Pasin Bilong Pret Long Trupela God i Save Helpim Yumi Olsem Wanem?
“Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—AISAIA 48:17.
SAPOS Adam i bin kisim pasin bilong pret long Jehova, dispela inap pasim em na em i no ken mekim dispela rong i bin bringim em long rot bilong i dai na pinis olgeta, na i givim bikpela hevi long ol pikinini na tumbuna pikinini bilong em inap planti tausen yia. Na sapos lain Israel i bin bihainim tok bilong Jehova long pret long em na givim bel long em, ol birua i no inap kisim ol i go kalabus long Babilon, na ol i no inap sakim Pikinini bilong God na kilim em i dai. Na sapos long nau ol man bilong graun i pret long God, ol i no inap paulim ol mani samting long wok gavman o long ol bisnis, na bai i no gat pasin raskol na ol bikpela pait.—Sindaun 3:7.
2 Tasol maski ol man bilong dispela graun i mekim wanem, yumi olgeta wan wan, ol famili, ol kongrigesen, yumi olgeta wokboi bilong Jehova—sapos yumi wok long kisim pasin bilong pret long trupela God, dispela bai helpim yumi. Dispela i stret wantaim tok Moses i bin givim long lain Israel, em i tok: “Yupela i mas aninit [olsem pret] long God, na bihainim olgeta tok bilong em. Yupela i mas laikim em tru, na amamas tru wantaim bel na tingting bilong yupela long mekim wok bilong em. Na yupela i mas bihainim olgeta lo bilong em . . . bai yupela i ken stap gut.” (Lo 10:12, 13) Orait, taim yumi pret long Jehova, em i God tru, dispela i save helpim yumi olsem wanem?
Gutpela Tingting na Save i Winim Gol
3 Namba wan samting yumi kisim long dispela pasin, em gutpela tingting na save. Song 111:10 i tok: “Sapos man i laik kamap saveman em i mas pret long Bikpela.” Em i olsem: Gutpela tingting i helpim yumi long mekim gutpela wok long ol save yumi bin kisim na bai yumi inap stretim ol hevi, na abrusim ol samting inap bagarapim yumi, na winim ol mak yumi bin putim bilong mekim sampela wok. Man i gat gutpela tingting em inap skelim gut ol samting. As bilong gutpela tingting, em pasin bilong pret long Jehova. Bilong wanem i olsem? Long wanem, Jehova yet i bin wokim ol man na olgeta samting, na ol i stap laip long strong bilong em tasol. Em i bin wokim man bambai man yet i ken tingim ol samting em i laik mekim, tasol Jehova i no inapim em long bosim gut wokabaut bilong em yet—Jehova yet i mas soim rot long em. (Josua 24:15; Jeremaia 10:23) Sapos yumi pilim tru dispela samting na yumi bihainim, orait ol samting yumi mekim bai kamap gutpela. Sapos yumi save gut long Jehova na dispela i kirapim yumi long bilip strong olsem laik bilong God bai kamap tru, na em bai truim tok promis bilong em long givim gutpela pe long ol man i stap gut long wok bilong em, na em inap tru long mekim olsem, orait pasin bilong pret long Jehova bai kirapim yumi long bihainim gutpela tingting long ol samting yumi mekim.—Sindaun 3:21-26; Hibru 11:6.
4 Tingim dispela stori: Bipo liklik wanpela yangpela man i go long Yunivesiti Saskasiwan, long Kanada. Em i stadi long ol samting bilong graun i gat laip, na ol i skulim em tu long evolusen, olsem yumi bin kamap long rot bilong binatang o animal samting. Taim em i winim skul em i stadi long ol atom i stap insait long ol samting. Em i winim bikpela mak long dispela na em i go skul long Yunivesiti Bilong Toronto bilong kisim sampela save moa. Taim em i stadi em i kirap nogut long lukim olgeta samting long ol atom i wok stret tru, na ol mak bilong ol i olsem wanpela man i bin tingim na wokim. Em i tingting: Husat i bin wokim? Em i wokim long wanem taim? Bilong wanem em i wokim? Tasol skul i no bekim ol dispela askim. Nau em i tingting: Sapos em i no inap save long bekim bilong en, olsem wanem em inap mekim stretpela wok long ol save em i kisim long dispela taim bilong Namba 2 Pait? Wanem samting bai stiaim tingting bilong em? Pasin bilong litimapim kantri? Bikpela laik long kisim mani samting? Em i tingting: ‘Mi bin kisim gutpela tingting na save tru?’
