I Stret Ol i Orait Long Katim Marit?

LONG JUN 1986 ol man long Ripablik bilong Aialan ol i vot bilong kamapim tingting bilong ol long lo bilong gavman i tambuim pasin bilong katim marit. Planti tru ol i laik bai gavman i mas holim yet dispela tambu. Olsem na long olgeta kantri long hap bilong Westen Yurop, dispela wanpela kantri tasol i tambuim dispela pasin bilong katim marit.

Tru long nau planti man i kisim nupela tingting na ol i lusim ol tambu bilong bipo, tasol planti manmeri i save tingim ol lo bilong ples o bilong lain bilong ol na ol i no orait long pasin bilong katim marit. Tru tumas, man em i bilong wanem lain, na em i bin kisim wanem kain skul, na em i gat wanem kain sindaun taim em i liklik yet, dispela olgeta samting i save bosim tingting bilong em. Tasol sapos em i gat lotu, o em i no gat lotu, dispela em i nambawan bikpela samting bilong bosim tingting bilong em long pasin bilong katim marit.

Orait, yu yet yu ting olsem wanem long pasin bilong katim marit? Sapos man wantaim meri bilong em, tupela i no sindaun gut wantaim na pasin bilong narapela i no stret wantaim pasin bilong narapela na tupela i save kros pait, ating ol i ken orait long tupela i katim marit na dispela bai pinisim hevi bilong ol o nogat? Bai yu bekim wanem tok long dispela askim? Na bikpela samting em olsem: Wanem as bilong ol tok yu bekim?

Kain Kain Tingting

Bikpela lain manmeri ol i bihainim lotu Katolik na ol dispela milion milion manmeri i no ken katim marit. Wanpela buk bilong lotu Katolik (The Catholic Encyclopedia) i tok, ‘Long marit Kristen, taim tupela i slip wantaim pinis, orait i no gat rot bilong katim tru dispela marit (bambai man o meri i ken maritim narapela poroman).’ Misin Katolik i save tambuim ol man long katim marit, tasol i gat sampela samting na bai Misin i tok marit bilong man na meri i no stret na Misin i pinisim na i orait long dispela man o meri i marit gen. Planti Katolik i save pinisim marit bilong ol olsem. Long Epril 1986 wanpela nius (The Denver Post) i stori olsem: ‘Planti Katolik moa yet long dispela hap ol i askim Misin long pinisim marit bilong ol na dispela i givim bikpela wok long Misin, olsem na Misin long dispela hap i mas tromoi inap olsem K250,000 bilong baim sampela wokman moa na bilong baim wanpela kompiuta bilong mekim dispela wok.’ Nius i stori moa olsem: ‘Long dispela hap i gat 700 man na meri marit em ol i bin wet inap 3-pela yia pinis bilong harim olsem Misin i pinisim marit bilong ol o nogat.’

Ol lotu Talatala long narapela narapela hap bilong graun ol i gat kain kain ‘lo long katim marit. Tasol long planti lotu Talatala ol bikman bilong misin i no orait tumas long pasin bilong katim marit; sapos i gat samting nogut tru, long dispela as tasol bai ol i orait long man na meri i katim marit. Tasol ol i gat kain kain tingting long wanem samting i olsem samting nogut tru. Planti ol i save tok, sapos man o meri i trabel na bagarapim marit, o man i mekim pasin nogut tru long meri, o man i lusim meri o meri i lusim man, orait ol i ken katim marit. Tasol i gat planti ol narapela samting tu na misin i orait long katim marit. Sampela misin i kirap nau na wokim lotu bilong katim marit−ol i save bung na mekim singsing na beten kain olsem ol i save mekim long taim man na meri i laik marit. Long wanpela kain bung olsem, man na meri marit i tokaut olsem nau tupela i pinisim ol tok promis tupela i bin mekim taim ol i marit, na tupela i bekim ring bilong marit i go long pasto, na bihain pasto i tokaut olsem marit bilong tupela i pinis, na nau tupela i sekan. Wanpela nius i stori olsem.−Nius The New York Times.

Ol Juda bilong nau ol i bihainim lo bilong ol tumbuna na ol i gat kot bilong lotu. Taim man na meri bilong lotu Juda i laik katim marit, dispela kot i mas skelim. Lo bilong ol pris bilong lotu Juda i orait long man na meri i katim marit sapos tupela i wanbel long mekim, o wanpela i kamap lek nogut samting o narapela hap bilong skin bilong em i bagarap, o wanpela i mekim pasin nogut tru. Tasol lo bilong ol i tok, man i mas raitim pas bilong katim marit na givim long meri na bai marit bilong tupela i pinis tru. Sampela man marit i bel nogut na ol i no laik givim dispela pas long meri, o ol i mekim wok long dispela pas bilong subim meri long bihainim laik bilong ol. Dispela pasin i givim bikpela hevi long ol meri Juda. Nambawan kaunsil long biktaun Nu Yok, em Andrew Stein, em i mekim tok long wanpela bung bilong ol pris bilong lotu Juda na ol loya na sampela man moa na em i tok, ‘Dispela pasin i mekim na planti gutpela meri Juda ol i stap nating−namba wan marit bilong ol i pinis, tasol ol i no inap marit gen, long wanem man i no bin raitim dispela pas bilong katim marit.’ Long kantri Isrel long nau, sapos i no gat dispela pas na meri i marit gen, marit bilong em i no stret long lo bilong gavman, na lo i tok ol pikinini em i karim ol i bastet tasol.

Ol manmeri i no gat lotu o ol i no bilip long God, ating ol i save bihainim lo bilong gavman long ples ol i stap long en, tasol ol tu i gat hatwok long katim marit, long wanem i gat kain kain lo bilong katim marit long narapela narapela kantri. Na sampela taim insait long wanpela kantri long narapela narapela hap i gat narapela kain lo bilong katim marit. Wanpela man i gat save long dispela samting em i tok, long ol narapela narapela hap bilong Amerika lo i makim olsem 50 kain samting em as bilong katim marit. Sampela em olsem: “Mekim pasin nogut tru,” “i no inap dispela marit i wok gut,” “taim man i kam sindaun long dispela provins, meri i no laik i kam wantaim em.” Long dispela taim nau ol man i no tingim moa wanem samting i stret na wanem samting i no stret, olsem na long sampela hap, lo i orait long man na meri i katim marit maski i no gat wanpela rong i bin kamap.

Ol i No Save Yet long Rot Bilong Stretim

Ol dispela planti kain kain lo bilong katim marit em ol man i tok Baibel i as bilong en. Tasol yu ting ol dispela lo i bin helpim marit long wok gut o helpim ol manmeri long i stap amamas? Nogat tru! Long wanem nau planti marit moa yet ol i katim marit. Na long olgeta taim dispela samting i wok long kamap bikpela moa. Ol dispela lo i no bin strongim marit na i bin skruim bikpela hevi moa long sindaun bilong planti milion manmeri.

Olsem na ol man i laik tru long mekim pasin stret, ol i mas save long wanpela bikpela samting, olsem: Ol i mas save Baibel i mekim wanem tok tru long katim marit?