Ol i Litimapim Kingdom long Olgeta Hap Bilong Graun

“O Jehova, yu mekim dispela lain i go bikpela; yu litimapim nem bilong yu yet. Yu mekim graun bilong ol i go bikpela.”​—AISAIA 26:15, NW.

1. (a) Dispela “lain” long nau ol i mekim wanem na ol i truim tok bilong Aisaia 26:2? (b) Dispela lain i mekim wanem na ol i narapela kain long ol lain bilong dispela graun?

JEHOVA i blesim wanem lain na mekim i bikpela? Em “dispela stretpela lain i mekim gutpela pasin.” (Aisaia 26:2) Em dispela lain bilong spirit ol i Kristen tru. “Meri” bilong Jehova, “Jerusalem i stap long heven,” i kamapim dispela lain wantu tasol long yia 1919 long taim bilong yumi. Ol lain bilong dispela graun wantaim ol pris pasto bilong ol, ol i bin insait long Namba Wan Pait Bilong Olgeta Hap bambai ol i ken bosim graun. Tasol “lain” bilong Jehova ol i givim bel olgeta long Kingdom bilong em i stap long han bilong Krais na i kamap long heven long yia 1914. (Galesia 4:26; Aisaia 66:8; Revelesen 11:15-18) Jehova i putim dispela “stretpela lain” long paradais bilong spirit, long ol wok bilong Kingdom. Em i givim wok long ol bilong autim tok long olgeta lain man nau long taim bilong pinis.—Matyu 24:14; 25:31-33.

2. I gat wanem ol samting na dispela “lain” i amamas?

² Ol manmeri bilong dispela lain ol i truim tok bilong song i stap long Aisaia 26:1-6. Ol i go insait long dua i op tru na ol i go klostu long “maunten Saion, na long biktaun bilong God i stap laip. Dispela em i Jerusalem i stap long heven.” (Hibru 12:22) Ol dispela lain bilong mekim wok king long Kingdom ol i amamas long bihainim ol tok bilong dispela song, olsem: “Yupela ol manmeri, yupela i mas bilip long Jehova long olgeta taim, long wanem Ja Jehova em i Helpim bilong yumi inap long taim bihain bihain.” Jehova i “mekim dispela lain i go bikpela” na inapim namba bilong ol, na ol dispela manmeri bilong lain holi ol i litimapim nem bilong Jehova, em i “Helpim” bilong ol na “Nambawan Bikpela King.” Ol i bilip tru olsem nau em i laik mekim olgeta samting em i tok pinis long mekim.—Aisaia 26:15, NW; 25:8.

3. Wanem samting moa i kamap na i givim biknem long Jehova?

³ Long dispela taim nau Jehova i bin mekim ‘graun’ em i bosim i go bikpela. Em i mekim olsem bambai “ol gutpela samting” bilong olgeta lain bilong dispela graun, em ‘bikpela lain manmeri,’ ol i ken insait long lain bilong em. Ol dispela manmeri i mekim ‘biknem i pulap long haus bilong em,’ long wanem ol i litimapim nem bilong em. Ol tu i autim tok long nem na long Kingdom bilong em.—Hagai 2:7, NW; Revelesen 7:9, 15.

Jehova i Mekim Dispela Lain i Go Bikpela long 1982

4. (a) Esikiel 9:1-11 i stori long wanem gutpela pasin ol manmeri long nau i wok long ‘putim mak’ long ol man ol i ken bihainim? (b) Sapos yu putim gut ripot long ol wok yu bin mekim, yu ken amamas olsem wanem?

