Wanpela Lain Brata i Stap Wanbel Ol i Sanap Strong

WANPELA MAN LONG EL SALVADO I RAITIM DISPELA STORI BILONG KIRAP!

LONG 11:34 LONG MONINGTAIM BILONG JANUERI 13, 2001, WANPELA GURIA I KAMAP LONG EL SALVADO, MAK BILONG STRONG BILONG EN LONG SKEL RIKTA EM 7.6, NA OL I PILIM DISPELA GURIA KIRAP LONG PANAMA I GO INAP LONG MEKSIKO. OL MAN I NO INAP LUSIM TINGTING LONG SAMTING OL I MEKIM LONG TAIM GURIA I KAMAP.

MIRIAM Quezada i tingim bek dispela taim na em i tok: “Taim guria i slek liklik, mipela i lukluk i go antap na lukim het bilong maunten i bruk, na em i stap olsem inap sampela sekon. Pikinini meri bilong mi i singaut, ‘Mama! Ranawe! Ranawe!’ ” Orait nau hap bilong maunten i lus na i kam daun. Inap olsem 500 manmeri i dai long hap bilong Las Colinas long Nueva San Salvador, olsem Santa Tecla, na inap olsem 300 haus i bagarap olgeta.

Roxana Sánchez i tok: “I no longtaim na mi bin lusim haus na sanap long hap bilong kisim PMV, na nau guria i kamap. Taim guria i pinis, mi helpim wanpela meri long kisim ol bek bilong em na mi ting, ‘Ating i gutpela sapos mi go bek long haus, nogut famili bilong mi bai tingting planti long mi stap olsem wanem.’ ” Taim Roxana i kamap long kona bilong rot, em i lukim traipela hip graun olsem maunten i karamapim rot em i save stap long en. Haus bilong em i no stap moa!

Kwiktaim Ol i Helpim Ol Man

Namba bilong olgeta Witnes long El Salvado i winim 28,000, na planti tausen i sindaun long hap guria i bin kamap long en​—⁠em hap bilong nambis long El Salvado. Maski ol yet i karim hevi, planti i kirap kwik long helpim ol narapela. Mario Suarez, wanpela wasman raun bilong ol Witnes Bilong Jehova i save mekim wok long Santa Tecla, em i tok: “Inap olsem wanpela aua bihain long guria i kamap, ol i singautim mi long helpim sampela brata sista Kristen. Ol i tok ol dispela brata sista i pas insait long ol haus bilong ol. Kwiktaim mipela i salim sampela volantia i go long dispela hap.

“Mipela i ting sampela banis bilong ol haus i bin pundaun na mipela i mas rausim sampela pipia ston na opim rot na ol manmeri i pas insait ol i ken lusim haus na kam ausait. Tasol mipela i no inap save bagarap i bikpela olsem wanem. Taim mipela i kamap long dispela hap, mipela i askim ol man long ol haus i stap we. Mipela i kirap nogut tru taim ol i tok mipela i sanap antap long ol! Bikpela hap graun i pundaun na i karamapim ol haus i go antap inap long namba 2 plua, em inap olsem 3-pela mita. Man! Bagarap i bikpela tru!”

Long apinun, inap 250 Witnes bilong ol kongrigesen i stap klostu ol i kam helpim ol lain long dispela hap. Ol volantia i wok strong tru, na ol i mekim wok long ol ain, savol, plet plastik, na han bilong ol bilong painim ol manmeri i stap insait long graun. Tasol long Santa Tecla ol inap painim wan wan man tasol i stap laip yet. Inap planti handet ol i kisim bagarap​—⁠bikpela hap graun i pundaun antap long ol na graun i krungutim sampela, na sampela i no inap pulim win na ol i dai​—⁠na 5-pela Witnes Bilong Jehova tu i dai.

Ol i Stretim Rot Bilong Helpim Ol

Long olgeta hap bilong kantri, ol kongrigesen bilong ol Witnes i insait long wok bilong helpim ol man. Long Comasagua, Ozatlán, Santa Elena, Santiago de María, na Usulután, haus bilong planti Witnes i bagarap olgeta. Planti haus na Haus Kingdom ol i kamap ples bilong bungim ol kago samting bilong helpim ol man. Wanpela wasman raun, Edwin Hernández, em i tok: “Planti brata sista i helpim mipela. Ol i bringim kaikai, klos, matres, marasin, na ol i givim mani tu bilong planim ol man i dai pinis.”

Wanpela komiti bilong helpim ol man, em brens-ofis bilong ol Witnes Bilong Jehova long El Salvado i makim, ol i stretim rot na bai sampela brata bilong ol kongrigesen i no bin kisim bikpela hevi tumas ol i ken helpim ol lain i kisim bikpela bagarap na ol i sot long ol samting. Ol dispela brata i gat olsem 10 i go inap 20 Witnes, na ol i wok long stretim ol samting i bagarap.

