Pinis Bilong Pasin Nogut i Klostu Nau!

POLIS i painim rot bilong kamapim long ples klia ol man i save mekim pasin nogut, na ol i lukim na skelim gut ol mak bilong pinga samting, na wanem samting i save kirapim man long mekim pasin nogut. Long olgeta hap planti ol buk ol man i wokim i stori long pasin na save bilong ol polis i mekim dispela kain wok, olsem ol plenklos. Ating bai polis inap painim man i mekim rong. Tasol wok bilong polis i kirap taim ol man nogut i mekim pinis rong.

Olsem yumi lukim pinis, pasin nogut i kamap bikpela tru. Tru polis i holim planti raskol, tasol i gat planti nupela raskol i wok long kamap. Olsem na bilong pinisim pasin raskol olgeta, nogut ol i wok tasol long painim ol man i mekim pinis rong. Orait, wanem samting inap pasim ol man na ol i no ken kamap raskol?

Stretpela pasin inap helpim man na em i no ken mekim ol rong. Tru yumi save pinis, pasin bilong kilim man, pasin bilong bagarapim ol meri, na ol narapela pasin bilong mekim nogut long narapela man, ol dispela pasin i gat rong. Tasol olsem wanem long pasin bilong giaman taim ol i wokim ol pepa bilong takis? Dispela pasin tu i gat rong; em i no stretpela pasin. Bilong pinisim pasin nogut ol i mas pinisim olgeta pasin i no stret.

Tingim 3-pela stori long Baibel i kamapim as bilong pasin nogut na rot bilong pasim ol dispela kain pasin nogut.

Pasin Bilong Pret long God na Pasin Bilong Mangal

Wanpela man em i bin raitim tok bilong Buk Song, em Asap, em i tok: “Long wanem, mi lukim ol man nogut i kamap maniman na mi mangal long ol samting bilong ol dispela bikhetman.” (Buk Song 73:3) Em nau, mangal long gutpela sindaun na i stap bilong narapela man i save pulim planti long kisim pasin bilong brukim lo. Long televisen na long ol nius ol i mekim olsem pasin nogut i bikpela samting, na ol i no kirapim ol man na bai ol i no laik tru long ol kain pasin nogut.

Tasol spirit holi i kirapim man i raitim buk Sindaun na em i tok: “Yu no ken laikim tumas pasin bilong ol man bilong mekim sin. Nogat. Oltaim yu mas strong long i stap aninit long Bikpela [Jehova].” Wanpela gutpela rot bilong pasim ol man na ol i no ken mekim pasin nogut em i olsem: Ol i mas wok long kisim pasin bilong pret long God na bai ol i no laik mekim pasin Jehova i no save laikim. “Sapos yu mekim olsem, bai yu painim gutpela taim bihain, na yu no inap i dai kwik.”—Sindaun 23:17, 18.

Bilip na Pasin Mangal

Long yia 33, Jisas i go insait long taun Jeriko. Em ples bilong Sakius. Luk, em wanpela bilong raitim gutnius, em i tok, Sakius em i “hetman bilong ol man bilong kisim takis, na em i gat planti mani.” Long hap bilong Jeriko i gat gutpela graun na ol man i gat bisnis long gaden samting. Olsem na ol man bilong kisim takis i save go long dispela hap bilong kisim mani takis bilong ol. Tok bilong Sakius yet i soim yumi, long taim em i mekim wok bilong em olsem hetman bilong ol takisman em i gat planti rot bilong giaman na pulim mani long ol narapela man. Tasol Sakius i no bin i stap olsem wanpela man nogut long olgeta taim. Nogat.—Luk 19:1-8.

Sakius i laik lukim Jisas, tasol bikpela manmeri i bung long Jisas na Sakius em i sotpela man, olsem na em i ran i go pas; em i go antap long wanpela diwai fik na em inap lukim Jisas. Jisas i lukim em pinis, na em i tokim Sakius long kam daun, long wanem Jisas bai stap wantaim em long haus bilong em taim em i stap long Jeriko. Bihain, tok Sakius yet i mekim i kamapim long ples klia olsem em i senisim pinis pasin bilong em. Em i tok: “Nau bai mi tilim olgeta samting bilong mi long tupela hap na givim wanpela hap long ol rabis man. Na sapos mi bin giamanim wanpela man na stilim wanpela samting bilong en, orait bai mi bekim 4-pela samting long en.” Nau Sakius mas bekim bek ol samting, olsem na em i mas tromoi bikpela mani tru! Sakius i tokaut olsem em i bilip long Jisas na em i tok promis bai em i bekim mani long ol man bipo em i bin giaman na pulim mani long ol, tasol nau em i mas bekim bikpela mani moa, olsem sapos em i bin pulim K10, nau em i mas bekim K40. Olsem na Sakius em i stretim rong em i bin mekim, na dispela i soim olsem Sakius em i pilim tru long bel bilong em na em i lusim pasin nogut bilong em.—2 Korin 7:11.