⁴ Ol Bilong Jehova i givim bel olgeta long helpim wok bilong Kingdom, na 1ong na long olgeta mun ol i save putim ripot long ol wok ol i bin mekim. Ol i save raitim hamas aua samting ol i bin lusim long autim tok bilong Kingdom. Ol i mekim olsem na ol i bihainim pasin bilong dispela man Esikiel 9:1-11 i stori long ern, em i gat pen bilong kuskus. Jehova i salim em i go putim mak long ol manmeri bambai ol i no ken bagarap, na bihain em i kam bek na em i ripot long Jehova, olsem: “Dispela wok yu bin tokim mi long mekim, em mi mekim pinis.” Taim yumi stap long Miting Bilong Wok na ol i tokaut long ripot bilong kongrigesen na yumi harim tok long ol gutpela wok kongrigesen i bin mekim, yumi save amamas, a? Maski yu yet yu bin mekim liklik wok tasol, olsem “liklik mani” bilong rabismeri, tasol sapos yu bin putim ripot na wok bilong yu i insait long dispela ripot bilong kongrigesen bai yu amamas, a? Na long pinis bilong yia ol i save bungim olgeta ripot bilong olgeta kongrigesen na yumi inap save long wok ol brata i bin mekim long olgeta hap bilong graun. Taim yumi lukim dispela ripot na yumi tingim ripot bilong wok bilong yumi tu i insait long dispela bikpela ripot, yumi save amamas, a?—Mak 12:42.

5. (a) Olsem wanem Jehova i bin kisim biknem long Ripot Bilong Wok bilong 1982? (b) Wok bilong ‘kamapim ol disaipel’ i karim kaikai olsem wanem?

⁵ Long pes 24-27 yu ken lukim “RIPOT BILONG WOK BILONG OL WITNES BILONG JEHOVA BILONG 1982.” Ol i bin mekim bikpela wok tru na litimapim nem bilong Nambawan Bikpela King Jehova! Lain manmeri ol i autim tok bilong Kingdom long olgeta mun, dispela lain i go bikpela inap 4.2 pesen long 1982. Ol i bihainim tok bilong Jisas, em i tok: “Yupela i go mekim olgeta lain manmeri i kamap disaipel bilong mi.” Na 2,477,608 Witnes ol i bin autim dispela gutnius “long bung na long olgeta haus” sampela taim long dispela yia. Em namba wan taim lain i go bikpela olsem.—Matyu 28:19; Aposel 20:20.

6. Ol Witnes Bilong Jehova i gat wanem laik long dispela wok God i givim long ol?

⁶ Tasol Ol Witnes i no ting olsem olgeta manmeri long olgeta hap bilong graun bai ol i harim tok bilong ol na tanim bel. Nogat. Tasol God i givim wok long ol bilong “autim tok long gutpela taim bilong Jehova, wantaim de bilong God bilong yumi long bekim pe nogut.” Yumi save beten askim God long helpim ol manmeri, na yumi laik tru bai planti milion manmeri moa ol i ken harim tok bilong Kingdom na ol i ken bilip paslain long taim “bikpela hevi tru” i rausim olgeta samting nogut i stap long dispela graun. Bihain “save bilong Jehova bai pulap long olgeta hap graun.”—Aisaia 61:2, NW; Matyu 24: 14, 21, 22; Aisaia 11:9, NW.

7. Lain bilong Jehova i mekim wanem bambai ol inap mekim bikpela wok moa?

⁷ Ol Witnes Bilong Jehova i tingim wok bilong ol bai i go bikpela moa long bihain, olsem na ol i bin skruim sampela haus ofis bilong ol i go bikpela na ol i wokim sampela nupela haus ofis. Ol i bin stretim na skruim namba wan ofis bilong ol long 25 Columbia Heights, long Bruklin, Nu Yok, long Amerika. Na ol i bin putim sampela nupela masin na kompiuta samting bilong wokim ol buk long ol haus faktori long Bruklin na long ol gaden o fam bilong Sosaiti Was Taua (Watchtower Farms). Long olgeta hap bilong graun, long planti namba tu ofis o brens-ofis winim 30, ol i bin wokim nupela haus o skruim haus ofis o haus faktori i go bikpela. Yu ken lukim piksa bilong sampela long pes 23. Lain bilong Jehova i redi bambai lain bilong ol i ken i go bikpela na ol i ken mekim bikpela wok moa!

