Taim i No Gat Pasin Bilong Laikim Tru Poroman Marit
“Long ol kantri em pasin bilong katim marit i bikpela, planti i save katim marit bilong ol taim ol i gat sampela hevi, na tu, planti marit moa bai go nogut.”—WANPELA LAIN I SKELIM OL FAMILI LONG AMERIKA.
SAMPELA i bin tok olsem, long i stap bilong yumi i gat wankain samting i save givim bikpela amamas na bikpela bel hevi long yumi—em marit bilong yumi. Tru tumas, i no gat planti samting olsem em inap kamapim bikpela amamas o kamapim bikpela pen na bel hevi. Olsem tok i stap long blok i kamapim, planti manmeri i kisim bikpela bel hevi long marit bilong ol.
Tasol namba bilong ol manmeri i katim marit, dispela i no kamapim hamas marit i gat ol bikpela hevi insait long en. I gat planti ol i no katim marit tasol ol i no sindaun gut wantaim poroman bilong ol. Wanpela meri i marit longpela taim, winim 30 yia, em i tok olsem: “Pastaim mipela famili i sindaun gut wantaim, tasol insait long dispela laspela 12-pela yia, pasin bilong mipela long stap gut wantaim i bagarap olgeta. Man bilong mi i no wari liklik long tingting bilong mi. I no gat narapela inap bagarapim bel bilong mi olsem em i save mekim.” Wanpela man i marit klostu 25 yia pinis, em i tok: “Meri i tokim mi pinis olsem em i no laikim mi moa. Em i tok sapos mipela i ken i stap olsem ol wanhaus tasol na raun wanpis long ol narapela taim, em i orait liklik long i stap yet wantaim mi.”
Tru, sampela bai katim tasol marit bilong ol sapos em i bagarap olsem. Tasol planti ol i no inap katim marit. Bilong wanem? Olsem Dokta Karen Kayser i tok, ol samting olsem ol pikinini, pret long kisim sem, mani, lotu, na ol pren na wanblut, ol dispela samting inap mekim na tupela i no katim marit, maski narapela i no laikim moa narapela. Em i tok: “I luk olsem tupela bai i no inap kot na katim marit, olsem na ol i tingting pinis long stap wantaim poroman ol i les pinis long en.”
Sapos tupela marit i no amamas moa long stap wantaim, yu ting ol i bilong stap olsem tasol na i no gat amamas liklik long marit bilong ol? Yu ting dispela kain sindaun tasol i olsem senis bilong katim marit? I gat ol samting i kamapim long ples klia olsem marit inap abrusim bagarap—i no olsem ol i mas katim marit o karim hevi bilong sindaun wantaim na i no gat pasin bilong laikim narapela.
[Blok long pes 3]
PASIN BILONG KATIM MARIT LONG OLGETA HAP
• Ostrelia: Kirap long 1960 samting pasin bilong katim marit i go bikpela tru.
• Briten: Ol i ting olsem 4-pela bilong olgeta 10-pela 10-pela marit bai bruk.
• Kanada na Japan: Wanpela bilong olgeta 3-pela 3-pela marit bai bruk.
• Amerika: Kirap long 1970, planti tru ol i katim marit bilong ol, inap olsem wanpela long olgeta tupela tupela marit.
• Simbabwe: Pasin bilong katim marit i pinisim 2-pela bilong olgeta 5-pela 5-pela marit.