Planti Bikpela Guria Moa Bai Kamap
NAU i gat ol masin bilong skelim strong bilong ol guria, olsem na ol saientis inap long skelim planti handet guria i save kamap. Taim ol guria i kamap long hap we ol man i no stap long en, ol man i no tingim tumas ol dispela guria na i no gat stori bilong en long niuspepa samting. Tasol sapos guria i kamap long wanpela bikpela siti, dispela i save kamapim bikpela bagarap tru. Namba bilong ol manmeri i dai na namba bilong ol haus samting i bagarap, dispela bai soim klia hamas manmeri i stap long wanpela taun na ol i bin mekim wanem samting bilong lukautim ol yet taim kain bagarap olsem i kamap.
Long Janueri 12, 2010, guria i kamap long Haiti i nogut tru, long wanem, planti manmeri tru i dai na planti samting i bagarap. Tasol dispela em i no namba wan guria i bin kamap long Haiti na i no dispela guria tasol i bikpela. Long ol narapela hap bilong graun tu i bin i gat sampela guria i kamap long kirap bilong yia 2010. Ol saveman i skelim ol guria na ol i tok ol dispela guria i bikpela tru wankain olsem guria i kamap long Haiti na sampela bilong ol i bikpela moa winim guria i bin kamap long Haiti.
Janueri 3: 7.1 Guria, Solomon Ailan
Dispela bikpela guria em strong bilong en i winim 7.1 long skel rikta, em i kamapim sunami, em traipela si i solap i go antap tru inap 2 i go 3 mita. Dairekta bilong National Disaster Management Office, em Loti Yates, i tok taim ol i flai antap long balus na lukluk i kam daun, ol i lukim olsem “bikpela tait wara i karamapim olgeta hap.” Loti Yates i tok, long ples Bainara long ailan Rendova, 16-pela haus i bruk na pundaun na planti moa i bagarap.
Paslain long dispela bikpela guria, i bin i gat narapela guria em strong bilong en em 6.6. Planti ol i pret long dispela guria na ol i ranawe i go long ol liklik maunten. Dispela i mekim na ol i abrusim bagarap taim bikpela guria i kamap 2-pela aua bihain na i kamapim sunami.
Februeri 26: 7.0 Guria, Ol Ailan Ryukyu, Japan
Dispela guria i kamap long 5:31 long moning long wanpela bilong ol ailan Ryukyu long Japan, na i kamap 80 kilomita longwe long Naha, Okinawa. Ol i bin givim tok lukaut olsem sunami bai kamap, tasol bihain ol i senisim na tok sunami bai i no inap kamap. Wanpela meri husat i bin stap long Okinawa winim 90 yia pinis, em i tok olsem strong bilong dispela guria i bikpela tru winim strong bilong olgeta narapela guria em yet i bin pilim.
Februeri 27: 8.8 Guria, Sili
Dispela guria i stap namba 5 long lista bilong ol bikpela guria i bin kamap stat long yia 1900 na i kam. Bikpela guria tru we i stap namba 1 long lista, em tu i bin kamap long Sili long 1960—strong bilong en em 9.4. Dispela guria—wantaim narapela guria em strong bilong en em 7.7 na i bin bagarapim biktaun bilong Sili long 1985—i mekim na kantri i kamapim ol lo bilong sanapim ol haus we inap sanap strong long taim bilong guria.
Dispela i mekim na taim guria i kamap long Sili long dispela yia, sampela haus tasol long Santiago na sampela long ol narapela taun i pundaun. Tasol planti tausen manmeri i kisim bagarap na haus samting bilong ol tu i bagarap. Ol i ting inap olsem 500 manmeri i dai, em 250 bilong ol dispela manmeri i dai long sunami i kamap long nambis bilong Sili.
Epril 4: 7.2 Guria, Baja California, Meksiko
Dispela guria i kamap 18 kilomita longwe long Guadalupe Victoria, long Meksiko, na 47 kilomita longwe long Mexicali. Guria i kamap long hap i stap longwe long ol biktaun na i no gat ol man i stap long en. Tasol ol manmeri i stap long planti siti na taun long Meksiko na long hap saut bilong Amerika, ol i pilim dispela guria.
Me 9: 7.2 Guria, Sumatra, Indonesia
Dispela guria i kamap aninit long solwara long 12 klok samting long apinun. Ples we guria i kamap long en i stap 217 kilomita longwe long hap not bilong taun Banda Aceh. Planti manmeri i ranawe lusim haus bilong ol na ol i no laik go bek long haus, long wanem, ol i pret. Tasol i no gat wanpela man i bin i dai.
Planti Guria Moa Bai Kamap
Kirap long bipo yet na i kam inap long nau, i bin i gat ol bikpela guria, olsem na i stret yumi ken tok planti guria moa bai kamap long ol yia i kam bihain. Lain (U.S. Geological Survey) bilong skelim guria, ol i tokaut olsem: “Ol bikpela guria bai wok yet long kamap, olsem i bin kamap long bipo.”
Wanpela niuspepa i tok: “Ol guria i wok long kamap long nau, . . . i no gat wanpela samting ol man i mekim bai inap pinisim guria, na dispela i kirapim yumi long tingim olsem ol man i sot tru long save. Dispela i no makim olsem yumi no ken mekim ol samting yumi inap long mekim . . . tasol yumi mas tingim olsem ol bikpela bagarap bai kamap yet, em yumi man i no inap long stopim.”
Ol sumatin bilong Baibel i tingim ol tok profet bilong Baibel we i tokaut stret olsem ol guria em hap bilong ol mak bilong las de bilong dispela taim nau yumi stap long en.—Matyu 24:3, 7; Mak 13:8; Luk 21:11.
[Mep long pes 20, 21]
Sampela guria em strong bilong ol em 7.0 o i antap moa, kirap long Janueri i go long Me
Meksiko
Haiti
Sili
Japan
Solomon Ailan
Indonesia