8. Taim yu lukim Ripot Bilong Wok long pes 24-27 yu lukim lain pablisa i go bikpela long wanem wanem ol hap?

⁸ Long Ripot Bilong Wok ol i raitim nem bilong planti hap o ples, na long 95 bilong ol dispela hap o ples, lain bilong autim tok bilong Kingdom i bin i go bikpela tru long 1982. Olsem: Long Hong Kong, long namba wan taim, winim 1,000 manmeri ol i autim tok bilong Kingdom. (Aisaia 60:22) Wok long Brasil tu i kamap bikpela na long namba wan taim 133,377 manmeri i bin autim tok. Lain Witnes long Amerika ol i nambawan bikpela lain, na nau lain Witnes long Brasil i nambatu bikpela lain. (Maika 2:12) Long hap bilong Itali, lotu Katolik i bikpela lain. Tasol Ol Witnes Bilong Jehova i nambatu bikpela lain bilong lotu long dispela hap na long 1982 lain bilong ol i go bikpela inap 8 pesen long Itali. Inap 98,172 manmeri ol i bin autim tok bilong Kingdom. (Mak 4:8, 20) Long ol ailan tu, ol bikpela ailan na ol liklik ailan, kirap long Australia i go inap long hap bilong Karibian, ol lain bilong autim tok i go bikpela. (Aisaia 42:10) Yumi amamas long gutpela wok ol brata i mekim long hap : gat hevi, olsem long Ajentina na El Salvado na Pakistan na Uganda. (Sam 91:9, 10) Na long ol hap longtaim pinis lain bilong Jehova i bin i stap long en, wok bilong ol tu i kamap gutpela. Olsem long Englan na Kanada na Jemani na long Amerika. Long hap bilong Amerika long Ogas, 1982, bikpela lain tru ol i autim tok, inap olsem 613,007. Dispela lain i go bikpela inap 8.8 pesen.—Aposel 16:5.

Ol i Mekim Wok “Painia”

9. (a) Olsem wanem long lain painia? (b) Bilong wanem i gutpela sapos olgeta manmeri ol inap mekim dispela wok ol i ken mekim?

⁹ Long dispela bikpela lain bilong autim tok bilong Kingdom long olgeta hap, inap 172,859 ol i save mekim wok “painia”; ol i save lusim bikpela hap taim long olgeta de bilong autim tok. Dispela lain i go bikpela inap 14 pesen! Planti moa ol tu i tingting long insait long dispela wok bilong amamas. Olsem wanem long yu? Yu tingting long mekim wok painia? Tru tumas, sapos yu insait long dispela wok bai yu inap ‘tokaut strong’ olsem ol aposel i bin mekim, na tokim ol man long ol gutpela samting liklik taim bai painim olgeta manmeri i kam long Jehova na ol i “bilip long Bikpela bilong yumi Jisas.”—Aposel 2:40; 8:25; 10:42; 20:21, 24; 23:11; 28:23.

10. (a) Olsem wanem wok painia long nau i kain olsem wok ol Nasarait i mekim long Isrel bipo? ( b) Olsem wanem Ol Witnes Bilong Jehova i bin wok strong tru long sampela hap?

¹⁰ Ol dispela manmeri i no save mekim wanpela tok tru antap long i stap “painia,” tasol ol dispela painia wantaim ol “painia helpim” (em ol i save mekim wok painia long wanpela mun o tupela mun samting) ol i kain olsem ol Nasarait long Isrel bipo. Long wanem, planti taim ol i mas lusim planti samting bambai ol inap givim ol yet bilong mekim dispela wok bilong God. Long sampela hap, ol wokman bilong Jehova i bin wok strong tru ‘long oltaim givim maus bilong ol long God olsem ofa.’ Long mun Epril, long Veneswela, 2,464 brata sista i mekim wok painia helpim, em inap olsem 136 pesen moa. Na long Trinidad, inap 51 pesen bilong olgeta pablisa ol i mekim wok painia. Na long mun Jun, long taim bilong ren long Japan, inap 25,140 ol i mekim wok painia, em inap olsem 36 pesen bilong ol manmeri i save autim tok bilong Kingdom long dispela hap. Ol i daunim laik bilong skin bilong ol yet bambai ol inap mekim bikpela wok moa bilong litimapim nem bilong Jehova, na ol i kisim bikpela amamas!—Hibru 13:15; Nambas 6:8; Luk 9:23-25.

