Amamas Long Bikpela Man i Bin Wokim Yumi
“Yupela ol Israel, yupela i mas belgut long God i bin wokim yupela. Yupela ol manmeri bilong Saion, amamas long king bilong yupela.”—SONG 149:2.
OL HEVI i pulap long graun, na “ol samting em i olsem pen i save kamap pastaim long meri i laik karim pikinini,” olsem Jisas i tok taim em i stori long “dispela graun i laik pinis.” Ol dispela hevi i bin kirap long 1914 long taim bilong Namba Wan Pait. (Matyu 24:3-8) Planti bikman bilong politik i ting ol hevi bai go bikpela moa. Tru, sampela kain hevi i pinis long Isten Yurop na ol i stap olsem fri, tasol olsem wanpela bikman bilong dispela hap i tok, ‘ol man i kamap planti tumas, na ol i mekim ol samting bilong bagarapim graun, na sik AIDS i kamap bikpela, na ol kantri i laik mekim pait long bom nuklia, na sampela lain i gat planti samting bilong skin, tasol sampela lain i stap rabis, na ol dispela samting i mekim na ol man i no stap wanbel o amamas liklik.’ I no gat wanpela man long graun inap pinisim ol dispela hevi.—Jeremaia 10:23.
2 Tasol Gutpela God bilong yumi em i save long pasin bilong stretim ol dispela samting. Taim Jisas i bin toktok long “dispela graun i laik pinis,” em i toktok tu long taim em i “kam bek” na i stap. (Matyu 24:3, 37-39) Bilong kamapim “nupela skai,” Jehova i givim wok King long Jisas, na ol samting i kamap pinis long graun i makim olsem em i kamap King long 1914. (2 Pita 3:13) Nau Jisas i stap king wantaim Bikpela King Jehova, na Jisas i gat wok long skelim ol man na brukim ol i kamap tupela lain, em lain i gat pasin daun olsem bilong ol sipsip, na lain i gat pasin bikhet olsem bilong ol meme. Ol bikhetman i bilong “kisim pe nogut,” olsem bagarap olgeta, na ol man kain olsem sipsip ol i bilong i stap laip oltaim long graun na Kingdom bai bosim ol.—Matyu 25:31-34, 46.
3 Lain remnan bilong Israel bilong spirit, wantaim bikpela lain man bilong harim tok na i olsem sipsip, ol i amamas long Bikpela King Jehova i kirapim pinis Kingdom na Pikinini bilong em i bosim, olsem na ol inap tok: “Bai mi singsing amamas long God, Bikpela bilong mi. Bai mi amamas moa yet, long wanem, em i bin kisim bek mi. Gutpela taim bilong en na stretpela pasin bilong en i karamapim mi olsem gutpela longpela klos, . . . God, Bikpela bai i mekim stretpela pasin wantaim pasin bilong litimapim nem bilong en i kamap namel long ol manmeri bilong en, olsem kru bilong kaikai i kamap long gaden na i go bikpela. Na ol arapela lain manmeri bai i lukim.” (Aisaia 61:10, 11) Nau planti milion bilong olgeta lain ol i kam insait long dispela lain i olsem sipsip.
“Bai i Kamap Hariap”
4 Klostu nau ol wok bilong Satan bai kisim bagarap, olsem na ol dispela sipsip i wok long kam insait hariap. Gutpela God i tok: “Olgeta manmeri bilong yu bai i mekim stretpela pasin tasol . . . Long han bilong mi yet mi bin mekim ol i kamap wanpela lain manmeri, na ol i kamap olsem ol han bilong diwai mi bin planim. Mi bin mekim olsem bai ol arapela lain manmeri i ken lukim na givim biknem long mi. . . . Ol lain i liklik tru bai ol i kamap planti moa olsem ol manmeri bilong ol bikpela na strongpela kantri. Mi Bikpela, mi tok, ol dispela samting bai i kamap hariap long taim mi makim pinis.” (Aisaia 60:21, 22) Ol samting dispela tok profet i makim i kamap tru long nau! Long pes 12 i go 15 long dispela magasin yumi ken lukim dispela samting long Ripot Bilong Wok Bilong Ol Witnes Bilong Jehova long 1992.
