Katim Marit—Ol Bikpela Hevi Bilong En

OL LOYA o ol pren o “ol saveman” i no save karim hevi bilong man na meri i katim marit, nogat; em man na meri yet na ol pikinini bilong ol i mas karim dispela hevi. Planti man na meri i katim marit ol i ting nau ol i stap fri tasol, pasin bilong katim marit i kamapim planti hevi ol i bin ting i no inap kamap.

Wanpela meri (Diane Medved) i raitim wanpela buk (The Case Against Divorce) na em i tok, bipo em i ting long raitim wanpela buk i stori long ol gutpela samting na ol samting nogut bilong katim marit. Tasol em i tok em i bin senisim tingting long dispela samting. Bilong wanem em i senisim tingting? Em i tok: ‘Taim mi skelim ol samting i painim man na meri i wok long stretim ol samting bilong katim marit na ol samting i painim ol bihain, em i samting nogut tru. Em i putim bikpela hevi long skin, na tingting, na bel bilong ol. Na planti bilong ol i ting bihain long taim ol i katim marit, ol bai sindaun gut, tasol dispela i kamapim hevi i winim hevi i bin kamap insait long marit bilong ol.’

Dispela meri Ana yumi bin stori long em long stori i go pinis i tok: ‘Mi ting taim mi katim marit bilong mi, mi bai stap fri. Na mi ting, sapos mi inap lusim dispela poroman marit bilong mi, orait bai mi stap gutpela. Tasol taim mi no katim marit yet, tru mi pilim bel hevi, tasol mi pilim olsem mi stap laip yet. Tasol taim mi katim marit pinis, bihain mi pilim olsem mi dai pinis. Mi pilim nogut tru, olsem mi wanpela meri nating. Mi no inap kamapim tru ol samting mi pilim long dispela taim. Bel bilong mi i bagarap stret.’ Taim man na meri i katim marit pinis, ol samting ol i bin tingim, olsem ol bai stap fri nau na ol bai amamas, dispela tingting i pinis taim ol i tingim ol hevi nau ol i mas karim long olgeta de long sindaun bilong ol.

Wanpela samting yumi mas tingim gut. Maski i gat as na wanpela i katim marit, em i mas tingting, sapos em i mekim, bihain ating em bai bel hevi na sampela taim dispela bel hevi i no pinis hariap. Olsem na sapos wanpela i ting long katim marit, i gutpela em i tingim tok bilong Jisas long Luk 14:​28, olsem: “Tingim gut pe.” Olsem na yumi ken askim olsem: ‘Wanem sampela “pe” o sampela bel hevi man o meri i kisim bihain long taim em i katim marit?

Ol Samting Dispela i Mekim Long Man

Nius (Journal of Marriage and the Family) i kamapim ripot bilong ol man i skelim dispela samting na dispela ripot i soim olsem, planti i katim marit long wanem, ol i no amamas o ol i gat bikpela bel hevi. Tasol man o meri i katim marit em i stap moa bel hevi, winim man o meri i no katim marit. Na sapos man o meri i katim marit tupela taim samting, ating bai ol i bel hevi planti taim. Wanpela meri (Lenore Weitzman) long buk bilong em, em i tok, ol man o meri i katim marit o lusim poroman marit, ol i kisim sik long tingting na planti ol i mas slip long haus sik bilong ol dispela kain man. Na tu, ol i winim ol narapela man long kisim ol sik, o long dai hariap, o long pasin bilong kilim i dai skin bilong ol yet.​—The Divorce Revolution.

Dispela meri (Diane Medved) i bin skelim pasin bilong 200 manmeri na em i kisim save olsem, man na meri i bin katim marit, sampela ol i bel hevi inap olsem 7-pela yia, na sampela​—planti yia moa. Dispela meri i tok moa olsem, wanpela samting pasin bilong katim marit i no bin senisim, em dispela samting i as bilong tupela i bin katim marit. Olsem na taim ol i marit gen dispela marit tu em inap bagarap!

