Pret Long Jehova na Litimapim Nem Holi Bilong Em
“Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu.”—KAMAPIM TOK HAIT 15:4.
1, 2. (a) Long 1991 olsem wanem Jehova i bin givim planti gutpela samting long lain bilong em? (b) Wanem ol samting i bin painim wanpela gutpela misineri na em i kirapim ol narapela long “pret long Jehova”? (Lukim tu Yearbook bilong 1991, pes 187-189.)
JEHOVA ‘i givim planti gutpela samting long ol wokman bilong em na ol i no sot liklik.’ Planti taim Jehova i bin mekim olsem long ol Witnes Bilong Jehova long nau. (Malakai 3:10) Olsem: Long yia bilong wok long 1991, long ol “Gutpela Tok Ples” Kibung kirap long Buenos Ares long Saut Amerika na Manila na Taipei na Bangkok long hap bilong Is, na i go long “Ol Man Bilong Laikim Pasin Bilong i Stap Fri” Kibung long Budapes na Prak na Sagreb (Ogas 16-18, 1991) long Isten Yurop, ol Witnes bilong ol dispela kantri yet na ol Witnes bilong ol narapela kantri i kam long kibung ol i bin kisim gutpela samting—ol i amamas tru long bung wantaim ol brata Kristen bilong ol.
2 Ol Witnes bilong ol narapela kantri i amamas tru long bungim ol Witnes bilong ol dispela kantri em ol i bin i stap gut long wok bilong Jehova inap planti yia! Wanpela i stap long Bangkok, em Frank Dewar—bipo em wanpela tasol i autim tok long Tailan—em i bin mekim wok misineri inap 58 yia na em i stori long ol wok em i bin mekim. Em i bin autim tok long hap bilong ol ailan bilong Solwara Pasifik, na long ol hap bilong Saut-Is Esia, na long kantri Saina tu. Em i karim planti hevi long taim em i mekim dispela wok—em i bin stap long sip na sip i bagarap, na ol animal bilong bus i laik bagarapim em, na ol sik bilong ples hat i bin painim em, na em i bin stap aninit long hatpela gavman bilong Japan em ol ami i bosim. Long kibung ol i askim em: “Yu laik givim wanem tok long ol lain i kam long kibung?” Em i bekim tok olsem: “Yupela i mas pret long Jehova!”
3. Bilong wanem yumi mas pret long God?
3 Em bikpela samting tru long yumi olgeta i mas kisim dispela gutpela pasin bilong “pret long Jehova.” Baibel i tok: “Sapos man i laik kamap saveman em i mas pret long Bikpela.” (Buk Song 111:10) I no olsem Jehova em i wanpela man nogut na yumi pret na guria long em. Nogat. Tasol taim yumi stadi na lainim ol tok bilong Baibel, nau yumi pilim tru bikpela strong bilong em na ol gutpela pasin bilong em, em i God na King bilong yumi, na yumi daun long em. Singsing bilong Moses wantaim Pikinini Sipsip long Kamapim Tok Hait 15:3, 4 i tok: “God, Bikpela I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu.” Jehova i bihainim tok promis bilong em na em i “raitim wanpela buk i gat nem bilong ol manmeri i save stap aninit long Bikpela na i tingting long em oltaim.” Bai em i givim gutpela pe long ol—bai ol i kisim laip i stap oltaim oltaim.—Malakai 3:16; Kamapim Tok Hait 20:12, 15.
