Wanpela Taim i Wankain Olsem “Taim Bilong Noa”
“Pasin nogut na pasin pait em i go pulap pinis long olgeta hap. . . . pasin long olgeta man i nogut tru. Wokabaut bilong man i sting tasol.”—JENESIS 6:11, 12.
1, 2. (a) Wanem ol kain pasin bilong pait na bagarapim man i putim hevi long ol Witnes Bilong Jehova long nau? (b) Wanem taim tok bilong kirap bek i mekim gut bel bilong lain bilong God?
PAIT na bagarapim man! Long taim bilong Noa na long nau tu, pasin bilong pait na bagarapim man i pulap pinis long graun. Dispela pasin i putim hevi tu long ol man i wokabaut stret long ai bilong God olsem Noa i bin mekim. Dispela samting i kamap ples klia long Julai 21 long yia 1985 taim wanpela bom i bagarapim wanpela Haus Kingdom bilong ol Witnes Bilong Jehova long Sidni, Australia. Ol i sindaun harim wanpela tok long pasin bilong i stap gut long God na famili na nau bom i pairap. Bom i kilim i dai wanpela Witnes na 40 ol i kisim bagarap na i go slip long haus sik. Nau olgeta i orait bek; sua bilong ol i drai pinis, tasol i gat bikpela mak bilong sua i stap yet long skin bilong sampela. Dispela pasin nogut i bagarapim ol tru. Wanpela polis i tok: “I gat 110 manmeri i sindaun insait long dispela haus na wanpela tasol i dai pinis—em wanpela mirakel!”
2 Long ol narapela hap bilong graun tu —olsem long Noten Ailan na Lebanon na El Salvado—ol Witnes Bilong Jehova i wok long autim ‘dispela gutpela tok’ namel long ol man i save mekim pasin nogut na pait na bagarapim man. Ol man nogut i kilim i dai sampela long taim ol i autim tok. Na long planti hap “sampela samting ol i no bin tingim” em i painim ol, olsem birua o guria, na ol i dai pinis. Tasol long kain taim olsem lain bilong Jehova i tingim tok promis bilong Em, em i tok em bai kirapim bek ol man i dai pinis, na dispela samting i mekim gut bel bilong ol.—Eklisiastis 9:11, NW; 1 Tesalonaika 4:13, 14.
3. Wanem samting inap painim ol manmeri bilong Jehova, olsem i bin painim sampela long dispela taim na Luk 21:16 i tok long en? (b) Olsem wanem yumi inap save God bai lukautim yumi long taim bilong “bikpela hevi tru”?
3 Long dispela taim, long Meksiko, inap 23 Witnes na man i bung wantaim ol Witnes ol i dai pinis taim bikpela guria i kilim i dai 5,000 manmeri. Na long hap bilong Poto Riko 7-pela moa i dai taim 300 manmeri i lus long bikpela tait wara na maunten i bruk na i pundaun. Olsem wanem? Ating Jehova i no lukautim ol dispela wokboi bilong em? Nogat. I no olsem. Birua na bagarap inap painim yumi. Na Jisas i tok bai ol man i mekim nogut long yumi. Em i tok: “Bambai ol i kilim i dai sampela namel long yupela.” Planti handet brata Kristen bilong yumi i bagarap long han bilong lain Nasi bilong Hitler. Jehova bai tingim ol dispela wokboi bilong em na kirapim bek ol long bihain. Tasol taim “bikpela hevi tru” i kamap long bihain olsem Jehova i bin tok profet long en, bai Jehova i kamapim long ples klia olsem em inap lukautim ol man i kolim nem bilong em na singaut long em, olsem em i bin mekim long taim bilong Noa.—Luk 21:16-19; Matyu 24:14, 21, 22, 37-39; Aisaia 26:20, 21; Joel 2:32; Rom 10:13.
4. Olsem wanem pasin bilong nau i wankain olsem pasin Jenesis 6:11, 12 i stori long en?
4 Kirap long 1914 pasin bilong pait na bagarapim man i wok long kamap bikpela long olgeta hap bilong graun. Ol pait nogut bilong dispela taim nau i bin kilim i dai pinis planti handet milion man. Na i gat pasin nogut bilong hansapim kepten bilong sip o balus, olsem haijakim, na pasin bilong tromoi bom nating bilong mekim pretim ol man, na kilim i dai planti man wantaim, na narapela lain i birua long narapela lain, na ol man i wokim planti bom nuklia—dispela olgeta samting inap bagarapim yumi. Tru tumas, yumi stap long taim bilong “planti hevi nogut tru” na “bel bilong olgeta lain man bai i bagarap tru na ol i pret,” long wanem ol i no save long rot bilong stretim ol dispela hevi. (2 Timoti 3:1-5, 13; Luk 21:25) Tasol long nau ol Witnes Bilong Jehova i stap namel long ol man i mekim wanpela pasin i moa nogut na em inap bagarapim ol moa yet, winim pasin bilong pait. Ol man i mekim dispela kain pasin, planti taim ol i save mekim pasin pait tu na bagarapim man. Dispela pasin i bin kamap 4,300 yia bipo, long taim bilong Noa. Em wanem kain pasin?
