Tupela Samting Long Wanpela Bagarap
Wanpela man long Meksiko i raitim dispela stori bilong Kirap!
TUPELA marit, em Godofredo na Gisela, ol i Witnes Bilong Jehova. Ol i bin stap insait long haus wantaim ol liklik pikinini bilong ol taim traipela win ren ol i kolim Polin, em i kamap long nambis bilong Wahaka, long Meksiko. Haus bilong tupela marit ol i bin wokim long plang na penim long kolta. Win i mekim na i rausim ol wan wan plang bilong haus. Bihain hap bun bilong haus tasol i stap, olsem na dispela famili i no inap hait long win na ren.
Gisela i holim bebi i gat 8-pela mun, na ol narapela 3-pela pikinini i hangamap long em na Godofredo, na inap 2-pela aua ol i kisim hatwok tru long strongpela win i wok long sakim ol. Sampela taim win i sakim ol strong na ol i pundaun long plua bilong haus na tantanim nabaut. Tasol dispela famili olgeta i abrusim bagarap.
Long biktaun Akapulko, wanpela Witnes Bilong Jehova nem bilong em Nelly, em i lukim wara i kam insait long haus, olsem na em i kirapim famili bilong em, em ol i slip i stap. Kwiktaim tru wara i wok long i go antap, na strong bilong en i pulim Nelly i go daun insait long wara, tasol pikinini meri bilong em i pulim em i kam antap. Tupela i holim sekyuriti-ba bilong windo, tasol ol i no inap mekim wanpela samting, maski wara i kam antap long nek bilong ol. Bihain ol i harim wanpela man i singaut long ol—em wanpela man i sindaun klostu long ol. Em i helpim tupela long lusim haus na em i kisim ol i go long haus bilong em. Long haus bilong dispela man, ol i kirap nogut long lukim wanpela ka i bagarapim haus bilong ol olgeta—em haus ol i bin stap insait long en sampela minit bipo.
Long Trinde apinun, Oktoba 8, 1997, traipela win ren Polin i sakim nambis bilong provins Wahaka. Win i spit tru inap 200 kilomita long wanpela aua. Long Fonde, Oktoba 9, taim tulait i no bruk yet, dispela traipela win ren i mekim na olgeta samting i bagarap nabaut long provins Guerero, na win i mekim moa yet long biktaun Akapulko. Win i kirapim traipela si inap olsem 10-pela mita, olsem na haiwara i karim planti haus, ka, animal, na manmeri i go. Taim win i lusim dispela hap, i gat ol traipela baret i go daun inap 10-pela mita samting, em ol i stap long ol hap em bipo ol rot i bin stap long en. Wanpela nius (The News) i kamapim tok bilong lain Retkros long Meksiko, i tok, long dispela tupela provins inap olsem 400 manmeri ol i dai, na 20,000 i go inap 25,000 ol i no gat ples slip moa. Tasol maski i gat bikpela bagarap i kamap, pasin bilong sori i bin kamap long dispela taim tu.
Lain Bilong Jehova i Mekim Sampela Samting
Taim ol i kisim toksave long samting traipela win ren Polin i bin mekim, ol Witnes long olgeta hap bilong kantri ol i telefon long brens-ofis bilong ol Witnes Bilong Jehova long Meksiko na askim brens long ol i ken mekim wanem bilong helpim ol lain i bin kisim bagarap. Ol Witnes long ol narapela kantri tu i laik salim sampela samting. Kwiktaim brens i kamapim wanpela komiti bilong skelim ol samting, na ol i tilim planti ton kaikai, klos, na ol narapela samting.
Na tu, ol i baim ol plang samting, na wantu tasol ol Witnes i kirap mekim wok bilong stretim 360 haus na sampela Haus Kingdom i bagarap liklik o ol i bagarap olgeta. Planti tausen brata sista Kristen ol i givim kaikai na klos samting, na ol i mekim bikpela wok long skelim ol kaikai klos samting, na pulimapim long ol katon, na salim i go long ol Witnes i sot; sampela ol i bin mekim bikpela wok long stretim ol haus samting.
Sampela papa bilong ol stua i kirap nogut long wok bilong ol Witnes, olsem na ol i givim nating kaikai na ol samting bilong stretim haus na sampela samting moa. Na long sampela stua moa, ol Witnes i kisim kaikai samting long liklik pe. Ol Witnes i bin kisim nogut long dispela win ren, ol i kirap nogut long pasin sori ol narapela i mekim long ol, na ol i pilim moa yet dispela pasin taim ol i kaunim ol gutpela pas ol brata i bin putim insait long ol katon i gat kaikai o klos long en.
Sori tru, traipela ren win i bin kilim i dai José Faustino, em wanpela Witnes i gat 18 krismas, na 3-pela man i lainim Baibel wantaim ol Witnes. Wanblut bilong ol, na papamama bilong José, ol i pilim tru tok ol Witnes i bin mekim bilong strongim bel bilong ol, na ol i pilim tru beten bilong ol bilong askim God long strongim ol.
Gutpela Samting i Kamap
Taim traipela win ren Polin i go pinis, planti manmeri i laik stadi long Baibel, na sampela bilong ol em ol wanblut bilong ol Witnes. Na planti manmeri i sindaun klostu long ol Witnes, nau ol i amamas long harim tok bilong ol Witnes long ol gutpela samting ol inap wetim i kamap bihain. Na tu, ol Witnes i insait long wok bilong tilim kaikai i go long ol man. Taim wanpela Witnes i askim papa bilong wanpela kampani long as na em i makim ol Witnes long tilim kaikai kampani bilong em i bin givim bilong helpim ol man, dispela man i tok: “Long wanem, mi save yupela i man bilong stretim gut ol samting bilong mekim wok na yupela i no save stil. Na tu, yupela i save gut long husat man i sot tru na ol i mas kisim dispela kaikai, long wanem, yupela i save long ol man long dispela hap bilong yupela.”
Taim pinis i wok long i kam klostu na planti bikpela bagarap moa i kamap, em i gutpela samting tru long lukim ol man i bihainim ol lo bilong Baibel—na ol i mekim long taim bilong hevi tu.
[Piksa long pes 26]
Ol yangpela i helpim wok bilong stretim haus samting
[Piksa long pes 27]
Ol Witnes i wokim wanpela nupela Haus Kingdom long Wahaka taim traipela win ren Polin i go pinis