5 Ripot i tok, i gat 4,472,787 manmeri i bin autim tok long 1992; insait long wanpela yia dispela lain i go bikpela inap 4.5 pesen—i gat 193,967 pablisa moa i kamap. Inap 301,002 i bin kisim baptais long 1992, olsem na yumi save, planti moa i bilip long tok i tru bilong Baibel. Nau em i taim bilong “tudak tru, na bai i gat planti blakpela klaut i karamapim skai,” tasol yumi amamas long bikpela lain nupela Witnes i kamap olsem “bikpela lain grasopa” na “bikpela lain soldia” em ol i “autim tok . . . i go inap long olgeta hap bilong graun”! (Joel 2:2, 25; Aposel 1:8) Long Alaska ol Witnes i raun inap 50 taim samting long balus bilong Sosaiti na autim tok long ol man i stap long ples kol i gat bikpela ais. Na long ples hat long Mali na long Bekina Faso ol Witnes i mekim wankain wok, na long ol ailan bilong Maikronisia tu—long ol dispela hap, lain bilong Jehova i kamapim tok i tru “olsem lait bilong olgeta kantri, na bai [ol i] helpim ol manmeri long olgeta hap bilong graun na bai [Jehova i] kisim bek ol.”—Aisaia 49:6.
6 Inap planti yia ol man i bin mekim nogut long ol Witnes Bilong Jehova, tasol Jehova i bin lukautim ol olsem wanpela strongpela haus samting bilong hait long en. (Song 37:39, 40; 61:3, 4) Tasol long nau 21 kantri i no tambuim moa wok bilong ol, na ol inap tokim ol man olsem Gutpela God i putim pinis Krais Jisas long i stap King bilong graun.—Song 2:6-12.
7 Olsem wanem long ol dispela kantri i no tambuim moa wok bilong autim tok? Olsem sat i makim, lain bilong Jehova i wok strong na kamap planti long Balgeria, na Romenia, na long ol hap em bipo Rasia i bin bosim long Isten Yurop, na long Angola na Benin na Mosambik long Afrika. Long Saier tu, lain Witnes i kamap bikpela tru. Bipo ol gavman i pasim wok bilong ol Witnes long ol dispela hap, tasol nau rot i op na ol i amamas tru long bihainim tok olsem: “Yumi mas tenkyu long Bikpela, long wanem em i save mekim gutpela pasin long yumi. . . . Em wanpela i save wokim ol bikpela mirakel. Oltaim oltaim em i save laikim yumi moa yet.” (Song 136:1, 4) Ol i givim bel tru long mekim wok bilong bringim ol man i gat pasin daun i kam long lain bilong Kingdom.
8 Long Yurop ol Witnes i bin kibung long ol kantri em bipo gavman Komyunis i bosim, na bikpela lain tru i bung, na planti nupela man i kisim baptais long ol dispela kantri. Na long Disemba 10, 1991, gavman i tekewe tambu long ol Witnes long Togo long Afrika, na wanpela mun bihain ol i kibung. I gat 6,443 pablisa i autim tok long olgeta mun, tasol long kibung i gat bikpela lain moa i bung, inap olsem 25,467, na 556 i kisim baptais, em olsem 8.6 pesen bilong ol pablisa. Aisaia 60:8 i tok piksa long ol dispela nupela manmeri i litimapim nem bilong Jehova na i tok, ol i olsem “waitpela samting i spit i kam olsem klaut win i bringim i kam antap long solwara, na olsem ol pisin i flai i kam bek long haus bilong ol”—haus bilong ol em ol kongrigesen bilong lain bilong Jehova.
9 Ol Witnes long Isten Yurop na Afrika ol i hangre long ol samting bilong spirit, olsem na ol faktori bilong Sosaiti long Jemani na Itali na Saut Afrika i wokim planti buk samting long planti tok ples na salim i go long ol. Bipo ol i gat wan wan magasin tasol, na ol i givim long narapela narapela bilong kaunim, tasol nau ol i kisim planti ol buk samting, i olsem kaikai bilong ol long ol samting bilong spirit. Nau ol i amamas long truim tok profet i tok: “Bai yupela i gat planti samting bilong kaikai na bai yupela i pulap tru. Na bai yupela i litimapim nem bilong mi God, Bikpela bilong yupela, long wanem, mi mekim planti gutpela samting long yupela.”—Joel 2:26.