Pasin Bilong Pret Long God, Dispela Pasin i Win
4. Jehova i bin helpim husat long bipo na dispela i mas strongim yumi na bai yumi pret long Jehova?
4 Taim ol Israel i lusim Isip na wokabaut i go, Moses i kamapim klia olsem em i pret long Jehova. I no longtaim na ol Israel i stap olsem kalabus namel long Solwara Retsi na bikpela lain ami bilong Isip. Ol i ken mekim wanem? Orait, Moses i tokim ol olsem: “Maski pret. Sanap strong na nau bai yupela i lukim olgeta samting Bikpela i laik mekim bilong helpim yupela. Nau yupela i lukim ol dispela Isip, tasol bihain bai yupela i no inap lukim ol gen. Harim. Bikpela bai i pait bilong helpim yupela. Tasol yupela yet i no ken mekim wanpela samting. Yupela i mas stap isi tasol.” Jehova i wokim mirakel na brukim wara na ol Israel i wokabaut long graun i drai. Bihain wara i pas bek gen long ples bilong en na ami bilong king bilong Isip i bagarap olgeta. Jehova i helpim dispela lain ol i pret long em na em i kisim bek ol long han bilong ol birua. Na taim em i mekim olsem, em i givim strafe long ol Isip, em ol i bagarapim nem bilong em. Olsem tasol long nau, bai em i truim tok promis bilong em na ol Witnes bilong em i save pret long em, bai em i kisim bek ol long dispela graun bilong Satan.—Kisim Bek 14:13, 14; Rom 15:4.
5, 6. Wanem ol samting i bin kamap long taim bilong Josua na i kamapim klia olsem yumi mas pret long Jehova na yumi no ken pret long ol man?
5 Ol Israel i lusim pinis Isip na nau Moses i salim 12-pela man bilong lukstil i go long Graun Bilong Promis. Tenpela ol i pret na guria nogut tru taim ol i lukim ol traipela man i stap long dispela ples, na ol i laik pasim ol Israel bai ol i no ken i go insait. Tasol tupela, em Josua na Kalep, i mekim ripot olsem: “Dispela hap graun mipela i bin lukim, em i gutpela tumas. Sapos Bikpela i amamas long yumi, em bai i kisim yumi i go long dispela kantri na givim dispela gutpela graun i gat planti gris long yumi. Yupela i no ken bikhet long Bikpela na yupela i no ken pret long ol manmeri i stap long hap. Long wanem, ol i olsem abus bilong yumi tasol. Yumi no gat hatwok long winim ol. Bikpela i stap wantaim yumi na em i bagarapim pinis ol giaman god i save was long ol. Olsem na maski pret long ol.”—Namba 14:7-9.
6 Tasol ol dispela Israel i pundaun—ol i pret long ol man. Olsem na ol i no go insait na kisim dispela graun God i bin tok promis long givim long ol. Tasol Josua tupela Kalep wantaim ol pikinini bilong ol dispela bikhetman bilong lain Israel, ol i go sindaun long dispela graun i gat planti gris na ol i lukautim ol gaden wain na ol diwai oliv i stap long en. Taim Josua i laik i dai, em i laik mekim laspela tok long lain Israel, olsem na em i singautim ol i kam bung na em i tokim ol: “Yupela i mas lotu long Bikpela na oltaim yupela i mas mekim wok bilong en long olgeta strong bilong yupela.” Na em i tok moa olsem: “Mi wantaim famili bilong mi, mipela bai i lotu long Bikpela tasol.” (Josua 24:14, 15) Dispela tok inap strongim tru bel bilong ol papa na olgeta narapela manmeri i pret long Jehova nau long taim yumi redi long i go insait long nupela taim God bai kamapim, i gat stretpela pasin tasol i stap long en!
7. Devit i tok wanem na em i kamapim klia olsem i bikpela samting long yumi mas pret long God?
7 Wanpela manki bilong lukautim ol sipsip, em Devit, taim em i laik pait wantaim Goliat long nem bilong God, em tu i kamapim klia olsem em i pret long God Jehova. (1 Samuel 17:45, 47) Taim Devit i lapun pinis na em i laik i dai, em inap tok olsem: “Spirit bilong Bikpela i autim tok long maus bilong mi. . . . God bilong yumi Israel i olsem bikpela ston na i save banisim yumi. Em i tokim mi olsem: King i mas i stap aninit long God na bosim ol manmeri long stretpela pasin. Sapos em i mekim olsem, orait ol manmeri bai i amamas long em olsem ol i save amamas long san i lait gut long moning na i no gat klaut i pasim lait bilong en.” (2 Samuel 23:2-4) Ol bos bilong dispela graun i no bin pret na aninit long God, olsem na bikpela hevi tru i bin kamap long graun! Tasol narapela kain pasin tru bai kamap taim Jisas, em “Pikinini Bilong Devit,” i bosim graun, long wanem, em i save pret na aninit long Jehova!—Matyu 21:9.
