Pasin Bilong Laikim Tru Jehova i Kirapim Yumi Long Lotuim Em
“Sapos yumi laikim tru God, orait yumi save bihainim ol lo bilong en.”—1 JON 5:3.
1, 2. Wanem samting i mas kirapim yumi long mekim wok bilong Jehova?
INAP olsem 80 manmeri bilong Japan i go lukim wanpela Haus Kibung bilong ol Witnes Bilong Jehova long Kalifonia, long Amerika. Ausait long haus ol i lukim ol gutpela plaua na diwai, em kain kain pisin i pulap long en, na ol i pilim olsem ol i stap klostu moa long Man bilong wokim ol, em God Jehova. Brata i kisim ol i go raun lukim dispela ples, kwiktaim em i kisim save olsem planti ol i painia. Planti Witnes i laik save, olsem wanem na i gat planti painia long Japan. Olsem na bihain wanpela i givim askim olsem long ol dispela brata sista. Inap liklik hap minit, no gat wanpela i toktok, na nau wanpela yangpela sista namel long ol i kirap na i tok: “Long wanem, mipela i laikim tru Jehova.”
2 Em nau, yumi laikim tru Jehova na dispela samting i kirapim yumi long givim bel long mekim wok bilong em! Tru, sampela ol i no inap mekim wok painia. Winim 4 milion manmeri ol i save autim tok bilong Kingdom na bikpela hap lain bilong ol i no gat rot bilong stretim ol wok samting bilong ol na mekim wok painia. Tasol planti i no gat samting i pasim rot bilong ol, na ol i kirap long mekim. Yumi ol narapela, yumi tu inap “bilip tru long God, na mekim gutpela pasin,” na taim yumi mekim sampela wok bilong kamapim ol disaipel, yumi kamapim klia olsem yumi laikim tru Jehova. (Buk Song 37:3, 4) Na olgeta manmeri i dediket long Jehova na mekim wok bilong em, ol i ken kirapim ol narapela long mekim wok painia, na strongim ol brata sista i mekim dispela wok.—Matyu 24:14; 28:19.
3. Planti man i tok ol i Kristen, olsem wanem ol i narapela kain long ol Witnes Bilong Jehova?
3 Planti man i tok ol i Kristen, tasol ol i no givim bel long lotu. Tasol ol Witnes Bilong Jehova i givim bel tru long God na dispela i kirapim ol long ‘painim kingdom wantaim stretpela pasin bilong God’ na ol i tingim dispela i namba wan samting ol i mas mekim. Ol i mas lusim sampela samting bilong ol yet bambai ol inap mekim olsem, tasol ol i kisim planti blesing! (Matyu 6:33; 16:24) Ol i mekim pasin i stret wantaim namba wan bikpela lo, em Moses i kolim pastaim na Jisas i bin kolim gen, olsem: “[Jehova] em wanpela tasol em i God bilong yumi. . . . Yupela i mas laikim em tru long bel bilong yupela na long spirit bilong yupela na long tingting bilong yupela na long strong bilong yupela.”—Mak 12:29, 30; Lo 6:4, 5.
4, 5. Yumi ken tok husat ol i stap gut long wok bilong God? Yumi ken mekim wanem na bai yumi kamapim klia olsem yumi stap gut long wok bilong God?
4 Presiden bilong Sosaiti Was Taua, em F. W. Franz, em i gat 98 krismas na em i bin mekim wok bilong Jehova long olgeta de, olsem wok painia, winim 70 yia pinis. I no longtaim i go pinis na wanpela brata i wok long namba wan ofis bilong ol Witnes Bilong Jehova i bin tokim em: “Brata Franz, yu stap gutpela piksa long pasin bilong i stap gut long wok.” Na Brata Franz i bekim tok olsem: “Tru yet! Yumi mas i stap gut long wok.” Dispela tok i stret. Maski wanem wanem kain wok bilong Kingdom yumi mekim, yumi mas i stap gut long en.—1 Korin 4:2; Galesia 3:9.