Sampela man i skelim dispela hevi long marit na ol i kisim save olsem, bihain long taim ol i katim marit planti man na meri i amamas long i stap fri, olsem nau ol i no pas long wanpela poroman, olsem na ol i painim narapela poroman. Ol i mekim olsem na bai ol i no ken pilim olsem ol i stap wanpis. Tasol pasin bilong painim poroman long wanem wanpela i pilim olsem em i stap wanpis, em inap kamapim narapela hevi olsem pasin pamuk. Na dispela kain pasin inap kamapim bikpela hevi long ol pikinini sapos ol i save papa o mama i mekim dispela kain pasin.

Tasol planti man na meri i wok long katim marit ol i tingim ol yet, olsem ol samting bilong ol yet i namba wan. Olsem na ol i strongim bel na ol i no tingim hevi ol bai kamapim long famili, olsem long pikinini bilong ol, o long papamama bilong ol, o long ol pren bilong ol. Na sampela i lusim tingting long bel hevi God inap kisim taim yumi no bihainim ol lo bilong em.​—Lukim Song 78:​40, 41; Malakai 2:16.

Hevi Long Mani Samting

Long Amerika, taim planti meri i katim marit, nau ol i sot tru long mani bilong baim ol samting ol i mas i gat, olsem kaikai, haus na sampela samting moa. Olsem na bihain long taim ol i katim marit ol i no gat gutpela sindaun olsem bipo.

Dispela meri (Lenore Weitzman) i tok moa long buk bilong em olsem, em i ting ol lo bilong kot bai helpim meri i bin katim marit, tasol em i kisim save olsem ol dispela meri i gat bikpela hevi. Ol i sot long planti samting bilong skin bihain long taim ol i katim marit. Ol dispela meri i tokim meri bilong raitim buk (Lenore Weitzman), ol i mas go long welfe na askim ol long helpim ol, o ol i mas go long sampela haus pasindia bilong kisim ples slip o kaikai samting. Long olgeta 100 100 meri Lenore Weitzman i bin toktok wantaim ol, 70 i tingting planti oltaim long painim rot bilong baim kaikai samting bilong helpim sindaun bilong ol. Sampela i pret, na sampela i bel nogut, na sampela i pilim ol i kalabus nau long ol pikinini, olsem na ol i no gat liklik hap taim bilong ol yet.

Papamama bilong yangpela man Tom i bin katim marit taim Tom i gat 8-pela krismas. Tom em i tingting bek na em i tok: ‘Taim Papa i lusim mipela, mipela i gat kaikai, tasol mipela inap baim loliwara wan wan taim tasol. Mipela i no inap baim ol nupela klos. Mama i mas wokim olgeta siot bilong mipela. Taim mi lukim sampela poto long taim mipela liklik, mipela i luk olsem ol pikinini i sik na i gat bel hevi.’

Taim man na meri i katim marit, planti taim mama i kisim ol pikinini na papa i no givim mani bilong helpim ol, maski kot i tok ol i mas mekim. Olsem na pasin bilong katim marit inap mekim na dispela ol meri i kamap rabis, winim ol man. Tasol ating pasin bilong katim marit inap putim hevi long ol man tu. Wanpela buk (Divorced Fathers) i tok, taim man i baim pinis kot na ol narapela samting olsem loya, dispela inap pinisim bikpela hap mani bilong em, inap olsem mani em i save kisim insait long wanpela yia. Na pasin bilong katim marit inap givim bikpela bel hevi long man marit na ol papa. Sampela man i bel hevi long wanem nau ol inap lukim pikinini sampela taim tasol.

Lukautim Gut Marit Bilong Yu!

Yumi no ken kirap nogut taim yumi save long samting wanpela lain i tokaut long en taim ol i skelim sampela man na meri ol i bin katim marit wanpela yia pinis. Long olgeta 100 100 man na meri, 81 man na 97 meri i ting ol i popaia long katim marit, na mobeta ol i bin wok strong moa long stretim hevi i bin stap long marit bilong ol.

