Ol i Hatwok Long Pinisim Pasin Raskol
HET-TOK bilong wanpela nius bilong Briten i tok: “Ol Yangpela i Tok—Les i As Tru na Ol Yangpela i Mekim Pasin Raskol.” Het-tok bilong narapela nius i tok: “Hevi Insait Long Famili i Mekim na Pasin Raskol i Wok Long Go Bikpela.” Het-tok bilong namba 3 nius i tok: “Kalabus Long Drak i ‘As Bilong Planti Tausen Pasin Raskol.’ ” Nius Philippine Panorama i tok, inap 75 pesen bilong ol pasin raskol na pait na bagarapim man long Manila, em asua bilong ol man i mekim nabaut long ol drak.
Na sampela samting moa inap mekim na ol man i mekim pasin nogut. Inspekta-jeneral bilong polis long Naijiria i kamapim wanpela as olsem: “I gat ol lain i stap rabis na i gat ol bikpela maniman.” Wanpela nius i kamapim sampela as moa olsem: Ol wanlain i pulim ol man, o ol i hatwok long painim wok mani, o lo bilong polis na kot i no strong, o planti famili i no stap gut, o ol man i sakim lo na wok bos, o televisen na video ol i lukim, ol i gat planti pasin pait na bagarapim man i save kamap long en.
I gat narapela samting tu na pasin raskol i go bikpela. Long nau tingting bilong planti man i senis—ol i ting pasin raskol i save helpim ol gut. Wanpela saveman long Bolonya Yunivesiti long Itali i tok, inap sampela yia nau ‘ol samting i senis—ol ripot long pasin stil ol man i tokim polis long en i planti, tasol ol stilman polis i kotim ol i no planti. Bipo polis i save kotim planti stilman (50 pesen), tasol nau nogat, ol i save kotim wan wan (0.7 pesen) tasol.’
Tarangu, tok bilong buk The New Encyclopædia Britannica i stret: ‘Pasin raskol i go bikpela long ol hap i gat planti wok bisnis, na maski i gat lo o kalabus samting, i olsem ol i no bikpela samting long daunim pasin nogut. Long ol taun long nau, wok bisnis na sindaun bilong ol man i bikpela samting. Em nau, yumi ken save—pasin raskol bai wok long go bikpela moa.’
Em Tingting Kranki?
Olsem wanem? Pasin raskol i go moa nogut? Ol ripot i tok, long sampela hap pasin raskol i go daun! Tru, long sampela hap i olsem, tasol sampela ripot i no tokaut stret. Olsem: Taim gavman i tambuim ol man long Filipin long holim gan, ol ripot i tok pasin raskol i go daun inap 20 pesen. Tasol nius Asiaweek i tok, wanpela bikman i ting ol man nogut bilong stilim ka na hansapim beng, ol i lusim dispela pasin na ol i “kirap na stilim man.” Em nau, ol man nogut i no hansapim planti beng o stilim planti ka na i olsem pasin raskol i go daun, tasol i no olsem sapos yumi skelim wantaim pasin ol i mekim bilong stilim man—dispela pasin i bin go bikpela inap 4-pela taim!
Nius HVG i stori long Hangari olsem: ‘Pasin raskol i go daun inap 6.2 pesen sapos yumi skelim wantaim mun Janueri i go inap Jun, 1993. Tasol polis i lusim tingting long tokaut olsem, pasin raskol i go daun, long wanem, sampela senis i kamap long pasin bilong polis long raitim ol ripot samting.’ Pe bilong ol samting ol man i bin stilim o bagarapim, o mani ol i bin paulim, polis i bin apim mak bilong en inap 250 pesen long ripot bilong ol. Olsem na taim raskol i stilim samting bilong wanpela man na pe bilong en i aninit long mak polis i bin putim, ol i no save raitim long ripot bilong ol. Tasol 75 pesen bilong pasin raskol i save kamap long dispela kantri, em ol dispela kain pasin raskol. Olsem na taim ol i tok pasin raskol i go daun, dispela tok i no stret.
Tru, i hatwok long save tru long hamas pasin raskol i kamap. Wanpela as bilong en i olsem: Planti pasin raskol—inap olsem 90 pesen—polis i no save long en. Tasol maski yumi ting pasin raskol i go bikpela o i go daun, dispela i no bikpela samting. Ol man i gat laik tru long pasin raskol i mas pinis, ol i no laik em i go daun tasol.
Ol Gavman i Mekim Sampela Samting
Long 1990 Yunaitet Nesen i skelim pasin raskol na i kisim save olsem: Bilong daunim pasin raskol, ol kantri i gat planti wok bisnis long en i save tromoi 2 i go inap 3 pesen bilong mani gavman i save makim bilong mekim wok long en long olgeta yia. Tasol ol kantri i stap rabis liklik, ol i tromoi bikpela hap mani moa (9 i go inap 14 pesen). Long sampela hap gavman i ting, bikpela lain polis na ol samting bilong helpim ol long mekim gut wok bilong ol, em i bikpela samting. Tasol dispela i save kamapim kain kain tingting. Sampela man bilong Hangari i tok: “I no gat planti polis bilong holim ol raskol, tasol i gat planti polis bilong holim ol man i draivim ka na brukim lo bilong rot.”
