Mekim Ol Samting Bambai Yu Inap i Stap Oltaim Long Bihain
“Olgeta haus i gat man i bin wokim em. Na man i wokim olgeta samting, em God.”—HIBRU 3:4.
1, 2. (a) Husat i kolim ol samting Noa i mas mekim bilong wokim sip? Em i kolim wan wan samting tasol o olsem wanem? (b) Bilong wanem i bikpela samting long yumi mas bihainim tok bilong God, olsem Noa i mekim?
SAMTING olsem 4,400 yia bipo Jehova i tokim Noa long wokim wanpela sip bilong helpim ol man bambai ol i no ken bagarap. God i no larim Noa i wokim sip long laik bilong em yet. Nogat. God i kolim wanem kain plang Noa i mas kisim, na em i tok Noa i mas wokim olsem tripela haus i gat ol rum insait, na em i kolim longpela na braitpela bilong sip na i mas go antap inap hamas fit, na em i tok banis bilong sip i no ken i go antap olgeta na pas long rup bambai win inap kam insait, na em i tok Noa i mas penim insait na ausait long kolta. “Orait Noa i mekim olgeta samting olsem God i tokim em.”—Jenesis 6:13-16, 22.
2 Noa i makim gutpela pasin ol witnes bilong Jehova long nau i ken bihainim! Olsem Noa, yumi tu yumi gat wok long helpim ol man bambai ol i no ken bagarap. Wok bilong yumi inap helpim planti man bambai ‘planti milion man nau ol i stap laip ol i no ken i dai.’ Yumi mas bihainim tok bilong God, olsem Noa i bin mekim. Em bikpela samting! No gat bikpela hap taim moa, olsem na yumi mas bihainim pasin bilong Man I Winim Noa, em Krais Jisas, na yumi mas wok strong moa long ‘autim tok long Stretpela pasin’!—2 Pita 2:5.
Wok Bilong Spirit
3. (a) Sapos yumi bihainim tok bilong Jisas na yumi bilip, bai wanem samting i kamap? (b) Ol tok Jisas i autim, ol dispela tok i strongim bilip bilong man olsem wanem?
3 Inap 1,956 yia bipo Jisas i autim tok long hap bilong Galili na ol man i kirap nogut long tok em i autim, em i tok, “Yupela tanim bel! Kingdom bilong heven i klostu pinis.” Em i tok ol man i bihainim tok bilong em na ol i bilip ol i olsem “man i gat gutpela tingting, na em i wokim haus bilong en antap long ston.” Bilip bilong dispela man i strong; no gat wanpela samting inap bagarapim. Taim hevi i painim em, em i no pundaun. Ol tok Jisas i autim long ol man, ol dispela tok i strongim bilip bilong ol. Ol man i pilim tru ol dispela tok long bel bilong ol—i no olsem ol tok nating ol hetman bilong lotu Juda i autim. Ol man i kirap nogut long ol tok Jisas i lainim ol long en. Ol soldia ol i salim bilong holim Jisas, ol i no holim em. Ol i tok: “Bipo i no gat wanpela man i mekim toktok olsem dispela man i mekim.”—Matyu 4:17; 7:24, 25, 28; Jon 7:46.
4. (a) Jisas i mekim wanem na em i redi long ‘wokim haus’ long bihain? (b) Wanem bikpela samting bilong ‘wokim haus’ i kamap long Pentikos long yia 33 C.E.?
4 Jisas i mekim ol samting bilong redi long ‘wokim haus’ long bihain. Em i bungim sampela man bilong wok wantaim em, olsem Pita, narapela nem bilong em Sifas, em insait bilong dispela nem i olsem “ston.” Jisas i tokim Pita: “Yu Pita, na bai mi wokim sios [kongrigesen] bilong mi antap long dispela ston.” Bihain Pita i kamap wanpela ston bilong ol planti “ston i gat laip,” long haus o kongrigesen God i wokim antap long Jisas em “namba wan ston.” Dispela kongrigesen i kamap long Pentikos long yia 33 C.E. taim Jisas i kapsaitim spirit holi long ol disaipel i wet i stap. Long dispela taim Jisas i kirap bek pinis na em i sindaun long han sut bilong Papa bilong em long heven.—Matyu 16:18; 1 Pita 2:4-6; Apose12:2-4, 32, 33.