Ol Manmeri i Bikpela Samting Moa Winim Mani Kago Samting

Ol man i kotim Jisas long ai bilong bikman bilong Rom, em Pailat, tasol Pailat i tok: “Mi no painim wanpela rong long dispela man.” (Luk 23:4) Taim Jisas i mekim wok bilong em long graun em i no tingting long insait long pasin nogut bilong kisim mani kago samting. Em i soim long ples klia em i laikim tru ol manmeri. Baibel i tok: “Em i lukim ol bikpela lain manmeri, na em i sori tru long ol, long wanem tingting bilong ol i paul nabaut, na ol i stap nogut tru, olsem ol sipsip i no gat wasman. Olsem na em i tokim ol disaipel bilong em olsem, ‘Planti kaikai tumas i mau pinis long gaden, tasol i no gat planti wokman bilong kisim. Olsem na yupela i mas beten long papa bilong gaden, bai em i salim ol wokman i go bungim kaikai bilong en.’” (Matyu 9:36-38) Jisas i gat bikpela tingting long ol manmeri na em i no tingim mani kago, na em i no tingim skin bilong em yet o laik bilong em yet. Em i tingting long helpim ol disaipel bilong em na ol manmeri em ol i kam long em long harim ol gutpela tok bilong em. (Matyu 8:20; 14:13-16) Long dispela, Jisas i soim gutpela pasin bilong yumi ken bihainim.—1 Pita 2:21.

Olsem wanem? Ol manmeri long nau ol inap bihainim pasin bilong Jisas long tingim ol narapela manmeri i olsem bikpela samting i winim mani kago? Yumi ken tok yes long dispela. Tingim ol Witnes Bilong Jehova, nau lain bilong ol i bikpela olsem 3 na hap milion samting na ol i save bihainim pasin bilong Krais long tingim ol narapela manmeri. Long olgeta taim ol i wok strong long rausim ol tingting nogut long bel bilong ol na ol i no save tingim ol laik nogut i save kirapim ol man long mekim pasin nogut. Pastaim ol i stadi na kisim save long tok bilong Baibel na ol i kamap Witnes na dispela i kirapim ol long laikim tumas God. Sampela man ol i bin mekim kain kain pasin nogut, tasol nau ol i kisim save pinis long tok bilong Baibel na ol i save ol i mas bekim ol samting ol i bin kisim long rot bilong pasin stil na pasin giaman bipo ol i bin mekim. Dispela samting ol i mekim i no bilong litimapim nem bilong ol long ai bilong ol man; nogat; tasol ol i mekim olsem bilong ol i ken i stap wanbel wantaim God Jehova, na long rot bilong ofa bilong Krais Jisas ol inap long kisim marimari bilong God.—1 Korin 2:16; 6:11; 2 Korin 5:18-20.

Pasin bilong laikim tru ol narapela manmeri i kirapim ol Kristen tru long lusim hap taim bilong ol long i go lukim ol narapela manmeri na stori gut long olsem wanem ol famili i ken tingting long i stap laip long paradais aninit long gavman bilong God. Ol Witnes Bilong Jehova i save bung na mekim ol miting long olgeta wik long Haus Kingdom bilong ol. Wanpela man em i wanpela stilman taim ol Witnes i singautim em i go long Haus Kingdom bilong harim ol tok i kamap long miting. Em i tok: ‘Mi kirap nogut tru! Pastaim mi ting bai mi les long harim ol tok na mi no inap klia long ol tok. Ol i kamapim long ples klia pasin bilong laikim tru ol narapela na amamas long lukim ol.’ Na em i lukim olsem ol samting bilong spirit i bikpela samting tru long ol. Em i kirap nogut long gutpela pasin em i lukim, olsem na em i wok yet long bung wantaim ol Witnes na dispela i helpim tru em na em i lusim pasin nogut na i kirap bihainim gutpela rot. Maski yu bin mekim pasin nogut tru, olsem stil samting, o nogat, tasol taim yu bung wantaim ol lain bilong God, yu tu bai yu laik long tingim ol narapela manmeri olsem ol i bikpela samting na i winim mani kago samting.—Matyu 22:39.

Pasin Nogut—Ol i Pinisim Pinis?