5 Em i winim pinis skul na bihain liklik em wantaim meri bilong em i kirap stadi long Baibel wantaim ol Witnes Bilong Jehova. Em nau, long Baibel tupela i kisim save long bekim bilong ol askim bilong ol. Ol i kisim save long Man bilong wokim olgeta samting, em Jehova. Tupela i lainim stori bilong Moses long solwara Retsi, na stori bilong Daniel na 3-pela poroman bilong em long Babilon, na ol i lain long ol i mas pret long God na no ken pret long ol man. (Kisim Bek 14:10-31; Daniel 3:8-30) Ol i wok long kisim pasin bilong pret long God na laikim em tru, na dispela i wok long kirapim ol. I no longtaim na tupela i senisim pasin na wokabaut bilong ol. Nau yangpela man i save pinis long Man bilong wokim ol samting bilong graun na em i save long laik bilong Em. Olsem na em i no laik wok moa long kamapim ol samting bai bagarapim ol man. Nau em wantaim meri bilong em i laik helpim ol man long laikim tru God na ol narapela man. Orait, tupela i kirap mekim wok bilong autim tok bilong Kingdom long olgeta de. Bihain tupela i go long Wastaua Baibel Skul Bilong Gileat na kamap misineri.
6 Tru i no olgeta man inap kamap misineri. Tasol yumi olgeta inap kisim gutpela tingting em pasin bilong pret long Jehova i as bilong en. Sapos yumi mekim olsem, bai yumi no larim save bilong dispela graun i stiaim yumi na yumi wok strong long painim save bilong ol man, em ol i toktok nating na ol i no save i gat wanem as tru na yumi stap. Bai yumi wok strong long kisim save long Baibel, em God Jehova yet i bin kamapim, em i As bilong laip na em i dispela Man inap givim laip oltaim long yumi. (Song 36:9; Kolosi 2:8) Bai yumi no go insait long ol bikpela wok bisnis samting bilong dispela graun i laik bagarap. Bai yumi bihainim tok bilong Jehova, em i tok, sapos yumi gat liklik kaikai na laplap samting yumi ken ting, em inap long yumi; bikpela samting tru bilong yumi, em yumi laik pas gut wantaim Jehova. (1 Timoti 6:8-12) Bai yumi no tingting long kisim bikpela wok mani bambai yumi gat gutpela sindaun long bihain. Bai yumi bilipim tok bilong Jehova long Baibel, em i tok, pasin bilong dispela graun na ol samting yumi aigris long en, em bai pinis, tasol man i mekim laik bilong God em bai stap oltaim.—1 Jon 2:17.
7 Sindaun 16:16 i tok tru olsem: “Sapos yu kisim gutpela tingting na save, orait dispela i winim tru planti gol na silva.” Dispela gutpela tingting na save bai kirapim yumi long putim laik bilong God i stap olsem nambawan bikpela samting bilong yumi. God i givim wanem wok long ol Witnes bilong em nau long dispela taim? Em wok bilong autim tok bilong Kingdom bilong em na helpim ol man i gat gutpela bel na bai ol i ken kamap disaipel bilong Krais Jisas. (Matyu 24:14; 28:19, 20) Yumi save kisim ol gutpela samting tru long dispela wok, na yumi kisim bikpela amamas na bel bilong yumi i gutpela. Olsem na i gat as tru na Baibel i tok: “Man i kisim gutpela tingting na save, em i ken amamas tru.”—Sindaun 3:13.
