Ol Lain i Kisim Bagarap Long Saiklon Long Mianma Ol i Kisim Helpim
LONG Me 2, 2008, Saiklon Nargis i bringim strongpela win nogut tru long Mianma, na i no longtaim ol nius long olgeta hap i stori long dispela. Ol i tok, klostu 140,000 manmeri i bin dai o lus bihain long taim bikpela win i kirapim solwara long kam antap long graun long ples Irrawaddy Delta.
Planti Witnes Bilong Jehova i stap long dispela hap, tasol i no gat wanpela bilong ol i bin kisim bagarap. Planti bilong ol i bin abrusim bagarap, long wanem, long taim bilong saiklon ol i go long ol Haus Kingdom bilong ol em ol i bin wokim gut. Long wanpela ples, inap 20 Witnes na 80 narapela manmeri bilong ples i sindaun long rup bilong Haus Kingdom inap 9-pela aua taim tait wara i kam antap inap 5-pela mita. Olgeta i bin abrusim bagarap. Tasol sori tru, 300 narapela man long dispela ples i bin dai. Long planti ples, bai yu lukim Haus Kingdom tasol i sanap i stap.
Tupela de bihain long saiklon, brens ofis bilong ol Witnes Bilong Jehova long Yangon i salim wanpela lain bilong helpim kongrigesen long Bothingone, em ples i stap klostu long maus bilong wara. Bilong kamap long hap, ol i mas abrusim ol ples em saiklon i bagarapim, ol man i laik stilim ol samting, na bodi bilong ol daiman. Ol i kamap long Bothingone wantaim planti rais, nudol, wara, na ol kandel. Ol i namba wan lain helpim i kamap long dispela hap. Bihain long ol i givim ol dispela samting long ol wanlotu Witnes, ol i mekim ol tok bilong Baibel bilong strongim bel bilong ol na ol i givim ol sampela Baibel na ol buk na nius bilong Baibel, long wanem, saiklon i bin bagarapim olgeta samting bilong ol.
Ol Witnes em ol samting bilong ol i bin lus long taim bilong saiklon ol i holim stretpela tingting. Wanpela Witnes bilong wanpela kongrigesen long ples Irrawaddy i tok: “Mipela i no gat wanpela samting i stap. Olgeta haus bilong mipela i bagarap. Olgeta gaden kaikai i bagarap. Tait i mekim na olgeta wara bilong dring i doti. Tasol ol lain Witnes i no tingting planti wankain olsem ol narapela. Ol i bilip long Jehova na oganaisesen bilong em. Bai mipela i bihainim olgeta tok, maski mipela bai stap long dispela ples o go long narapela hap.”
Inap 30 Witnes em olgeta samting bilong ol tu i bin lus, ol i amamas na mekim singsing bilong Kingdom taim ol i raun inap 10-pela aua bilong kamap long ples em ol lain helpim i stap na ol i gat kaikai, ol klos, na ol haus samting. Paslain long ol i go kamap long dispela hap, ol i harim olsem i gat wanpela kibung sekit bilong ol Witnes Bilong Jehova long wanpela taun i stap klostu. Ol i wokim tingting olsem ol bai i go long dispela kibung pastaim na kisim strong long ol tok bilong Baibel na kisim amamas bilong bung wantaim ol wanbilip.
Long ol hap em saiklon i bin bagarapim, inap 35 haus bilong ol Witnes i bagarap, na 125 haus bilong ol i kisim sampela bagarap, na 8-pela Haus Kingdom i bin kisim liklik bagarap. Gutpela tru na brens ofis i no bin kisim bikpela bagarap.
Dispela saiklon i mekim na i no gat wanpela man inap go long brens ofis o lusim brens ofis, long wanem, ol bikpela diwai i pundaun na pasim ol rot i stap klostu. Sampela aua tasol bihain long strongpela win i dai, winim 30 manmeri i stap long brens i insait long wok bilong rausim ol diwai na ol i no mekim wok long ol bikpela masin. Taim ol i wok i stap, ol manmeri i kirap nogut na sanap lukluk long ol. I no longtaim na sampela meri Witnes i kam wantaim ol koldring na prut bilong ol lain i wok na bilong ol narapela man i stap klostu, em ol i no inap bilipim samting em ol i lukim. Taim wanpela niusman i lukim dispela samting, em i askim, “Ol dispela lain i wok gut tru, ol i husat?” Bihain long ol i tokim em long ol i husat, em i tok olsem, “Sapos planti manmeri i bihainim pasin bilong helpim narapela olsem ol Witnes Bilong Jehova i mekim, em bai gutpela tru!”
