Planti Ol i Katim Marit
“BILAS BILONG KATIM MARIT.” Dispela narapela kain het-tok i bin kamap long wanpela nius ol meri i save laikim. Nius i tok: ‘Olsem na marit bilong yu i pinis na yu pilim bel hevi, a? Ol samting yu holim olsem ring gol, givim long man i wok bisnis long wokim ol samting long gol na silva, na em bai wokim ring bilong yu i kamap narapela samting bilong bilas.’
Long nau marit i olsem ol samting yumi save mekim wok long en liklik taim na bihain yumi tromoi, olsem plet, o resa o pen bilong rait samting, em ol man i laikim sapos ol inap mekim wok long en na bihain tromoi dispela samting. Planti ol i ting olsem: ‘Taim yu les long en, tromoi tasol.’
Wanpela nius bilong Jemani (Stuttgarter Zeitung) i tok, inap olsem 130,000 marit long Jemani i save bruk long olgeta yia. Tasol pasin bilong katim marit i no kamap planti long Jemani tasol, nogat.
Em i Kamap Long Olgeta Hap
Wankain samting i kamap long olgeta kantri. Ating yumi ken tok Amerika i win long dispela samting—planti tru ol i katim marit. Long olgeta yia winim 1,160,000 i katim marit, o insait long 100 100 marit, klostu 50 i katim marit. Taim yumi skelim dispela samting i olsem long olgeta wan wan minit long olgeta de, winim 2-pela marit i bruk, olsem ol i katim marit!
Taim yumi skelim ol marit bilong bipo bipo, ol dispela namba i soim yumi olsem, nau planti marit moa i bruk. Long wan handet yia i go pinis long Amerika, long olgeta 18 18 marit, wanpela tasol i katim marit. Bihain long Namba 2 Pait, planti i katim marit tasol namba bilong ol man i katim marit i wok long i go bikpela isi isi inap long 1960. Long 1960 i go 1967 samting, planti liklik ol i katim marit. Tasol long 1967 i kam inap long nau, olsem insait long 25 yia, namba bilong ol marit i katim marit i go bikpela inap 3-pela taim!
Long 1985 samting long olgeta kantri namba bilong ol marit i katim marit i go antap. Sampela i olsem: Long Rasia 940,000 i katim marit long olgeta yia; long Japan, 178,000; long Inglan 159,000; long Frans 107,000; long Kanada 61,000; long Ostrelia 43,000. Long sampela kantri ol i gat strongpela lo bilong gavman na lotu, na planti man i no bin katim marit, tasol nau bikpela senis i kamap. Olsem: Long Hong Kong long nau, insait long ol 17 17 marit, wanpela tasol i katim marit, tasol namel long yia 1981 na 1987 namba bilong ol marit i katim marit i go antap. Wanpela nius bilong India (India Today) i kamapim tok olsem: Tingting bilong sampela manmeri long India i wok long senis nau. Bipo ol i ting pasin bilong katim marit em samting bilong sem. Long sampela provins bilong India ol i kamapim ol nupela kot bilong harim kot bilong ol man i laik katim marit, long wanem nau planti i laik katim marit.
Tasol ol dispela namba bilong ol man i katim marit i no inap kamapim long ples klia bikpela bel hevi dispela pasin bilong katim marit i save kamapim. Pasin bilong katim marit i stap long olgeta kantri, olsem na dispela pasin bilong katim marit inap kisim yumi olgeta. Ating yumi marit o yumi pikinini bilong tupela marit, o yumi stap klostu long ol marit. Olsem na maski ol hevi bilong pasin bilong katim marit i no bin painim yumi yet, tasol em inap kamap na sapos olsem, yumi no ken kirap nogut.
Wanem samting i as na ol dispela manmeri i katim marit? Ating wanpela samting em gavman i senis long sampela kantri. Bipo long sampela kantri gavman i no larim man na meri i katim marit long wanem, lotu i bin bosim gavman, tasol taim dispela ol gavman i bagarap na nupela gavman i kamap, ol lo i bin senis. Olsem: Long 1985 samting kantri Ajentina i tok, em i no stret sapos wanpela lo i tok man na meri i no inap katim marit. Spen na Itali tu i kamapim lo olsem man na meri inap katim marit. Tasol dispela kain senis long lo bilong gavman i no dispela tasol i as na namba bilong ol marit i katim marit i go antap.
Olsem na i mas i gat narapela samting na namba bilong ol manmeri i katim marit i go antap moa. Wanpela man bilong raitim buk (Joseph Epstein) i kamapim wanpela tok na ating dispela i wanpela as bilong dispela hevi. Em i tok, i no bipo tumas na ol man i ting ‘sapos yu bin katim marit i olsem yu man i no gat strong. Tasol nau long sampela lain man planti ol i bin katim marit—wan wan tasol i no bin mekim olsem. Olsem na sapos yu marit longtaim long wanpela poroman, ol dispela man i ting yu narapela kain man.’—Divorced in America.
Olsem na long nau tingting bilong ol man long marit i narapela kain. Planti yia ol man i bin ting marit em wanpela samting holi na samting yumi mas daun long en, tasol nau dispela kain tingting i wok long senis. Olsem na nau long olgeta hap ol man i orait long pasin bilong katim marit. Bilong wanem ol man i ting em i orait long katim marit, tasol bipo ol i ting em i no orait? Ating pasin bilong katim marit em i no gat rong, a?