Ol Samting Jehova i Mekim Nau Bilong Helpim Ol Man
BAIBEL i tok long Jehova olsem: “Planti hevi i save kamap long stretpela man, tasol Bikpela i save helpim em na ol dispela hevi i no daunim em,” na “sapos traim i kamap long ol man i bihainim God, orait Bikpela i save long rot bilong kisim bek ol long dispela traim.”—Song 34:19; 2 Pita 2:9.
Orait, olsem wanem Jehova i save helpim ol man taim hevi i painim ol? Em i no save wokim mirakel na pasim guria o win samting olsem planti man i ting em i mas mekim. Em i helpim ol long narapela rot ol man i no pilim gut—em pasin sori. Jehova i save laikim tru lain bilong em, na em i bin kamapim pasin namel long ol olsem narapela i laikim tru narapela, olsem na em inap mekim ol samting bilong helpim ol na i olsem mirakel.—1 Jon 4:10-12, 21.
Tasol sampela bai tok, i mas i gat kaikai na marasin samting bilong helpim ol—maski long pasin sori. Tru, kaikai na marasin samting i bikpela samting. Tasol aposel Pol i tok: “Sapos mi givim olgeta samting bilong mi long ol rabisman, . . . tasol sapos mi no bin givim bel . . . long ol, orait dispela olgeta pasin bilong mi bai i no inap helpim mi liklik.”—1 Korin 13:2, 3.
Planti taim yumi harim olsem ol kantri i bin salim kaikai na marasin samting long ol lain i gat bikpela hangre o sik, na ol dispela kaikai i sting nating long bris o ol rat i pinisim, tasol ol manmeri i wok long i dai long sik na hangre na ol i no kisim ol dispela samting. Na sampela taim ol man nogut bilong mangal ol i kisim ol dispela kaikai samting na ol man i mas baim long ol long bikpela pe. Olsem na maski ol kaikai na marasin i stap bilong helpim ol man i hangre o i gat sik, planti taim ol dispela samting i no helpim ol. Em nau, sapos ol man i sori tru long ol lain i stap tarangu, ol inap mekim na bai ol dispela lain inap kisim ol dispela samting.
Pasin Sori i Mekim Wok
Long Septemba 1992 bikpela saiklon i kamap long wanpela ailan bilong Hawaii, em Kauai, i gat 55,000 manmeri long en. Win i strong tru, inap olsem 210 kilomita long wanpela aua, na tupela man i bagarap na 98 i kisim hap bagarap, na planti haus i kisim sampela bagarap, na nau 8,000 manmeri i no gat haus. Na planti samting i bagarap, pe bilong en i olsem 1 bilion kina. I gat olsem 800 Witnes Bilong Jehova long dispela liklik ailan na ol i stap long 6-pela kongrigesen. Olsem wanem long ol long dispela taim?
Taim dispela saiklon i laik kamap long ailan, ol elda bilong ol kongrigesen i toksave long olgeta wan wan Witnes long ol i mas mekim ol samting bilong redi long dispela saiklon i kamap na bai ol i ken i stap gutpela. Olsem na i no gat wanpela Witnes i kisim bikpela bagarap o i dai.—Lukim Aisaia 32:1, 2.
Ol telefon i no wok gut, na ran bilong ol balus samting tu i no wok gut, tasol 3-pela man bilong brens-ofis bilong Sosaiti Was Taua long Honolulu i olsem namba wan lain bilong kamap long ailan bihain long saiklon. Lain bilong sivil difens i orait long ol i kisim balus na kam long Kauai. Kwiktaim ol i salim tok long ol Witnes bilong dispela hap, na long moningtaim ol i bung bilong toktok long ol samting ol i mas mekim bilong helpim ol dispela Witnes. Ol i kamapim wanpela komiti bilong skelim ol samting ol i mas kisim na brens-ofis long Honolulu bai salim i kam. Ol i wok long san na nait bilong lukautim wok bilong karim ol samting i go long ol brata i sot na bilong klinim na mekim gut ol haus bilong ol na stretim ol haus i gat sampela bagarap long en.
Ol Witnes long ol narapela ailan i kirap kwik long helpim ol brata. Taim ol i opim gen ples balus long Kauai, 70 Witnes ol i kam bilong helpim dispela wok. Ol samting ol Witnes i salim i kam, olsem ol jenareta, stov kerasin, lam, kaikai samting, pe bilong en i olsem 100,000 kina. Ol i mekim wok long wanpela Haus Kingdom olsem bakstua bilong putim ol samting long en. Tasol sampela i pret, nogut ol man i brukim haus na stilim ol samting. Orait, bihain sampela trak bilong ami i kam na ol i pasim ol trak long hap bilong Haus Kingdom ol i save putim ol ka long en, na ol draiva i tok ol i laik putim ol trak long dispela hap sapos i orait long mekim. Ol i putim sampela soldia bilong was long ol trak na nau ol brata i no tingting planti long ol samting ol i bungim long Haus Kingdom bilong helpim ol man.