Yumi No Mekim Rong
8 Namba tu samting em pasin bilong pret long God i save helpim yumi long en—em i lukautim yumi na bai yumi no mekim rong. Ol man i pret long God, ol i no ting ol yet inap skelim wanem pasin i gutpela na wanem pasin i nogut. Samting God i tok i gutpela, ol i no ting em i samting nogut, na ol samting God i tok i nogut, ol i no ting em i gutpela samting. (Song 37:1, 27; Aisaia 5:20, 21) Na man i pret long God em i no laik save tasol long samting Jehova i tok i gutpela o i nogut. Em i laikim ol samting Jehova i laikim, na em i nolaik tru long samting Jehova i nolaik tru long en. Olsem na em i save mekim ol samting i stret wantaim ol lo bilong God. Olsem Sindaun 16:6 i tok: “Sapos man i stap aninit [olsem pret] long Bikpela, orait dispela man inap abrusim pasin bilong sin.” Dispela pasin bilong pret long God bai givim strong long em na kirapim em long mekim ol samting em i no inap mekim long strong bilong em yet.
9 Maski man i kirap nupela long pret long God, dispela inap strongim em na bai em i no mekim wanpela samting em bai bel hevi long en inap long olgeta taim bihain. Olsem: Wanpela meri long Meksiko i gat bel na em i askim wanpela Witnes Bilong Jehova long pasin bilong rausim bel. Witnes i kaunim sampela tok bilong Baibel long em na bihain Witnes i tok: “Laip i bikpela samting tru long Man bilong wokim yumi, maski em i laip bilong pikinini em mama i no karim yet.” (Kisim Bek 21:22, 23; Song 139:13-16) Dokta i bin glasim pikinini na em i ting skin bilong pikinini i nogut. Tasol meri i pilim tru ol tok em i bin lukim long Baibel na nau em i no laik rausim bel. Dokta i kros na i no laik lukim em moa, na man bilong em i tok long lusim em, tasol em i sanap strong. Bihain em i karim wanpela naispela pikinini meri, skin bilong em i gutpela na i no gat sik. Meri i amamas tru na em i kirap painim ol Witnes bilong tok tenkyu long ol. Ol i stadi wantaim em long Baibel na insait long wanpela yia em wantaim man bilong em i kisim baptais. Sampela yia bihain, long kibung distrik, em i bungim dispela Witnes i bin toktok wantaim em pastaim, na tupela i soim gutpela pikinini meri bilong ol long Witnes, em pikinini i gat 4-pela krismas pinis. Em nau, sapos yumi daun long God na yumi no laik mekim wanpela samting em i no laikim, dispela i gat strong long stiaim wokabaut bilong yumi.
10 Pasin bilong pret long God em inap strongim yumi long abrusim ol kain kain rong. (2 Korin 7:1) Taim man i kisim pasin bilong pret long God, dispela inap helpim em long lusim ol rong em i bin mekim hait, na em wantaim Jehova tasol i save long en. Na em inap helpim man long lusim pasin bilong dring oltaim o kisim drak. Tingim stori bilong wanpela man bipo em i man bilong kisim drak long Saut Afrika. Em i tok: “Mi wok long kisim save long God na nau mi pret long mekim wanpela samting i bagarapim bel bilong em o em i no laikim. Mi save em i lukim mi, na mi laik i stap gut long ai bilong em. Dispela i kirapim mi long tromoi olgeta drak bilong mi i go daun long toilet.” Pasin bilong pret long God i bin helpim planti tausen moa olsem.—Sindaun 5:21; 15:3.