5. Kongrigesen Kristen i insait tru long wanem ol samting long nau?
5 Long nau kongrigesen Kristen i insait tru long ol samting Jehova i mekim bilong kamapim laik bilong em. Nau em i taim bilong ‘ol samting i stap hait i kamap ples klia’—nau God i soim long “ol wokboi bilong en” long graun “ol samting i mas kamap kwiktaim.” (Revelesen 1:1-3) Nau em i taim bilong ol dispela wokboi i mas ‘autim gutpela tok bilong Kingdom bilong God long olgeta hap bilong graun’ na bihain tasol bai God i givim strafe long Seten na ol lain nogut bilong em. Nau em i taim bilong King Krais Jisas long heven i mas tilim ol man bambai ol man i kain olsem sipsip, em ol i gat pasin daun, ol i stap narapela lain, na ol man i kain olsem meme, em ol i bikhet na ol i no laikim dispela Kingdom, ol i stap narapela lain. Ol man i kain olsem sipsip, Krais i bungim ol wantaim lain “brata” spirit o kongrigesen bilong em paslain long taim “bikpela hevi tru” i kirap.—Matyu 24:14, 21; 25:31-40.
6. Wanem samting long nau i olsem ‘sip bilong Noa’? Yumi mas mekim wanem bambai yumi no ken bagarap?
6 Orait, wanem samting long nau i olsem sip bilong Noa bilong helpim ol man bambai ol i no ken bagarap? Em wanpela samting bilong spirit, olsem: Kirap long 1919 na bihain long dispela taim ol Witnes Bilong Jehova i stap gut long ol samting bilong spirit na i olsem ol i stap long wanpela paradais bilong spirit. Lain bilong Noa i mas stap insait long sip bambai ol i no ken bagarap, na olsem tasol long nau, lain remnan wantaim lain poroman bilong ol ol i mas i stap insait long dispela paradais bilong spirit bambai ol i no ken bagarap. Ol i mas bihainim tok bilong God na givim bel long mekim wok na pinisim dispela bikpela wok bilong spirit God i laik ol i mekim. Dispela wok i olsem: Bilong “bungim olgeta samting long Krais, ol samting bilong heven [kirap long yia 33 C.E. em i bungim ol man ol i bilong kisim laip long heven] na bilong graun tu [long yia 1935 samting em i kirap long bungim ‘bikpela lain’ bilong olgeta hap ol i bilong kisim laip oltaim long graun].”—Efesas 1:10; Revelesen 7:9, 14.
“Wokim na Planim”
7. I gat wanem tupela wok i kamap long nau? Olsem wanem yumi ken kisim amamas wankain olsem bilong Noa na Jeremaia?
7 Hap lain bilong ol Kristen em spirit holi i bin makim ol, olsem lain remnan, Jehova i givim wankain wok long ol olsem em i bin givim long profet Jeremaia, olsem: “Bilong bosim ol lain man na ol kingdom, bilong kamautim na bagarapim ol samting, na bilong wokim na planim ol samting.” Olsem na ol i gat tupela wok: Ol i mas (1) tokaut long strafe bilong Jehova em bai painim Seten wantaim lain nogut bilong em na (2) bilong wokim na kamapim lain bilong God ol i bilong kisim laip. (Jeremaia 1:10, NW; 24:6, 7; Aisaia 26:20, 21) Lain remnan na bikpela lain poroman bilong ol, ol i amamas long mekim dispela wok long nau! Noa wantaim lain bilong em ol tu i wok strong na ol i bin kisim wankain amamas.
8. Insait long 22 yia i go pinis, lain bilong autim tok i go bikpela inap wanem mak? (b) Lukim pes 22-25 na kolim sampela kantri em lain bilong autim tok i go bikpela tru long 1985.
