Ol Polis—Olsem Wanem Long Wok Bilong Ol Bihain?

SAPOS i no gat ol polis, ating bai i no gat lo na olgeta samting i no inap wok gut. Tasol maski i gat polis, yu ting yumi stap gut? Long planti siti long nau na ol liklik taun, planti man i pilim olsem samting nogut inap kamap long ol na ol i no inap stap gut. Yumi inap ting olsem ol polis bai lukautim yumi na bai ol lain olsem raskol i no ken bagarapim yumi? Yumi inap ting olsem ol polis bai lukautim hap yumi stap long en na bai yumi stap gut? Ol inap long pasim pasin raskol na pasin bilong bagarapim man?

David Bayley i kamapim tingting bilong em long buk bilong em (Police for the Future), na em i tok: “Ol polis i no inap pasim pasin raskol. Ol i wankain olsem plasta ol i pasim long skin bilong daunim sik kensa. . . . Yumi no ken ting ol polis inap daunim ol pasin nogut, maski ol i givim bel tru long pasim pasin raskol, na lukautim ol man na bai ol i no kisim bagarap.” Na ol ripot i tok, tripela bikpela wok bilong ol polis​​—⁠raun na was long ol hap bilong siti o taun, helpim ol man taim hevi i kamap, na painim ol lain i bin mekim pasin raskol​​—⁠dispela i no pasim ol pasin nogut na pasin raskol. Bilong wanem i olsem?

Sapos ol i kisim planti polis bilong traim long pasim ol pasin nogut, ol bai lusim bikpela mani tru, na dispela i no inap mekim na bai ol man nogut i lusim pasin bilong ol, nogat. Na maski ol polis i hariap long mekim wok bilong ol, dispela tu i no inap pasim tumas pasin raskol. Ol polis i tok, sapos insait long wanpela minit tasol ol inap long go hariap long hap em ol man nogut i wok long stil o mekim ol narapela pasin olsem, ol inap long holim ol, tasol sapos nogat, ol i no inap. I luk olsem ol raskol i save ol polis i no inap kamap wantu olsem. Na tu, wok bilong ol polis long painim ol raskol i no pasim ol raskol. Na sapos ol polis i painim ol raskol na putim ol long kalabus, dispela i no save pasim pasin raskol. Long Amerika ol i save putim planti raskol long kalabus, winim ol narapela kantri, tasol namba bilong ol man i mekim pasin raskol i go antap. Tasol long Japan, i no gat planti man i stap long kalabus, na pasin raskol i liklik long dispela hap. Na maski ol manmeri bilong wanpela hap ol i was na lukautim ol narapela i stap klostu long ol, dispela i no pasim pasin raskol. Taim ol polis i wok strong long pasim sampela pasin nogut, olsem pasin bilong salim drak o pasin raskol, inap sotpela taim dispela wok i save daunim ol dispela pasin nogut, tasol dispela i no stap longpela taim.

Wanpela buk (Police for the Future) i tok: “Yumi no ken kirap nogut olsem ol polis i no inap long pasim ol pasin nogut na pasin raskol. Planti man i save olsem pasin na sindaun bilong ol man em samting ol polis na ol haus kot i no inap bosim, na dispela yet i makim olsem pasin raskol bai i bikpela o nogat.”

Olsem Wanem Sapos i No Gat Ol Polis?

Yu save mekim wanem sapos i no gat ol polis i lukluk i stap? Yu save brukim lo taim ol i no stap? Pasin bilong paulim mani long ples wok i go bikpela tru namel long ol man i gat gutpela sindaun na ol i no tingting planti olsem sapos ol i mekim dispela pasin em bai bagarapim nem bilong ol na sindaun bilong ol long bihain. Wanpela nius (The New York Times) i tok ‘ol polis i sasim 112 manmeri em ol i bin wok wantaim long giamanim ol insurens kampani bilong ol ka na kisim bikpela mani long dispela rot. Namel long ol dispela lain em ol i sasim, em ol loya, ol dokta, na sampela lain bilong helpim ol man i gat pen long bun o skin, na wanpela i save wok long ofis bilong ol polis.’

Narapela bikpela pasin giaman i kamap na ol maniman i save baim ol piksa ol i kirap nogut tru; ol man bipo ol i save go pas long salim ol piksa long haus Sotheby long New York na haus Christie long London, ol polis i sasim ol long ol i bin giaman na makim pe bilong ol piksa ol i oksen long en. Ol i mas tromoi planti milion dola bilong baim kot na bekim bek mani bilong ol man! Em nau, pasin bilong mangal long mani i kamap namel long ol kain kain lain.