Sapos ol man na meri i no mekim moa ol pasin nogut, olsem wanem? Ol i kamap gutpela olgeta? Nogat tru! Ol Witnes Bilong Jehova ol i wankain olsem olgeta narapela manmeri—sin bilong Adam i pas yet long skin bilong ol. (Rom 5:12; 1 Jon 1:8) Tasol olgeta i wanbel long lotuim Jehova, na dispela i kamap ples klia long wok autim tok ol i mekim long olgeta hap bilong graun na ol i skulim ol manmeri long tok bilong Jehova. Dispela i truim tok profet bilong Aisaia: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na olgeta lain manmeri bai i kam bung long en.” (Aisaia 2:2) Tru tumas, milion milion manmeri nau ol i kam na lotuim Jehova, ol i larim Jehova i skulim ol long pasin bilong em. Ating yu tu bai kisim ol gutpela samting sapos yu bung wantaim ol manmeri em ol i no save mekim ol pasin nogut.

Taim Pasin Nogut i Pinis Ol Gutpela Samting Bai Kamap

Nau long taim bilong yumi pasin nogut i kamap bikpela tru na dispela i makim olsem klostu nau bai God i kirap na pinisim olgeta man nogut, na olgeta man i save mekim pasin nogut, olsem stil samting. Baibel i tok: “Ol man nogut bai i bagarap olgeta. . . . I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol.” (Buk Song 37:9, 10) Pinis bilong pasin nogut i kam klostu tru, na yumi stap klostu long taim man nogut bilong bipo, em Satan, em bai kalabus long hul i no gat as. (Kamapim Tok Hait 20:1-3) Yumi save pret long ol man nogut na ol pasin nogut ol i mekim long ol man na givim bikpela pen long ol. Tasol yumi ken amamas tru, long wanem yumi save klostu nau ol dispela samting bai pinis.

Tasol olsem wanem long planti milion manmeri em bai ol i kirap bek na kisim laip i stap long graun? (Aposel 24:15) Sapos ol i strong long bihainim olpela pasin na tingting olsem ol i bin mekim taim ol i no i dai yet, olsem wanem? Ating bai ol i kamapim bek pasin nogut? No ken tingting planti long dispela; ol i no inap mekim olsem. Jisas i tok promis long wanpela stilman em bai kirap bek, em i tok, “Mi tok tru long yu, nau bai yu stap wantaim mi long [Paradais].” (Luk 23:43) Dispela i soim olsem ol man i kirap bek ol i mas senisim pasin bilong ol. Sapos ol i no senisim pasin bilong ol, nupela graun i no inap i stap olsem wanpela paradais.

Pastaim ol man nogut i mas lain long bihainim stretpela pasin na bai ol i lusim olgeta pasin nogut ol i bin mekim, na bai ol inap sindaun gut wantaim ol narapela manmeri. Olsem tasol aninit long Kingdom bilong God, olgeta manmeri bai skul na kisim save na dispela bai helpim ol long kamap man i bihainim lo. (Kamapim Tok Hait 20:12, 13) Ol man i kirap bek bai ol i kisim planti gutpela samting long Paradais; bai ol i stap namel long ol manmeri i bihainim lo bilong God na oltaim ol i no inap sot moa long wanpela samting. (Aisaia 65:21-23) Bai i gat ol stretpela man tasol i bosim graun, na ol man i bikhet na mekim pasin nogut ol i mas i dai. (Aisaia 32:1; 65:20) Olsem na i gat planti gutpela as na yumi ken bilip tru, pasin nogut bai i pinis olgeta.

Maski long nau yumi stap namel long ol manmeri i mekim pasin nogut, tasol yu ken bilip tru long Jehova, em i tok promis long givim gutpela sindaun long Paradais long ol boi bilong em. Bilong mekim olsem yu ken stadi wantaim ol Witnes Bilong Jehova long Baibel, no gat pe, na bai ol i helpim yu long kisim save long Baibel. (Jon 17:3) Sapos narapela taim yu bungim ol, yu ken askim ol long dispela samting. O yu ken raitim pas i go long brens-ofis bilong ol Witnes long Papua Niugini; lukim atres i stap long pes 2 bilong dispela magasin. Gutpela sapos yu wok strong long lainim tok bilong Baibel, long wanem pinis bilong pasin nogut i klostu nau!

[Piksa long pes 5]

Bilip bilong Sakius i kirapim em long bekim olgeta mani em i bin pulim long ol man

[Piksa long pes 7]

Ol man i stap aninit long Kingdom bilong God bai ol i lain na kisim save long kamap man bilong bihainim lo