Yu Inap Mekim Sampela Wok Moa Bilong Givim Biknem Long Jehova?
Namba Wan Hap
1 Em wanpela bikpela askim yumi olgeta i mas tingim. Yumi ol man i bihainim Bikpela bilong yumi, Jisas Krais, long nau yumi givim biknem long God bilong yumi taim yumi tokaut long nem bilong em long olgeta man. Yumi mas mekim dispela wok sapos yumi laik God i ken amamas long yumi. (Mk 13:10; Lu 4:18; Ap 4:20; Hi 13:15) Em wanpela gutpela wok tru yumi kisim—yes, dispela wok i apim nem bilong yumi tu—em dispela wok bilong bringim gutnius i go long ol “sipsip” i stap yet nabaut, na bai ol i gat rot long kam insait long bikpela lain sipsip bilong Jehova!—Jo 10:16.
2 Olsem wanem? Yu na ol pikinini bilong yu, yupela inap long mekim bikpela wok moa bilong givim biknem long Jehova? Long olgeta hap bilong graun namba bilong ol brata na sista i kirap mekim wok painia i go antap moa moa yet. Long Amerika long mun Epril 1992 inap 172,145 i insait long wok painia salim o painia oltaim o painia haptaim. Long Papua Niugini 464 i bin insait long ol dispela wok painia long April 1992. Olsem wanem? Yu yet yu bin tingting strong long mekim wok painia? Yu save kirapim ol pikinini bilong yu long makim wok painia olsem wok bilong ol long bihain?
3 Gutpela yu ken skelim bel bilong yu, yu gat wanem tingting long wok painia. Sapos yumi toktok long wok painia wantu yu save kisim tingting olsem, yu no inap mekim wok painia, long wanem sindaun bilong yu i no gutpela long mekim dispela wok? Tru, yumi olgeta i no inap long mekim wok painia. Ol wok Baibel i tok yumi mas mekim na sampela ol narapela samting i pasim rot na planti i no inap mekim wok autim tok long olgeta de. (1 Ti 5:8) Tasol olsem wanem? Yu bin tingting na beten long dispela samting? Yu bin toktok wantaim famili bilong yu na bai wanpela bilong famili i ken mekim wok painia? Tok bilong Wastaua bilong Julai 1, 1983 long pes 25 i kirapim tingting bilong yumi olsem: “Tru tumas, olgeta wokman Kristen i mas beten na tingim gut dispela samting, olsem: Mi inap mekim wok painia? Wanpela brata na meri bilong em long Saut Afrika tupela i bin mekim wok painia inap 15 yia pinis, tupela i tok: ‘Bilong wanem mipela i mekim wok painia? Long wanem, sapos mipela i no mekim, bai mipela i tok wanem long Jehova?’ Planti brata sista, em ol i no mekim wok painia, gutpela sapos ol i askim skin bilong ol yet, olsem: ‘I gat sampela samting tru bilong pasim mi na long ai bilong Jehova i stret na mi no mekim wok painia?’ ”
4 Narapela Wastaua i stori tu long dispela samting i mekim dispela tok: “Yumi no ken giamanim yumi yet. Yu save tok: ‘Bel i gat laik bilong mekim samting, tasol bodi em i no gat strong.’ Tasol olsem wanem? Bel i gat laik tru long mekim? Yumi no ken larim sin i stap long skin bilong yumi i pasim yumi na yumi no mekim ol wok bilong spirit.”—w78-E 8/15 pes 23.
