Kisim Pasin Bilong Pret Long Jehova
“Ol i mas aninit [olsem pret] long mi na bihainim olgeta lo bilong mi oltaim.”—LO 5:29.
1. Olsem wanem yumi ken save olsem bihain ol man bai i stap fri long pasin bilong pret?
PRET i bin givim hevi long ol man inap planti handet yia. Pret long hangre, bikpela sik, pasin raskol, o woa i as na bel bilong planti milion manmeri i bagarap i stap. Olsem na tok i go pas bilong Yunivesal Dekleresen ov Human Raits i stori olsem ol i laik mekim graun i kamap ples we olgeta man inap stap fri long pasin bilong pret.a Gutpela tru God yet i tok graun bai kamap kain ples olsem—tasol i no long han bilong ol man yet. Long rot bilong profet Maika, Jehova i tok promis long nupela taim bilong stretpela pasin em bai kamapim, bai i ‘no gat wanpela man bai i mekim lain bilong em i pret.’—Maika 4:4.
2. (a) Baibel i tok wanem bilong kirapim yumi long pret long God? (b) Wanem ol askim inap kamap taim yumi tingim wok bilong pret long God?
2 Tasol pret inap stap olsem gutpela samting. Planti taim Baibel i kirapim ol wokboi bilong God long kisim pasin bilong pret long Jehova. Moses i tokim ol Israel: “Yupela i mas aninit [olsem pret] long God, Bikpela bilong yumi. Na yupela i mas lotu long em wanpela tasol.” (Lo 6:13) Sampela handet yia bihain Solomon i tok: “Namba wan samting long laip bilong yumi man i olsem. Yumi mas aninit [olsem pret] long God tasol na bihainim ol lo bilong em.” (Saveman 12:13) Na long rot bilong wok autim tok em ol ensel i stiaim dispela wok, yumi tu i save kirapim olgeta man long ‘pret long God na litimapim nem bilong em.’ (KTH 14:6, 7) Ol Kristen i mas pret long God, na tu, ol i mas laikim em tru long bel bilong ol. (Matyu 22:37, 38) Olsem wanem yumi inap laikim tru God na pret tu long em wantaim? Bilong wanem yumi mas pret long God bilong sori? Taim yumi wok long kisim pasin bilong pret long God, dispela i helpim yumi olsem wanem? Bilong bekim ol dispela askim, pastaim yumi mas save pasin bilong pret long God i makim wanem samting na olsem wanem dispela pret i bikpela samting bilong helpim yumi long pas gut wantaim Jehova.
Daun na Pret Long God
3. Pret long God i makim wanem samting?
3 Pasin bilong pret long God i mas i stap long bel bilong olgeta Kristen. Wanpela buk i tok dispela pret i makim ‘pasin bilong daun olgeta na tingim bikpela strong bilong Man bilong wokim yumi na pret long mekim samting dispela Man i no amamas long en.’ Olsem na pasin bilong pret long God i bosim tupela samting long laip bilong yumi: Em tingting yumi holim long God yet, na tingting bilong yumi long ol pasin em i no laikim. Tupela wantaim i bikpela samting tru, na i stret yumi lusim hap taim bilong skelim gut tingting bilong yumi long dispela tupela samting. Olsem wanpela dikseneri (Expository Dictionary of New Testament Words, bilong Vine) i tok, long tingting bilong ol Kristen dispela pret i ‘bosim laip bilong ol, long ol samting bilong spirit na long wokabaut bilong ol.’
4. Yumi ken mekim wanem bilong kisim pasin bilong pilim tru bikpela strong bilong Man bilong wokim yumi na daun olgeta long em?