Pret Long Jehova na Mekim Wok
8. Taim Jehosafat i bosim ol Juda, olsem wanem na ol i stap gutpela? Dispela i makim wanem samting long nau?
8 Devit i dai pinis na klostu 100 yia bihain Jehosafat i kamap king long Juda. Em tu i wanpela king i save pret long Jehova na mekim wok. Em i kirapim ol Juda long bihainim gen ol lo bilong Jehova, na em i putim ol jas long narapela narapela hap bilong mekim kot. Em i tokim ol dispela jas: “Yupela i mas was gut long pasin yupela i mekim long taim yupela i harim na skelim kot bilong ol manmeri, long wanem, yupela i no mekim wok bilong man. Nogat. Yupela i mekim wok bilong Bikpela. . . . God, Bikpela bilong yumi, i no laikim tru pasin bilong paulim kot na pasin bilong helpim ol wantok tasol na pasin bilong larim ol man i grisim yupela long mani samting. Olsem na yupela man bilong harim kot i mas aninit tru long Bikpela na was gut long pasin bilong yupela.” (2 Stori 19:6-9) Ol dispela jas i pret na aninit long Jehova na dispela pasin i helpim ol Juda, na olsem tasol gutpela wok ol wasman bilong nau i mekim long pasin sori em i helpim lain bilong God.
9, 10. Jehosafat i pret long Jehova na em i win olsem wanem?
9 Tasol i gat sampela birua bilong ol Juda i stap. Ol i pasim tok long pinisim dispela lain bilong God. Ol ami bilong Amon na Moap na Maunten Seir i bung wantaim na ol i kam long hap bilong Judia na i laik kirapim pait long Jerusalem. Em bikpela lain ami tru. Olsem na Jehosafat i beten askim Jehova long helpim ol na “olgeta man bilong Juda wantaim ol meri na pikinini bilong ol i sanap long ai bilong Bikpela.” Jehova i harim beten bilong Jehosafat na em i givim spirit bilong em long wanpela Livai, nem bilong em Jahasiel, na dispela man i tok: “King Jehosafat na yupela ol manmeri bilong Jerusalem na bilong olgeta hap bilong Juda, yupela harim gut. God, Bikpela i tok, yupela i no ken bel hevi na pret tumas long dispela bikpela lain ami. Nogat. Dispela pait em i samting bilong God tasol. I no samting bilong yupela. Tumora bai ol birua i kam . . . Na yupela i mas i go na bai yupela i bungim ol . . . tasol bai yupela yet i no inap pait. Nogat tru. . . . bai yupela i mas sanap na lukluk tasol, na bai yupela i lukim Bikpela i helpim yupela na winim pait. Yupela ol manmeri bilong Jerusalem na bilong olgeta hap bilong Juda, yupela i no ken bel hevi na pret. Tumora yupela i mas i go bilong pait, na Bikpela bai i stap wantaim yupela.”—2 Stori 20:5-17.
10 Tumora ol man bilong Juda i kirap long moningtaim tru. Ol i laik bihainim tok na i go bungim ol birua, na nau Jehosafat i kirap sanap na em i tok: “Yupela ol man bilong lain Juda na bilong taun Jerusalem, harim. Yupela i mas bilip strong long God, Bikpela bilong yumi, na bai yupela inap sanap strong. Na yupela i mas bilipim tok bilong ol profet bilong God na bai yupela i win.” Ol man bilong mekim singsing bilong litimapim nem bilong Jehova ol i wokabaut i go pas long ol soldia, na ol i mekim singsing na tok olsem: “Yumi mas tenkyu long Bikpela, long wanem, oltaim em i save laikim yumi tumas.” Jehova i laikim ol tumas, olsem na em i mekim na ol birua i longlong nabaut na ol i pait long ol yet inap olgeta i bagarap. Ol soldia bilong Juda i go kamap long wanpela haus long dispela ples drai, em haus bilong ol soldia i save stap na was long ol birua, na ol i kirap nogut long lukim olgeta birua i dai pinis na bodi bilong ol tasol i slip nabaut long graun.—2 Stori 20:20-24.