5 Papamama i Laik Pikinini Bai Kamap Gutpela: Sindaun 15:20 i tokim yumi: “Sapos pikinini man i gat gutpela tingting na save, orait papamama bilong en i save amamas.” Tru tumas ol papamama Kristen i amamas taim ol pikinini man na pikinini meri bilong ol i givim bel long mekim wok bilong Jehova. Tasol ol pikinini bilong yu i no kirap nating long bihainim gutpela rot olsem. Pasin bilong dispela graun i gat bikpela strong long pulim ol. Pikinini bilong yu i save kisim wankain tingting olsem bilong yu. Olsem na sapos olgeta taim yu toktok long ol gutpela blesing bilong wok painia, na sapos yu tokim ol yangpela bilong yu long poromanim ol gutpela painia, na sapos yu bilip tru wok painia em i nambawan gutpela wok ol pikinini bilong yu i ken mekim long bihain, dispela gutpela tingting bai kirapim na stiaim tingting bilong ol pikinini bilong yu. Yu mas helpim ol na bai ol i gat laik long kisim gutpela nem long ai bilong Jehova, na bai ol i mas save dispela i winim gutpela nem long ai bilong ol man.
6 Yupela ol yangpela, Sindaun 22:1 i tokaut klia long samting yupela i mas kisim: “Sapos ol man i ting yu gutpela man na ol i givim biknem long yu, orait dispela i winim tru olgeta mani samting bilong ol maniman.” Bai yu kisim wanem kain nem? Tingim ol man na meri Baibel i stori long ol em ol i kisim gutpela nem long God, long wanem ol i givim bel tru long mekim wok bilong em. Tingim Luk, dispela dokta ol i laikim tumas, na Inok em pren tru bilong God. Samuel i kisim gutpela skul tru taim em i kirap wok long haus lotu sel bilong Jehova taim em i liklik yet. Yu ting ol dispela gutpela wokboi bilong God i bel hevi, long wanem ol i bin kirap na mekim wok bilong God? Nogat, a? Ol i bin stap amamas tru na mekim planti gutpela wok. Oltaim Jehova bai amamas long ol!—Sng 110:3; 148:12, 13; Snd 20:29a; 1 Ti 4:8b.
7 Taim ol pikinini i kamap gutpela, papamama bilong ol i amamas tru. Wok bilong ol long skulim na stretim na lainim ol dispela “presen” God i givim i no lus nating, nogat. (Sng 127:3) Sapos pikinini man o meri i givim bel tru long givim biknem long Jehova papamama i ken amamas tru. I no gat wanpela samting i winim dispela amamas. Planti yangpela long nau i bihainim pasin bilong Luk, Inok, na Samuel, olsem wanpela pas i soim yumi: “Mi gat 16 krismas. Mi bin kirap mekim wok painia 9-pela mun bihain long de mi kisim baptais na mi kisim planti blesing long Jehova. . . . Wok painia i helpim mi long skul tu. Bipo ol wanskul i tok bilas long mi, long wanem mi wanpela Witnes. Tasol nau mi save givim bel long mekim stadi bilong mi yet, olsem na ‘sapos wanpela man i sutim tok long mi’ mi inap bekim tok long em.”
8 Kisim Skul Inap Long Mekim Wok Bilong God: Nau yumi ken skelim ol samting bilong kisim gutpela skul. Yumi mas bihainim stretpela tingting long dispela samting. Nem bilong wanpela hap bilong Wastaua bilong Novemba 1, 1992 i olsem: “Skul i Gat As Bilong En.” Aninit long het-tok “Kisim Save Inap Long Yumi Mekim Wok” ol i mekim dispela tok: “Ol Kristen i mas lukautim ol yet long ol samting bilong skin, na ol painia tu. (2 Tesalonaika 3:10-12) . . . Yangpela Kristen i mas skul inap hamas yia? . . . Sapos em i wanpela painia. . . em i ken tingim hamas pe inap long em? Ating em i mas i gat wanpela wok bilong skin na bai em i ken winim liklik mani, nogut ol narapela man i mas lukautim em long kaikai samting na dispela i ‘givim hevi’ long ol.—1 Tesalonaika 2:9.”