Bilip Bilong Noa Namel long Ol Man i Mekim Pasin Sem
5, 6. (a) Seten i kirap paulim ol man olsem wanem? (b) Noa wantaim lain bilong em ol i mekim wanem na ol i narapela kain long ol narapela manmeri?
5 Kirap long taim pasin bikhet i kamap long Iden na i kam inap long nau, Seten i wok long “giamanim olgeta manmeri bilong graun.” (Revelesen 12:9) God i givim strong long man na meri bilong “karim planti pikinini,” tasol ol i mas mekim wok long dispela strong insait long marit tasol. (Jenesis 1:28; Hibru 13:4) Tasol Seten i kirap paulim ol man na ol i lusim stretpela pasin bilong marit na bihainim pasin i no stret; Seten i pulim ol long mekim pasin pamuk na kain kain pasin i gat Sem. Em i mekim olsem wanem? Sampela ensel bilong God ol i bihainim Seten na ol i mekim pasin bikhet. Ol i kamap olsem “ol spirit nogut” na Seten em i “het man” bilong ol. (Luk 11:15) Orait, ol dispela spirit nogut i mekim wanem? Ol i tanim i kamap man na ol i maritim ol meri bilong graun ol i luk nais tumas. Pasin nogut tru i kamap!
6 Taim ol dispela spirit nogut i maritim ol meri bilong graun ol i kamapim ol pikinini, em ol i draipela man, ol i hap spirit na hap man. Ol i “strongpela man tru” na ol i man bilong kilim i dai ol narapela man, olsem Baibel i tok: “Tasol olgeta arapela man ol i stap nogut long ai bilong God, na pasin nogut na pasin pait em i go pulap pinis long olgeta hap. Na God i lukluk long graun na em i lukim pasin bilong olgeta man i nogut tru. Wokabaut bilong man i sting tasol.” Pasin bilong pait na bagarapim man na pasin Sem i pulap long graun, olsem na Baibel i tok Noa tasol “em i gutpela man, na wokabaut bilong em i stret long ai bilong God.” Meri bilong Noa na ol pikinini man bilong em wantaim meri bilong ol, ol tasol i bilip na pret long God—olgeta narapela man, nogat. Pasin nogut bilong ol man long taim bilong Noa i no bagarapim gutpela pasin bilong lain bilong Noa.—Jenesis 6:4, 9-12.
7. Olsem Jehova i bin mekim long taim bilong Noa, long nau Jehova i save skelim man nogut na gutpela man olsem wanem? (Lukim tu Matyu 25:40, 45, 46.)
7 Jehova i pinisim ol man bilong bipo em ol i save pait na bagarapim man na mekim pasin Sem na bihainim ol spirit nogut. Em i salim bikpela tait wara na pinisim olgeta pasin nogut na olgeta man nogut. Ol “strongpela man tru,” em ol i hap spirit na hap man, ol i bagarap; na olgeta man nogut ol i bagarap. Ol spirit nogut, bipo ol i stap pikinini bilong God long heven, ol i tanim i kamap spirit gen, na ol i wetim de bilong kot bilong God na bai ol i lus. Tasol i gat sampela man ol i abrusim bagarap! Noa wantaim lain bilong em ol i no bagarap. Bilong wanem ol i no bagarap? Long wanem ol i bilip, na ol i mekim ol wok bilong kamapim bilip bilong ol—ol i wokim sip na tokaut long stretpela pasin long ol man God i bin kotim ol.—2 Pita 2:4, 5.
Ol Man Bilong Nau—Lukaut!
8. Olsem wanem taim bilong Noa i makim taim bilong yumi?
8 Taim bilong Noa i olsem piksa na i makim taim bilong yumi long nau. Olsem wanem yumi save long dispela samting? Long wanem, Jisas i tok pasin bilong pait na pasin nogut na no gat pasin sori moa—ol dispela pasin bai kamap bikpela wankain olsem long taim bilong Noa na dispela i olsem “mak” na yumi ken save taim bilong “bikpela hevi tru” i laik kamap. “Tasol i no gat wanpela man i save long dispela de na dispela aua. . . . Papa wanpela tasol em i save long dispela.” Na Jisas i tok: “Pasin ol i bin mekim long taim bilong Noa, pasin olsem tasol bai ol i mekim long taim bilong Pikinini Bilong Man i kam bek. Taim bikpela tait i no kamap yet, ol i kaikai, na ol i dring, na ol i marit, i go inap long taim Noa i go insait long sip. Ol i no ting, na ol i stap olsem tasol, na bikpela tait i kamap nau na i tekewe dispela manmeri olgeta. Bai i olsem tasol taim Pikinini Bilong Man i kam bek.”—Matyu 24:3-21, 36-39.
