup bilong ol haus. Planti haus i stap insait long wara. Tudak i wok long kamap na mipela i gat 25 kilomita moa bilong i go kamap long Aldeia da Barragem.”
Dispela lain helpim i kamap long Aldeia da Barragem long nait. Wanpela brata i insait long dispela lain i tok: “Mipela i pasim ka na mipela i tingting long wanem samting mipela bai mekim.” Nau ol manmeri i kam na ol i singaut: “Ol brata!” na ol i amamas na lap strong. Taim ol i lukim lait bilong dispela tupela ka em ol lain helpim i go long en, wantu ol Witnes long dispela hap i tingting olsem ol brata bilong ol i kam, na ol i tokim ol narapela long dispela samting. Ol narapela lain i lukim dispela samting na ol i kirap nogut na tok: ‘Tru tumas, ol dispela lain i gat pasin bilong laikim tru narapela. Ol i bringim kaikai i kam, na tu, ol i kam bilong lukim ol wanbilip bilong ol!’
Wok Yet Long Lukautim Ol Brata
Ol i helpim ol brata long Aldeia da Barragem long i go long kem long Macia, na long dispela hap ol i kisim kaikai na ples slip na ol marasin samting. Tasol nau bikpela hevi i laik kamap long Macia. Ol i sot long kaikai, marasin na kerosin samting bilong kukim kaikai, long wanem, ol i save kisim ol dispela samting long rot bilong ol helikopta. Olsem na nau ol i mas hariap long stretim rot bilong ka long i go long Maputo. Ol i stretim dispela long Mas 8.
Tait wara i bin inapim olgeta hap bilong biktaun Xai-Xai. Long sampela hap bilong taun, tait wara i bin i go antap inap olsem 3-pela mita! Ol Witnes i kamapim wanpela komiti bilong helpim ol brata long dispela hap. Na tu, ol i kamapim ol komiti bilong helpim ol brata i sot long ol samting long ol provins bilong Sofala na Manica.
Ol Witnes long ol narapela kantri i salim ol kaikai samting bilong helpim ol lain i kisim hevi long tait wara. Olsem: Brens-ofis long Saut Afrika i stretim rot bilong salim planti ton klos, blanket, na ol narapela samting i go long ol. Na hetkota bilong ol Witnes Bilong Jehova long Brooklyn, New York i givim mani bilong helpim ol lain i kisim hevi long tait wara.
Taim tait wara i pinis liklik na ol i kisim save long hamas lain em haus bilong ol i lus na nau ol i kirapim wok bilong wokim gen ol haus na ol Haus Kingdom. Ol i kamapim wanpela komiti bilong wokim ol haus samting na wantu tasol planti volantia i kirap long helpim dispela wok. Kirap long dispela taim, ol i bin wokim planti haus, winim 270, na 5-pela Haus Kingdom.
Taim ol Witnes volantia i wokim pinis sampela haus, ol man i kirap nogut na ol i mekim sampela tok. Wanpela meri i tok: ‘Yupela i lotuim wanpela God i stap laip. Ol pasto bilong mipela i no tingim ol sipsip bilong ol em ol i karim hevi. Tasol yupela i wok long kisim ol dispela naispela haus.’ Long ol kain hap olsem, planti man i amamas long putim yau long harim tok bilong Kingdom em ol Witnes Bilong Jehova i autim, na ol i bin kirapim planti Baibel-stadi.—Matyu 24:14; KTH 21:3, 4.
Maski planti Witnes i lusim olgeta samting bilong skin, i no gat wanpela bilong ol i lusim bilip bilong em. Bilip bilong ol long God Jehova na long ol wanbilip bilong ol i stap long olgeta hap bilong graun i kamap strong moa. Ol i tenkyu tru long lain brata bilong ol long olgeta hap i bin hariap long helpim ol long dispela taim bilong hevi. Olgeta wan wan i pilim tru pasin bilong Jehova long tingim tru ol na lukautim ol, na oltaim bai ol i tingim dispela tok bilong Baibel: “Bikpela i gat biknem.”—Song 48:1.
[Piksa long pes 28, 29]
Wara i gat graun malumalum i bagarapim biktaun Xai-Xai
[Piksa long pes 29]
Ol i bringim ol kaikai samting
[Piksa long pes 30]
Lain helpim bilong ol Witnes i wokim wanpela liklik haus sik
[Piksa long pes 30]
Ol i wokim yet ol nupela haus
[Piksa long pes 30]
Inap 100,000 manmeri i stap long dispela bikpela refiuji kem