9 Sapos dispela yangpela i laik mekim wok painia i mas kisim sampela skul moa bilong mekim wok painia, Wastaua bilong Novemba 1, 1992 i tok olsem: “Sapos yangpela Witnes i laik stadi na kisim sampela skul moa, i gutpela sapos em i ken mekim dispela samting long haus bilong papamama, na em i ken bihainim yet ol pasin Kristen, na go long ol miting, na autim tok.”
10 Wanpela yangpela bilong Afrika i gat 22 krismas i mas i go long wanpela skul vokesenel, tasol long bel na tingting bilong em, em i laikim wok painia. Taim em i stap long skul vokesenel em i kirap mekim wok painia haptaim. Ol wanskul bilong em i tok bilas long em na ol i tok, em bai lus long winim skul. Olgeta taim em i bekim tok long ol olsem: “Mi mas wok pastaim long painim kingdom bilong God wantaim stretpela pasin bilong em.” Em i bosim gut skin bilong em na olgeta de em i kirap long bikmoning tru na em i stadi inap 2-pela aua bilong redi gut long skul, na long apinun em i autim tok taim skul i pinis. Olgeta man i stap long dispela skul i kirap nogut taim dispela yangpela i kamap namba 3 long wanpela bikpela tes bilong painim ol nambawan sumatin bilong dispela skul. Sumatin i kamap namba 2 em wanpela yangpela dispela painia i mekim Baibel-stadi wantaim em long skul. Na sumatin i kamap namba wan em wanpela narapela yangpela Witnes i save givim bel long wok bilong God.
Yu Inap Mekim Sampela Wok Moa Bilong Givim Biknem Long Jehova?
(Namba 2 Hap)
1 Ol elda bilong kongrigesen i amamas long gutpela wok ol painia i mekim na ol i strongim tru ol dispela wokboi bilong God. Ol elda i amamas long mekim olsem, long wanem, ol i save ol strongpela painia i olsem wanpela blesing long kongrigesen. Taim ol painia i mekim wok painia oltaim inap wanpela yia pinis bai ol inap long i go long Skul Bilong Wok Painia. Dispela skul i bin helpim ol painia na bai ol inap mekim gut tru wok bilong ol. Ol painia i go pas tru long wok bilong yumi na ol tu i mas i gat man bilong strongim ol. Ol elda i mas tingim dispela na strongim ol.—1 Pi 5:1-3.
2 Ol elda i ken mekim wanem bilong kirapim ol brata sista long wok painia? Ol i ken tingting long husat husat inap long kisim dispela gutpela wok. Ol elda i ken toktok wantaim ol brata na sista em sindaun bilong ol i gutpela bilong mekim wok painia, em ol brata na sista ol i mekim wok painia haptaim inap planti taim pinis, na ol brata i kisim pensen, na ol meri i no mekim wok mani, na ol sumatin. Ol i no ken strong long ol, na subim ol long dispela wok, tasol sampela i gat laik long mekim dispela wok na sapos yumi strongim ol bai ol i ken luksave ol i inap long mekim wok painia.
3 Taim ol elda i strongim ol brata sista i laik putim aplikesen bilong wok painia ol i ken tingim tok bilong Wok Kingdom, em i tok, ol brata sista i laik mekim wok painia oltaim i no olsem ol i mas mekim wok painia haptaim inap sampela mun pastaim bilong kisim dispela wok. (km-E 8/86 insert, pars. 24-26) Tasol ol elda i mas save dispela brata o sista i putim aplikesen bilong mekim wok painia em bai inap long winim ol aua bilong ol painia.
4 Taim Komiti Bilong Lukautim Wok Bilong Kongrigesen i orait long dispela pepa na kuskus bilong kongrigesen i lukim olgeta tok i stap stret long en ol i mas salim i go long Sosaiti.
