Ol i Lus Long Pinisim Pasin Raskol
WANPELA nius bilong Inglan (Liverpool Daily Post) i raitim tok bilong wanpela man bipo em i stap nambawan bilong lain Polis Bilong Biktaun, olsem: “Mipela inap pinisim pasin raskol kwiktaim sapos olgeta man i redi long mekim sampela samting na ol i no les.” Tru tumas, sapos olgeta man i bihainim lo, pasin raskol bai pinis.
Tasol pasin raskol i go bikpela moa long planti hap. Samting ol i bin raitim long planti tausen yia bipo i stret long taim bilong yumi nau: “God i lukim pasin bilong ol arapela manmeri i nogut tru. Long olgeta hap bilong graun ol i wok long pait na bikhet tasol.” (Stat 6:11)—Lukim blok i stap long narapela pes.
Pasin Raskol i Kirap Long Ol Liklik Samting
Pasin bilong brukim lo long ol liklik samting em inap lainim man long brukim lo long ol bikpela samting. Wanpela tisa i laik kamapim klia dispela samting long ol sumatin bilong em, olsem na em i tok: “Ol man nogut bilong hansapim beng i save kirap long mekim pasin nogut bilong ol taim ol i stilim ol pensil long skul.”
Orait bihain, wanem samting i save kamap planti taim long ples wok? Planti man i save stap long haus na ol i no go long wok, long wanem, ol i tok ol i sik, na bihain ol i kisim sampela mani samting bilong helpim ol, tasol i no stret ol i kisim. Planti man i save mekim dispela pasin giaman. Olsem: Long Jemani, inap 6 pesen bilong ol wokman i tokaut olsem ol i sik, ol i save mekim long ol Trinde, na inap 10 pesen long Tunde, na inap 16 pesen long Fonde, tasol dispela namba i go bikpela moa inap 31 pesen long ol Mande, na i go bikpela moa moa yet inap 37 pesen long ol Fraide! Olsem wanem? Ol man i save sik planti taim long ol Mande na Fraide? O dispela em i narapela rot tasol bilong stilim ol samting?
Husat i Mekim Bikpela Pasin Giaman?
Tru, samting i save kamap taim man nating i mekim pasin giaman olsem stil samting, dispela i no wankain olsem samting i save kamap taim ol bikman i mekim. Long yia 1972 samting, ol man bilong Yunaitet Stets i kirap nogut tru, long wanem, wanpela pasin giaman nogut tru long ol samting bilong politik i bin kamap, ol i kolim “Watergate,” na dispela i mekim na nem “Watergate” i kamap hap bilong tok Inglis.
Wanpela buk (Barnhart Dictionary of New English) i tok: “Watergate em wanpela pasin giaman nogut tru i bin kamap, em pasin sampela man i mekim bilong haitim samting inap kamapim rong bilong sampela lain, o haitim samting ol i bin mekim em gavman i tambuim.”a Na buk i tok moa olsem: “Long yia 1972, dispela samting i bin kamap, ol i kolim ‘Watergate,’ em i bin kamap olsem wanpela bikpela tok long ol man i mekim tok Inglis. Dispela hap tok i kamapim sampela ol narapela tok olsem, na taim ol i bungim dispela tok -gate long pinis bilong wanpela tok, dispela tok i makim bikpela pasin giaman o pasin bilong paulim mani samting.”
Kirap long dispela taim planti pasin giaman nogut tru olsem “Watergate” i bin kamap, na dispela i kamapim klia olsem ol kain kain man i save mekim pasin giaman, na ol man i mas i stap olsem gutpela piksa bilong bihainim lo, ol tu i mekim pasin giaman olsem. Long Japan pasin giaman na pasin bilong paulim mani samting em i kamap bikpela tru insait long wok politik, olsem na long yia 1990 samting ol i mas kamapim sampela nupela lo bilong daunim dispela pasin. Long 1992 presiden bilong Brasil i mas lusim wok bilong em, long wanem, ol i kotim em long planti pasin giaman em i bin mekim bilong paulim mani samting.
Yumi lukim olsem bikpela rong ol man i gat namba long bosim man ol i save mekim, olsem ol papamama na ol tisa na ol polis samting, dispela i save helpim wok bilong ol raskol i go bikpela moa, laka?