8 Olsem wanem? Tru planti milion man bai abrusim bagarap long de bilong kros bilong Jehova? Dispela samting inap kamap—lukim Ripot Bilong Wok Bilong Ol Witnes Bilong Jehova Bilong 1985. Na long pes 22 i go inap 25 bilong dispela nius yu inap lukim dispela ripot. Yumi amamas tru long lukim ol manmeri bilong autim tok ol i kamap planti. Long nau i gat 3,024,131 manmeri ol i save autim tok bilong Kingdom. Bipo, long yia 1963, i gat 1,000,000 ol i mekim dispela wok, na long 1974 i gat 2,000,000, na long 1985 dispela lain i go bikpela tru, winim 3,000,000. Olsem na insait long 22 yia dispela lain bilong autim tok bilong Kingdom i go bikpela inap 200 pesen. Yumi tenkyu tru long Jehova, long wanem em i salim spirit bilong em i kam na lain bilong em i kamap planti!—Sekaraia 4:6; 1 Korin 3:6.
9. (a) Olsem wanem long lain painia na yumi kirap nogut long en? (b) Sapos man inap go insait long dispela wok, i gutpela sapos em i mekim wanem? Bilong wanem i gutpela sapos em i mekim olsem?
9 Na i no dispela lain pablisa tasol i go bikpela. Insait long ol dispela yia ol lain bilong autim tok bilong Kingdom long olgeta de, olsem ol “painia,” dispela lain tu i go bikpela tru. Maski hevi bilong mani i wok long i go bikpela long olgeta hap na pe bilong kaikai samting i go antap na mani i sot, tasol dispela strongpela lain “painia” i go bikpela tru—long 1963 i gat 38,573 long olgeta mun, tasol long yia 1985 i gat 322,821 painia—dispela lain i go bikpela tru inap 737 pesen! Dispela i kamapim long ples klia wanem samting? Olsem: Lain bilong God i bihainim tok bilong Jisas long Luk 9:23 na ol i daunim laik bilong ol yet na ol i putim laik bilong God i go pas long laik bilong ol. Tru, sapos man i laik i stap long wok painia na mekim gut dispela wok, em i mas tingim na skelim gut ol hap taim em i save lusim bilong mekim ol narapela wok na ating em i mas lusim sampela samting bipo em i save laik long mekim, na bai em i gat bikpela hap taim bilong mekim gut wok painia bilong em. Sapos em i mekim olsem, bai wok bilong em i kamap gutpela na bai em i kisim bikpela amamas long en.—Rom 12:1, 2; Malakai 3:10.
10. Ol pablisa bilong kongrigesen ol i mekim wanem gutpela wok? (b) Wanem 3-pela wok i go bikpela na i winim bilong ol narapela yia bipo? Olsem na yumi ken save long wanem samting?
10 Planti milion pablisa insait long ol kongrigesen ol tu i mas karim planti hevi em Seten wantaim ol man bilong graun i putim long ol. Tasol ol dispela lain tu ‘i givim maus bilong ol long God na ‘telimautim nem bilong em,’ na dispela i olsem ofa ol i givim long God. (Hibru 13:15; Rom 10:9, 10) Ol dispela aua yupela ol gutpela pablisa i save putim ripot bilong en long olgeta mun, maski em i bikpela aua o liklik aua, tasol ol i bungim wantaim na i kamap bikpela tru, inap olsem 590,540,205 aua bilong yia 1985. Dispela namba i winim bilong 1984 inap 16.8 pesen! Bipo ol i no bin winim bikpela aua olsem insait long wanpela yia! Na long 1985 ol i mekim 224,725,918 gobek na 2,379,146 Baibel-stadi long ol manmeri i laik harim tok bilong Baibel. Dispela wok tu i go bikpela tru na i winim ol narapela yia bipo. Olsem na yumi save, ol manmeri bilong autim tok bilong Kingdom ol i wok strong long autim tok na ol i wok strong tu long kamap gutpela tisa bilong skulim ol man long tok bilong Baibel.—Matyu 28:19, 20.
“Wokim na Planim” Bilong Kamapim Gutaim Tru na Gutpela Sindaun
11. Ol i mekim wanem bilong toksave long ol man long as tru bilong kamapim bel isi na gutaim long graun? Olsem wanem long dispela wok ol i mekim?