5 Kuskus i mas toksave long ol narapela elda sapos ol painia i gat sampela hevi. Long ol kongrigesen i gat planti painia dispela em bikpela samting. Long mun Ogas bilong olgeta yia ol elda i mas skelim wok bilong ol painia taim ol i raitim Ripot Bilong Skelim Wok Bilong Kongrigesen (S-10-MP). Gutpela sapos long kirap bilong mun Mas kuskus i ken bung wantaim wasman bilong wok autim tok na ol i ken skelim husat bilong ol painia i sot long winim ol aua na ol i mas helpim ol. Sapos wantu ol i kirap na helpim dispela painia ating bai em inap long winim yet ol aua long dispela yia bilong wok.
6 Planti ol nupela painia i yangpela yet na ol i nupela liklik long tok i tru. Ol i givim bel tru na dispela i mekim yumi amamas! Tasol ol dispela nupela painia i mas kisim sampela skul moa long pasin bilong autim tok long ol haus na long mekim ol gutpela gobek na lainim gut ol Baibel-stadi. Sapos yumi no helpim ol, ating bihain long wanpela yia samting bai nupela painia hia i no amamas, long wanem, em i no lukim gutpela samting i kamap long wok bilong em, na em i laik pinis long mekim wok painia. Sapos ol elda i was gut bai ol i luksave taim wanpela painia i gat liklik hevi o wok bilong em i go slek. Sapos wantu ol i helpim em, ating bai em i ken stap amamas inap planti yia long wok painia.
7 Yu Inap Painim Pis Long Ol Wara i Stap Longwe? Sampela disaipel bilong Jisas ol i man bilong painim pis. Sampela taim ol i bin wok long painim pis inap nait olgeta, tasol ol i no kisim wanpela pis long umben bilong ol. (Jo 21:3) Long planti teritori bilong graun, wok bilong ‘kisim pis’ i stap nau inap planti yia na sampela painia i ting i no gat planti ‘pis’ moa long ‘wara’ bilong kongrigesen bilong ol. (Mt 4:19) Tasol yumi kaunim planti ripot i kam long ol narapela narapela kantri ol i tok ol pablisa na painia i lukautim planti Baibel-stadi, na yumi amamas tru long dispela, laka? Amamas ol painia na misineri i kisim long ol dispela hap i stap ples klia. (w92 9/1 pes 20, par. 15) Olsem na sapos i gat sampela painia i save wok strong na ol inap long go long wanpela kantri i no gat planti Witnes long en bai ol i mas toktok pastaim wantaim bres-ofis.
8 Ating pastaim sampela i kirap mekim wok painia, long wanem ol i bin save i stret ol i mas mekim dispela wok, tasol ol i no bin save ol bai inap long mekim o nogat. Ating ol i tingting planti taim ol i putim aplikesen. Na ating taim ol i kirap mekim wok painia wok bilong ol i kamapim liklik kaikai tasol. Tasol bihain ol i kisim save moa na ol i lukim blesing bilong Jehova i stap long wok bilong ol. Olsem na ol i kisim bikpela amamas. Sampela i mekim wok painia na bihain ol i bin kisim wok long Betel o wok misineri o wok wasman bilong raun o ol i bin go long Skul Bilong Lainim Wok Bilong Lukautim Kongrigesen.
9 Ating yu no gat rot long go long narapela kantri o go long skul Gileat, tasol i gat rot bilong yu long kisim pis long narapela wara insait long dispela kantri yet. Planti hap bilong Papua Niugini i sot tru long ol painia. Sapos yu go long kain hap olsem, ating bai yu mas senisim sindaun bilong yu, tasol bai yu kisim planti blesing bilong spirit.—Mt 6:19-21.
10 O sapos sindaun bilong yu i gutpela long mekim, yu ken i go na helpim wanpela kongrigesen klostu long sekit bilong yu yet. Sapos yu winim ol mak bilong mekim olsem, wasman sekit bilong yu bai amamas long tokim yu long sampela kongrigesen i stap long sekit ol i sot long wanpela painia i helpim ol.