Gutpela Laik Em Tasol i No Inap
Planti man bai wanbel long tok olsem ol gavman i gat laik long pinisim pasin raskol. Tasol wanpela man bipo em i stap bikman bilong gavman em i stori long kantri bilong em olsem: “Gavman i bin mekim liklik samting tasol bilong helpim ol kot na polis samting long mekim gut wok bilong ol. Mipela i no gat planti jas—sampela jas tasol i stap na ol i mekim bikpela wok tumas. Na i no gat planti polis na ol samting bilong helpim ol long mekim gut wok bilong ol. Sampela taim ol polis i no kisim pe bilong ol long taim stret bilong en, olsem na taim ol man i laik givim grismani long ol, i hatwok long ol i sakim dispela traim.”
Wanpela nius bilong Itali (La Civiltà Cattolica) i tok, “Gavman i no inap pinisim bikpela lain ol i wok olsem raskol,” na nius i tok moa olsem: “Maski yumi luksave olsem ol polis na kot i givim bel long wok bilong ol long daunim lain raskol, yumi inap lukim olsem wok bilong bikpela lain olsem raskol i no go daun liklik—strong bilong ol i go bikpela moa yet.”
I luk olsem gutpela laik bilong ol gavman bilong daunim pasin raskol i no inap. Wanpela ofisa bilong imigresen na kot samting bilong Yurop, em Anita Gradin, em i tok stret taim em i tok: “Yumi mas bihainim moa gutpela pasin long wok gut wantaim bilong daunim wok bisnis long drak na maketim ol drak, na pasin bilong kalapim lo na bringim ol man long narapela hap i kam insait long kantri long pasin hait, na pasin bilong brukim lo bilong imigresen, na ol bikpela lain i wok olsem raskol, na pasin giaman na paulim mani samting.”
Ol Bikman Bilong Gavman i Givim Bel Olgeta?
Sampela man i tingting planti. Olsem wanem? Ol gavman i givim bel olgeta long wok bilong ol long daunim pasin raskol? Wanpela man bipo em i stap olsem bikman bilong polis long wanpela kantri i tok, olgeta man ol i save tokaut olsem ol “i no laikim tru pasin bilong paulim mani samting na pasin giaman long wok bisnis.” Tasol em i tok, ol i no gat laik tru bilong pinisim olgeta pasin raskol na pasin bilong paulim mani samting. I luk olsem planti man—ol bikman bilong gavman tu—ol i ting i no gat rong long mekim pasin bilong kisim grismani na pasin bilong giaman na paulim mani na pasin stil bambai ol inap long helpim sindaun bilong ol.
Wanpela ofisa bilong kastam i tok olsem planti man “i bin mekim pasin bilong brukim lo ol i no kisim strafe liklik,” olsem na pasin raskol i go bikpela moa. Olsem: Wanpela nius bilong Rasia i tok long “ol lain raskol ol i no hatwok long abrusim strafe.” Na nius i tok moa olsem, “i luk olsem dispela samting i kirapim ol man nating long mekim ol pasin i nogut moa yet.” Dispela tok i stret wantaim tok bilong man i bin raitim Baibel inap 3,000 yia i go pinis. Em i tok: “Ol man i no kisim bekim kwiktaim long rong bilong ol, olsem na dispela i kirapim tingting bilong ol manmeri na ol i strong long mekim pasin nogut.”—Saveman 8:11.
Yumi no giaman taim yumi tok, ol gavman i lus long pinisim pasin raskol na kain pasin nogut olsem. Nius bilong Jemani (Rheinischer Merkur) i tok: “Long planti hap ol man i pret long pasin bilong bagarapim man i go bikpela moa, na ol i pret yet maski ol man bilong lain politik i toktok planti long dispela samting o ol ripot i tok olsem pasin raskol i no go bikpela tumas olsem ol i bin ting.”
Maski ol i tok olsem pasin raskol i no go bikpela tumas olsem ol i bin ting, tasol ol samting i bin kamap i no truim dispela tok. Tasol yumi inap ting ol dispela pasin nogut olsem pasin raskol samting bai pinis. Dispela taim i kam klostu tru, na yu inap i stap long dispela gutpela taim i no gat pasin raskol moa. Stori i kamap bihain long dispela bai kamapim klia olsem i gat wanem as na mipela i tok olsem.