11 Long 1985 Yunaitet Nesen i tokaut olsem yia 1986 em Yia Bilong Gutaim. Nau long dispela taim Yunaitet Nesen i mekim planti tok long pasin sekan na gutaim, tasol i gat narapela toksave i kamap, em i bikpela toksave moa, na em i kamapim tok bilong Baibel long bel isi na gutaim bai kamap olsem wanem long graun. Long 1985 ol Witnes Bilong Jehova i mekim bikpela wok tru long autim dispela toksave long ol man, na long olgeta hap bilong graun ol i tilim 38,805,561 Baibel na buk na buklet, na ol i tilim 300,545,609 magasin na ol i kisim 1, 719,930 sabskripsen bilong Wastaua na Kirap! Long rot bilong ol dispela buk na nius, na long maus tu, ol i mekim bikpela toksave tru long olgeta hap na ol i tokaut long Kingdom bilong “King bilong Gutaim.” Long ol narapela yia bipo ol i no bin mekim bikpela wok olsem long autim dispela tok. Tru tumas, “wok king bilong em bai go bikpela, na gutaim i no ken pinis.”—Aisaia 9:6, 7, NW.
12. Lain bilong Jehova i go bikpela, olsem na ol i mas i gat wanem samting? Olsem wanem yumi save lain bilong Jehova i wanbel long kamapim dispela wok?
12 Bilong kamapim bikpela wok olsem, i mas i gat planti manmeri moa bilong mekim dispela wok. Olsem na long 1985 planti nupela kongrigesen bilong ol Witnes Bilong Jehova i kamap long olgeta hap. Pastaim long 1985 i gat 47,869 kongrigesen, tasol taim yia i laik pinis i gat 49,716 kongrigesen. Olsem na ol i mas i gat planti nupela Haus Kingdom bilong bung na mekim miting bilong ol long en. Jehova i mekim gut long ol Witnes bilong em na long planti hap ol i painim pinis mani bilong wokim ol nupela Haus Kingdom bilong ol! Taim wanpela kongrigesen i gat hevi long wokim Haus Kingdom bilong ol, Orait ol narapela kongrigesen i kam helpim ol long wokim. Narapela i helpim narapela, olsem na insait long lain brata i stap long olgeta hap, olgeta wantaim ol “inap olsem.”—2 Korin 8:14, 15.
13. Ol wan wan manmeri inap mekim wanem bilong helpim dispela wok bilong wokim ol nupela Haus Kingdom?
13 Long sampela kantri, rot i op na ol brens-ofis bilong Sosaiti Was Taua long ol dispela hap ol inap helpim ol kongrigesen long wokim ol nupela Haus Kingdom. Long hap bilong Amerika na Kanada, planti manmeri ol i putim mani olsem kontribusen long wanpela bokis i stap long ol Haus Kingdom, o ol i givim mani olsem dinau, em bilong wokim ol nupela Haus Kingdom. Na sampela ol i givim strong na save bilong ol long wokim ol dispela nupela Haus Kingdom, olsem na long planti hap ol i wokim ol Haus Kingdom insait long 2-pela de tasol, olsem long Sarere na Sande. Ol Witnes Bilong Jehova i givim bel tru long mekim dispela wok, olsem na ol inap mekim ol samting ol man bilong graun i ting i no inap long man i mekim.—Kolosi 3:23.
14. Ol i sot long ol Haus Kingdom na ol i mekim wanem?
14 Long planti kantri i no gat gutpela haus bung bilong wokim ol kibung sekit bilong ol Witnes Bilong Jehova na ol i tingting planti. Tasol ol i painim rot bilong stretim dispela hevi na ol i kirap long wokim sampela haus bilong mekim ol kibung long en. Ol i mekim wankain gutpela pasin olsem ol boi bilong God i bin mekim bipo long taim bilong ol Isrel. Long dispela taim bipo God i tokim ol long wokim haus lotu sel, na ol i mas painim planti samting bilong wokim. Tasol lain Isrel i amamas na i wanbel long bihainim tok Bilong God, em i tok: “Nau yupela mas givim sampela samting long em. Olgeta manmeri i laik givim ol samting long em, ol i mas bringim samting.” Orait ol i bringim planti samting moa yet i kam, olsem na dispela wok bilong wokim haus lotu em i pinis hariap.—Eksodas 35:5-19; 36:7.
15. (a) Olsem wanem long planti haus brens bilong Sosaiti Was Taua? (b) Olsem wanem na ol inapim tru dispela wok?