11. (a) Ol manmeri i no inap mekim wok painia, bilong wanem ol i no ken bel hevi? (b) Ol Witnes i autim tok inap hamas aua long 1982 na yumi ken save, ol i bin wok strong? Na ol i mekim hamas Baibel-stadi? Na hamas manmeri ol i bung long taim bilong Memorial?

¹¹ Ol painia i givim bel long mekim wok na “lain” Isrel bilong spirit wantaim ol poroman bilong ol, em ‘bikpela lain,’ ol tu i bin wok strong long autim tok bilong Kingdom long 1982. Ol i mekim bikpela wok, olsem na long namba wan taim ol i bin lusim 384,856,662 aua long autim tok, na planti ol i bin i go long haus bilong ol man i laik harim tok na mekim Baibel-stadi long ol long olgeta wik, inap olsem 1,586,293 Baibel-stadi. Taim ol 44,953 kongrigesen bilong Ol Witnes i mekim Memorial long Epril 8, 1982 inap 6,252,787 manmeri ol i bung. Em bikpela lain tru! Na yumi mas wok strong yet long givim kaikai bilong spirit long ol dispela “pikinini sipsip”!—Jon 21:15-17.

12. Wanem gutpela tok i stap long Nambas 6:24-26? Dispela tok i stret long husat long nau?

¹² Moses i kolim lo bilong Jehova long ol Nasarait na bihain Jehova i tokim em long blesim lain Isrel olgeta, na em i tok: “Jehova i mas blesim yupela na was long yupela. Jehova i mas tingting long yupela na helpim yupela. Jehova i mas marimari long yupela na mekim yupela i stap bel isi.” Dispela tok i stret tru long lain holi bilong Jehova long nau, em lain Isrel bilong spirit, wantaim “planti arapela lain manmeri” ol i kam bilong mekim wok bilong Jehova wantaim ol! Yumi amamas tru long save 138,540 nupela witnes bilong Jehova i bin kisim baptais long 1982; dispela lain i go bikpela inap 15.6 pesen, winim yia bipo. Nem bilong Jehova i stap long olgeta dispela manmeri na long olgeta narapela brata sista long ol kongrigesen, olsem na Jehova yet em i blesim ol.—Nambas 6:24-27, NW; Eksodas 12:38.

‘Ol i Win Tru’

13, 14. (a) Ol brata i stap long dispela 28 narapela hap (“28 Other Countries”) ol i stap olsem wanem? (b) Tasol pasin bilong ol inap strongim yumi olsem wanem?

¹³ Long sampela hap bikpela hevi na traim i painim Ol Witnes Bilong Jehova na ol i mas wok strong bambai ol inap sanap strong long bilip. Ol birua i mekim nogut tru long ol brata, olsem na bilong lukautim ol mipela i no raitim nem bilong ol dispela hap long lista bilong ripot. Tasol mipela bungim wok bilong ol wantaim na raitim long dispela hap, olsem: “28 Other Countries.”

¹⁴ Ol Witnes long ol dispela hap ol i “win tru,” long wanem Krais i bin givim bel long ol. (Rom 8:37-39) Taim yumi tingim gutpela wok ol i mekim, em ol i karim ol hevi na sanap strong, dispela samting i strongim yumi na yumi tu yumi laik winim olgeta samting i laik pasim rot bilong yumi bambai yumi inap mekim yet wok bilong Jehova, na ‘givim bel olgeta na tingting olgeta na strong olgeta’ long mekim. Yumi mas helpim ol narapela man tu long mekim olsem. Long dispela rot yumi kamapim bel bilong yumi, yumi “no i stap longwe long kingdom bilong God.”—Mak 12:29-31, 34.

15-17. (a) Wanem ol gutpela tok o ripot i kam long sampela hap i gat pait long en? (b) Yu bin kaunim wanem ol narapela gutpela ekspiriens olsem long dispela yia? (c) Ol Witnes Bilong Jehova i beten askim God olsem wanem long ol bikpela bos bilong graun?