4 Yumi ken mekim wanem bilong kisim pasin bilong pilim tru bikpela strong bilong Man bilong wokim yumi na daun olgeta long em? Bel bilong yumi i kirap tru long lukim naispela graun, o bikpela wara i kapsait i go daun long maunten, o kala kala bilong san long apinun tru. Amamas bilong lukim ol dispela samting i bikpela moa yet taim bilip i helpim yumi long pilim tru olsem God i as bilong ol dispela samting. Na tu, olsem King Devit, yumi pilim olsem yumi man nating taim yumi skelim ol samting Jehova i wokim. “Taim mi lukim skai yu bin wokim, na taim mi lukim mun na olgeta sta yu bin putim i stap antap, mi save ting olsem. Mipela man i wanem samting na yu save tingting long mipela? Mipela i samting nating.” (Song 8:3, 4) Pasin bilong pilim tru bikpela strong bilong God olsem i helpim yumi long daun long em, na dispela i kirapim yumi long litimapim nem bilong Jehova na tok tenkyu long em long ol gutpela samting em i mekim bilong helpim yumi. Na tu, Devit i tok: “Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.”—Song 139:14.
5. Bilong wanem i stret yumi pret long Jehova? Husat i gutpela piksa long dispela samting?
5 Pasin bilong pilim tru bikpela strong bilong God na daun olgeta long em i kirapim yumi long pret long bikpela strong bilong Man bilong wokim olgeta samting, na pret long bikpela namba em i holim olsem Bos bilong heven na graun. Long driman aposel Jon i lukim, “ol manmeri i bin winim pait na daunim dispela wel animal wantaim piksa bilong en”—em lain bilong Krais ol i stap pinis long heven—ol i tokaut: “Bikpela, yu God I Gat Olgeta Strong, yu save mekim ol narakain strongpela wok . . . King bilong olgeta lain manmeri, ol pasin bilong yu ol i stret na i tru olgeta. . . . Olsem na olgeta manmeri ol i mas pret long yu na litimapim nem bilong yu.” (KTH 15:2-4) Pasin bilong daun tru long God olsem king i as na ol i pret long em, na dispela i kirapim ol lain i wok king wantaim Krais long heven long givim biknem long God olsem Nambawan Bos tru. Taim yumi tingim olgeta wok Jehova i mekim pinis na stretpela pasin bilong em long bosim heven na graun, i gat as tru na yumi pret long em, a?—Song 2:11; Jeremaia 10:7.
6. Bilong wanem yumi no laik tru long mekim pasin Jehova i no amamas long en?
6 Pasin bilong pret long God i makim olsem man i daun olgeta long God na pilim tru bikpela strong bilong em, na i makim tu olsem man i pret long brukim lo bilong God o mekim em i bel hevi. Bilong wanem? Long wanem, tru Jehova “i no save belhat kwik; em i save laikim tru ol manmeri,” tasol yumi no ken lusim tingting olsem, “em i no ken larim man i abrusim strafe.” (Kisim Bek 34:6, 7, NW ) Em i gat pasin bilong sori na marimari, tasol Jehova i no orait liklik long pasin i no stret o long man i strong long mekim rong. (Song 5:4, 5; Habakuk 1:13) Ol man i strong long mekim pasin Jehova i no laikim na ol i no tanim bel, ol i kamap birua bilong God, na dispela i makim olsem ol bai kisim strafe. I olsem aposel Pol i tok: “Sapos God bilong i stap oltaim em i laik mekim save long wanpela man na em i holimpas em, orait dispela man i ken pret nogut tru.” Sapos yumi pret long kisim strafe long God, dispela inap lukautim yumi.—Hibru 10:31.
“Holimpas” Jehova
7. I gat wanem ol as na yumi inap bilip long strong bilong Jehova long lukautim yumi?
7 Pasin bilong pret long God na pilim tru bikpela strong bilong em, dispela i save kamap long bel bilong man pastaim na bihain em i kisim pasin bilong bilip long Jehova. Pikinini i no pilim pret taim papa bilong em i stap klostu, olsem tasol bel i stap isi na yumi no save pret taim yumi stap aninit long Jehova. Tingim pasin ol Israel i mekim bihain long Jehova i helpim ol long lusim Isip: “Ol i lukim dispela bikpela wok Bikpela i bin mekim bilong winim ol Isip. Na ol manmeri bilong Israel i pret na i stap aninit long Bikpela, na ol i bilip long em.” (Kisim Bek 14:31) Na tu, samting i painim Elisa i kamapim klia olsem “ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.” (Song 34:7; 2 King 6:15-17) Ol samting i painim lain bilong Jehova long nau na ating ol samting i painim yumi yet i kamapim klia olsem God i save mekim wok long strong bilong em long helpim ol wokboi bilong em. (2 Stori 16:9) Dispela i helpim yumi long save olsem “man i aninit long Bikpela, em bai i sanap strong na i no ken pret long wanpela samting.”—Sindaun 14:26.