[Futnot]
a Ol i kolim dispela pasin giaman nogut tru olsem “Watergate,” long wanem, sampela man i bin brukim banis bilong wanpela haus i gat dispela nem Watergate, na dispela i mekim na dispela pasin giaman nogut tru i kamap ples klia. Na long rot bilong dispela pasin giaman nogut tru, Presiden Richard Nixon bilong Amerika i mas lusim wok bilong em, na tu, sampela bikman bilong em i mas kalabus.
[Blok long pes 5]
Pasin Bilong Pait na Bagarapim Man i Pulap Long Graun
BRASIL: “Pasin bilong pait na bagarapim man i go bikpela moa, olsem na planti handet tausen manmeri i pulap long ol rot long biktaun [Rio de Janero], ol i kamapim pret na kros bilong ol, long wanem, pasin raskol i mekim na i olsem ol manmeri long biktaun bilong ol i stap kalabus.”—Nius International Herald Tribune.
SAINA: “Ol raskol i kamap bek long Saina na pasin raskol i go bikpela tru. . . . Ol saveman bilong Saina i tok olsem namba bilong ol lain raskol na ‘ol lain i save mekim hait ol samting’ ol i go bikpela hariap na ol polis i hatwok long save hamas lain olsem i stap.”—Nius The New York Times.
JEMANI: “Planti man i redi oltaim long mekim pasin bilong pait na bagarapim man na planti rot i op bilong ol i ken mekim dispela pasin, olsem na yumi no kirap nogut taim yumi lukim pasin bilong pait na bagarapim man i kamap long olgeta de.”—Nius Rheinischer Merkur.
BRITEN: “Planti man i kirap kwik long mekim pasin bilong pait na bagarapim man, na i luk olsem taim man i kros, wantu tasol em bai kirap na pait na bagarapim man.”—Nius The Independent.
AIALAN: “Ol lain raskol olsem Mafia i kamap strong long biktaun Dablin na long ol liklik ples i stap rabis long hap bilong wes klostu long dispela biktaun. Ol dispela lain raskol i gat planti gan samting.”—Nius The Economist.
MEKSIKO: “Insait long liklik hap taim tasol, pasin raskol i go bikpela tru na yumi kirap nogut tru long dispela samting.”—Nius The Wall Street Journal.
NAIJIRIA: “Mista Frank Odita, em i olsem maus bilong ol polis, em i tok olsem, ol famili, ol misin, ol haus lotu bilong ol Muslim, ol skul, na ol klap samting, ol i pundaun long wok bilong ol long pasim ol yangpela long mekim pasin raskol.”—Nius Daily Champion.
FILIPIN: “Long olgeta 10-pela 10-pela famili long Filipin, 6-pela i tok taim ol i stap long haus bilong ol yet o raun long rot, ol i pret long kisim bagarap.”—Nius Asiaweek.
RASIA: “Ol lain raskol olsem Mafia i bin senisim wanpela biktaun i kamap biktaun bilong pasin raskol stret, tasol taim ol gavman komyunis i bin bosim dispela biktaun em i no gat planti pasin raskol tumas i stap long en. . . . Plisman Gennadi Groshikov i tok, ‘Insait long 17 yia mi wok olsem plisman, mi no bin lukim planti pasin raskol tumas long Mosko, na mi no bin lukim ol pasin raskol nogut tru olsem nau mi lukim.’ ”—Nius Time.
SAUT AFRIKA: “Pasin bilong pait na bagarapim ol man nabaut i go bikpela tru, na dispela i mekim na yumi olgeta i pret, nogut dispela samting i bagarapim yumi na ol wok yumi mekim, olsem na yumi mas mekim sampela bikpela samting tru bilong senisim dispela pasin.”—Nius The Star.
TAIWAN: “Long Taiwan . . . pasin bilong hansapim man, na pasin bilong paitim na bagarapim man, na pasin bilong kilim man i dai, isi isi ol dispela pasin i go bikpela moa . . . Tru tumas, isi isi pasin raskol i go bikpela moa, na long sampela hap em i winim pasin raskol i kamap long ol kantri bilong Wes.”—Nius The New York Times.
YUNAITET STETS: “I gat planti pait na pasin bilong bagarapim man i kamap long Amerika. . . . Taim yumi skelim ol narapela kantri i gat wok bisnis long en ol i no gat bikpela pasin raskol olsem.”—Nius Time.