¹⁵ Meri bilong wanpela wasman sekit long Lebanon em i raitim pas na em i tok: “Taim mipela i autim tok na mipela harim ol gan bilong sutim balus ol i pairap, mipela save sanap insait long dua bilong wanpela haus na hait i stap. Long wanem, long dispela wik, sampela hap bilong katres bilong gan i bin kilim i dai 5-pela manmeri long dispela hap mipela i autim tok long en. Oltaim mipela i wok long beten askim Jehova long blesim kibung i laik kamap long Wes Berut na ol brata bilong yumi. Kibung sekit i bilong kamap long Jun 13. Na mipela i amamas tru long wanem long Jun 12 ol i tokaut long redio olsem pait i pinis. Kibung i kamap gutpela.” Na bihain mipela i harim tok olsem i no gat wanpela Witnes long hap bilong Wes Berut em i kisim bagarap long dispela taim.

¹⁶ Long wanpela hap bilong Sentral Amerika i gat nupela gavman na dispela gavman i tingting nogut long Ol Witnes. Ol i rausim olgeta misinari bilong lain Witnes. Ol i holim wanpela brata na meri bilong em, em tupela i mekim wok misinari, na inap tupela wik ol i haitim ol. Tasol bihain sampela gutpela Witnes bilong dispela ples ol i painim ol pinis na ol i go tokim Britis Embasi tupela i stap we, na Embasi i stretim rot bambai ol inap lusim dispela hap. Mipela harim tok olsem, long dispela hap gavman i wok long painim dispela ‘wokboi i gat gutpela tingting,’ em ol i ting em i bos bilong Ol Witnes long dispela hap.—Matyu 24:45-47.

¹⁷ Long Simbabwe, long hap bilong Afrika, wanpela bikpela man bilong gavman i tokim bikpela bung bilong ol man bilong wok politik, olsem: “Sapos ol i stap Witnes Bilong Jehova, yumi no ken tingting planti. Ol i no birua bilong yumi. Tasol sapos ol i no i stap Witnes moa, nau yumi mas tingting planti.” Lain tru bilong God ol i save beten askim God long helpim olgeta bikpela man bilong gavman bambai ol i ken kisim kain gutpela tingting olsem, na bai olgeta Witnes Bilong Jehova “i ken i stap bel isi, na [Ol] i ken bihainim tru stretpela pasin bilong God.”—1 Timoti 2:1, 2.

Ol i Kisim Nupela Samting long “Tok i Tru Bilong Kingdom” Kibung Distrik!

18. Yumi bin kisim wanem gutpela buk (tok Inglis) long “Tok i Tru Bilong Kingdom” Kibung Distrik? Wanem wok bilong dispela buk?

¹⁸ Long Jun 1982 Ol Witnes Bilong Jehova i kirap mekim ol “Tok i Tru Bilong Kingdom” Kibung Distrik long olgeta hap. Long Amerika bikpela lain tru, winim bilong bipo, ol i bung long ol dispela kibung distrik, inap olsem 1,108,022.a Long ol dispela kibung distrik bilong 1982 long Amerika na long sampela hap moa, ol i kisim wanpela nupela buk bilong helpim ol man long lainim tok bilong Baibel. Dispela buk i gat ol gutpela piksa i stap long en na i gat 256 pes. Ol i kisim long tok Inglis, tasol nem bilong en long tok Pisin i olsem: Yu inap i Stap Oltaim long Paradais long Graun. Tasol dispela buk em i no wanpela piksa buk nating. Na em i no bilong ol pikinini tasol. Nogat. Ol gutpela piksa bilong dispela buk i bilong lainim ol manmeri, maski ol i yangpela o ol i lapun, bambai ol i ken kisim dispela pasin em inap helpim ol long kisim laip, em pasin bilong BILIP. Ol witnes bilong Jehova long bipo ol i save long Jehova na long Tok bilong em, em Baibel, na long ol samting em i laik mekim, na ol i BILIP. Olsem na ol inap winim bikpela hevi na traim na sanap strong. Na long rot bilong BILIP ‘bikpela lain manmeri’ long nau ol i winim ol hevi bilong dispela “las taim,” na bai ol inap winim taim bilong “bikpela hevi tru” na i go insait long Nupela Taim Jehova bai kamapim.—Revelesen 7:9, 14; 2 Timoti 3:1; Hibru 10:38, 39; 11:32-38.