15 Planti man moa yet i singaut long ol Baibel na buk samting i kamapim tok Bilong Baibel, na ol 94 brens-ofis bilong Sosaiti Was Taua i stap long olgeta hap ol i gat bikpela wok long wokim ol dispela buk samting. Olsem na long planti hap ol i mas skruim sampela rum moa long ol brens-ofis na kisim ol nupela masin samting bambai ol inap wokim planti buk na nius moa. Haus faktori bilong wokim ol buk samting long Bruklin na Was Taua Fam i bikpela tru na i winim ol narapela brens-ofis, tasol long nau 36 brens-ofis bilong Sosaiti i save wokim ol magasin bilong ol yet, na 6-pela brens-ofis i gat ol masin bilong wokim ol buk tu. Jemani, Itali, Japan ol i save wokim ol Baibel tu wantaim ol buk na magasin samting. Nupela haus faktori long Seltes long Jemani i wokim planti buk na nius inap tru long skel bilong ol masin. Long Ebina, long hap bilong Japan, nau ol i wok long wokim narapela haus faktori em i go antap inap 6-pela plua, na ol i skruim planti rum moa long haus Betel, na dispela nupela hap ol i wokim em i go antap inap 8-pela plua, na 280 wokman moa bai slip long dispela nupela haus. Bipo, taim Solomon i laik wokim haus lotu, lain bilong Jehova i givim bel long wokim, na long nau tu lain bilong Jehova i givim bel long mekim dispela wok, na ol i ‘givim planti samting long Jehova.’ Olsem na em i blesim ol na ol inapim tru wok bilong ol long wokim ol dispela nupela haus. —1 Kronikel 22:14, 15; 29:7, 9.
16. Bilong wanem ol i mas wokim ol dispela nupela haus na masin samting?
16 Tasol olsem wanem? I gat wok bilong ol dispela nupela haus na ol i mas mekim dispela bikpela wok? Yes, i gat wok bilong ol dispela samting, long wanem, “wokboi i gat gutpela tingting” em i gat wok yet long givim kaikai bilong spirit long lain bilong Jehova “long taim bilong en.” “Ol manmeri bilong God” i mas kisim dispela kaikai bambai lain bilong God i ken i go bikpela, na ol i ken mekim wok bilong autim tok bilong Kingdom long olgeta hap na long 200 samting tok ples. (Matyu 24:45; Efesas 2:19; 4:15, 16) Lain bilong Jehova yet ol i wokim wanpela nupela kain masin bilong wokim ol buk samting long kain kain tok ples (ol i kolim MEPS), na nau inap 26 brens-ofis bilong Sosaiti Was Taua ol i gat dispela nupela masin. Olsem na nau long planti hap ol inap mekim wankain pasin long wokim ol buk samting na ol i wokim ol nius long wankain taim. Olsem na long planti hap bilong graun ol man inap kisim ol dispela tok bilong kingdom long wankain taim.—Lukim Aisaia 52:7-9.
17. Long nambawan ofis bilong Bruklin ol i sot long wanem samting? Ol i laik mekim wanem samting bilong stretim dispela samting?
17 Long nau oganaisesen bilong Jehova i wok long i go bikpela bikpela. Long namba wan ofis long Bruklin, Nu Yok, famili bilong Betel i go bikpela na ol i kisim olgeta rum na ol i sot long ol rum slip bilong ol nupela wokman. Sapos em i laik bilong Jehova, orait ating bai ol i wokim wanpela haus i go antap tru na i gat planti rum slip long en inap long wan tausen wokman moa. Ol i tingting long wokim dispela haus long hap graun bilong Sosaiti long Kolambia Haits. Tasol sapos rot i no op bilong wokim dispela haus, orait bai mipela i wetim Jehova i stiaim tingting bilong mipela na soim rot long mipela. Mipela i tenkyu tru long ol brata i stap long olgeta hap, ol i beten na ol i givim ol samting bilong helpim dispela bikpela wok.—Lukim Aposel 21:14; 2 Tesalonaika 3:1.