Lukautim Ol Nupela Man
10 Planti tru ol i kam long Memorial bilong tingim i dai bilong Jisas, inap olsem 11,431,171, winim narapela yia inap 781,013; namba i go bikpela inap 7.3 pesen. Yumi laik tok amamas long ol dispela nupela manmeri i kam bung wantaim yumi! I gutpela sapos sampela Witnes i ken stadi wantaim ol long Baibel! (Lukim Aisaia 48:17.) Ripot i tok, ol Witnes i wokim 4,278,086 stadi long olgeta mun wantaim ol manmeri i laik stadi, em i winim bilong yia i go pinis inap 8.4 pesen. Tasol i gutpela sapos ol narapela nupela manmeri i ken stadi olsem. Ol Witnes bilong Jehova i amamas long go long haus bilong ol man na stadi wantaim ol long Baibel na helpim ol long painim laip oltaim. (Jon 3:16, 36) Yu ken askim ol long mekim olsem. Na ol i amamas sapos yu kam long miting bilong ol long Haus Kingdom tu!—Song 122:1; Rom 15:7.
11 Sampela kongrigesen i gat gutpela Haus Kingdom bilong bung long en, tasol sampela nogat. Sampela kantri i bin putim tambu long ol Witnes, na inap planti yia ol i mas bung hait long ol liklik liklik grup na bai ol i ken miting, tasol nau tambu i pinis, na ol inap bung long ples klia, tasol ol i no gat Haus Kingdom. Long wanpela kantri long Afrika i gat 93 kongrigesen, na i gat 3-pela Haus Kingdom tasol, olsem na planti kongrigesen i mas miting ausait. Sampela kongrigesen i gat olsem 150 pablisa, tasol inap olsem 450 manmeri i save kam long ol miting bilong ol.
12 Long Isten Yurop i hatwok long baim hap graun na long wokim haus, tasol ol Witnes i bin wokim sampela. Long Novemba 28, 1992, ol i dediketim nupela haus brens long Polan. Ol Witnes Bilong Jehova long olgeta hap ol i save givim kontribusen, olsem mani, bilong helpim wok bilong Jehova, na dispela i helpim ol long wokim ol Haus Kingdom samting. Olsem na sampela “i gat planti samting” ol i “ken givim ol samting bilong helpim ol manmeri i sot,” na nau “olgeta bai stap gut” long ol samting bilong spirit.—2 Korin 8:13, 14.
Wan Bilion Aua!
13 Em planti aua tru, a? Ol man i kisim laip oltaim bai ol inap mekim gutpela wok bilong Jehova long ol dispela planti planti milion aua na bai ol i amamas! Sapos yumi bungim ol aua em lain bilong Jehova i bin winim taim ol i autim tok long 1992, em inap olsem 1,024,910,434 aua! Ol i bin go “long ol bung bilong ol manmeri na long olgeta haus” na ol i litimapim nem bilong Gutpela God bilong ol. (Aposel 20:20) Inap 4,289,865 Witnes i bin autim tok long olgeta mun. Ol wan wan i gat narapela narapela kain sindaun. Sampela i no gat bikpela hap taim bilong mekim wok bilong Kingdom. Ol papa i mas lukautim famili, na ol lapun i no strong tumas, na sampela Witnes i gat sik, na sampela yangpela i mas i go skul, tasol ripot i kamapim klia olsem ol i laikim tumas Jehova, na dispela i kirapim ol long mekim wok bilong em.—Lukim Luk 21:1-4.
14 Planti yangpela i mekim wok bilong Jehova, na ol i bihainim tok bilong Solomon long Saveman 12:1 i tok: “God i bin wokim yumi olgeta. Olsem na long taim yupela i yangpela yet, yupela i mas tingim em.” Ol i givim bel long lainim ol samting long skul, na ol i mekim olsem tu long ol samting bilong spirit em papamama i lainim ol long en. Yumi amamas long planti yangpela i bin kisim baptais long ol kibung. Na yumi amamas tu long planti ol i lain long sampela kain wok bilong skin na bai ol i ken kisim wok haptaim long taim ol i pinis long skul na ol i ken mekim wok painia na lukautim ol yet long ol samting bilong skin, olsem aposel Pol i bin mekim; em i bin wok haptaim long samapim haus sel.—Aposel 18:1-4.