5 Tru, planti ol i gat laik long mekim bikpela wok moa long wok bilong Jehova, tasol ol i gat ol wok bilong skin ol i mas mekim em Baibel i makim bilong ol, o ol i gat sik, olsem na ol i no inap mekim bikpela wok moa olsem ol i laik mekim. Tasol ol brata sista i no inap mekim wok painia, yumi no ken ting ol i no stap gut long wok. Nogat. Sampela ol i bin karim bikpela hevi na mekim wok bilong Jehova inap planti planti yia. Yumi ken tok, tru tumas ol i bin stap gut long wok! Ol i bin kamapim bel bilong ol olsem ol i laikim tru Jehova, na ol i bin wok strong na givim bel long wok gut wantaim oganaisesen bilong em. Ol i bin tingim tru wok bilong ol painia, na ol i bin strongim ol lain ol inap kamap painia long bihain, olsem ol pikinini bilong ol yet, na kirapim ol long mekim dispela wok i gutpela moa, winim olgeta narapela wok, na holim oltaim.—Lukim Lo 30:19, 20.
6, 7. Stori i stap long 1 Samuel 30:16-25 inap makim wanem samting long nau?
6 Stori i stap long 1 Samuel 30:16-25 i kamapim klia wanpela gutpela pasin bilong olgeta manmeri bilong God long nau, em ol i pas gut wantaim long pasin sori na ol i wok gut wantaim. Ol dispela ves i stori long ol Israel i pait wantaim ol Amalek. “Devit wantaim ol soldia bilong en i wet i stap inap long moningtaim tru, na ol i kirapim pait. Na ol i pait long ol Amalek inap long apinun tru,” na ol i kisim planti samting bilong ol Amalek. Taim ol i go bek long kem, sampela soldia i bin go long pait ol i tok, ol i no laik larim ol man i no bin i go wantaim ol i kisim hap bilong ol samting ol i bin kisim long pait. Tasol Devit i bekim tok long ol olsem: “Husat bai i orait long tok bilong yupela? I no gat wanpela man. Yumi mas tilim gut na givim wankain skel long olgeta man. Ol man i stap na lukautim ol kago i mas kisim wankain skel olsem ol man i go long pait.”
7 I wankain long nau. Ol painia i go pas long mekim pait bilong spirit, tasol ol narapela long kongrigesen ol tu i givim bel tru long helpim dispela wok. Olgeta i wok gut wantaim, na lista hia long pes 10-13 i kamapim bikpela wok ol i bin mekim long 1991.
Gutpela Ripot Tru
8. (a) Ripot bilong olgeta hap i makim olsem i gat hamas pablisa, olsem ol man bilong autim tok? Na ol i bin lusim hamas aua long mekim wok bilong Jehova? (b) Yu lukim wanem ol gutpela samting long wok bilong ol kantri i stap long ripot long namba wan taim?
8 Lista hia long dispela 4-pela pes i kamapim klia olsem olgeta manmeri i lotuim Jehova ol i bin wok strong wantaim long mekim wok, olsem na lain bilong ol i go bikpela long olgeta hap long yia 1991. Long namba wan taim i gat 4,278,820 manmeri i autim tok bilong Kingdom—lain i go bikpela inap olsem 6.5 pesen. Ol i bin lusim 951,870,021 aua (klostu wan bilion!) long autim tok. Na lukim bikpela wok ol brata bilong yumi i bin mekim long ol kantri bipo i gat tambu long en—Kamerun, Balgeria, Itiopia, Mosambik, Nikaragua, Ruwanda, Sekoslovakia, ol kantri bilong Rasia—em ripot bilong wok bilong ol i kamap nau long ripot bilong wok long olgeta hap.
9, 10. (a) Maski yumi stap long taim bilong planti hevi, ol painia i bin mekim wanem? (b) I gat wanem samting bilong strongim yumi long kirap mekim wok painia?
9 Inap sampela yia pinis, long olgeta hap bilong graun, planti brata sista i bin kirap long mekim wok painia. Long ol kantri nau tasol gavman i orait long ol man i bihainim wanem wanem lotu ol i laikim, long ol dispela kantri tu lain painia i go bikpela. Maski i gat hevi long ol dispela kantri long kisim wok na kaikai na ol i sot long mani, ol dispela strongpela Witnes i givim olgeta samting bilong ol long mekim wok bilong Jehova. (Lukim 2 Korin 11:23, 27.) Long olgeta mun, long olgeta manmeri i autim tok bilong Kingdom, inap olsem 14 pesen ol i mekim wok painia. Long wanpela mun i gat planti painia tru, inap olsem 780,202. Em gutpela tru! Em inap olsem 18 pesen bilong olgeta pablisa.
