Faipela As na Yumi Mas Pret Long God na No Ken Pret Long Man

YANGPELA man i amamas na kirap nogut long samting i kamap nau tasol. Em i bin toktok wantaim tupela Witnes Bilong Jehova na em i kisim sampela nupela save. Inap planti yia pinis em i gat askim olsem: Bilong wanem God i save larim pen na hevi i stap? Tasol nau em i lukim bekim bilong dispela askim long Baibel. Em i no bin save olsem Baibel i gat planti gutpela tok olsem i mekim gut bel bilong yumi.

Tupela Witnes i go pinis na kwiktaim meri bilong bosim haus i kam insait long rum na em i belhat na i singaut, “Ol dispela man ol i husat?”

Man ya i kirap nogut na i no inap bekim tok.

Meri i bikmaus: “Mi save long dispela lain, na sapos yu larim ol i kam insait gen, yu ken go painim narapela ples slip!”

Meri i pasim dua strong na i go.

Hevi Bai Painim Ol Disaipel Tru Bilong Krais

Hevi i painim yangpela man hia i no narapela kain. Baibel i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Planti man i no save laikim ol Kristen tru, na bipo tu i olsem. Bilong wanem? Aposel Jon i tokim ol wanbilip Kristen: “Yumi save, yumi stap pikinini bilong God, tasol dispela graun olgeta em i stap aninit long strong bilong Satan.” Na Baibel i tok Satan i kain olsem “wanpela laion i singaut strong. Oltaim em i save raun bilong painim ol manmeri bilong kaikai.” (1 Jon 5:19; 1 Pita 5:8) Pasin bilong pret long man i wanpela tul bilong Satan.

Jisas Krais i bin mekim planti gutpela wok na em i no bin mekim sin, tasol ol man i bin tok bilas na mekim nogut long em. Em i tok: “Ol man i birua nating long mi.” (Jon 15:25) Long nait paslain long taim em i dai, em i tokim ol disaipel olsem: “Sapos ol manmeri bilong graun i birua long yupela, orait yupela i no ken lusim tingting, pastaim ol i bin birua long mi tu. Yupela i mas tingim gut dispela tok mi mekim long yupela. Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu.”​—Jon 15:​18, 20.

Long dispela as, planti i surik long bihainim lotu i tru. Baibel i tok long sampela husat i bin wok long painim Jisas: “Ol i pret long ol bikman bilong ol Juda, olsem na i no gat wanpela man i mekim toktok long pasin bilong en long ples klia.” (Jon 7:13; 12:42) Ol bikman bilong lotu i bin tokim ol man, sapos wanpela i bilip long Krais, ol bai tambuim em long i go insait long haus lotu. Olsem na pasin bilong pret long man i pasim rot bilong planti long kamap Kristen.​—Aposel 5:13.

Bihain, taim lotu Kristen i kamap strong, Baibel i tok “ol i stat long mekim nogut tru” long kongrigesen i stap long Jerusalem. (Aposel 8:1) Long olgeta hap em Gavman Rom i bosim, ol man i mekim nogut long ol Kristen. Sampela bikman bilong Rom i tokim aposel Pol: “Long olgeta ples, ol manmeri i save mekim tok nogut long dispela nupela lain i bin kamap namel long yumi Juda.” (Aposel 28:22) Tru tumas, long planti hap ol man i bin biruaim ol Kristen tru.

Long nau tu, pasin bilong pret long ol man em wanpela tul bilong Satan long pasim planti manmeri long kamap disaipel tru bilong Krais. Ol man i gat gutpela bel na i stadi long Baibel wantaim ol Witnes Bilong Jehova, ating ol pren bilong ol, ol man long skul, ples wok, na long hap ol i sindaun long en, ol bai birua o tok bilas long ol. Ating ol bai pret, nogut ol man i no rispek moa long ol, ol pren i lusim ol, o famili i no helpim ol moa long ol samting bilong skin. Long sampela hap, ol fama i pret, nogut ol neiba i no laik helpim ol long taim bilong kisim kaikai long gaden, o lukautim ol bulmakau samting bilong ol. Tasol planti milion man i pasim tok long bel olsem ol bai bilip long God na bihainim ol tok bilong Baibel, olsem Jisas Krais i bin mekim. Ol i mekim olsem, na Jehova i mekim gut long ol.

As na Yumi Mas Pret Long God Tasol

Baibel i tokim yumi long pret long God, ol man, nogat. Em i tok: “Sapos man i laik kamap saveman em i mas pret long Bikpela.” (Song 111:10) Dispela kain pret i no olsem yumi pret nogut tru, nogat, em i olsem yumi no laik mekim wanpela samting em Man Bilong Givim Laip long yumi i no save laikim. Dispela kain pret i poroman wantaim pasin laikim. Tasol bilong wanem yumi mas pret long God tasol? Yumi ken skelim 5-pela as bilong mekim olsem.

1 Jehova em i Nambawan Bikpela. Jehova i gat bikpela strong moa, winim ol man. Taim yumi pret long God, yumi kamapim klia olsem yumi lotuim God i Gat Olgeta Strong, na long ai bilong em “ol manmeri bilong graun i olsem samting nating.” (Aisaia 40:15) God i gat olgeta strong, olsem na em i gat strong inap long daunim ‘ol samting bilong pait’ ol man i wokim bilong bagarapim ol man i stap gut long God. (Aisaia 54:17) Na em yet bai skelim husat inap long kisim laip oltaim, olsem na em i savetingting sapos yumi no larim wanpela samting i pasim yumi long kisim save long em na mekim laik bilong em.​—KTH 14:​6, 7.

