Hevi Bilong Katim Marit

ANDRU na Ana i marit. Ana em meri bilong i stap isi na em i save tingim ol narapela. Em i poromanim gut ol narapela. Pasin bilong Andru, em man bilong toktok na lap na wok. Taim Andru i stap, ai bilong Ana i save lait na olgeta man i lukim tupela ol i save Andru i laikim tru Ana.

Tupela i marit 7-pela yia na nau ol hevi i kamap. Andru i kisim nupela wok mani na dispela wok i pulim bikpela hap taim bilong em. Dispela wok Andru i kisim Ana i no amamas long en long wanem, nau Ana i no save lukim Andru tumas, na planti taim em i no kam hariap long haus. Olsem na bilong daunim dispela tingting olsem em i stap wanpis, Ana i tingim moa yet wok mani bilong em. I no longtaim tumas na taim Andru i kam long haus Ana inap harim smel bilong dring long maus bilong em. Andru i tokim Ana, bihain long wok em i go dring wantaim ol wanwok bilong em. Dispela pasin bilong Andru long dring i go moa nogut, olsem na Ana i lusim haus na go i stap long narapela ples. Olsem na Andru i bel hevi stret. Sampela mun bihain tupela i katim marit.

Long planti marit dispela samting i no nupela samting. Olsem yumi lukim long stori paslain long dispela, long olgeta hap planti ol i katim marit. Na tu ating i no gat olsem narapela rot, na sampela i mas katim marit. Sampela i ting Baibel i tambuim pasin bilong katim marit, tasol nogat. Ol lo bilong Baibel long dispela samting i gutpela na i stret, na sapos wanpela i pamuk, Baibel i larim man i no bin bagarapim marit em i ken katim marit. (Matyu 19:9) Na tu, sapos wanpela i kisim bikpela hevi, olsem poroman marit i paitim em nogut tru, ol lo bilong Baibel i orait long em i ken lusim poroman marit bilong em. (Lukim Matyu 5:32; 1 Korin 7:​10, 11.) Tasol ol dispela samting i no as na Andru na Ana i katim marit.

Long dispela taim Andru na Ana i Kristen na bipo tupela i bin ting marit em samting holi. Tasol olsem yumi olgeta i mas mekim, tupela i stap namel long ol man bilong dispela graun, na ol i gat narapela kain tingting long marit​—ol i ting sapos yumi laik yumi ken pinisim marit, na pasin bilong katim marit em rot bilong mekim olsem. Olgeta yia planti tausen marit i kisim dispela tingting, olsem na ol i katim marit, tasol i no gat gutpela as na ol i mekim olsem. Bihain planti ol i kisim save olsem dispela tingting bilong ol long katim marit i no stret, na dispela tingting i olsem umben i kalabusim ol pinis.

Ating tingting bilong yu i olsem tingting bilong planti​—man na meri ol i ting katim marit em i gutpela rot long lusim marit i save kamapim ol hevi tasol. Tasol pasin bilong katim marit i gat ol hevi bilong en tu. Yu save long dispela? Na yu save, tingting bilong graun inap senisim tingting bilong yu long pasin bilong katim marit?

Ol i Laik Inapim Laik Bilong Ol

Wanpela samting i mekim na Andru na Ana i bin katim marit, em ol i bin kisim tingting olsem: Long rot bilong gutpela wok mani tupela i laik holim oltaim, tupela inap kisim ol samting tupela yet i laik kisim. Olsem na tupela i kisim tingting olsem wok mani i namba wan samting long marit bilong tupela. Andru i amamas tru long nupela wok mani bilong em na sapos em i wok strong em inap kisim bikpela wok moa. Em i kisim sampela wok moa antap long wok em i save mekim, na tu, bihain long wok em i go dring o go long pati wantaim ol wanwok bilong em na bai ol i ken laikim em. Na Ana i skul bambai em i ken mekim gut dispela wok mani em i laik holim oltaim.

Dispela pasin bilong givim bel tru long wanpela wok em inap kamapim tupela samting: Namba wan i olsem​—Andru na Ana i no gat taim bilong sindaun wantaim na toktok. Ana i bin tok: ‘Wok bilong mipela i pulim mipela long wokabaut long narapela narapela kain rot. Bipo long olgeta nait mitupela i bin sindaun wantaim na toktok gut. Tasol bihain mipela i no mekim moa​—Andru i mekim ol samting bilong redi long mekim wok long de antap na mi tu. Pasin bilong toktok i pinis.’

Namba tu samting i kamap long tupela em olsem: Ol i slek long ol samting bilong spirit. Tupela i putim wok mani olsem namba wan samting, olsem na long i stap bilong tupela, pasin bilong i stap pren bilong God i kamap namba tu. Tupela i gat hevi, olsem na mobeta tupela i tingim God, tasol ol i no mekim. Sapos Andru i bin tingim gut ol lo bilong Baibel, dispela inap helpim em long winim dispela hevi long dring. Na sapos Ana tu i bin tingim ol lo bilong Baibel, dispela inap helpim em long pas gut long man bilong em na helpim em long winim dispela hevi.

Olsem na tupela i no wok long stretim hevi long marit, nogat; tupela i ting pasin bilong katim marit em gutpela rot, olsem rot bilong helpim tupela long lusim ol hevi. Taim tupela i katim marit, tupela i sem na maus bilong bel i gat tok, olsem na tupela i no moa mekim ol wok bilong spirit olsem Kristen tru.