18. Amagedon i klostu pinis na bilong wanem nau ol i wokim planti haus na masin samting?
18 Tasol ating sampela bai tok, ;Nau Amagedon i klostu pinis na bilong wanem ol i wok strong long wokim planti nupela haus olsem?’ Mipela laik bekim tok long ol olsem: Maski Amagedon i klostu pinis, mipela i no ken pasim dispela wok bilong mipela. Nau em i taim bilong pasim wok bilong Seten, tasol oganaisesen bilong Jehova i “wokim na planim” ol samting bilong i stap oltaim oltaim long bihain. Tru sting sampela haus bai sanap yet long taim nogut bilong Amagedon o nogat, em mipela i no save. Tasol mipela save tru, oganaisesen bilong Jehova bai winim Amagedon na em bai wok yet i go, na Jehova bai mekim wok long rot bilong dispela oganaisesen wantaim ol manmeri i stap gut long en, na Jehova bai kamapim bel isi na gutaim long gutpela Paradais em i tok pinis long kamapim long graun.—Revelesen 7:9, 14-17; 21:1, 4, 5.
“Wokim na Planim” i Gat As Bilong En
19. Taim yumi lukim ripot bilong Memorial bilong 1985, yumi tingim wanem samting?
19 Bipo Noa i no wokim nating sip. Nogat. I gat as na em i wokim. Na yumi tu—i mas i gat as bilong wok yumi mekim. Taim yumi skelim ripot bilong 1985 yumi kirap nogut long wanpela hap bilong dispela ripot—i gat 7,792,109 manmeri i kam long bung bilong Memorial bilong tingim i dai bilong Jisas, long Epril 4, 1985. Dispela namba i winim bilong 1984 inap olsem 375,135. Em i gutpela tru! Tasol i gat wanpela samting yumi mas tingim. I gat 3,024,131 pablisa i autim tok bilong Kingdom, tasol i gat samting olsem 4,000,000 manmeri moa ol i bung wantaim yumi na ol i no kirap yet long mekim wok Kristen bilong autim tok bambai ol i ken ‘wokim na planim’ bilong i stap oltaim long bihain. Orait yumi inap helpim ol olsem wanem?
20. 1 gat wanem bikpela wok i stap? Yumi ken mekim dispela wok olsem wanem?
20 Yumi wan wan i save long sampela bilong ol dispela man. Ating sampela ol i famili bilong yumi yet, o yumi save stadi wantaim ol, o ol i save kisim nius bilong yumi. Na ating sampela ol i kirap long bung wantaim yumi bihain long Memorial bilong 1985. Olsem wanem? Yumi inap wok strong moa long helpim ol dispela lain na stadi wantaim ol long Baibel bambai ol i ken kamap strong? Yumi ken helpim ol olsem bambai ol i ken i kam hait insait long samting Jehova i putim bilong lukautim ol i go inap long taim ‘olgeta samting bilong bagarapim ol i go pinis’? (Sam 57:1) Long taim bilong “bikpela hevi tru” Jehova bai bekim nogut long ol man, na dispela bagarap bai winim tru bikpela Tait Wara i bin kamap long taim bilong Noa. Orait yumi laik skulim ol dispela nupela man long tok i tru bilong Baibel bambai ol i ken kamap strong na “singaut long nem bilong Jehova,” olsem bai ol i no ken bagarap long taim bilong dispela “bikpela hevi tru.” (Matyu 24:21, 22, 39; Sefanaia 2:3; 3:8, 9, NW) Olsem na yumi mas stadi wantaim ol long Tok bilong God, em Baibel, na buk Yu Inap i Stap Oltaim long Paradais long Graun o narapela buk bilong Baibel inap strongim bilip bilong ol.