11 Sampela painia na pablisa ol i bin mekim gutpela wok moa long hap bilong ol yet. Ating ol i save long narapela tok ples. Yu inap wok long wanpela kongrigesen i gat dispela tok ples na ol i sot long painia? Sapos yumi save long narapela tok ples yumi ken helpim tru wok bilong autim tok bilong Kingdom long ol narapela narapela lain. Sampela taim dispela i hatwok tru, tasol yumi inap kisim planti blesing tu.—1 Ti 2:4; Ta 2:11.
12 Sapos nau yu mekim olgeta samting yu inap long mekim bilong givim biknem long Jehova, orait yu ken amamas long dispela. Sapos yu ting yu inap mekim sampela wok moa, orait beten long Jehova long dispela samting. Tingim sindaun bilong yu na skelim gut yu inap senisim sindaun bilong yu o nogat. Toktok wantaim wanpela elda o wantaim wasman sekit long dispela samting. Taim yu tingting gut na beten pinis na yu pasim tok long samting yu laik mekim orait givim bel long bihainim dispela, na yu ken bilip tru long promis bilong Jehova long givim biknem long ol man i givim biknem long em.—Hi 13:5,6; 1 Sml 2:30.
[Questions for Part 1]
1. (a) Long nau yumi ken mekim wanem gutpela wok tru? (b) Kaunim sampela skripsa i toktok long dispela gutpela wok?
2. Wanem ol bikpela askim yupela ol papamama i mas tingim?
3. (a) Husat inap mekim wok painia? (b) Ating husat i no inap mekim wok painia?
4. Yumi no ken kisim wanem tingitng?
5. (a) Ol papamama Kristen i ken kirapim ol pikinini man na pikinini meri bilong ol long mekim wanem? (b) Ol papamama i ken mekim wanem na bai pikinini i gat laik long kisim gutpela nem long ai bilong Jehova?
6. (a) Wanem bikpela tok i stap long Sindaun 22:1? (b) Kolim sampela ol i bin kisim gutpela nem. (c) Bilong wanem ol i no hevi long samting ol i bin mekim?
7. (a) Ol papamama i amamas long wanem kain pikinini? (b) Wanpela painia i gat 16 krismas i ting wanem long wok painia bilong em?
8, 9. Sapos yu tingting long mekim wok painia 2 Tesalonaika 3:10-12 na 1 Tesalonaika 2:9 i givim wanem gutpela tok long yu?
10. (a) Wanpela brata bilong Afrika i mekim wanem taim em i stap long skul vokesenel? (b) Tupela yangpela Witnes i kisim wanem blesing long gutpela wok bilong ol?
[Questions for Part 2]
1. (a) Bilong wanem ol elda i amamas long strongim ol painia? (b) Kaunim 1 Pita 5:1-3. Dispela tok i kirapim ol elda long mekim wanem?
2. Ol elda i ken mekim wanem bilong helpim ol brata long mekim wok painia?
3, 4. Kuskus na Komiti Bilong Lukautim Wok Bilong Kongrigesen ol i mas mekim wanem long aplikesen bilong mekim wok painia oltaim?
5. (a) Kuskus bilong kongrigesen i gat wanem bikpela wok bilong helpim ol painia? (b) Wanem taim em i mas mekim dispela wok? Bilong wanem em i mas mekim?
6. Olsem wanem yumi ken helpim ol nupela painia? Sapos yumi helpim ol olsem, wanem samting bai kamap?
7, 8. Wanem samting i givim bikpela amamas long ol painia? Na bihain wanem samting i kamap?
9, 10. Maski dispela i senisim sindaun bilong ol, ol painia i ken mekim wanem bilong mekim sampela wok moa bilong kamapim gutpela kaikai?
11, 12. (a) Maski i hatwok, sampela pablisa na painia i bin mekim wanem samting? (b) Taim wanpela Witnes i mekim olgeta samting em i inap long mekim, orait em i mas ting olsem wanem? (c) Hibru 13:5, 6 i tok wanem bilong strongim yumi?