Bilong Wanem Pasin Nogut i Kamap Bikpela?
“PLANTI pasin nogut ol man i mekim, em ol i mekim long ol samting bilong ol man,” em wanpela nius bilong gavman long Inglan i tok olsem. Tasol long dispela kantri yet ol i tok pasin bilong mekim nogut long ol manmeri i wok long kamap bikpela tru, winim ol narapela rong man i mekim.
Long ol narapela hap bilong graun tu pasin nogut i kamap bikpela tru. Planti taim ol nius long olgeta hap i stori long ol man i bin hansapim kepten bilong balus, o ol i holim gan o naip na stil, o bagarapim meri, o mekim narapela pasin nogut. Ol kain stori olsem i save pulim planti man long kaunim, na stori bilong ol liklik pasin nogut ol man i no kaunim tumas. Olsem na yu yet wantaim ol kago samting bilong yu inap kisim nogut long han bilong ol man nogut. Tasol bilong wanem i olsem? Wanem samting i kirapim ol manmeri na ol i kamap ol man nogut?
Ol raskol i save wok long painim rot bilong mekim wok nogut bilong ol. Olsem na ol bikman bilong gavman ol i wok long kirapim ol manmeri long luksave long ol samting i kamap long hap ol i stap long en, na bai ol i no ken givim rot long ol raskol. Ol gavman i mekim olsem bilong pasim pasin nogut, tasol olsem wanem? Dispela i pasim ol man na ol i no ken kamap man nogut? Nogat.
Ol saveman i wok strong long kisim save long ol kain tingting bilong ol raskol. Tok bilong God, em Baibel, i givim toksave long ol yangpela man bambai ol i was gut long ol man i laik pulim ol long mekim pasin nogut. Dispela tok bilong Baibel i kamapim tingting bilong ol man nogut. Baibel i tok: “Dispela kain man i save tok olsem, ‘Goan, yu kam wantaim mipela, na yumi go kilim sampela man i dai. Yumi go hait long arere bilong rot na lukim wanem ol man bai i kam, na yumi kilim ol i dai. Maski ol i no gat asua, yumi pinisim laik tasol na kilim ol i dai. Bai yumi kam wantu na kilim ol, olsem dai i save kamap wantu long ol man na ol i go long ples bilong ol man i dai pinis. Na bai yumi kisim planti samting bilong ol dispela man na bai ol dispela samting i pulap long haus bilong yumi. Yu kam poroman wantaim mipela, na bai yu tu i kisim planti samting.’” (Sindaun 1:11-14) Yes, pasin bilong mangalim samting bilong ol arapela man na tingim tumas mani kago i save kirapim man long mekim pasin raskol.
Nau long taim bilong yumi planti ol i save kisim ol drak na ol i tingting tumas long painim amamas. Bilong kisim ol drak samting ol i mas i gat mani, olsem na sampela taim ol i nogutim ol narapela o bagarapim laip bilong narapela bilong kisim mani. Nau long dispela ‘taim bilong planti hevi nogut tru,’ planti man na meri “i laikim tumas long mekim ol pasin nogut. Na oltaim bel bilong ol i save kirap long kilim ol man i dai.”—2 Timoti 3:1, 3, 4; Sindaun 1:16.
Wanpela buk dikseneri (Webster’s Ninth New Collegiate Dictionary) i tok, pasin nogut “em i wanpela bikpela rong i brukim lo.” Yumi stap nau long taim bilong planti man i brukim lo; ol manmeri i no bihainim ol stretpela pasin. Aposel Pol i givim strongpela tok long ol Kristen long Efesus long ol i mas lukaut long ol man ol i save wokabaut long pasin bilong ol haiden. “Tingting bilong ol i paul olgeta, na save bilong ol i olsem tudak. Ol i no gat save tru, na bel bilong ol i pas, olsem na ol i stap ausait long laip bilong God. Ol i no save sem moa long pasin ol i save mekim. Ol i go insait tru long pasin nogut, na bel bilong ol i kirap tru long mekim kain kain pasin doti.” Olsem tasol, nau long taim bilong yumi, yumi mas was gut.—Efesus 4:17-19.
Olsem wanem long planti ol video nogut nau ol i wokim, i litimapim pasin bilong pait na pasin bilong tingim tumas ol amamas nogut bilong graun? Dispela inap kirapim ol man long kamap man nogut na ol i bagarapim sindaun bilong ol gutpela man, a? Tasol i gat narapela bikpela samting i kirapim ol man long mekim ol pasin nogut. Em wanem samting?
Em Satan. Belhat bilong Satan i kirapim ol man long mekim pasin nogut na pasin bilong bagarapim man. (1 Jon 5:19; Kamapim Tok Hait 12:12) Em i gat bikpela laik tru long pulim olgeta man na ol i no ken lotuim dispela trupela God, Jehova. Ating em inap long pulim planti, tasol Baibel i tok profet olsem bai em i no inap long bagarapim bilip bilong ol wokboi tru bilong God. Bihain Satan bai pinis. Taim Satan i pinis, olsem wanem? Bai pasin nogut tu i pinis? Olsem wanem? Pinis bilong ol pasin nogut i klostu nau?