10 Ol narapela i lukim ol amamas ol painia i kisim na dispela i strongim ol na ol tu i kirap mekim dispela wok. Sapos nau yu no mekim wok painia, olsem wanem? Yu laikim tru Jehova na dispela inap kirapim yu long tok “Salim mi,” olsem tok i stap long Aisaia 6:8? O sapos yu givim bel long stadi long Baibel, ating ol dispela tok bilong God inap kirapim strongpela laik long bel bilong yu na yu no inap sakim, na bai yu kirap mekim wok painia? Traim na hevi i bin painim Jeremaia, tasol tok bilong Jehova i olsem bikpela paia i stap long bel bilong em, na em i no inap sakim.—Jeremaia 20:9.
Wok Bilong Helpim Ol Man
11. I gat wanem gutpela samting long wok bilong mekim ol Baibel-stadi?
11 Wanpela bikpela samting long ripot bilong dispela yia em olsem: Ol brata i bin mekim planti Baibel-stadi moa. Long olgeta mun ol i bin mekim 3,947,261 Baibel-stadi, no gat pe. Dispela em i wanpela gutpela wok bilong helpim ol man, na ol Witnes Bilong Jehova i save mekim taim ol i autim tok na painim pinis sampela man i laik harim tok. Yumi amamas long mekim ol Baibel-stadi wantaim ol man bilong olgeta kain lain na skin. Yumi givim bel long mekim dispela wok wankain olsem aposel Pol i bin mekim. Em i “autim tok strong long ol Juda na long ol Grik.” (Aposel 20:20, 21) Yumi save em i bin lusim planti aua long lainim ol long tok i tru. Na i wankain long nau tu—ol Witnes Bilong Jehova i save helpim olgeta kain kain man “bai ol i ken save long as bilong tok tru” na God i ken kisim bek ol.—1 Timoti 2:4.
12-14. I gat wanem ol gutpela ripot i kam long hap bilong Yurop?
12 Yumi amamas tru long ripot bilong ol planti Baibel-stadi moa i kamap long hap bilong Isten Yurop! Inap planti yia ol brata bilong yumi long dispela hap i bin bung long ol liklik lain tasol, na i gat wanpela olpela Wastaua tasol bilong olgeta i ken lukim, em planti taim ol i bin stadi long en. Tasol nau planti planti Baibel na ol buk na nius bilong Baibel i go kamap long ol dispela kantri. Dispela i kirapim yumi long tingim tok bilong Song Bilong Solomon 2:4: “Em [Krais Jisas] i kisim mi i go long bikpela kaikai [bilong spirit] long bikpela haus bilong en. Em i laikim mi tumas.” Nau olgeta wan wan i gat ol Wastaua na Kirap! bilong ol yet, na dispela i helpim planti long kamap gutpela wokman na “autim stret tok tru bilong God.”—2 Timoti 2:15.
13 Long dispela taim wanpela kongrigesen long biktaun Sen Pitasbek, long Rasia, i putim ripot na ol i gat planti Baibel-stadi tru, winim 300. Dispela wok bilong ol long mekim ol Baibel-stadi i karim gutpela kaikai—insait long 8-pela mun tasol inap olsem 53 nupela Witnes i bin kisim baptais! Bikpela hap lain bilong dispela kongrigesen, winim 50 pesen, ol i nupela man—ol i bin kisim save long tok i tru insait long 6-8 mun i go pinis! Na i no gat wanpela elda long dispela kongrigesen. I gat wanpela wokman bilong kongrigesen tasol bilong helpim ol long kamap strong.
14 Wanpela sista i save autim tok bilong Kingdom long Estonia em i stadi wantaim wanpela meri, na dispela meri i tok em i laik singautim sampela moa i kam long stadi. Taim sista i kamap long haus bilong dispela meri long wik antap, em i lukim 50 manmeri ol i bung i stap! Sista i stretim rot bilong helpim ol dispela planti manmeri i laik harim tok.