2 God bai helpim na lukautim yumi. Baibel i tok long Sindaun 29:25: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.” Pasin bilong pret long ol man i olsem umben, long wanem, em inap pasim yumi long tokaut olsem yumi bilip long God. God i tokim yumi: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.”​—Aisaia 41:10.

3 God i laikim tru ol man i save go klostu long em. Aposel Pol i mekim gutpela tok olsem: “Mi bilip tru olsem, i no gat wanpela samting inap pasim laik bilong God i kamap long yumi. Dai o laip, o ol ensel o ol strongpela spirit, o samting nau i stap o samting bai i kamap bihain, o kain kain samting i gat strong, o samting bilong antap o samting bilong daunbilo, o ol arapela samting i stap nabaut, dispela olgeta i no inap pasim laik bilong God . . . em i givim yumi long Krais Jisas, Bikpela bilong yumi.” (Rom 8:​37-39) Sapos yumi lain long bilip long God na bihainim tok bilong em, dispela King Bilong Heven na Graun bai laikim tru yumi na i no gat wanpela samting inap tekewe dispela. Em gutpela samting tru, a?

4 Yumi tenkyu long olgeta samting God i bin mekim bilong helpim yumi. Jehova em Man Bilong Wokim yumi, na em i Man i givim laip long olgeta samting. Na tu, em i bin givim yumi olgeta samting yumi mas kisim bilong i stap laip na bilong kisim amamas long i stap bilong yumi. Tru tumas, em i As bilong olgeta presen i gutpela tru. (Jems 1:17) Devit, em gutpela man i bin pilim tru gutpela–pasin–sori bilong God, na em i tok: “God, Bikpela bilong mi, yu bin mekim planti gutpela wok bilong helpim mipela. . . . Dispela i moa moa yet! Mi no inap kaunim ol samting yu bin mekim bilong helpim mipela.”​—Song 40:5.

5 Sampela man i biruaim yumi, ol inap senisim pasin bilong ol. Yu inap helpim ol man i biruaim yu sapos yu holim strong pasin bilong pret long God na laikim em tru, na yu no lusim bilip bilong yu. Tingim ol wanblut bilong Jisas. Pastaim ol i no bilip long em. Ol i tok: “Em i longlong pinis.” (Mak 3:21; Jon 7:5) Orait, taim Jisas i dai pinis na kirap bek, planti i kamap bilipman. Tupela brata bilong Jisas, em Jems na Jut, ol i bin raitim sampela hap bilong Baibel. Na Sol, em man bilong birua nogut tru long ol Kristen, em i bin kamap aposel Pol. Pasin bilong yumi long strong long stap gut long God inap mekim na sampela man em nau ol i givim hevi long yumi, bihain ol inap luksave olsem yumi gat tok i tru bilong Baibel.​—1 Timoti 1:13.

Yumi ken tingim Aberash, em wanpela meri Afrika i bin beten long painim tok i tru bilong God. Em i kirap stadi long Baibel wantaim ol Witnes Bilong Jehova, na bihain famili bilong em na ol bikman bilong lotu ol i birua nogut tru long em. Sampela wanblut em ol i bin kirap stadi long Baibel, ol i pret na lusim stadi. Tasol Aberash i beten na askim Jehova long givim strong long em na bai em i no ken pret, na em i kisim baptais na kamap wanpela Witnes Bilong Jehova. Wanem samting i kamap? Etpela wanblut bilong em i strongim bel na i kirap stadi gen long Baibel na ol i wok long kamap strong.

Yu Inap Daunim Pasin Bilong Pret Long Man

Bilong abrusim pasin bilong pret long man, yu mas wok long strongim pasin bilong yu long laikim tru God. Yu ken mekim olsem long rot bilong stadi long Baibel na tingim tingim long bel ol skripsa olsem Hibru 13:​6, em i tok: “Bikpela i save helpim mi na mi no inap pret. Ol man i no inap mekim wanpela samting long mi.” Yu no ken lusim tingting long as na i stret yumi mas pret long God tasol na em i savepasin long mekim olsem.

Na tingim tu ol gutpela samting yu kisim taim yu bihainim ol tok yu lainim long Baibel. Yu inap painim gutpela bekim bilong ol bikpela askim long ol samting bilong laip. Yu inap kisim savetingting bilong karim ol hevi i painim yu. Yu inap wetim gutpela samting bai kamap bihain, maski ol hevi bilong nau i go bikpela tru. Na long olgeta taim yu inap beten na go klostu long God i Gat Olgeta Strong.

Aposel Jon i tok: “Dispela graun bai i pinis, na olgeta pasin bilong dispela graun . . . ol tu bai i pinis wantaim. Tasol man i bihainim tok bilong God, em bai i stap oltaim.” (1 Jon 2:17) Nau em taim bilong sanap strong na wokabaut long pasin bilong pret long God. Yu no ken larim pasin bilong pret long man i daunim bilip bilong yu; makim rot bilong bihainim dispela tok bilong God, olsem: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Sindaun 27:11) I gutpela tru long bihainim dispela tok, a?

Tingim, ol man bilong graun i no inap givim ol gutpela samting long yu em ol samting God bai givim long ol man i pret long em, olsem: “Sapos yu daunim yu yet na yu stap aninit long Bikpela, bai yu gat planti . . . samting na biknem, na bai yu stap gut.”​—Sindaun 22:4.

[Piksa long pes 14]

Aberash i no pret long ol man, olsem na 8-pela wanblut i stadi yet long Baibel