Ol “Saveman” i Helpim Pasin Bilong Katim Marit

Taim planti marit i kisim hevi long marit, ol i go lukim ol saveman bilong helpim kain man olsem, o ol i kaunim ol buk em ol dispela kain saveman i raitim. Tasol sori tru, sampela kain saveman i ting pasin bilong katim marit i stret, na ol marit i no ken hatwok long stretim ol hevi bilong ol.

Sampela saveman i tok, ‘katim marit i no samting nogut. Katim marit em rot bilong lusim ol hevi. Planti i katim marit, tasol i no olsem ol dispela man i mekim samting i no stret, nogat. Dispela i makim olsem samting i no stret long pasin bilong marit.’ Sampela saveman i tok insait long skin bilong yumi, yumi gat wanpela samting i mekim na taim sampela yia i go pinis dispela samting i kirapim yumi long senisim poroman marit bilong yumi. Orait, sampela yia moa yumi senisim gen poroman marit, na i go i go. Olsem tok bilong ol dispela saveman i olsem yumi ken kisim planti poroman na sapos yumi laik katim marit, no gat rong long en.

Ating planti marit i bin bagarap long wanem, ol marit i bihainim tingting bilong ol dispela kain saveman bilong graun. Planti narapela saveman i mekim wok long ol narapela rot bilong kirapim ol manmeri long ting, pasin bilong katim marit i gutpela. Wanpela meri (Diane Medved) i bin skelim planti buk paslain long em i raitim buk bilong em yet (The Case Against Divorce). Em i tok, long haus buk long ples bilong em yet em i painim 50 buk samting i tok pasin bilong katim marit i stret, na sampela buk i bilong mekim gut bel bilong ol marit na ol i no ken bel hevi taim ol i katim marit.

Sampela Samting Moa i Kirapim Ol Long Senisim Tingting

I gat sampela samting moa i kirapim man long tingting long katim marit, i no ol saveman tasol. Ol samting olsem televisen, piksa wokabaut, ol nius, ol buk i stori nating long man i laikim meri, planti taim ol dispela samting i kamapim ol tok bilong giamanim ol man na ol i ting olsem marit i no gutpela samting.

Sapos yu gat tingting olsem ol dispela buk o piksa o tok bilong ol saveman i giaman, dispela tasol em i no inap helpim yu long sakim dispela tingting. Dispela meri (Medved) i tok moa olsem: ‘Yu lukim wanpela piksa wokabaut na maski yu gat gutpela pasin na yu ting yu no inap mekim pasin nogut, dispela piksa wokabaut i gat strong na em inap paulim tingting bilong yu. Ol man i wokim dispela piksa wokabaut i wokim bambai man i lukim em i ken sori long man marit long piksa wokabaut, maski em i aigris long ol meri. Na meri tru bilong em i kamap olsem wanpela meri nogut long ai bilong ol man i lukim dispela piksa wokabaut maski em i no gat rong. Ating yu yet yu no amamas long pasin dispela man long piksa wokabaut i mekim, tasol yu save planti ol i ting dispela pasin i orait tasol, olsem na nau yu kirap na kisim narapela tingting long dispela samting.’

Pasin ol narapela man i mekim inap givim gutpela tingting long yumi o bagarapim tingting bilong yumi. Olsem na sapos ol buk, televisen, piksa wokabaut, na nius inap givim gutpela tingting long yumi o bagarapim tingting bilong yumi, orait, ol poroman bilong yumi inap mekim moa yet! Baibel i givim tok lukaut long yumi olsem: “Yupela i no ken larim ol arapela man i giamanim yupela. Yupela i save long dispela tok, ‘Sapos yumi poroman wantaim ol man nogut, bai ol i bagarapim gutpela pasin bilong yumi.’ ” (1 Korin 15:33) Marit i wanpela gutpela samting, tasol sapos yumi poroman wantaim sampela i ting marit i samting nating, dispela inap bagarapim marit bilong yumi. Planti marit i kamapim ol hevi bilong ol long sampela kain “pren” na tingting bilong ol dispela pren i no helpim ol em i bin bagarapim marit bilong ol. Na sampela bilong ol dispela “pren” ol yet i bin katim marit, tasol i no gat gutpela as na ol i mekim olsem.

Na sampela, taim ol i gat hevi long marit ol i no wok long stretim, nogat, ol i go long loya samting bilong kisim tok bilong helpim ol. Planti bilong ol i lusim tingting olsem long planti kantri ol loya o kot samting i no wok long helpim marit, ol i wok long helpim man long katim marit. Ol loya i save kisim mani taim ol i helpim man long katim marit​—ol i no kisim mani long helpim man long stretim marit.

Tasol ating yu tingting yet olsem: ‘Sapos ol dispela loya, o ol saveman bilong dispela samting, o ol man bilong raitim ol buk na nius samting, o ol pren bilong mi yet, ol i ting pasin bilong katim marit i no bikpela samting, tingting bilong ol i stret, o nogat?’ Planti kain man i ting olsem, na tingting bilong ol i stret long dispela bikpela samting olsem katim marit o olsem wanem? Orait nau yumi ken skelim sampela samting inap kamap bihain long taim ol marit i katim marit pinis, na em bai bekim ol dispela askim.

[Piksa long pes 7]

Sampela “saveman” bilong marit ol i gat save long helpim ol marit long katim marit bilong ol, tasol ol i no gat save long stretim ol hevi bilong ol