Ol samting i bin kamap long Recife, Brasil, long 1997 taim ol polis i straik i soim olsem planti manmeri ol i redi long mekim pasin nogut sapos i no gat man bilong pasim ol. Wanem ol bilip samting ol i holim, dispela i no senisim pasin bilong ol. Ol inap lusim hariap ol gutpela pasin na ol stiatok. Olsem na yumi no kirap nogut olsem ol polis long planti kantri ol i no inap long pasim olgeta pasin nogut long dispela taim ol man i no save bihainim ol lo, maski ol i liklik lo o bikpela lo.

Tasol i gat sampela manmeri ol i save bihainim ol lo, long wanem, ol i save daun long ol man i gat namba long bosim ol. Aposel Pol i tokim ol Kristen long Rom olsem ol i mas daun long ol man i gat namba long bosim ol na God yet i larim ol i stap, long wanem, wok bilong ol i pasim liklik ol pasin nogut na ol man i stap gut liklik. Pol i stori long ol lain i gat wok bos olsem: “Gavman . . . em i wokman bilong God, bilong bekim pe nogut long man i mekim pasin nogut. Olsem na yumi mas aninit long gavman. Na yumi no ken pret long dispela pe nogut tasol na bihainim tok bilong em. Nogat. Yumi mas save long bel bilong yumi yet olsem dispela pasin i stret, olsem na yumi bihainim.”​​—⁠Rom 13:​4, 5.

Sindaun Bilong Ol Man i Wok Long Senis

Wok ol polis i mekim i save helpim sindaun bilong ol man. Taim i no gat ol man i save salim drak long ol rot na i no gat pasin raskol long bagarapim man, dispela i save mekim na ol manmeri i save traim long mekim ol samting i stret wantaim dispela senis i kamap long hap bilong ol. Tasol bilong senisim tru pasin na sindaun bilong ol man, em i hatwok tru long ol polis i mekim.

Yu inap tingim wanpela taim na olgeta manmeri i daun long ol lo na i no gat wok moa long ol polis? Yu inap long tingim wanpela taim na ol manmeri i tingim tru narapela narapela na ol man i amamas long helpim ol narapela i sindaun klostu long ol na i no gat wok long singautim ol polis long helpim ol? Ating yu tingim dispela samting i olsem driman nating. Tasol tok Jisas i mekim i stret tru long dispela, maski em i mekim long narapela samting. Em i tok: “Ol man i no inap. Tasol God em inap long mekim olgeta samting.”​​—⁠Matyu 19:⁠26.

Baibel i toktok long wanpela taim bihain na olgeta man bai stap aninit long wanpela gavman em God Jehova i putim. “God bai i kirapim wanpela kingdom na . . . em bai i daunim . . . na bagarapim ol arapela king.” (Daniel 2:44) Dispela nupela gavman bai skulim ol manmeri long pasin bilong God long laikim ol narapela, na long dispela rot em bai senisim sindaun bilong ol man i save kamapim pasin nogut. “Olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” (Aisaia 11:⁠9) King em Jehova i makim, Jisas Krais, bai em inap pasim olgeta pasin nogut. “Taim em i harim kot, em i no inap skelim man long ol toktok em i harim na long ol samting em i lukim long ai tasol. Nogat. . . . Em bai i harim wari bilong ol rabisman na em bai i helpim ol tarangu, ol arapela i daunim ol na mekim nogut long ol.”⁠​—⁠Aisaia 11:​3, 4.

Bai i no gat ol raskol o pasin raskol. Bai i no gat wok moa long ol polis. Olgeta manmeri “bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.” (Maika 4:⁠4) Sapos yu laik i stap long dispela “nupela graun” em Baibel i stori long en, nau em taim bilong painimaut wanem samting God i tok promis long en insait long Baibel.​​—⁠2 Pita 3:​13.

[Rait long pes 24]

Yu inap long tingim wanpela taim na ol manmeri i daun long ol lo na i no gat wok long ol polis?

[Rait long pes 24]

Bai i no gat ol raskol o pasin raskol

[Blok/Piksa long pes 23]

Ol Polis na Ol Teroris

Ol samting i bin kamap long Septemba 11, 2001, long New York Siti na Washington, D.C., i soim olsem ol lain i save hansapim ol balus, na ol lain i save holim ol man, na ol teroris, ol i givim bikpela hatwok long ol polis long lukautim ol man. Long sampela hap, ol i skulim gut sampela polis long i go insait hariap long balus i sindaun long ples balus na kisim balus. Ol i lain tu long mekim wok long baklain na kam daun long rup bilong haus, na kalap i go insait long windo bilong haus na tromoi ol hanbom i save paulim tingting bilong man na ol tia-ges. Ol polis i kisim dispela kain skul, planti taim ol i save kamap long ol teroris na mekim ol samting bilong pasim ol, na bagarap i no save kamap long ol lain em ol teroris i holim ol.

[Kredit Lain]

James R. Tourtellotte/U.S. Customs Service

[Piksa long pes 24]

Ol samting bai i no gat wok moa long en long nupela taim God bai kamapim