Na tu, ol Komiti Bilong Wokim Ol Haus Kingdom bilong ol Witnes Bilong Jehova, em planti taim ol i save wokim ol nupela Haus Kingdom, ol i stretim ol grup bilong wokim ol haus bilong ol manmeri em haus bilong ol i bagarap olgeta. Long El Salvado pe bilong kapa i go antap tru, olsem na brens-ofis bilong ol Witnes Bilong Jehova bilong Guatemala i givim planti kapa olsem presen. Brens-ofis bilong Amerika na Honduras i givim planti timba bilong wokim ol pos bilong haus.

Taim ol brata i mekim ol dispela wok, ol liklik guria i wok yet long kamap. Ol manmeri bilong planti ples ol i slip long rot aninit long ol plastik na ol olpela laplap. Ol man i pret na bel bilong ol i no stap isi. I kam inap long Februeri 12, inap olsem 3,486 liklik guria i bin kamap.

Namba Tu Bikpela Guria

Long Februeri 13, 2001, long 8:22 long moningtaim, em wanpela mun bihain long namba wan guria, namba tu guria i kamap long namel bilong El Salvado, mak bilong strong bilong en long skel Rikta em 6.6. Long dispela taim tu ol Witnes Bilong Jehova i wok strong long helpim ol manmeri. Wanpela elda, nem bilong en Noé Iraheta, em i tok: “Olgeta brata i lukautim Buk-Stadi ol i go painim ol Witnes i stap long grup bilong ol bilong save olsem ol brata sista i stap orait o nogat.”

Taun San Vicente na Cojutepeque na ol ples klostu long en ol i kisim bikpela bagarap. Ol taun San Pedro Nonualco, San Miguel Tepezontes, na San Juan Tepezontes ol i bagarap. Long taun Candelaria na Cuscatlán klostu olgeta samting i bagarap, na wanpela skul i pundaun na kilim i dai 20 pikinini. Wanpela Witnes long dispela ples, Salvador Trejo, em i tok: “Inap wanpela aua bihain mi harim wanpela nek long rot i singaut, ‘Brata Trejo!’ Pastaim mi no inap lukim wanpela samting, long wanem, i gat planti das. Orait nau wantu mi lukim ol Witnes bilong Cojutepeque. Ol i kam bilong save mipela i stap olsem wanem!”

Na long nau tu ol i stretim gen rot bambai ol kongrigesen i stap klostu ol i ken helpim ol manmeri i kisim hevi long dispela namba tu bikpela bagarap. Ol i bihainim pasin bilong ol Kristen long Masedonia long taim bilong ol aposel, em ol i strong long givim ol samting, maski ol yet i sot. Olsem: Ol brata sista long kongrigesen bilong taun Santiago Texacuangos, em ol i bin kisim bikpela bagarap long namba wan guria, ol i kukim kaikai na kisim i go long ol brata sista i stap klostu, em long San Miguel Tepezontes.

Ol i ting inap olsem 1,200 manmeri ol i bin dai long guria long El Salvado, na 8-pela i dai long kantri i stap klostu, em Guatemala.

Ol i Amamas Long Ol Wok Ol i Mekim

Sampela narapela lain bilong helpim ol man ol i amamas long wok ol Witnes i mekim bilong helpim ol man i kisim bagarap. Wanpela ka bilong lain Nesenel Emejensi Komiti i kam bilong bringim ol kaikai, blanket, klos samting long wanpela Haus Kingdom i olsem ples slip bilong ol man em haus bilong ol i bagarap. Wanpela mausman bilong ol i tok: “Long olgeta dispela kain haus mipela i save go long en, dispela em i namba wan ples ol samting i wok gut. Mi tok amamas long yupela!” I no gat wanpela i ran i go long trak bilong kisim ol samting, na subim ol man olsem ol i save mekim long ol narapela ples, nogat tru. Na tu, long dispela hap ol i givim ol samting long ol lapun pastaim bilong helpim ol.

Ol Witnes i no helpim tasol ol wanlotu bilong ol. Olsem: Long San Vicente planti man i stap klostu long ol Witnes ol i ranawe na kam long ples em Haus Kingdom i sanap long en. Regina Durán de Cañas i tok: “Long dispela hap bilong Haus Kingdom bilong ol Witnes Bilong Jehova ol manmeri i gat gutpela bel tru. Ol i bin opim dua na tok, ‘Kam insait!’ Na nau mipela i stap long hia. Long nait tu ol i save was long mipela taim mipela i slip.”

Stretim Ol Haus

Taim ol i skelim pinis ol bagarap, ol i toksave long brens-ofis long hamas ol manmeri i mas kisim haus samting. Ol i kirap wokim ol haus bilong ol manmeri em haus bilong ol i bin bagarap olgeta. Na tu, ol i stretim ol haus i kisim sampela hap bagarap. Ol brata i wok strong tru na ol i stretim gut wok, na dispela i kirapim ol man i stap klostu na ol narapela man tu long kam lukim wok ol brata i mekim.