Ol manmeri i bin katim marit ol i ken kisim save long ol hevi i bin kamap bihain long taim ol i katim marit, na bai ol i ken save, ol tok bilong planti saveman bilong graun long marit na katim marit i kranki. Olsem Song 146:​3, 4 i tok: “Ol king na ol man bilong graun . . . nogut yu bilip long ol. Taim ol i dai ol i tanim i kamap graun gen. . . . Ol i no inap mekim olgeta samting ol i bin tok long mekim.”

Olsem na ol pren, na ol saveman, na ol loya samting ol i man bilong graun tasol, ol i no stret olgeta na ol i save popaia. Olsem na sapos yumi laik save long wanpela samting long marit, bilong wanem yumi tingim ol dispela man tasol? Gutpela yumi tingim God Jehova, em Man bilong wokim marit, a? Ol lo bilong em long dispela samting i no senis olsem tingting bilong ol ‘saveman.’ Ol lo bilong Jehova i bin stap planti tausen yia na inap long nau dispela ol lo i stret na i save helpim gut ol man i bihainim ol dispela lo.

Andru na Ana i tingim dispela samting bihain liklik long taim tupela i katim marit. Tupela i kisim save olsem tupela i bin popaia taim tupela i katim marit. Tasol gutpela tru tupela i bung gen na marit gen. Nau tupela i senisim tingting bilong ol. Andru i tok: ‘Mi save mi bin lusim ol stretpela lo, olsem na i mas i gat samting bilong helpim mi. Olsem na mi kirap na beten long dispela samting. Mi laik tru long mekim stretpela pasin. Olsem na mi mas lusim sampela pasin bilong dispela graun mi bin kirap long mekim. Mi no laikim moa ol dispela samting.’

Ana i tok: ‘Nau mipela inap stap wantaim gen na lusim tingting long ol samting nogut mipela i bin mekim bipo, long wanem, mitupela i laik tru long mekim samting i stret long ai bilong Jehova. Na tu, mipela i laik tru bai marit bilong mipela i wok gut.’ Tasol dispela samting i hatwok liklik long Andru na Ana. Ana i tok: ‘Olgeta taim mipela was gut long i stap bilong mitupela, mipela pas gut wantaim o nogat. Sapos mi o Andru i pilim olsem mipela i laik lusim dispela pasin bilong pas gut wantaim, mitupela i save toktok wantaim long dispela samting.’

Nau Andru na Ana i mekim bikpela long tupela naispela pikinini bilong ol, na Andru em wanpela wokman insait long wanpela kongrigesen bilong ol Witnes Bilong Jehova. Tru, olgeta samting i no stret olgeta. I no gat wanpela marit i stret olgeta, long wanem, marit i save pasim man na meri i gat sin, tupela i no stret olgeta. Olsem na Baibel i givim gutpela tok long yumi olsem: Taim sin i kamap long graun olgeta marit i save kisim sampela hevi. (1 Korin 7:28) Olsem na yumi mas tingting gut paslain long yumi laik marit. Sapos wanpela i laik marit em i mas lusim bikpela hap taim bilong kisim save long man o meri em i laik marit long em. Na taim tupela i marit, marit bai stap gut sapos tupela i wok strong long mekim ol samting man o meri marit i mas mekim.

Tasol yumi no ken ting pasin bilong katim marit em samting nating. Taim man o meri i mas katim marit, God em inap helpim yumi long karim ol hevi em inap kamap. Lukautim gut marit bilong yu. Sapos hevi i kamap na yu ting long katim marit, o ting long lusim poroman, tingim wanem samting inap helpim yu long stretim dispela hevi. Lukim Tok bilong God long Baibel bilong helpim yu long winim hevi long marit.a Tok bilong helpim yumi long marit i stap insait long Baibel na sapos yumi bihainim dispela tok em inap helpim tru yumi.

[Futnot]

[Piksa long pes 10]

Mekim sampela samting wantaim famili na dispela bai helpim yu long lukautim gut marit bilong yu