Wantu ol Witnes i kamapim 2-pela komiti bilong karimaut wok bilong helpim ol Witnes long ol hap bilong kantri i kisim bagarap. Planti handet i volantia long insait long ol dispela lain helpim. Insait long sampela de, ol i sanapim ol nupela haus bilong ol Witnes em haus bilong ol i bin bagarap. Taim wanpela lain helpim i kam sanapim nupela haus bilong wanpela Witnes, ol neiba bilong em i no inap bilipim samting ol i lukim. Wanpela neiba i tok: “Ol wanlotu bilong dispela meri Witnes i kam helpim em long sanapim haus bilong em. Tasol i no gat wanpela poroman bilong mi long lotu Buda i kam helpim mi. Bilong wanem na mi no laik kamap wanpela Witnes taim dispela meri i bin autim tok long mi?”
Taim ol konstraksen lain na ol lain helpim i go long taun Thanlyn bilong sekim wanpela haus i bin kisim bagarap, ol i pilim tru gutpela pasin bilong famili Witnes taim ol i tok: “Haus bilong mipela i no gat bikpela bagarap tumas. No ken wari! Mipela inap i stap long en. Helpim ol narapela Witnes em ol i no gat haus!”
Long wanpela hap bilong Yangon, sampela lain i bin traim long hait insait long wanpela haus lotu. Tasol dua bilong haus lotu i lok na i no gat wanpela inap long i go insait. Ol manmeri i belhat na ol i laik brukim dua bilong haus lotu. Tasol ol Witnes Bilong Jehova i narapela kain, ol i bin helpim planti manmeri na larim ol i kam hait insait long Haus Kingdom long taim bilong saiklon. Olsem, long wanpela Haus Kingdom long Dala, tupela marit Witnes i larim 20 neiba em ol i mas kisim helpim long kam hait long Haus Kingdom. Long moning, ol dispela neiba i no gat haus bilong go bek long en, na ol i hangre. Olsem na taim man Witnes i lukim wanpela i salim rais, em i baim inap long olgeta i ken kaikai.
Long wanpela famili long Yangon sampela ol i Witnes Bilong Jehova, tasol ol narapela long famili i save go long ol narapela lotu. Bihain long saiklon, famili olgeta i kam long miting long Haus Kingdom. Bilong wanem? Wanpela bilong famili i tok olsem: “Ol wanlotu bilong mipela i tok ol bai kam lukim mipela bihain long dispela strongpela win, tasol ol i no bin kam. Ol Witnes tasol i kam. Yupela i bin givim mipela rais na wara. Yupela i no wankain olsem ol narapela lotu!” Ol narapela long famili em ol i no Witnes ol i laikim samting ol i harim long stori “Jehova i Save Harim Beten Bilong Yumi,” long Stadi Wastaua, na tu, ol i bekim sampela tok long dispela miting.
Wanpela meri husat i wok long stadi long Baibel wantaim ol Witnes, em i kam long miting long wik bihain long saiklon. Long taim bilong miting, ol i ritim wanpela pas i kam long brens ofis i kamapim stori bilong ol samting ol i bin mekim bilong helpim ol wanlotu na stori bilong ol wanlotu em ol i bin abrusim bagarap long taim bilong saiklon. Taim ol i wok long ritim dispela pas, dispela meri i kirap long krai. Em i amamas tru long harim olsem ol i bin painim olgeta Witnes na ol i stap gut. Bihain, ol i givim em sampela samting bilong helpim em, na ol i sanapim wanpela haus sel klostu long haus bilong em. Em i tok ol Witnes i bin lukautim em gut tru.
Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Na disaipel Jems i tok olsem man i bilip tru em bai mekim ol gutpela pasin. (Jems 2:14-17) Ol Witnes Bilong Jehova i save bihainim dispela tok na ol i wok strong long kamapim pasin laikim long rot bilong helpim na lukautim ol lain i mas kisim helpim.
[Rait long pes 11]
Baibel i tok man i bilip tru em bai mekim ol gutpela pasin