Yumi No Pret Long Ol Man
11 Pasin bilong pret long God i save helpim yumi na yumi no pret long ol man. Klostu olgeta man i save pret long ol man—sampela i pret tru na sampela i pret liklik. Ol aposel bilong Jisas tu, ol i ranawe lusim em taim ol soldia i kam holim em long gaden Getsemani. Bihain Pita i sanap ausait long haus bilong hetpris na tingting bilong em i paul liklik na em i pret long ol man, na dispela i mekim na em i tokaut olsem em i no wanpela disaipel bilong Jisas, na em i no save long Jisas. (Mak 14:48-50, 66-72; Jon 18:15-27) Tasol bihain ol aposel i kisim sampela helpim na ol i kamap strong gen long ol samting bilong spirit. Tasol long taim bilong King Jehoiakim, Uria, em pikinini bilong Semaia, em i pret nogut tru long ol man na em i lusim wok bilong em olsem profet bilong Jehova na em i ranawe lusim kantri, tasol dispela i no helpim em—ol i holim em na kilim em i dai.—Jeremaia 26:20-23.
12 Orait, wanem samting inap helpim man long daunim pasin bilong pret long man? Sindaun 29:25 i tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet.” Na em i tok moa olsem: “Tasol sapos man i bilip strong long Bikpela, bai em i stap gut.” Em nau, yumi mas bilip strong long Jehova. Bilong bilip long Jehova olsem, yumi mas kisim save long em na yumi pilim pinis sampela samting Jehova i bin mekim bilong helpim yumi. Taim yumi stadi long Baibel, yumi lukim ol samting i kamapim klia stretpela pasin bilong Jehova. Na yumi save long ol samting i bin kamap bipo na i kamapim long ples klia olsem yumi inap bilip long Jehova na wetim em, na em bai truim olgeta tok promis bilong em (na promis bilong em long kirapim bek ol man i dai pinis), na em i gat bikpela sori na olgeta strong. Orait, taim yumi mekim wok long dispela save yumi kisim, na yumi mekim olgeta samting Jehova i tokim yumi long mekim, na yumi strong long sakim ol samting em i tok yumi no ken mekim, bai yumi kirap long pilim tru olsem em i sori long yumi na tingim yumi, na yumi inap bilip long em. Yumi lukim pinis ol samting i kamapim klia olsem em i bin mekim wok long strong bilong em bilong kamapim laik bilong em. Em nau, yumi bilip strong moa long em, na yumi wok long laikim em moa yet, na yumi laik tru long abrusim olgeta pasin em i no save laikim. Dispela kain bilip i gat as tru bilong en, na em i strongim yumi long sakim pasin bilong pret long ol man.
13 Na taim yumi bilip long Jehova na yumi pret long em, dispela bai strongim yumi long bihainim stretpela pasin sapos bos i laik bai yumi mekim sampela pasin i no stret insait long bisnis bilong em na long dispela as em i tok long rausim yumi long wok. (Skelim wantaim Maika 6:11, 12.) Dispela pasin bilong pret long God i save helpim planti tausen Kristen long sanap strong long lotu i tru, maski sampela bilong famili i no bilip na i biruaim ol. Na dispela pasin i strongim ol yangpela i save go long skul na ol i strongim bel na tokaut olsem ol i Witnes Bilong Jehova, na em i strongim ol tu na ol i no pret long tok bilas bilong ol wanskul em ol i ting ol lo bilong Baibel i samting nating. Wanpela yangpela Witnes i tok: “Ol i ting olsem wanem long mi, em i no bikpela samting. Tasol Jehova i ting olsem wanem long mi, dispela em i bikpela samting.”
14 Dispela bilip i save strongim ol Kristen tru long holimpas ol lo bilong Jehova, maski ol man i tok long kilim ol i dai. Ol i save, ol man bilong dispela graun bai mekim nogut long ol. Ol i save, ol man i bin givim kanda long ol aposel, na ol man nogut i bin paitim Krais Jisas yet na kilim em i dai. (Mak 14:65; 15:15-39; Aposel 5:40; skelim wantaim Daniel 3:16-18.) Tasol ol wokboi bilong Jehova i bilip tru olsem em inap strongim ol long karim hevi na sanap strong; na ol i bilip olsem Jehova bai helpim ol na ol inap winim strong bilong dispela graun; na ol i bilip tu olsem Jehova bai givim gutpela pe long ol man i stap gut long em—na sapos ol i dai em bai kirapim bek ol na ol bai stap long nupela taim em bai kamapim long graun. Pasin bilong ol long laikim tumas God na pret long em, dispela i save kirapim ol strong na ol i no laik mekim wanpela samting em i no save laikim.
