Pasin Kristen Namel Long Ol Bikpela Bagarap Long Meksiko
WANPELA nius bilong Meksiko Siti i tok: ‘Insait long 20 de i go pinis, ol bikpela raunwin na wanpela guria i kamap long ol nambis bilong Meksiko—planti man i kisim bagarap na planti haus samting i bagarap.’—El Financiero, bilong Oktoba 17, 1995.
Long Oktoba, bikpela raunwin Opal i bagarapim tru sampela provins bilong Meksiko olsem Kampetse, Kintana Ro, na Tabasko. Klostu 200 man i dai, winim 150 man i kisim hap bagarap, na sampela samting bilong 500,000 man i lus, na haus bilong planti tausen man i bagarap liklik o bagarap olgeta.
Taim brens-ofis bilong ol Witnes Bilong Jehova long Meksiko i harim tok olsem planti samting i bagarap, kwiktaim ol i salim wanpela man i go long ol ples em bagarap i bin kamap long en bilong kisim save long ol Witnes i stap olsem wanem. Ol i kisim save olsem, winim 2,500 Witnes ol i mas lusim haus bilong ol. Ol narapela Witnes i mekim gutpela pasin long ol na kisim ol Witnes i no gat haus.
Ol i wokim kem bilong helpim ol Witnes i sot long kaikai na klos na mani. Taim bikpela tait i slek pinis, ol Witnes i kirap na wokim gen haus bilong ol brata Kristen bilong ol.
Long Oktoba 9, wanpela bikpela guria i gat mak olsem 7.6 long skel Rikta, em i bagarapim provins Kolima na Halisko. Long ol dispela hap, 8-pela Haus Kingdom bilong ol Witnes Bilong Jehova i kisim bikpela bagarap, na 12-pela haus bilong ol i pundaun, na 65 haus i bagarap liklik. Em nau, ol Witnes i makim gen wanpela komiti bilong skelim ol samting na ol i bin wok long helpim ol Witnes i sot.
Long Oktoba 20, narapela guria i kamap na provins Siapas i kisim hevi. Haus bilong narapela 88 Witnes i bagarap olgeta na 38 haus i kisim bikpela bagarap. Tupela Haus Kingdom i bagarap olgeta na 4-pela i kisim bikpela bagarap. Na long wankain taim, raunwin Roksan i mekim na bikpela tait i kamap na i bagarapim haus bilong 80 samting Witnes long provins Verakrus. Long dispela hap 4-pela haus i bagarap olgeta. Kwiktaim tru mani ol Witnes Bilong Jehova i save salim bilong helpim ol man i kisim kain hevi olsem i bin helpim ol dispela Witnes tu.
Skin bilong sampela Witnes i bagarap liklik, na bun bilong sampela i bruk, tasol i no gat wanpela i dai long ol dispela bikpela hevi. Ol Witnes i salim 24 ton kaikai na 4-pela ton klos i go long ol Witnes i sot. Planti man i lukim dispela pasin bilong ol Witnes, ol i kirap nogut. Wanpela meri long Kolima i tok: “Mi bin harim olsem ol Witnes Bilong Jehova i stap wanbel tru, tasol nau mi lukim long ai bilong mi yet.”
Planti taim ol man i lukim pasin na wok bilong ol Witnes, ol i tok: “Ol i brata brata tru.” “I no gat narapela lain i mekim stret ol samting olsem ol Witnes.” Na sampela i tok: “Sapos ol narapela lain i kam bilong helpim ol man, ol i bin wok olsem ol Witnes Bilong Jehova i wok, dispela taun bai klin pinis.”
Long nau, winim 440,000 Witnes i save autim gutnius bilong Kingdom bilong God long ol narapela man long Meksiko. Pasin sori ol i bin kamapim long ol narapela long taim ol dispela bikpela hevi i bin kamap i litimapim tru tok bilong ol.—Jon 13:34, 35.