15 Na ol painia na ol narapela i mekim wok bilong Jehova long olgeta taim ol i bin mekim bikpela wok bilong Kingdom long 1992! Ol i kamap planti inap 931,521. Ol i save autim tok long ol haus long olgeta de, na mekim Baibel-stadi wantaim ol man long haus bilong ol, olsem na ol i save gut long pasin bilong kamapim gut ol tok bilong Baibel. Planti ol i bin go long Skul Bilong Wok Painia, na dispela i helpim ol long mekim gutpela wok moa bilong God na kisim amamas long en.
16 Gutpela samting i bin painim ol painia olsem Aisaia 50:4 i tok: “God, Bikpela i bin skulim mi long gutpela pasin bilong toktok, olsem na mi inap mekim gutpela tok bilong strongim bel bilong ol manmeri i no gat strong.” Planti man i les long ol pasin nogut bilong dispela graun, tasol taim ol i harim gutpela tok bilong ol painia, dispela i mekim gut bel bilong ol.—Lukim Sindaun 15:3; Esekiel 9:4.
Ol i Wokim Planti Haus
17 Wok bilong ol Witnes Bilong Jehova long ol samting bilong spirit i go bikpela, olsem na ol i mas i gat ol haus samting na bai ol i ken mekim gut dispela wok. Ol i mas i gat planti haus faktori moa bilong wokim ol buk samting, na planti ofis moa, na haus Betel, na Haus Kingdom, na Haus Kibung. Olsem na ol Witnes Bilong Jehova i mas kamap man bilong wokim ol haus tu. Kain wok olsem i bin kamap long taim bilong King Solomon. Em i bin wokim haus lotu bilong lotuim Jehova, na em i bihainim “lista i gat ol piksa bilong olgeta samting spirit bilong God” i bin makim na God i bin givim long King Devit, em papa bilong Solomon. (1 Stori 28:11, 12) Solomon i bin givim gutpela tok long ol man na strongim bel bilong ol, na em i bin wokim wanpela gutpela haus tu, winim olgeta narapela haus ol man bilong graun i bin wokim.—1 King 6:1; 9:15, 17-19.
18 Long nau God i no givim piksa bilong haus long ol Witnes Bilong Jehova na bai ol i ken wokim, nogat, tasol em i givim spirit bilong em long ol na bai ol i ken wokim ol haus, na taim ol i mekim dispela wok, ol man bilong graun i lukim na ol i kirap nogut. (Sekaraia 4:6) I gat sotpela taim tasol i stap, na lain bilong Jehova i mas wokim hariap planti Haus Kingdom moa na ol narapela haus tu. Long sampela kantri ol brata i save sanapim hariap ol nupela Haus Kingdom. Long Kanada, insait long 10-pela yia ol i sanapim 306 Haus Kingdom, em ol i wokim olgeta wan wan insait long tupela de tasol. Wok bilong Jehova i kamap bikpela hariap long olgeta hap bilong graun, olsem na ol i wok long sanapim 43 nupela haus brens o skruim ol nupela rum i go long ol haus brens. Na klostu nau wok bilong wokim bikpela haus long Bruklin bai pinis. Em i go antap inap 30 plua, na em i gat ol rum inap long 1,000 wokman bilong Betel i ken slip long en. Na long provins Nu Yok long taun Pateson ol i wokim ol haus olsem haus skul bilong Baibel; em bikpela wok moa, winim ol narapela wok olsem em Sosaiti i bin mekim bipo, tasol ol i wokim hariap na i olsem em bai pinis paslain long taim ol i bin makim.
19 Ol dispela wok i kamap gutpela tru, na ol kampani i save mekim kain wok olsem ol i kirap nogut taim ol i lukim dispela wok bilong ol Witnes. Ol Witnes i dediket long Jehova ol i givim planti kontribusen na bai Sosaiti i ken wokim ol dispela haus. Spirit bilong Jehova i kirapim ol long givim mani, na givim bel na taim na strong bilong ol long mekim ol dispela wok. Planti ol i bin lain gut long mekim kain wok olsem. Ol i no save straik o les long wok. Spirit bilong Jehova i kirapim ol long mekim wok, olsem spirit i bin mekim long taim bilong Moses na long taim bilong Solomon na ol i wok long sanapim haus lotu. Bikpela samting, em ol wokman i mas i gat strong long ol samting bilong spirit.—Lukim Kisim Bek 35:30-35; 36:1-3; 39:42, 43; 1 King 6:11-14.