15. Olsem wanem long bikpela lain i kam long bung bilong Memorial na ol manmeri i bin kisim baptais?
15 Planti manmeri i stadi ol i save bung wantaim ol narapela Kristen long namba wan taim long taim bilong tingim i dai bilong Jisas, em taim bilong Memorial. Long 1991, long namba wan taim, winim 10,000,000 ol i bin kam long bung bilong Memorial. Long olgeta hap bilong graun inap olsem 10,650,158 i bin bung long 66,207 kongrigesen long dispela gutpela taim bilong mekim bel bilong yumi i amamas. Long planti kantri long Latin Amerika, na long Afrika, na long Isten Yurop, planti manmeri tru i bung long dispela taim, winim lain pablisa inap 3-pela o 4-pela taim. Nau yumi mas kirap na redi long mekim Memorial bilong dispela yia long Fraide, Epril 17. Mipela i laik bai planti planti nupela Baibel-stadi, em ol i bin kam long Memorial, ol i ken wok long kamap strong na kisim baptais. Long 1991 planti tru ol i bin kisim baptais. Winim 300,000 ol i bin kisim baptais long wara bilong makim ol i dediket long God Jehova.
Ol Man i Laikim Pasin Bilong i Stap Fri Em God i Givim Long Ol
16. Wanem ol gutpela ripot i kam long ol kibung distrik ol i kolim “Ol Man i Laikim Tumas Pasin Bilong i Stap Fri”?
16 Wanpela bikpela samting i bin kamap long yia bilong wok bilong 1991 em ol kibung distrik ol i kolim “Ol Man Bilong Laikim Pasin Bilong i Stap Fri.” Long hap bilong not ol i mekim pinis long 1991, tasol long hap bilong saut ol i mekim i kam inap long kirap bilong yia 1992. Long namba wan taim, ol brata sista long sampela kantri bilong Isten Yurop ol inap harim olgeta tok bilong kibung. Long ol dispela kantri nau ol brata sista bilong yumi i kamap fri, na ol i amamas long mekim wok long dispela fri bilong ol bilong litimapim nem bilong Jehova. Long Oktoba 1991, ol ripot mipela kisim i tok i gat 4,774,937 manmeri ol i bin bung long 705 kibung long 54 kantri.
17, 18. (a) Ol manmeri i lotuim Jehova ol i stap fri olsem wanem long nau? Na ol i wet long i stap fri olsem wanem long bihain? (b) Pasin bilong i stap fri yumi kisim long God, olsem wanem dispela i narapela kain long ol pasin bilong i stap fri em ol man bilong dispela graun i kisim?
17 Jisas i bin tokim ol disaipel bilong em: “Yupela bai i save long tok tru, na tok tru bai i mekim yupela i kamap fri.” (Jon 8:32) Long nau tok i tru bilong Baibel i bin helpim planti milion manmeri long lusim ol tok bilong ol misin i gat nem Kristen na kamap fri. Ol dispela milion milion manmeri i bin kisim save olsem Jehova i bin salim Jisas olsem ofa bilong baim bek ol man, na long dispela rot Jehova “bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru [olsem] ol pikinini bilong God.” (Rom 8:19-22) Bai ol manmeri i stap fri tru—bai ol i stap oltaim long paradais long graun aninit long ol stretpela lo Jehova yet i putim long pasin sori!—Aisaia 25:6-8; skelim wantaim Aposel 17:24-26.
18 Ol Witnes Bilong Jehova i stap fri liklik long nau, na ol i wet long i stap fri tru long nupela taim God bai kamapim. Dispela pasin bilong i stap fri i kam long God. (2 Korin 3:17) God yet i mekim na ol i stap fri—ol i no wetim wanpela wok politik o wok bilong daunim gavman i helpim ol na bai ol i stap fri. Nogat. (Jems 1:17) Bilong kamapim klia dispela samting, long ol kibung long sampela kantri bilong Isten Yurop long 1991 long liklik kat bilong kibung ol Witnes Bilong Jehova i pasim long siot samting bilong ol, i gat rait long en olsem: “Ol Man Bilong Laikim Pasin Bilong i Stap Fri Em God i Givim Long Ol.” Ol i no raitim olsem “Ol Man Bilong Laikim Pasin Bilong i Stap Fri.”