21. Olsem wanem yumi inap kamapim bilip olsem bilong Noa long yumi yet na long ol narapela man?
21 God Jehova em i Nambawan Man bilong wokim haus na em i Man bilong givim olgeta samting long ol man. (Sam 127:1; 145:16; Eklisiastis 3:10-13) Em yet i bin tokim Noa long wokim sip olsem wanem. Orait bihain long dispela, Krais Jisas, em Man I Winim Noa, em i wok gut wantaim Jehova na Jehova i stretim rot bilong baim bek ol man i bihainim tok bilong em na ol i no ken kalabus moa long sin na dai. Na long rot bilong Pikinini bilong em, em i wokim wanpela samting i mekim sip bilong Noa. Dispela samting i gutpela ples paradais bilong spirit, na ol manmeri i bilip ol inap i kam insait long en na abrusim bagarap, na bihain ol inap kisim laip i stap oltaim. (Matyu 20:26-28; Jon 3:16; 17:3) Orait yumi mas givim bel long helpim planti manmeri moa long kisim bilip na bai bilip bilong ol i kamap strong, na bai ol i ken kamap wanbel tru wantaim Jehova na Pikinini bilong em Krais Jisas. Yumi mas helpim ol long laikim tumas stretpela pasin na nolaik tru long pasin nogut. (Hibru 1:9) Olsem bai yumi inap holim bilip kain olsem bilong Noa na yumi olgeta wantaim i ken “wokim na planim” samting bilong i stap oltaim oltaim long bihain.—1 Timoti 4:15, 16.
YU INAP TINGIM BEKIM BILONG OL DISPELA ASKIM?
◻ Jisas i bin mekim wanem bilong “wokim na planim” samting bilong i stap long bihain bihain?
◻ Taim yu skelim ripot bilong 1985, yu kirap nogut long wanem samting?
◻ Bilong wanem oganaisesen bilong Jehova i mas wokim planti haus moa long nau?
◻ Olsem wanem yumi inap “wokim na planim” na dispela wok i gat as bilong en?
[Blok long pes 20]
Long wanpela kantri bilong Afrika ol i tambuim wok bilong ol Witnes Bilong Jehova. Tasol i gat 95 manmeri, olsem pablisa, ol i autim tok long olgeta mun. I gat 130 ol i save bung long wanpela miting bilong ol, em Miting Bilong Wok Autim Tok, na 160 ol i save kam bung bilong harim miting bilong pablik-tok. Long dispela kongrigesen ol i gat 3-pela painia regula, na nau tasol i gat 8-pela ol i mekim wok painia helpim. Insait long 6-pela mun i go pinis, 21 nupela pablisa i kirap long autim tok.
[Blok/Ol Piksa long pes 18, 19]
WOK BILONG OL WITNES BILONG JEHOVA GO BIKPELA
Long olgeta hap bilong graun i gat 322,821 painia i autim tok long olgeta mun (i go bikpela inap 24.7 pesen)
Long olgeta hap ol pablisa i kamap planti inap 3,024,131(i go bikpela inap 6.4 pesen)
Long 1985 ol i mekim 224,725,918 go-bek long ol manmeri i laik harim tok (i go bikpela inap 14.8 pesen)
Long olgeta mun ol i wokim 2,379,146 Baibel-stadi long haus bilong ol man (i go bikpela inap 16.2 pesen)
[Ol Piksa]
Ol painia i redi long i go long ol haus na autim tok long Bruklin, Nu Yok
Ol i wokim kibung long 14 tok ples long Montreal long hap bilong Kwibek long Kanada
Ol i autim tok long hap bilong Kasel Kom long Wiltsia, Englan
Wanpela lain ol i stadi long Yap, long Maikronisia
Em sampela haus bilong helpim wok bilong autim tok long olgeta hap long graun
Long Bruklin, ol Baibel na buk samting bilong salim i go long ol narapela hap ol i save putim long dispela bikpela haus long 360 Furman Strit, mak bilong haus em 1,000,000 skwea fit
Ol i wokim dispela Haus Kingdom (long Daunpatrik, Noten Ailan)insait long 31 aua tasol
Dispela em i wanpela Haus Kibung long Rom. i gat planti haus olsem long olgeta hap bilong graun
Nau ol i wokim dispela nupela hap bilong Haus Betel long Japan
[Sat long pes 22-25]
RIPOT BILONG WOK BILONG OL WITNES BILONG JEHOVA LONG 1985
(See bound volume)
[Sat long pes 21]
Etpela kantri i winim 100,000 pablisa long 1985. Bipo i no gat planti pablisa olsem long ol dispela hap
Amerika 723,220
Brasil 177,904
Meksiko 173,037
Itali 127,526
Naijiria 121,729
Jemani 115,604
Englan 103,522
Japan 103,117