11. Long pasin bilong pret, olsem wanem ol lain bilong dispela graun i narapela kain long lain bilong God?
11 Taim ol lain klostu i harim stori bilong dispela mirakel Jehova i wokim bilong kisim bek lain bilong em long han bilong ol birua, ol “i pret tru.” Tasol dispela lain ol i pret long God na bihainim tok bilong em, ol i stap gutpela “na i no gat pait moa i kamap long taim Jehosafat i stap king.” (2 Stori 20:29, 30) Olsem tasol, long taim Jehova i givim strafe long ol lain man long Armagedon, ol dispela lain bai i pret tru long God na long dispela Man em i makim bilong kilim i dai ol birua, em Pikinini bilong em, Krais Jisas. Bai ol i no inap abrusim strafe long dispela bikpela de bilong God i kamapim belhat bilong em.—Kamapim Tok Hait 6:15-17.
12. Long bipo Jehova i bin givim wanem gutpela pe long ol man i pret na aninit long em?
12 Pasin bilong pret na aninit long Jehova i gat gutpela pe bilong en. Noa “i bilipim tok bilong God na em i wokim wanpela sip. Na em wantaim meri pikinini bilong en ol i go insait long sip na . . . ol i no bagarap.” (Hibru 11:7) Na Baibel i stori long ol man i mekim nogut long ol Kristen bilong pastaim na i tok, bihain “ol i stap gut. Ol arapela man i no mekim nogut long ol, na [kongrigesen] i kamap strong. Ol i bihainim pasin bilong aninit long Bikpela, na Holi Spirit i strongim bel bilong ol. Na planti manmeri i kam insait long [kongrigesen]”—olsem i kamap long hap bilong Isten Yurop long nau.—Aposel 9:31.
Laikim Tumas Gutpela Pasin, Nolaik Tru Long Pasin Nogut
13. Yumi mas mekim wanem na bai yumi inap kisim blesing long Jehova?
13 Jehova em i gutpela olgeta. Olsem na “man i save [pret] long Bikpela, em i no save laikim tru ol pasin nogut.” (Sindaun 8:13) Baibel i stori long Jisas olsem: “Yu save laikim stretpela pasin, na yu no laikim tru pasin nogut. Olsem na God bilong yu yet em i bin kapsaitim wel long yu, bilong makim yu olsem man i gat biknem. Na dispela i mekim yu i amamas moa yet.” (Hibru 1:9) Sapos yumi laik kisim blesing long Jehova olsem Jisas i bin kisim, yumi tu yumi mas nolaik tru long pasin nogut, na pasin pamuk, na pasin pait, na pasin mangal bilong ol bikhetman bilong dispela graun Satan i bosim. (Lukim Sindaun 6:16-19.) Yumi mas laikim tru ol samting Jehova i laikim, na yumi mas nolaik tru long ol samting em i no laikim. Yumi mas pret long mekim pasin Jehova i no laikim, nogut em i kros long yumi. Baibel i tok: “Sapos man i [pret] long Bikpela, orait dispela man inap abrusim pasin bilong sin.”—Sindaun 16:6.
14. Olsem wanem Jisas em i gutpela piksa bilong yumi?
14 Jisas i bin makim gutpela pasin yumi ken bihainim, na yumi mas bihainim gut lek bilong em. “Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat. Em i putim em yet long han bilong God, em dispela Jas i save skelim stret olgeta samting.” (1 Pita 2:21-23) Sapos yumi pret na aninit long Jehova, bai yumi inap sanap strong na karim olgeta hevi bilong ol tok nogut na tok bilas na pasin nogut em lain bilong Satan i mekim long yumi.