Pasin raskol i mekim na planti gavman long nau i kamapim ol lo i strong moa. Olsem: Nius Time i tok, long ‘olgeta hap bilong Latin-Amerika pasin bilong stilim man i wok long go bikpela moa,’ olsem na ol gavman long dispela hap i kamapim ol ‘strongpela lo, tasol ol dispela lo i no stretim hevi. I no hatwok tumas long kamapim wanpela lo, tasol i hatwok tru long kirapim ol man long bihainim.’
Long 1992 long Briten, i gat inap olsem 100,000 program bilong ol lain i was long ples, na ol i bin was long 4 milion haus. Long 1985, wankain program i bin kamap long Ostrelia. Wanpela lain polis long Ostrelia (Institute of Criminology) i tok, wok bilong ol dispela program em bilong helpim ‘ol man long tingim ol samting bilong lukautim ol yet na narapela man, na lain long tokim polis sapos ol i lukim pasin raskol o wanpela samting i kamap long ples na ol i tingting planti long en, na long skulim ol long makim kago bilong ol na sapos raskol i stilim na bihain polis i painim, ol inap save em kago bilong ol, na tu, long putim long haus wanpela gutpela masin bilong krai bilong pretim ol raskolman.’
Long sampela hap, ol bikpela stua i mekim wok long wanpela kain televisen na sapos hevi i kamap long stua polis inap save kwik long en. Na bilong pasim planti pasin raskol o bilong luksave long raskol, ol polis na beng na stua i save mekim wok long video-kamera.
Long Naijiria polis i save sanap long ol bikrot na pasim ol ka. Ol i mekim olsem bilong holim ol man nogut i bin stilim ka o ol i bin hansapim beng samting na stilim mani. Na gavman i bin makim wanpela kain polis bilong painim ol man i paulim mani bilong ol bisnis samting. Na i gat sampela kain komiti i save wok wantaim polis. Ol hetman bilong ples i insait long dispela kain komiti na ol i toksave long polis sapos pasin raskol i kamap o ol i lukim sampela man i no gat gutpela pasin.
Ol man i go raun bilong lukim Filipin, ol i luksave olsem ol haus i no stap nating, na planti man i gat dok bilong was long haus. Na bilong lukautim stua bilong ol, ol bisnisman i gat ol sekyuriti. Planti man i save baim ol liklik masin bilong krai bilong pasim ol man i laik stilim ka. Ol man i gat mani i save sindaun long ol haus insait long bikpela haus i go antap inap planti plua, em ol bikpela haus i gat sekyuriti samting.
Nius The Independent bilong Landon i tok: “Long nau ol man i no bilip tumas long ol lo na polis samting, olsem na planti man i stretim rot bilong lukautim ples bilong ol yet.” Na planti man moa i holim gan samting bilong lukautim ol. Olsem: Long olgeta 100 100 famili long Yunaitet Stets, 50 i save holim gan—sampela famili i gat sampela gan moa.
Olgeta taim ol gavman i wok long kamapim ol nupela tingting na pasin bilong pinisim pasin raskol. Tasol V. Vsevolodov bilong wanpela lain long Yukren (Academy of Home Affairs), em i tok, lain bilong Yunaitet Nesen i tok, planti man i gat bikpela save long kamapim “ol narapela kain rot bilong mekim pasin raskol,” olsem na i hatwok long “skulim polis samting” long nupela save bilong ol dispela kain man. Ol man nogut i save mekim wok hait long bikpela mani ol i bin paulim bilong helpim wok bisnis bilong ol o bilong mekim wanpela wok bilong helpim ol man. Ol i mekim olsem na “long ai bilong ol man ol i gat nem.”
Ol i No Bilip Tumas
Long sampela kantri planti man i ting gavman yet i gat hap asua long dispela hevi bilong pasin raskol. Nius Asiaweek i kamapim tingting bilong bos bilong wanpela lain i gat wok long daunim pasin raskol, em i tok: “Inap 90 pesen bilong ol man mipela i ting ol i bin mekim pasin raskol na mipela i save holim, ol i polis o soldia.” Maski tok bilong nius i stret o nogat, kain ripot olsem i mekim na wanpela man i gat wok long kamapim lo, em i tok: “Sapos ol man i mekim tok tru antap long bihainim lo, tasol ol i brukim, em nau, yumi ol man i gat bikpela hevi.”
Long sampela hap bilong graun, pasin giaman bilong paulim mani samting ol bikman bilong gavman i mekim, i bin kamapim bikpela hevi long gavman bilong ol, na ol man i stap aninit long gavman ol i no bilip moa long en. Na ol man i no bilip tasol olsem gavman i no gat save long pinisim pasin raskol—ol man i ting ol i no wok strong long pinisim. Wanpela bikpela tisa i gat askim olsem: “Olsem wanem ol dispela bikman inap daunim pasin raskol long nau? Ol yet i insait tru long en.”
Ol gavman i kamap na bihain ol i pinis, tasol pasin raskol i stap yet. Tasol klostu nau bai i gat wanpela taim na i no gat pasin raskol moa!
[Ol Piksa long pes 7]
Bilong pasim pasin raskol: Kamera bilong televisen, sekyuriti-waia, sekyuriti wantaim dok
[Piksa long pes 8]
Pasin raskol i mekim na ol man i stap kalabus long haus bilong ol yet