Baibel—Em Inap Helpim Yumi?
NAMBA WAN presiden bilong Amerika, em George Washington, em i tok: “Yumi mas i gat God na Baibel bambai yumi inap bosim stret dispela graun.” Yu ting dispela tok i stret? Orait tingim ol samting i kamap long graun long nau.
Pe bilong ol samting i go antap: Kirap long taim bilong Namba Tu Pait Bilong Olgeta Hap i kam inap long nau, mani i no gat strong moa long planti hap. Ating yu pilim dispela hevi. Wanpela nius (U.S. News & World Report) i tok: ‘Bihain long 1939 pe bilong ol samting long Amerika i go antap tru, inap 579 pesen.’
Pait: Tupela bikpela pait i bin kamap long taim bilong yumi na i kilim i dai planti milion manmeri—ol soldia na ol man nating tu. Namel long 1945 na 1978 inap 25 milion soldia i dai long 150 pait i bin kamap. Long dispela taim ol lain man i save tromoi 500 bilion dola long olgeta yia bilong baim ami na ol samting bilong pait. Em inap olsem wan milion dola long olgeta minit!
Katim marit: Long Japan long olgeta 4-pela 4-pela minit wanpela man na meri marit i katim marit. Na long hap bilong Amerika tu planti manmeri i katim marit (wanpela long olgeta tupela). Long hap bilong Rasia, sapos 100 man i marit, inap 30 bihain bai ol i katim marit. Dispela hevi i kamap long olgeta hap bilong graun long nau.
Pasin nogut: Pasin nogut bilong pait na bagarapim man i go bikpela. Long hap bilong Amerika ol man i mekim bikpela rong olsem inap wanpela taim long olgeta 24 sekon. Long olgeta 23 minit 23 minit ol i kilim i dai man, long olgeta 9 minit 9 minit ol i holim meri na bagarapim em, long olgeta 58 sekon 58 sekon ol i stil. Na planti bilong ol dispela man i mekim bikpela rong ol i no kisim strafe (polis i stretim 19% tasol na holim ol man nogut).
Kaikai i sot: Ol gaden i kamapim planti kaikai moa long dispela taim (Inap 30 yia i go pinis), tasol planti man moa ol i sot long kaikai, winim bipo. I gat 5 handet milion samting manmeri ol i hangre o ol i no gat gutpela kaikai bilong strongim skin bilong ol. Dispela hevi i stap tu long ol hap i gat planti wok bisnis long en.
Olgeta dispela hevi i stap na i wok long i go bikpela. Ol man bilong save long mani, na ol man bilong politik, na ol man bilong givim tok long ol marit, na ol dokta bilong helpim tingting bilong ol man, na planti saveman moa ol i wok long stretim ol dispela hevi, tasol ol i no inap. Olsem na yumi ken save, wanpela Man em i gat bikpela save, winim bilong yumi, em i mas helpim yumi yet na olgeta narapela manmeri na soim gutpela rot long yumi. Em i stret, a?
Baibel i soim gutpela rot long yumi. Wanpela man bilong raitim tok bilong Baibel, em Devit, em i tok: “Spirit bilong Jehova i kamapim tok long maus bilong mi.” (2 Samyuel 23:2, NW) Na aposel Pita i tok, “Holi Spirit yet i kirapim” ol profet bilong Baibel na ol i autim tok God i givim long ol.—2 Pita 1:20, 21.
Tasol maski wanpela buk i tok God i as bilong tok bilong en, i mas i gat sampela samting bambai yumi inap save tru, God i as bilong en o nogat. Orait, i gat sampela samting tru na yumi ken save, Baibel em i buk bilong God?