Guria!

WANPELA MAN LONG TAIWAN I RAITIM DISPELA STORI BILONG KIRAP!

“Mi slip long bet na rit i stap long rum bilong mi long namba 9 plua bilong wanpela bikpela haus, na nau lait i wok long dai. Na wantu, rum i wok long guria nogut tru. I olsem traipela samting nogut i holim dispela haus na wok long seksekim. Mi harim pairap bilong ol samting i pundaun insait long ol rum bilong plua namba 10, olsem na mi pret, na mi siksti i go hait aninit long tebol, nogut plua bilong ol i pundaun antap long mi. I olsem dispela guria i no laik pinis.”​—⁠Wanpela niusman i stap long Taiwan.

GURIA. Dispela tok i save kirapim ol man long pret, na long nau ating yu harim stori bilong dispela samting klostu klostu. Olsem wanpela ripot i tok, planti guria moa i bin kamap long 1999, na namba bilong ol man i dai long ol dispela guria i bikpela moa, winim ol narapela taim bipo.

Nambawan bikpela guria bilong 1999 i bin kamap long Taiwan, long dispela hap em graun i stap insait tru i bruk long tupela bikpela hap. Long Taiwan i gat 51 ol narapela narapela hap insait long graun i bruk olsem. Dispela i mekim na masin bilong skelim ol guria i makim olsem i gat 15,000 liklik guria i save kamap long olgeta yia long Taiwan. Tasol planti bilong ol dispela guria i liklik tumas na ol man i no pilim.

Tasol long Septemba 21, 1999, i no olsem. Long 1:47 bikmoning, bikpela guria tru i seksekim Taiwan. Guria i strong tru, olsem na Presiden Lee Teng-hui bilong Taiwan i tok “insait long wan handet yia samting i no gat bikpela guria olsem long dispela ailan.” Graun i guria sotpela taim tasol, inap olsem 30 sekon, tasol mak bilong dispela guria i olsem 7.6 long skel Rikta.a Dispela guria i kirap long hap i stap insait long graun inap long 1 kilomita tasol, olsem na ol man i bin pilim tru strong bilong dispela guria. Liu Xiu-​Xia i save sindaun klostu tru long hap dispela guria i kirap long en, na em i tok: “Ol samting i wok long seksek strong tru, na dispela i kirapim mi. Ol samting insait long haus i wok long pundaun, na lait tu i pundaun na mekim bikpela pairap. Mi no inap lusim haus na go ausait, long wanem, ol samting i pundaun na ol glas i bruk bruk na dua i no inap op.” Huang Shu-​Hong i slip long bet na guria i tromoi em i go long plua, na narapela kain hevi i painim em. Em i tok: “Wantu paua i dai, olsem na ples i tudak tru na mi pundaun nabaut taim mi painim rot long go ausait. Mi na ol lain i stap klostu long mi, mipela stap long rot inap long tulait. I olsem graun i no malolo long seksek.”

Wok Bilong Helpim Ol Man

Taim tulait i bruk, ol samting guria i bin mekim i kamap ples klia. I gat olsem 12,000 haus i bagarap, em ol liklik haus wantaim ol bikpela haus i gat planti plua long en. Taim toksave bilong dispela guria i go long ol narapela hap, ol man em wok bilong ol long helpim ol lain i kisim sampela bagarap, ol i kam long 23 kantri bilong wok wantaim ol volantia bilong Taiwan. Taim ol i kamap, planti man i kalabus yet insait long pipia bilong ol bikpela haus samting i pundaun.

Insait long 72 aua bihain long bagarap, em i bikpela samting tru long painim ol man i stap laip yet, tasol ol man i wok long painim ol lain em pipia i karamapim ol, ol i kirap nogut long sampela samting i bin kamap long dispela taim. Olsem, ol i bin painim wanpela pikinini man i gat 6-pela krismas, na em i bin stap kalabus insait long pipia inap 87 aua pinis. Na long Taipe, taim ol wokman i mekim wok long ol bikpela masin na rausim pipia bilong wanpela bikpela haus i bin i gat 12-pela plua long en, wanpela yangpela man i lusim pipia na kam ausait. Dispela man wantaim brata bilong em, tupela i abrusim bagarap maski pipia i kalabusim ol inap 5-pela de!

Tasol sori tru, ol i no inap rausim olgeta manmeri paslain long ol i dai, na i gat ol samting i bin kamap i bagarapim tru bel bilong ol man i mekim dispela wok. Bos bilong wanpela lain wokman i bel hevi na i tok olsem: “Mipela i bin harim krai bilong wanpela pikinini, tasol nau inap long 8-pela aua mipela i no harim moa.” Taim ol i skelim ol samting pinis, ol i kisim save olsem namba bilong ol man i dai long dispela guria i winim 2,300 na i gat 8,500 i kisim sampela bagarap long skin.