8. (a) Bilong wanem pasin bilong pret long God i kirapim yumi long wokabaut long rot em i makim? (b) Yumi mas “holimpas” Jehova olsem wanem?
8 Pasin bilong pret long God i helpim pasin bilong bilip long em, na tu, dispela pret i kirapim yumi long wokabaut long rot em i makim. Taim Solomon i dediketim tempel, em i prea long Jehova olsem: “Bai mipela ol manmeri bilong yu i stap aninit [olsem pret] long yu na bihainim gut ol pasin yu save laikim, long olgeta taim mipela i stap long dispela graun yu bin givim long ol tumbuna bilong mipela.” (2 Stori 6:31) Paslain Moses i bin tokim ol Israel: “Yupela i mas aninit [olsem pret] long Bikpela na bihainim em. Na yupela i mas harim tok bilong em na bihainim ol lo bilong em, na lotu long em na holimpas strong long em.” (Lo 13:4) Olsem ol dispela ves i kamapim, pasin bilong bilip long God em dispela i kirapim man long “holimpas” Jehova na bihainim rot em i makim. Yes, pasin bilong pret long God i kirapim yumi long harim tok bilong Jehova, mekim wok bilong em, na holimpas em, olsem pikinini i bilip tru long papa bilong em na holimpas skin bilong en.—Song 63:8; Aisaia 41:13.
Man i Laikim God i Save Pret Long Em
9. Olsem wanem pasin bilong laikim tru God i helpim pasin bilong pret long God?
9 Olsem Baibel i kamapim, pasin bilong pret long God i no makim olsem man i no inap laikim em tru, nogat. Ol Israel i kisim tok olsem ol i mas ‘aninit [olsem pret] long God, na bihainim olgeta tok bilong em na laikim em tru.’ (Lo 10:12) Olsem na pasin bilong pret long God i helpim pasin bilong laikim em tru. Pret long God i kirapim yumi long wokabaut long rot em i makim, na dispela i kamapim klia olsem yumi laikim em tru. (1 Jon 5:3) Yumi inap bilipim dispela tok, long wanem, taim yumi laikim tru narapela, i stret yumi pret long mekim samting i bagarapim bel bilong em. Ol Israel i bin mekim Jehova i bel hevi taim ol i bikhet long ples drai nating. Yumi no laik mekim wanpela samting na bai Papa bilong yumi long heven i bel hevi olsem, a? (Song 78:40, 41) Jehova “i save amamas long ol manmeri i save pret long em,” olsem na pasin bilong yumi long harim tok bilong em na stap gut long em, dispela i mekim gut bel bilong em. (Song 147:11; Sindaun 27:11) Pasin bilong laikim tru God i kirapim yumi long mekim ol samting i amamasim em, na pasin bilong pret long God i pasim yumi long mekim em i bel hevi. Tupela pasin i no pait wantaim, nogat, narapela i helpim narapela.