15. Bilong wanem yumi mas pret long Jehova na yumi no ken pret long ol man ol inap kilim bodi tasol?
15 Long Matyu 10:28 Jisas i givim strongpela tok long yumi olsem: “Yupela i no ken pret long ol man i save kilim i dai bodi, tasol ol i no inap kilim spirit [strong bilong i stap laip] bilong yupela. Nogat. Yupela i mas pret long God tasol. Em inap bagarapim spirit na bodi tu long [Gehena].” Sapos ol birua i kilim i dai wanpela man i save pret long Jehova, em samting nogut tru, tasol em bilong liklik taim tasol. (Hosea 13:14) Taim dispela man i kirap bek long matmat, bai em inap tok olsem: “Dai, we stap strong bilong yu long daunim ol man? Dai, we stap spia bilong yu bilong bagarapim ol man?”—1 Korin 15:55.
16. Jisas i bin mekim wanem na em i pret long Jehova na litimapim nem bilong em?
16 Jisas yet i stap olsem gutpela piksa bilong olgeta manmeri i laikim tumas stretpela pasin bilong Jehova na ol i nolaik tru long pasin nogut. Laspela tok Jisas i givim long ol disaipel i kamapim klia olsem em i save pret na aninit long Jehova. Long Jon 16:33 em i tok: “Mi laik bai yupela i pas long mi na bai yupela i stap bel isi, olsem na mi bin mekim dispela tok long yupela. Long taim yupela i stap long dispela graun, ol hevi bai i kamap long yupela, tasol bel bilong yupela i ken i stap strong. Mi winim pinis strong bilong dispela graun.” Jon i stori moa olsem: “Jisas i autim tok pinis long ol disaipel, na em i lukluk i go antap long heven, na em i tok olsem, ‘Papa, taim i kamap pinis. Nau yu ken givim biknem long Pikinini bilong yu, olsem na bai Pikinini i ken givim biknem long yu. . . . Mi autim pinis nem bilong yu long ol man yu bin givim mi long dispela graun.’ ”—Jon 17:1-6.
Pret Long Jehova na Litimapim Nem Bilong Em
17. Yumi ken mekim wanem na bai yumi bihainim pasin bilong Jisas?
17 Olsem wanem? Long nau yumi inap sanap strong olsem Jisas i bin mekim na yumi no ken pret long ol man? Yumi inap mekim sapos yumi pret long Jehova! Jisas i bin lainim yumi long bikpela nem bilong Jehova na long ol gutpela pasin bilong em. Yumi pret na aninit long Jehova, em King na Nambawan Bikpela bilong yumi, olsem na yumi litimapim nem bilong em i go antap tru, winim nem bilong olgeta narapela god na dispela God Triwan i no gat nem bilong en, em bilong ol misin ol i kolim Kristen. Jisas i pret na aninit long Jehova na mekim wok bilong Em; em i no larim pasin bilong pret long ol man bilong dispela graun i kalabusim em. “Taim Jisas i stap man long graun, em i save mekim prea na beten long God. Em i save, God inap long kisim bek em, na em i no [ken] dai, olsem na em i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em.” Olsem Jisas i bin mekim, yumi tu yumi mas pret na aninit long Jehova, na ol hevi yumi karim i mas skulim yumi long pasin bilong bihainim tok bilong God—na yumi ken wet long kisim laip i stap oltaim.—Hibru 5:7-9.
18. Olsem wanem yumi ken pret na lotu long God long pasin em i laikim?
18 Long dispela pas Pol i raitim long ol Kristen bilong lain Hibru, Pol i raitim sampela tok moa na em i tok strong long ol Kristen em God i bin makim, olsem: “Dispela kingdom yumi [bai] kisim, em i no inap guria. Olsem na yumi mas tenkyu long God long em i bin givim dispela kingdom long yumi. Na yumi mas lotu long em long pasin em yet i laikim. Na yumi mas litimapim nem bilong em na pret long em na aninit long em.” Long nau ‘bikpela lain’ tu ol i lotu olsem long God. Ol i mekim wanem na ol i lotu long God long pasin em yet i laikim? Pol i stori long pasin marimari God i bin mekim, olsem em i bin givim Pikinini bilong em, Krais Jisas, olsem ofa, na bihain Pol i tok: “Olsem na oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” (Hibru 12:28; 13:12, 15) Yumi pilim tru marimari bilong Jehova, na dispela i mas kirapim yumi long laik tru long lusim planti aua, inap tru long skel bilong yumi, long mekim wok bilong em. I gat liklik hap lain bilong ol Kristen God i bin makim em ol i stap yet long graun, tasol ol poroman bilong ol i bikpela lain, na long nau dispela bikpela lain ol i mekim bikpela hap wok long litimapim nem bilong God. Ol manmeri bilong ‘bikpela lain’ i save tokaut olsem God na Krais i bin kisim bek ol, na long tok piksa i olsem ol i sanap long pes bilong sia king bilong God, na ‘long san na long nait ol i save mekim wok bilong God.’—Kamapim Tok Hait 7:9, 10, 15.