20 Taim Solomon i wokim pinis haus lotu, em i wokim ol narapela haus. (2 Stori 8:1-6) Orait, olsem wanem long bihain? Wok bilong autim tok em bai go bikpela moa yet na ol i mas wokim planti Haus Kingdom na haus faktori moa? Em yumi no save. Tasol yumi save, taim Jehova i tok dispela wok bilong autim gutpela tok bilong Kingdom em inap pinis, em nau, dispela “bikpela hevi tru” bai kamap. (Matyu 24:14, 21) Bihain long en, nupela taim bai kamap, na “nupela skai na nupela graun” bai stap, na Jehova bai mekim gut tru long ol man. Olsem na yumi “ken belgut na amamas oltaim long nupela samting nau [Jehova i] wokim,” na yumi ken litimapim nem bilong dispela Gutpela God bilong yumi!—Aisaia 65:17-19, 21, 25.
Yu Save Long Dispela?
◻ I gat wanem ol as na yumi ken amamas long Gutpela God bilong yumi?
◻ Wanem ol samting i go bikpela long 1992?
◻ Olsem wanem long sampela kantri ol i pinisim tambu long ol Witnes?
◻ Ol yangpela na ol painia i mekim wanem na dispela i helpim planti nupela man long kam insait long oganaisesen bilong Jehova?
◻ Wanem bikpela wok lain bilong Jehova i mekim long wokim ol haus na long mekim ol wok bilong spirit?
[Askim Bilong Stadi]
1. Long nau, ol man i stap olsem wanem?
2. Husat inap tru long stretim ol hevi bilong ol man? Em i bin mekim wanem bilong stretim ol hevi?
3. Bilong wanem ol Kristen tru i amamas?
4, 5. (a) God i bin mekim wanem tok profet long lain bilong em bai kamap planti? (b) Ripot bilong 1992 i tok wanem long dispela samting?
6, 7. Wanem senis i bin kamap long nau? Olsem na lain bilong Jehova i bin mekim wanem?
8. Lain Witnes i kamap bikpela olsem wanem long Isten Yurop? Na olsem wanem long Afrika?
9. Sosaiti i mekim wanem na bai ol Kristen long Isten Yurop na long Afrika ol i ken kisim ol samting bilong spirit inap tru long ol?
10. Yumi laik bai ol dispela planti nupela man i bin kam long Memorial ol i ken mekim wanem?
11, 12. (a) Wanem sampela hevi i stap long sampela kantri? (b) Ol brata i mekim wanem bilong helpim ol brata em ol i sot long ol samting bilong skin?
13. Long 1992 ol Witnes i lusim hamas aua long autim tok na skulim ol man? Wok bilong husat i mekim na ol aua bilong wok autim tok i go bikpela tru?
14. Planti yangpela i mekim wanem na ol i tingim Bikpela Man i bin wokim ol?
15, 16. Ol painia na ol narapela i mekim wok bilong Jehova long olgeta taim, olsem wanem ol i bin mekim na wok bilong Kingdom i go bikpela? Wanem gutpela samting em sampela i bin kisim long dispela wok?
17. Wanem narapela wok ol Witnes i mas mekim long dispela taim?
18, 19. (a) Oganaisesen bilong Jehova i wokim wanem ol haus? (b) Spirit bilong Jehova i mekim wanem na ol Witnes bilong em i mekim ol dispela wok?
20. (a) Wok bilong autim tok bai go inap long wanem mak? (b) Lain bilong Jehova i wetim wanem gutpela samting?
[Blok long pes 17]
Long 1992 ol i lusim planti aua, winim wan bilion, long autim tok na skulim ol man
[Sat long pes 12-15]
(Bilong save ol dispela rait i stap we long pes, lukim buk o magasin)
RIPOT BILONG WOK BILONG OL WITNES BILONG JEHOVA LONG 1992
[Piksa long pes 10]
Planti tausen manmeri i kisim baptais long yia i go pinis, na dispela i kamapim klia olsem Jehova i mekim gut tru long wok bilong autim tok na skulim ol man
[Piksa long pes 16]
Planti ol yangpela i tingim Bikpela Man i bin wokim ol