10. Olsem wanem Jisas i kamapim klia em i kisim amamas long pret long Jehova?
10 Wokabaut bilong Jisas i kamapim klia olsem wanem yumi inap laikim tru God na pret long em wantaim. Profet Aisaia i stori long Jisas na i tok: “Spirit bilong Bikpela bai i kam i stap long em na givim em gutpela save na tingting, na bai em i stap strongpela king na i gat gutpela tingting na save bilong bosim ol manmeri bilong en. Em bai i save long tingting bilong Bikpela. Oltaim em bai i stap aninit [olsem pret] long Bikpela, na dispela pasin bai i mekim em i amamas moa yet.” (Aisaia 11:2, 3) Olsem dispela tok profet i kamapim, spirit bilong God i bin kirapim Jisas long pret long Papa bilong em long heven. Na tu, dispela pret i no givim hevi long em, nogat, dispela pret i mekim em i stap belgut. Jisas i amamas long mekim wok bilong God na mekim gut bel bilong Papa bilong em, maski bikpela hevi i painim em. Taim ol i laik kilim em i dai long diwai pos, em i tokim Jehova: “Yu no ken bihainim laik bilong mi. Nogat. Yu mas bihainim laik bilong yu tasol.” (Matyu 26:39) Pasin bilong Jisas long pret long God i as na Jehova i bin harim prea bilong Pikinini bilong em, na givim strong long em, na kisim em bek long indai.—Hibru 5:7.
Lain Long Pret Long Jehova
11, 12. (a) Bilong wanem yumi gat wok long lainim pasin bilong pret long God? (b) Jisas i mekim wanem bilong skulim yumi long pret long Jehova?
11 Taim yumi lukim ol narakain samting God i bin wokim, bel i kirapim yumi long pilim bikpela strong bilong God, tasol pasin bilong pret long God i no save kamap nating long bel bilong yumi. Dispela i as na Man Devit i piksa bilong en, em Jisas Krais, em i tok profet na singautim yumi olsem: “Yupela i mas i kam na putim yau gut long tok bilong mi. Mi laik skulim yupela na bai yupela i stap aninit [olsem pret] long God oltaim.” (Song 34:11) Olsem wanem Jisas i ken lainim yumi long pret long Jehova?
12 Bilong skulim yumi long pret long Jehova, Jisas i helpim yumi long save long gutpela pasin tru bilong Papa bilong yumi long heven. (Jon 1:18) Ol samting Jisas i bin mekim i helpim yumi long save long tingting bilong God yet na pasin em i mekim long ol man, long wanem, Jisas i bihainim wankain pasin olsem Papa bilong em. (Jon 14:9, 10) Na tu, long rot bilong ofa bilong Jisas yumi inap go klostu long Jehova taim yumi beten askim em long lusim tingting long sin bilong yumi. Em bikpela pasin marimari bilong God long stretim rot olsem, na dispela i bikpela samting tru bilong kirapim yumi long pret long em. Man bilong raitim song i tok: “Yu save rausim ol sin bilong mipela, olsem na mipela i mas pret long yu.”—Song 130:4.
13. Buk Sindaun i kamapim wanem ol tok bilong helpim yumi long pret long Jehova?
13 Buk Sindaun i stori long ol samting yumi ken mekim bilong kisim pasin bilong pret long God. “Pikinini, yu mas harim tok bilong mi na putim gut long tingting bilong yu. Yu mas putim gut yau long olgeta tok i save givim yu gutpela tingting. Na yu mas wok strong long kisim gutpela save. Na yu mas askim gutpela tingting na save long kam long yu, olsem yu singautim wanpela man i kam bilong helpim yu. . . . Sapos yu mekim ol dispela samting, orait bai yu save tru long pasin bilong stap aninit [olsem pret] long Bikpela, na bai yu save gut long God.” (Sindaun 2:1-5) Olsem na bilong pret long God, yumi mas stadi long Tok bilong em, wok strong long kisim gut mining bilong en, na skelim gut ol tok bilong en bilong stretim yumi.
14. Olsem wanem yumi inap bihainim dispela lo God i bin givim long ol king bilong Israel?
14 God i bin tokim olgeta king bilong Israel long bipo long wokim wanpela kopi bilong Lo na ‘ritim long olgeta de bai em i ken aninit [olsem pret] long Bikpela na bihainim tru olgeta lo na tok bilong em.’ (Lo 17:18, 19) Wok bilong ritim Baibel na stadi long en em samting yumi tu mas mekim bilong lain long pret long Jehova. Taim yumi wok long larim ol tok bilong Baibel i bosim wokabaut bilong yumi, isi isi yumi kisim gutpela tingting na save bilong God. Na yumi bai “save tru long pasin bilong stap aninit [olsem pret] long Bikpela,” long wanem, yumi lukim ol gutpela kaikai dispela pasin i kamapim long laip bilong yumi, na long tingting bilong yumi pasin bilong stap klostu long God em i dia tumas. Na tu, long rot bilong bung oltaim wantaim ol wanbilip, ol yangpela na ol lapun inap harim ol skul bilong God, lain long pret long em, na wokabaut long rot em i makim.—Lo 31:12.