Litimapim Nem Bilong Jehova Oltaim Oltaim
19, 20. Wanem tupela kain pasin bilong pret bai kamap klia long ‘De bilong Jehova’?
19 Bikpela de bilong stretim bek nem bilong Jehova i klostu pinis! Jehova i tok: “Harim gut. Wanpela De bai i kamap na bai paia i kukim olgeta manmeri bilong bikhet na olgeta manmeri nogut, olsem paia i save kukim kunai i drai. Long dispela De bai ol i bagarap long paia na bai ol i pinis olgeta. Dispela De bilong mi em i bikpela De na bai mi mekim olgeta manmeri i pret nogut tru.” (Malakai 4:1, 5) Ol manmeri nogut bai ol i “pret nogut tru,” na ol dispela manmeri “bai i no inap abrusim dispela samting.”—Jeremaia 8:15; 1 Tesalonaika 5:3.
20 Tasol narapela kain pret i kirapim lain bilong Jehova long mekim wok. Ensel i gat “gutnius bilong i stap oltaim oltaim” em i singaut strong long ol na i tok: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em.” (Kamapim Tok Hait 14:6, 7) Taim yumi lukim strafe bilong dispela kot i painim lain bilong Satan na paia bilong Armagedon i bagarapim ol, bai yumi pilim tru strong bilong God na bai yumi litimapim nem bilong em. Stretpela pasin bilong pret long Jehova bai pas long bel bilong yumi inap long olgeta taim bihain. God i mas mekim gut long yumi na bai yumi inap abrusim bagarap na i stap wantaim ol man ‘i bin singaut long nem bilong Jehova na em i kisim bek ol’!—Joel 2:31, 32; Rom 10:13.
21. Sapos yumi pret long Jehova, bihain bai yumi inap kisim wanem ol blesing?
21 Bihain bai yumi kisim ol gutpela blesing, na bai yumi “stap longpela taim”—inap oltaim oltaim! (Sindaun 9:11; Buk Song 37:9-11, 29) Olsem na maski yumi wet long kisim Kingdom long heven o yumi wet long mekim wok bilong Kingdom oltaim hia long graun, yumi mas wok strong yet long nau long pret na aninit long God na mekim wok bilong em. Yumi mas wok yet long litimapim nem holi bilong em. Na bai yumi kisim wanem blesing? Inap long olgeta taim bihain bai yumi tenkyu long God long yumi bin bihainim gutpela tok olsem: “Yupela i mas pret long Jehova!”
Bai Yu Bekim Wanem Tok?
◻ Pasin bilong ‘pret long Jehova’ em wanem kain pret?
◻ Lain bilong God long bipo ol i pret long Em na dispela i bin helpim ol olsem wanem?
◻ Jisas i makim wanem gutpela pasin bilong pret long Jehova na yumi ken bihainim?
◻ Yumi mas mekim wanem na bai yumi inap pret long God na stap gut long em?
[Piksa long pes 18]
Kamapim Tok Hait i stori long ol brata bilong Jisas i mekim “song bilong Moses” em bilong litimapim nem bilong Jehova
[Piksa long pes 20]
Ami bilong Jehosafat ol i pret long Jehova na ol i win
[Piksa long pes 23]
Ol manmeri i pret long Jehova bai ol inap kisim laip i stap oltaim oltaim