Laikim Tumas Jehova
19. Sapos yumi stap klostu long God long rot bilong beten, dispela inap strongim yumi olsem wanem?
19 Yumi laikim tumas Jehova na bilip tru long em na dispela samting i kirapim yumi long i go klostu long em long rot bilong beten. Yumi pas tru wantaim Jehova na dispela samting i bin helpim ol brata bilong yumi long karim planti hevi na sanap strong. (Buk Song 25:14, 15) Long taim bilong bikpela traim tru bilong Jisas, em i stap klostu long Papa bilong em long rot bilong beten. (Luk 22:39-46) Dispela pasin bilong i stap klostu long Jehova long rot bilong beten i bin strongim Stiven long karim bikpela pen em i bin kisim taim ol birua i kilim em i dai. Taim ol i laik tromoi ston long em na kilim em i dai, em i lukluk i go antap long heven na em i tok: “Harim. Mi lukim heven i op, na Pikinini Bilong Man em i sanap i stap long han sut bilong God.”—Aposel 7:56.
20-22. Stori long samting i bin painim wanpela brata na dispela i makim olsem Jehova i save harim beten bilong yumi?
20 Ol manmeri i lotuim Jehova, taim ol i beten askim em long helpim ol long samting i stret wantaim laik bilong em, em i save harim beten bilong ol na helpim ol. Ol i save pinis long dispela samting, long wanem, planti taim em i bin mekim olsem long ol. Olsem: Long wanpela kantri long Afrika gavman i tambuim wok bilong ol Witnes. Wanpela painia salim long dispela kantri i raun long bas long hap bilong not na em i holim traipela bek i gat ol buk na nius bilong Kingdom i pulap long en na i gat sampela pas bilong givim long ol brata tu. Man i gat wok long putim ol kago long bas i askim brata: “Wanem samting i pulap long bek?” Brata i kolim namba wan samting i kamap long tingting bilong em na em i tok: “Ol pas.”
21 Long rot, bas i spit i go abrusim wanpela ples bilong polis i sekim ol ka na bas samting. Olsem na polis i ranim bas na pasim. Ol i ting i gat sampela kago long dispela bas ol man i laik haitim. Polis i tokim olgeta pasindia long lusim bas i go daun na ol i lukim olgeta switkes na bek samting bilong ol. Olaman! Bikpela hevi inap painim dispela brata nau! Em i lusim ol pasindia, em ol i bung bung na toktok planti namel long ol yet, na em i go liklik na em i brukim skru na beten long Jehova. Taim em i bung gen wantaim ol narapela pasindia, em i lukim ol polis i opim switkes samting bilong olgeta pasindia na lukim gut olgeta samting i stap insait. Taim ol i laik opim bek bilong brata, em i beten long bel na askim Jehova long helpim em.
22 Plisman i laik opim bek em i bikmaus na tok olsem: “Em bek bilong husat? Wanem samting i stap insait?” Brata i laik bekim tok, tasol em i no opim yet maus na man bilong putim ol kago long bas i tok: “Ol pas i stap insait . . . bilong narapela pos ofis . . . i go long narapela pos ofis.” Plisman i tok: “Em i orait,” na em i givim bek long dispela man na tokim em: “Yu lukautim gut.” Brata hia i brukim skru gen na beten tok tenkyu long Man bilong harim beten.—Buk Song 65:2; Sindaun 15:29.
23. Jehova i bin kamapim klia wanem samting? Tasol olsem wanem na sampela taim em i larim ol man i mekim nogut long wanpela wokboi bilong em inap long ol i kilim em i dai tu?
23 Tasol i no olsem hevi i no inap painim ol man i save lotuim Jehova. Nogat. Sampela taim, long taim bilong Baibel na long nau tu, Jehova i bin kamapim klia olsem em inap kisim bek lain bilong em long han bilong ol birua. Tasol bilong stretim bikpela tok olsem ol man inap i stap gut long em o nogat, sampela taim i olsem em i no mekim wanpela samting—em i larim ol man i mekim nogut long ol wokboi bilong em inap long ol i kilim ol i dai tu. (Lukim Matyu 26:39.) Yumi no ken ting Jehova i mas lukautim yumi na birua i no inap painim yumi long rot, na bagarap i no inap painim yumi long taim ol man i kros na kirapim pait long gavman, na hevi bilong pasin raskol i no inap painim yumi. Nogat. Tasol long ol kain taim olsem, sapos yumi bihainim gutpela tingting olsem i stap long Baibel, dispela inap helpim yumi. (Sindaun 22:3; Saveman 9:11) Yumi ken bilip tru olsem, maski God i kisim bek yumi long hevi o nogat, sapos yumi stap gut long em, bai yumi kisim gutpela pe. Na sapos yumi dai tu, bai yumi kisim gutpela pe—bai God i kirapim bek yumi.—Matyu 10:21, 22; 24:13.