Olgeta Man i Pret Long Jehova Ol i Stap Amamas
15. Olsem wanem pasin bilong pret long God i helpim wok bilong yumi long lotuim em?
15 Ol tok yumi skelim pinis i helpim yumi long save olsem pasin bilong pret long God em pasin yumi olgeta i mas wok long kisim, long wanem, em i bikpela hap bilong lotu bilong yumi. Em bai kirapim yumi long bilip tru long Jehova, wokabaut long rot em i makim, na holimpas em. Olsem Jisas Krais, pasin bilong pret long God i ken kirapim yumi tu long truim dediket bilong yumi inap long nau na olgeta taim bihain.
16. Bilong wanem Jehova i laik bai yumi pret long em?
16 Pasin bilong pret long God i no samting nogut o samting i putim planti tambu long man, nogat. “Yu wanem man o meri i save pret long Bikpela na i save bihainim tok bilong en, yu ken amamas.” (Song 128:1) Jehova i laik kirapim yumi long pret long em, long wanem, em i save dispela pret bai lukautim yumi. Yumi pilim bikpela pasin sori bilong em taim yumi skelim tok em i givim long Moses, em i tok: “Mi laik bai ol i tingting olsem oltaim, na bai ol i mas aninit [olsem pret] long mi na bihainim olgeta lo bilong mi oltaim. Olsem bai olgeta wok samting bilong ol na bilong ol tumbuna pikinini bilong ol i ken kamap gutpela oltaim.”—Lo 5:29.
17. (a) Pasin bilong pret long God i helpim yumi olsem wanem? (b) Stori i kamap bihain long dispela bai skelim wanem ol samting long pasin bilong pret long God?
17 Olsem na sapos yumi tu i kisim pasin bilong pret long God, dispela bai helpim yumi. Em i helpim yumi olsem wanem? Namba wan samting, dispela pasin bai amamasim God na helpim yumi long go klostu long em. Ol samting i bin painim Devit i bin helpim em long save olsem: “Ol manmeri i save pret long em, em i save givim ol samting long ol. Na em i save harim krai bilong ol na kisim bek ol.” (Song 145:19) Namba tu samting, pasin bilong pret long God bai helpim yumi, long wanem, em bai stretim tingting bilong yumi long ol pasin i no stret. (Sindaun 3:7) Stori i kamap bihain long dispela bai skelim olsem wanem dispela pret i helpim yumi long abrusim bagarap bilong spirit, na em bai kamapim stori bilong Baibel long sampela man i bin pret long God na givim baksait long pasin nogut.
[Futnot]
a Jeneral Asembli Bilong Yunaitet Nesen i tok orait long Yunivesal Dekleresen ov Human Raits long Disemba 10, 1948.
Yu Inap Bekim Ol Dispela Askim?
• Pret long God i makim wanem samting, na em i mekim wanem long yumi?
• Olsem wanem pasin bilong pret long God i helpim pasin bilong wokabaut wantaim God?
• Olsem wanem Jisas i kamapim klia pasin bilong pret long God i helpim pasin bilong laikim tru God?
• Yumi ken mekim wanem bilong kisim pasin bilong pret long Jehova?
[Piksa long pes 17]
God i tokim ol king bilong Israel long wokim kopi bilong Lo bilong ol yet na ritim long olgeta de
[Piksa long pes 18]
Pasin bilong pret long God i helpim yumi long bilip long em olsem pikinini i save bilip long papa
[Piksa Kredit Lain long pes 15]
Stars: Photo by Malin, © IAC/RGO 1991