15 Dispela pasin bilong pret long God na laikim em tru i save kirapim ol Witnes na ol inap long sanap strong na karim bikpela pen na hevi taim ol i bin i stap long ol banis kalabus nogut bilong Hitler long taim bilong Namba 2 Pait. Bel bilong ol i pilim tru tok bilong Jisas long Luk 12:4, 5, em i tok: “Ol pren bilong mi, mi tokim yupela olsem. Yupela i no ken pret long ol man i save kilim i dai bodi tasol, na bihain ol i no inap mekim wanpela samting moa. Tasol mi laik tok klia long yupela long yupela i mas pret long husat tru. Yupela i mas pret long God. Taim God i kilim man i dai, orait em i gat strong bilong tromoi dispela man i go long hel [Gehena, NW]. Mi tokim yupela stret, yupela i mas pret long God.” Olsem na wanpela Witnes i bin i stap long banis kalabus bilong Saksenhausen, em Gustav Auschner, em i tok: ‘Ol lain SS [em wanpela lain polis bilong Hitler] i bin sutim August Dickmann na ol i tok long sutim mipela ol narapela sapos mipela i no sainim nem bilong mipela long wanpela pepa i toksave olsem mipela i lusim bilip bilong mipela. I no gat wanpela bilong mipela i sainim nem long pepa. Mipela i pret long mekim wanpela samting Jehova i no laikim, na mipela i no pret long katres bilong ol.’ Sapos yumi pret long ol man, bai yumi surik na mekim ol samting ol i laikim, tasol sapos yumi pret long God, bai yumi strong long mekim ol samting i stret.
Ol i Abrusim Bagarap
16 Noa i bin i stap na winim taim bilong las de paslain long Bikpela Tait. Jehova i tingting pinis long bagarapim olgeta man nogut bilong dispela taim, em ol i mekim ol pasin nogut tru. Noa i stap namel long ol dispela lain bilong pait na mekim ol kain kain pasin nogut olsem pamuk samting, na ol i no tingim ol samting God i laik mekim. Noa i autim tok bilong stretpela pasin long ol, tasol “ol i stap olsem tasol i go inap long taim bikpela tait i kamap na i pinisim olgeta dispela manmeri.” (Matyu 24:39) Tasol Noa i no surik long mekim wok God i givim long em. Em i mekim “olgeta samting olsem God i tokim em.” (Stat 6:22) Wanem samting i mekim na Noa i bihainim stretpela rot long olgeta wan wan yia inap long taim Bikpela Tait i kamap? Hibru 11:7 i bekim dispela askim olsem: “Noa i bilip long God, na God i toksave long em long samting bai i kamap bihain, em samting Noa i no lukim yet. Orait em i bilipim tok bilong God.” Olsem na God i lukautim Noa wantaim meri bilong em na ol pikinini man na ol meri bilong ol, na ol i no bagarap long Bikpela Tait.
17 Long planti samting, dispela taim nau yumi stap long en i wankain olsem taim bilong Noa. (Luk 17:26, 27) Long nau tu, wanpela toksave i go long ol man. Kamapim Tok Hait 14:6, 7 i stori long wanpela ensel i flai i go namel long skai na em i wok long kirapim ol man bilong olgeta kantri na olgeta lain na olgeta tok ples na ol “i mas pret long [God] na litimapim nem bilong em.” Maski ol man bilong dispela graun i mekim wanem, yu mas bihainim dispela tok na givim long ol narapela man. Bihainim pasin bilong Noa na mekim ol wok i kamapim bilip, na pret long God. Sapos yu mekim olsem, dispela inap helpim yu na planti ol narapela man long abrusim bagarap na i stap laip. Taim yumi tingim ol gutpela samting ol man i pret long God ol i save kisim, yumi wanbel wantaim man bilong raitim Song, em i tok: “Man i save pret long Bikpela na i laikim tumas long bihainim ol lo bilong en, dispela man i ken amamas.”—Song 112:1.
