Taim Pasin Raskol i No Bin Stap
YU INAP ting olsem pasin raskol bai pinis? Yu no inap ting olsem sapos yu kaunim pinis ol nius, olsem dispela nius bilong Jemani (Süddeutsche Zeitung). Em i tok: “Ol man i save gut long pasin bilong ol raskol ol i tok pasin raskol i kamap bikpela moa yet. Toktok bilong ol i makim olsem ol i tingting planti long ol samting bai kamap long bihain, em ol samting nogut bai pinisim tru ol man.”
Long yia 1995, wanpela lain i bin askim planti tausen manmeri bilong Yurop long tingting bilong ol, na klostu olgeta i bekim tok olsem ol i tingting planti long pasin raskol bai bagarapim ol. Long Jemani, Netelan, Polan, Rasia, Inglan, pasin raskol em i namba wan samting ol man i pret nogut tru long en. Pasin bilong pret long ol raskol i bagarapim ol, em i namba 2 samting ol man long Denmak na Finlan na Swiselan i pret long en; na em i namba 3 samting ol man long Frans na Grik na Itali i pret long en. Insait long 12-pela kantri ol i bin askim ol man long en, Spen tasol i no putim pasin bilong pret long ol raskol olsem samting ol i pret tru long en.
Kirap long 1991 pasin raskol i go bikpela tru long Isten Yurop. Long sampela bilong ol dispela kantri, pasin raskol i go bikpela moa olsem 50 i go inap 100 pesen, na long ol narapela kantri bilong dispela hap, pasin raskol i go bikpela moa yet olsem 193 i go inap 401 pesen!
Tasol long wanpela taim bipo, pasin raskol i no bin stap. Em long wanem taim? Na pasin raskol i kirap olsem wanem?
Pasin Raskol i Kirap Olsem Wanem?
Pasin raskol i olsem “pasin bilong brukim tru lo,” na em i bin kirap long ples bilong ol spirit. Taim God i wokim namba wan man na meri, Adam na Iv, tupela i no gat pasin nogut long bel bilong ol, na tu i no asua bilong tupela tasol na pasin raskol i kamap long graun. Wanpela pikinini spirit bilong God—em i gutpela olgeta—em i larim tingting nogut i kamap long bel bilong em; na taim dispela tingting nogut i kamap bikpela pinis, em i kamapim pasin nogut bilong bagarapim man. Dispela man yet i gat asua long bagarapim dispela graun i no gat pasin raskol long en. Taim em i brukim lo bilong God, em i mekim em yet i kamap wanpela raskol, na Baibel i kolim dispela man olsem Satan.—Jems 1:13-15; KTH 12:9.
Taim Satan i kirap mekim pasin birua long God long heven, em i tingting strong long pulim ol man bilong dispela graun long bihainim pasin raskol bilong em. Baibel i no mekim planti tok long olsem wanem Satan i bin mekim dispela samting—em i mekim liklik tok tasol, tasol em i kamapim tok tru bilong dispela samting. (Stat, sapta 2-4) Long pasin bilong trik na giaman, dispela spirit nogut i bin pulim Adam na Iv, olsem na tupela i no laik bihainim ol lo bilong God. Taim tupela i sakim tok bilong God, em nau, tupela i kamap man bilong brukim lo. Bihain, ating ol i pret na kirap nogut tru taim namba wan pikinini bilong ol, em Kein, i tekewe nambawan gutpela samting bilong brata bilong em Abel—em laip bilong em!
Em nau, namel long 4-pela manmeri bilong pastaim tru i stap long graun, 3-pela i kamap raskol; dispela i mekim na Adam na Iv na Kein, ol i no inap i stap long graun i no gat pasin raskol long en—ol i lusim dispela gutpela samting. Kirap long dispela taim na i kam inap long nau planti yia i go pinis, olsem na bilong wanem yumi ken bilip tru olsem klostu nau bai i no gat pasin raskol moa long graun?