24. Jehova i laikim tru yumi na em i bin givim wanem ol gutpela presen long yumi? Yumi ken mekim wanem bilong kamapim klia olsem yumi pilim tru gutpela pasin sori em i mekim?
24 Jehova i givim ol gutpela presen tru long yumi! Em i givim dispela graun long yumi ol manmeri na olgeta samting i stap long en. Dispela i kamapim klia olsem em i laikim yumi tru. (Buk Song 104:1, 13-16; 115:16) Na God i sori long yumi na givim Pikinini bilong em long yumi, em Krais Jisas, bilong baim bek yumi long sin na i dai. Em nambawan gutpela presen tru God i givim long yumi, winim ol narapela. Baibel i tok: “God i gat wanpela Pikinini tasol, na em i salim dispela Pikinini i kam long graun, bai yumi kisim laip long em. Long dispela pasin God i soim yumi olsem em i laikim yumi tru. Pasin bilong laikim ol arapela, em i pasin bilong God. Yumi no ken ting, yumi bin laikim God pastaim. Nogat. God i laikim yumi pastaim. Olsem na em i bin salim Pikinini Man bilong en i kam long graun bilong lusim ol sin bilong yumi.” (1 Jon 4:9, 10) Sapos yumi pilim tru dispela bikpela pasin sori God i mekim, orait yumi mas bilip tru olsem “dai o laip, o ol ensel o ol strongpela spirit, o samting nau i stap o samting bai i kamap bihain, o kain kain samting i gat strong, o samting bilong antap o samting bilong daunbilo, o ol arapela samting i stap nabaut, dispela olgeta i no inap pasim [sori] bilong God, em dispela [sori] em i givim yumi long Krais Jisas, Bikpela bilong yumi.”—Rom 8:38, 39.
Kamapim Gen Ol Bikpela Tok
◻ Man i mas mekim wanem na em i stap gut long wok?
◻ Yumi ken mekim wanem ol wok na bai yumi kamapim klia olsem yumi laikim tru Jehova?
◻ Yu laikim tru wanem ol gutpela samting long ripot bilong yia bilong wok?
◻ Yumi ken mekim wanem na bai yumi kamapim klia olsem yumi pilim tru ol gutpela presen Jehova i givim long yumi?
[Blok long pes 15]
BILONG WANEM I GAT PLANTI PAINIA?
Ol man i tok, inap olsem 2,600 yia ol Japan i bin givim bel tru long lotuim ol king bilong ol, ol i kolim empera. Long ol bikpela pait long taim bilong yumi, winim 3 milion soldia bilong Japan i bin givim laip bilong ol olsem ofa bilong helpim dispela king em olsem god bilong ol—ol i ting em rot bilong kisim biknem tru. Tasol wok ami bilong lotu Buda na Sinto i lus long Namba 2 Pait Bilong Olgeta Hap, olsem na bihain king i tokaut olsem em i no wanpela god. Nau bai ol i lotuim wanem god? Ol Witnes Bilong Jehova long Japan, ol misineri na ol Japan yet, ol i bin helpim planti manmeri long kisim save long God tru, em Jehova, na ol i dediket long em. Ol dispela Witnes long Japan i save tingim tru dediket bilong ol. Sapos bipo ol i redi long givim laip bilong ol bilong lotuim king olsem god bilong ol, orait nau ol i redi moa yet long givim olgeta strong bilong ol long mekim wok painia na lotuim God i gat laip, em Man bilong wokim olgeta samting, em Nambawan Bikpela Jehova!
[Sat long pes 10-13]
RIPOT BILONG WOK BILONG OL WITNES BILONG JEHOVA LONG 1991
(Bilong save ol dispela rait i stap we long pes, lukim buk o magasin)
[Piksa long pes 16]
Ol man i laikim pasin bilong i stap fri em God i givim long ol—ol man i lotuim Jehova ol i kibung long Prak, long Ogas 9-11, 1991