Ol Wok Bihain Long Guria

Ol i kirap na mekim bikpela wok tru bilong painim ples slip bilong planti handet tausen manmeri em guria i mekim na ol i no gat haus moa. Pastaim sampela i pret long stap insait long wanpela haus. I no hatwok long save long as bilong dispela pret, long wanem, inap long 10-pela de bihain long bikpela guria i gat 10,000 ol liklik guria i wok long kamap! Na strong bilong wanpela guria i olsem 6.8 long skel Rikta, na dispela i mekim na sampela haus em namba wan guria i bin bagarapim liklik, ol i pundaun.

Maski i gat ol dispela hevi, ol i no lusim wok bilong helpim ol man. Sampela ol oganaisesen i no bilong gavman​—⁠em ol lain i kam long ol narapela kantri, na Tzu Chi, em wanpela lain bilong lotu Buda, na ol lain bilong daunim paia​—⁠olgeta i lusim bikpela hap taim na save bilong ol long mekim ol wok. Na tu, ol lain Witnes Bilong Jehova i insait long dispela wok bilong helpim ol narapela. Olsem Galesia 6:10 i makim, i gat tupela samting ol i laik mekim. Namba wan i olsem ol i laik helpim ol wanbilip, na namba tu i olsem ol i laik mekim gutpela pasin long olgeta man, maski ol i no wanbilip bilong ol.

Taim dispela de bilong bikpela guria i laik pinis, ol Witnes i wok long bungim ol kaikai, wara, haus sel, na ol praimas samting, na salim i kam. Ol telefon i no wok, olsem na ol elda bilong ol 6-pela kongrigesen long dispela hap i gat bagarap long en, ol i wok strong tru long painim ol wanbilip na ol famili bilong ol wanbilip, na ol Baibel-stadi na ol man i laikim tok i tru. Ol i kirapim ol Witnes i no gat haus moa long putim haus sel bilong ol klostu long ol narapela Witnes, na long dispela rot em bai i no hatwok long lukautim olgeta, na toktok wantaim ol. Ol wasman bilong raun na ol lain bilong Komiti Bilong Brens bilong Taiwan i go lukim ol dispela lain na ol kongrigesen bilong strongim ol.

Orait taim ol i mekim ol dispela samting pinis, nau ol i tingting long stretim ol haus na Haus Kingdom i gat sampela bagarap long en. Ol wan wan kongrigesen i wokim lista bilong husat i mas i gat sampela helpim. Ol i mekim olsem na nau Komiti Bilong Wokim Ol Haus Kingdom i salim ol lain volantia long stretim ol dispela samting. Insait long wanpela mun bihain long guria, ol i pinisim ol dispela wok.

Na tu, ol Witnes Bilong Jehova i bin helpim ol narapela lain i no wanlotu bilong ol. Olsem: Ol i go lukim ol man i stap long ol haus sik na long ol hap ol man i slip long ol haus sel na strongim bel bilong ol. Na ol i tilim planti kopi bilong wanpela stori i stap long Kirap! bilong Jun 22, 1996 long tok Inglis (Natural Disasters​—⁠Helping Your Child to Cope). Planti manmeri i amamas long kisim dispela nius na wantu ol i kirap na ritim. Taim ol rot i no pas moa, ol Witnes Bilong Jehova i salim planti kago samting i go long ol man i stap long ol longwe hap long ples maunten, em guria i bin kamapim bikpela bagarap long en.

Ol man i stadi long Baibel ol i save, long bipo yet tok bilong en i makim olsem long taim bilong las de “graun bai i guria.” (Matyu 24:⁠7) Tasol narapela tok bilong Baibel i makim olsem klostu nau ol man bai kisim bel isi long wok Kingdom bilong God bai kamapim, na bai ol i no pret moa long ol bikpela guria samting. Long dispela taim graun bai kamap ples paradais tru tru.​—⁠Aisaia 65:​17, 21, 23; Luk 23:⁠43.

[Futnot]

[Ol Piksa long pes 24]

Ol Witnes Bilong Jehova i wokim ol miting taim ol i stap long ol kem

[Piksa long pes 25]

Guria i bagarapim planti rot

[Kredit Lain]

San Hong R-C Picture Company

[Piksa Kredit Lain long pes 25]

San Hong R-C Picture Company

[Piksa Kredit Lain long pes 25]

Seismogram on pages 2, 23-25: Figure courtesy of the Berkeley Seismological Laboratory