Bai Yu Bekim Olsem Wanem?
◻ Taim yumi pret long trupela God, dispela i save helpim yumi olsem wanem?
◻ Gutpela tingting em pasin bilong pret long God i as bilong en, dispela i save lukautim yumi olsem wanem?
◻ Olsem wanem na pasin bilong pret long God i save helpim yumi long lusim pasin nogut?
◻ Olsem wanem pasin bilong pret long God i helpim yumi na bai yumi no pret long ol man?
◻ Olsem wanem long pasin bilong pret long God na laip oltaim yumi tingting long kisim bihain?
[Askim Bilong Stadi]
1. Wanem ol hevi i no inap kamap sapos ol man i pret long God?
2. Maski pasin bilong ol man i go nogut, bilong wanem yumi mas kisim pasin bilong pret long Jehova?
3. (a) Wanem nambawan bikpela samting yumi inap kisim long dispela pasin? (b) Wanem insait bilong tok bilong Song 111:10?
4, 5. (a) Olsem wanem na bikpela skul em wanpela yangpela man i kisim long yunivesiti i no bin helpim em long kisim gutpela tingting na save tru? (b) Bihain, olsem wanem dispela yangpela man wantaim meri bilong em i kisim gutpela tingting na save tru? Olsem wanem dispela i senisim wokabaut bilong ol?
6. Sapos yumi gat gutpela tingting na save em pasin bilong pret long Jehova i as bilong en, bai yumi no tingting long mekim wanem? Bai yumi mekim wanem?
7. (a) Olsem wanem Sindaun 16:16 i helpim yumi long kisim stretpela tingting long ol samting? (b) Yumi kisim wanem ol gutpela samting sapos yumi putim wok bilong God i stap olsem nambawan bikpela samting bilong yumi?
8. (a) Kolim namba tu samting em pasin bilong pret long God i save helpim yumi long en. (b) Wanem dispela pasin nogut em pasin bilong pret long God i helpim yumi long abrusim? (c) Olsem wanem pasin bilong pret long God i kamap olsem strongpela samting bilong kirapim man?
9. Olsem wanem strongpela laik long abrusim pasin God i no laikim i stiaim tingting bilong wanpela meri long Meksiko? Wanem samting i kamap long dispela?
10. Pasin bilong pret long God inap strongim ol man long lusim wanem ol rong?
11. Pasin bilong pret long Jehova i helpim yumi long abrusim wanem pasin i save kalabusim man?
12. (a) Yumi mas mekim wanem na bai yumi no pret long ol man, olsem Sindaun 29:25 i makim? (b) Olsem wanem yumi ken kisim pasin bilong bilip long God?
13. Olsem wanem pasin bilong pret long God inap helpim yumi long ples wok, na long haus, na long skul?
14. Olsem wanem ol wokboi bilong Jehova inap winim strong bilong dispela graun, maski ol man i tok long kilim ol i dai?
15. Wanem samting i mekim na ol Witnes inap holimpas bilip taim ol i stap long ol banis kalabus nogut bilong Hitler?
16. Wanem samting i mekim na Noa inap bihainim stretpela rot long olgeta wan wan yia inap long taim Bikpela Tait i kamap? Taim Tait i kamap, olsem wanem long Noa wantaim ol wanhaus bilong em?
17. (a) Maski ol narapela man i mekim wanem, yumi yet i mas mekim wanem? (b) Olsem wanem na ol man i pret long Jehova ol i amamas tru?
[Ol Piksa long pes 16, 17]
‘Man i save pret long Jehova, na i laikim tumas long bihainim ol lo bilong en, dispela man i ken amamas.’—Song 112:1