Ol brata i karim ol jenareta i go long olgeta wan wan haus bilong kirapim ol bokis ais na ol i ken wok inap tupela o 3-pela aua na ol kaikai i no ken bagarap. Na sampela brata i go long ol haus bilong klinim na stretim ol samting i bin bagarap. Ol i stretim haus bilong wanpela sista em man bilong em i bin biruaim lotu bilong em. Tasol taim ol i mekim dispela wok, em i pilim tru na em i krai. Wanpela man bilong bikples em i kam raun long dispela hap na em i lukim sampela Witnes i mekim wok, na em i kirap nogut long pasin na wok bilong ol, em ol i wok gut wantaim. Em i askim ol, wanem samting i mekim na ol i narapela kain. Wanpela brata i tok, ol i laikim tru God na ol wanbilip Kristen. Em nau, man i tok: “Olsem wanem mi ken save long God?” (Matyu 22:37-40) Na em i tok moa: “Yupela i gat save tru long stretim ol wok bilong yupela, olsem na ating bai yupela i mekim na taim mi go bek long Florida bai i gat wanpela long lain bilong yupela i wetim mi long haus!”
Ol Witnes i helpim wok bilong klinim na stretim 295 haus long Kauai. Inap 207 i bin bagarap liklik, tasol 54 i kisim bikpela bagarap, na 19 ol i bagarap olgeta. Na ol i go lukim olgeta Witnes long ailan na bai ol i ken save, ol i stap orait o nogat. Ol i kisim kaikai samting i go long wanpela sista, na wanpela man bilong lotu Buda i stap klostu em i lukim na em i tok, ol wanlotu bilong em i no bin givim wanpela liklik hap lip ti long em! Ol Witnes i klinim na stretim haus bilong wanpela meri na em i tokim ol: “Yupela i bin kam long haus bilong mi inap longtaim, na mi bin ting yupela i save mekim gut long ol man i stap klostu long yupela. Tasol nau mi lukim pasin sori yupela i mekim bilong helpim mipela, olsem na nau mi save liklik long oganaisesen bilong yupela. Mi laik tok tenkyu tru long bikpela wok yupela i mekim.”
Na ol Witnes i no lukautim ol brata long ol samting bilong skin tasol, nogat. Ol i lukautim ol long ol samting bilong spirit tu. Tupela de samting bihain long saiklon, sampela kongrigesen i kirap pinis long mekim gen miting bilong ol. Kwiktaim ol liklik grup i kirapim gen Buk-Stadi bilong ol. Tenpela elda bilong ol narapela ailan ol i kam long Kauai bilong helpim ol elda bilong dispela hap long raun na strongim olgeta wan wan Witnes long ailan. Long Sande antap, olgeta 6-pela kongrigesen i mekim Stadi Wastaua, na wanpela bilong dispela lain komiti bilong helpim ol brata em i mekim wanpela tok inap 30 minit long ol samting bilong dispela wok. Na wanpela long Komiti Bilong Brens long Honolulu em i mekim laspela tok inap 30 minit. Wanpela brata i tok: “Ol dispela tok i strongim tru bel bilong ol brata na ol i pilim olsem nau ol i redi long stretim ol narapela hevi bilong ol. Taim miting i pinis, planti ol i krai na ol i mekim save paitim han.”
Wanpela Lain Brata i Stap Long Olgeta Hap
Dispela pasin bilong laikim tru na tingim ol brata em i wanpela mak bilong ol Witnes Bilong Jehova long olgeta hap. Wanpela yia paslain long dispela, wanpela bikpela saiklon i bagarapim planti samting long Westen Samoa, tasol kwiktaim ol Witnes long ol narapela hap i salim ol samting i kam bilong helpim ol brata. Bihain gavman i givim sampela mani long olgeta lotu—ol Witnes tu—bilong helpim ol long stretim ol haus lotu bilong ol. Tasol ol Witnes i bekim dispela mani wantaim pas i tok, ol i stretim pinis ol haus bilong ol i bin bagarap, olsem na gavman i ken mekim wok long dispela mani bilong stretim ol haus o ofis bilong gavman i bin kisim bagarap. Wanpela nius bilong dispela hap i kamapim dispela samting. Wanpela man bilong gavman i kaunim na em i tokim wanpela Witnes, em i sem long lotu bilong em, long wanem, maski mani bilong insurens bai inapim pe bilong stretim ol haus lotu samting bilong ol, ol i no bekim dispela mani long gavman.