Wanpela meri, em i ting ol dispela wokman em ol lain bilong gavman i bin tok promis longtaim long ol bai kam helpim em, em i toktok planti, long wanem, i no gat wanpela i bin kam helpim em long rausim ol pipia ston. Ol pikinini i stap klostu long em i tokaut: “Meri, ol i no bilong gavman. Ol i bilong Kingdom!” Narapela man i no Witnes, em Moisés Antonio Díaz, i tok: “Em i gutpela samting tru long lukim pasin bilong ol Witnes Bilong Jehova long helpim ol man i sot long ol samting. Dispela oganaisesen i stap wanbel tru, na yumi mas tenkyu long God long ol i amamas long helpim yumi ol rabisman. Mi bin wok wantaim ol, na mi laik wok yet wantaim ol i go.”

Ol i wokim haus bilong wanpela sista Kristen na em i krai taim em i tok: “Mi wantaim man bilong mi, mitupela i sot tru long ol tok bilong kamapim tenkyu bilong mipela​—⁠long Jehova na long ol dispela brata. Maski ol i no save long mipela, kwiktaim ol i kam helpim mipela.”

I kam inap long namel bilong Epril, ol Witnes i bin wokim 567 haus bilong ol man em haus bilong ol i bin bagarap long guria, na inap olsem 100 narapela famili i kisim ol timba na kapa samting bilong stretim haus bilong ol. Taim ol famili i gat dua ol inap lokim na haus i gat rup bambai ren i no ken wasim ol, ol Witnes i kirap mekim wok long ol 92 Haus Kingdom i bagarap​—⁠sampela ol i mas wokim nupela, na sampela ol i stretim.

Stretim Gen Sindaun

Ol i bin wokim gen planti haus, tasol planti ol i amamas moa long ol brata i bin strongim ol long ol samting bilong spirit na tingting.

Miriam, em yumi bin stori long em pastaim, em i tok: “Graun i wok long guria yet, olsem na sampela taim bel bilong mi i no stap isi liklik, tasol long olgeta taim ol brata i bin mekim gutpela pasin long mi na ol i bin strongim mi. Man! Sapos ol brata i no helpim mipela, bai mipela i stap olsem wanem?”

Gutpela pasin sori Jehova i kamapim long rot bilong kongrigesen i bin kirapim sampela brata sista i bin kisim hevi long mekim bikpela wok moa. Long Comasagua klostu olgeta haus bilong ol Witnes i bin kisim sampela hap bagarap o ol i bin bagarap olgeta long namba wan guria. Tasol 12 bilong ol 17 Witnes i putim nem bilong ol long autim tok fultaim long Epril na Me, na bihain long en 2-pela bilong ol i kirap mekim dispela wok long olgeta taim.

Ol kongrigesen long hap bilong Cuscatlán, em wanpela hap i bin kisim bikpela bagarap long taim bilong namba tu guria, ol i bin mekim bikpela de kibung long Mas. Planti tru ol i kam long dispela kibung, inap 1,535, na 22 manmeri i kisim baptais. Maski haus bilong planti brata sista i stap long dispela kibung i bagarap, ol i givim planti mani long Haus Kibung olsem kontribiusen, na ol brata i stretim wok bilong dispela kibung ol i kirap nogut long dispela.

Wanpela Witnes long San Vicente i kamapim tingting bilong planti man taim em i tok: “Long ol nius bilong yumi, mi bin ritim ol stori long samting oganaisesen i save mekim long taim bilong bikpela bagarap, tasol nau mi lukim long ai bilong mi yet, na mi pilim tru gutpela helpim ol brata sista i givim long mipela. Mipela i lukim tru pasin sori bilong ol Kristen. Mipela i amamas tru long i stap insait long dispela lain manmeri i stap wanbel!”

[Piksa long pes 19]

Guria i mekim na graun i bruk na i kam daun na karamapim 300 haus long Las Colinas

[Kredit Lain]

Bottom of pages 19-21: Courtesy El Diario de Hoy

[Piksa long pes 20]

Bilong helpim ol man ol lain bilong ples i mekim wok long ol ain, savol, na baket

[Kredit Lain]

Courtesy of La Prensa Gráfica (photograph by Milton Flores/Alberto Morales/Félix Amaya)

[Piksa long pes 21]

Ol pipia ston bilong Haus Kingdom long Tepecoyo

[Piksa long pes 22]

Wantu ol brata bilong Tepecoyo i sanapim wanpela haus bilong mekim ol miting

[Ol Piksa long pes 22]

Kwiktaim ol Witnes i wokim ol Haus Kingdom na 500 haus

[Piksa long pes 22]

Wanpela mama wantaim pikinini meri bilong em ol i amamas tru taim ol i lukim ol brata i wokim gen haus bilong ol