19. Yu yet yu ting olsem wanem long dispela buk?

¹⁹ Wanpela papa em i bin kisim dispela buk, em i amamas tru na em i tok: “Inap 25 yia pinis mi bung wantaim lain bilong Jehova, tasol dispela buk nau yumi kisim i winim tru olgeta narapela gutpela samting yumi bin kisim. Olgeta man bai laikim tok bilong en. Ol piksa i gutpela tru inap yu pilim tu tingting bilong ol manmeri i stap long ol dispela piksa. Dispela buk i stori gut long ol samting God i laik mekim na bai ol man inap bilip long ol dispela samting.” Ol i wokim pinis dispela buk long 21 tok ples, na ol bai wokim long planti moa.

20. (a) Bilong wanem i gutpela sapos planti milion manmeri moa ol i kisim save long tok i tru long rot bilong dispela buk? (b) Ol manmeri i harim gut tok bilong Aisaia 26:2, 4, liklik taim bai ol kisim tru wanem samting?

²⁰ Mipela laik bai planti milion manmeri moa long olgeta hap ol i ken kisim save long tok i tru long rot bilong dispela nupela buk, na bai ol i sanap strong na givim bel long Kingdom taim ol samting i kamap olsem laspela tok bilong “song” bilong Aisaia sapta 26 i makim, olsem: “Yupela lain bilong mi, yupela i go insait long rum bilong yupela na yupela pasim dua. Yupela i stap hait liklik taim tasol inap long taim dispela kros i pinis. Long wanem, Jehova i laik lusim ples bilong em bilong givim strafe long ol man i bin mekim rong long em.” Taim Nambawan Bikpela King Jehova i kamapim pinis kros bilong em long Amagedon na stretim bek nem bilong em, “dispela stretpela lain i save mekim gutpela pasin” wantaim ‘bikpela lain manmeri’ ol i save lotuim Jehova wantaim ol, ol i no ken bagarap. Bai ol i winim dispela taim na bai ol i kisim olgeta gutpela samting “Ja Jehova” i tok promis pinis long en long Baibel.—Aisaia 26:2, 4, 20, 21, NW; Revelesen 7:9, 14; 16:13-16.

[Ol Futnot]

Skelim ol samting i kamap long nau na i truim tok profet bilong “song” i stap long Aisaia 26:

□ Ves 2: Husat pastaim ol i givim bel long Kingdom? Ol i mekim olsem wanem? Na wanem samting i bin kamap?

□ Ves 4: Dispela tok i mas kirapim olgeta wokman bilong Ja long bilip olsem wanem?

□ Ves 15: Sampela bikpela tok bilong Ripot Bilong Wok bilong 1982 i makim wanem truim bilong dispela tok?

□ Ves 20: Jehova i givim wanem ples hait long yumi? Inap long wanem taim?

□ Ves 21: Tok bilong dispela ves i kamapim gut wanem as bilong kros bilong Jehova?

[Blok/​Piksa long pes 32]

Ol Witnes Bilong Jehova long olgeta hap ol i amamas long kisim dispela nupela buk long ol “Tok i Tru Bilong Kingdom” Kibung Distrik. Dispela buk i gat 256 pes na planti piksa. Em i kamapim gut ol as tok bilong Baibel, na olgeta manmeri i laik lukim gutpela taim i kamap long graun, ol lapun wantaim ol yangpela, bai ol i laikim dispela buk. Ol Witnes bai mekim bikpela wok long dispela buk bilong mekim ol Baibel-stadi na lainim ol man long ol tok bilong Baibel.

[Sat long pes 24-27]

[RIPOT BILONG WOK BILONG OL WITNES BILONG JEHOVA BILONG 1982]

(See bound volume 1983)

[Box/Ol Piksa long pes 23]

Sampela nupela brens-ofis bilong Sosaiti Was Taua ol i bin wokim long Yurop long 1982

ENEBAK, NOWE

HOLBAIK, DENMAK

AJALVIR (MADRID), SPEN

SELTES, JEMANI