Na long Septemba 1992 Wara Uvas long hap saut-is bilong Frans i tait na bagarapim tru ples Vason-la-Romen na 15 ples moa, na kwiktaim ol Witnes i kirap mekim wok. Long wanpela nait tasol 40 manmeri i bagarap long dispela tait wara na 400 haus i bagarap olgeta na planti handet moa i kisim hap bagarap, na planti tausen famili i no gat wara o paua. Orait, long moningtaim ol Witnes i paslain long i kam helpim ol man i kisim nogut long tait wara. Ol man i no gat haus, ol famili Witnes i mekim pasin sori na kisim ol. Sampela handet Witnes bilong ol narapela narapela hap ol i kam bilong helpim ol brata. Ol i kamapim wanpela komiti long biktaun Orens bilong stretim wok bilong 4-pela lain Witnes, em ol i rausim graun malumalum insait long ol haus na ol i klinim gut, na ol i wasim planti klos bilong ol brata sista em graun i pas long en, na ol i redim na bringim kaikai na wara bilong dring i go long ol ples em tait wara i bagarapim. Na ol i tok long klinim na stretim wanpela haus skul na sampela haus bilong gavman. Ol i wok strong tru na ol brata na ol narapela man long dispela hap i amamas long wok bilong ol.
Long ol narapela ples bipo, ol Witnes Bilong Jehova tu i bin kisim hevi long ol bikpela bagarap olsem tait wara o bikpela win o guria samting, wankain olsem ol narapela man. Ol i save, taim nogut i save painim olgeta man, olsem na ol i no tok em asua bilong God o wanpela man, nogat. (Saveman 9:11) Ol i save, ol wanbilip i laikim tru ol na ol bai helpim ol, maski wanem kain hevi i painim ol. Ol i gat wankain bilip, na dispela i kirapim ol Witnes long mekim pasin sori na helpim ol brata. Disaipel Jems i tok: “Sapos wanpela Kristen brata o susa, em i gat laplap nogut tasol, na em i no gat kaikai, na wanpela bilong yupela i tokim em olsem, ‘Yu ken i stap bel isi. Yu go putim laplap bilong hatim skin bilong yu, na yu go kisim kaikai na pulapim bel bilong yu,’ orait dispela tok bai i helpim em olsem wanem? . . . Pasin bilong bilip, em tu i olsem tasol. Sapos bilip i stap nating, na em i no kamapim gutpela pasin . . . orait dispela bilip em i samting nating.”—Jems 2:15-17.
Samting Bilong Lukautim Tru Yumi
Ol Witnes i no ting Jehova i mas kamapim mirakel bilong helpim ol. Ol i insait long bikpela lain brata Kristen i stap long olgeta hap, na ol i save, dispela ol brata bai helpim ol long taim nogut. Na tru tumas, samting dispela bikpela lain brata Kristen inap mekim bilong helpim ol long taim bilong bikpela bagarap i kain olsem mirakel stret! Olsem Jisas i tok long Matyu 17:20: “Sapos yupela i gat bilip inap olsem liklik pikinini bilong dispela kain sayor ol i kolim mastet, orait bai yupela inap tokim dispela maunten hia, ‘Yu kirap na yu go long hap,’ na em bai i go. Na bai i no gat wanpela wok yupela i no inap long mekim.” Em nau, maski sampela hevi i bikpela tru olsem maunten, taim strongpela bilip Kristen wantaim pasin sori i mekim wok, ol inap winim ol dispela hevi.
Lain bilong Jehova i pilim tru olsem han bilong God bilong ol i save lukautim ol nau long dispela taim nogut. Ol i gat wankain tingting olsem man bilong raitim Song, em i tok: “Bikpela, yu tasol yu save lukautim mi na mi stap gut. Mi no save pret long wanpela samting. Taim mi go long bet, wantu mi save slip i dai.” (Song 4:8) Olsem na ol i tingim wok ol i mas mekim long nau, olsem: “Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Na ol i bilip na wetim Jehova i truim tok promis bilong em long kamapim nupela taim i gat stretpela pasin tasol long en, na ol i ken i stap bel isi na i no gat sampela bagarap i ken painim ol moa.—Maika 4:4.
[Ol Piksa long pes 12]
Ol Witnes bilong planti hap ol i kam bilong helpim ol brata i bin kisim nogut long bikpela tait wara