9. Sapos yumi no laik bagarap olsem ol man ‘ol i no tingim,’ orait yumi mas mekim wanem?
9 Tru tumas ‘ol i no tingim’ na ol i bagarap. Tasol yu no ken bihainim pasin bilong ol. Yu inap abrusim bagarap taim Bikpela bilong yumi Jisas i kamap ples klia bilong givim strafe bilong God long “ol man i no save long God na i no bihainim gutnius bilong Bikpela bilong yumi Jisas.” (2 Tesalonaika 1:7, 8) Yu no ken bihainim pasin bilong ol manmeri bilong dispela graun, em nambawan tingting bilong ol i bilong bihainim laik bilong ol yet, na kisim biknem, o kisim bikpela mani kago na ol i no tingim God. Tru tumas “laik bilong bodi bilong ol yet em i olsem god bilong ol.”—Filipai 3:19.
‘Nolaik Tru long Pasin Nogut’
10, 11. (a) Yumi mas klia long wanem ol pasin nogut bambai God i ken amamas long yumi? (b) Yumi mas pasim wanem ol klos pait? Bilong wanem yumi mas pasim?
10 Nau long las taim planti man i tingting long kisim ol amamas bilong mekim maritpasin, tasol ol i no marit. Na planti marit ol i katim marit. Planti man na meri bilong ol misin ol i kolim ‘Kristen,’ ol i sakim toksave bilong ol disaipel bilong Jisas na ol i mekim pasin sodom. Planti ol i kisim pinis “pe nogut inap long bekim dispela pasin nogut bilong ol”—ol i kisim sik AIDS o narapela kain sik bilong pamuk. Tasol ol dispela manmeri tu inap kisim laip. Taim Jisas i stap long graun sampela pamukmeri i bin stretim pasin bilong ol na ol i bilip long em, na em i mekim gutpela tok long ol, em i tok ol i winim tru ol hetman bilong lotu long taim bilong em, em ol i gat pasin antap na ol i no tanim bel.—Rom 1:26, 27; 2 Pita 2:9, 10; Jut 6, 7; Matyu 21:31, 32.
11 Sapos sampela long lain bilong Jehova i bin mekim pasin i no stret o traim i painim ol na i laik pulim ol long mekim pasin i no stret, olsem pasin pamuk samting, orait ol i mas kirap na pasim olgeta klos pait God i save givim long yumi! (Efesas 6:11-18) Tru tumas, “pasin ol i bin mekim long taim bilong Noa,” olsem tasol ol i mekim nau long dispela taim. Dispela “laion i krai strong,” em Seten, wantaim ol spirit nogut i bihainim em, long san na long nait ol i wok long pundaunim ol wokboi bilong Jehova na pulim ol i lusim lain bilong God na i stap wanpela tasol. Olsem na yumi mas sakim ol dispela birua na stap strong long bilip.—1 Pita 5:8, 9.
12. Bilong wanem i bikpela samting yumi mas bihainim tok bilong Sam 97:10?
12 Tasol samting nogut tru yumi kirap nogut long en, em olsem: Sampela ol i gat bikpela wok insait long oganaisesen bilong Jehova ol i mekim pasin i no stret, olsem pasin sodom, o senisim meri, o pilai nogut long skin bilong pikinini. Long 1985 kongrigesen Kristen i rausim 36,638 manmeri—planti ol i bin mekim pasin pamuk. Oganaisesen bilong Jehova i mas i stap stret na klin! (1 Korin 5:9-13) Nau em i taim bilong ol elda na ol wokman bilong kongrigesen na olgeta brata sista ol i mas klia long olgeta samting em inap pulim ol long mekim pasin i no stret, olsem pasin pamuk samting. Sapos yumi holimpas lo bilong Jehova, bai yumi kisim gutpela pe, olsem Sam 97:10 i tok: “Bikpela i laikim tru ol manmeri ol i no save laikim pasin nogut. Em i save lukautim gut ol manmeri bilong en na kisim bek ol long han bilong ol man nogut.”
13. Aposel Pol na Pita i givim wanem ol gutpela tok long yumi?
13 Na bihain “bikpela hevi tru” bai pinisim olgeta man “i mekim kain kain pasin nogut tru.” Tru tumas, yumi mas was gut—yumi mas nolaik tru long pasin nogut bilong ol man bilong dispela graun na givim baksait olgeta long en! Yumi mas “lusim pasin pamuk na ranawe”! (Revelesen 21:8; 1 Korin 6:9, 10, 18) Aposel Pita i tok yumi mas was gut long ol man i lusim bilip na ol i laik paulim yumi na bai yumi gat tupela tingting, na em i tok yumi mas tingim gut “De bilong Bikpela,” em bai kamap tru. Na bihain em i givim strongpela tok long yumi bilong kirapim yumi long “wokabaut long pasin holi na bihainim olgeta pasin bilong God.” Na em i tok moa, olsem: “God i promis pinis long wokim nupela skai na nupela graun, na bai stretpela pasin tasol i stap long en. Yumi wet long dispela samting tasol. Ol pren tru, yupela i save wet long dispela samting. Olsem na yupela i mas wok strong long i stap klin na i no gat asua long wanpela samting, na yupela mas i stap wanbel wantaim God. Na bihain God i ken lukim yupela i stap gut olsem.” Sapos yumi inap i stap long dispela “nupela graun” taim God i mekim “olgeta samting i kamap nupela” na klinpela, bai yumi amamas tru!—2 Pita 3:3-7, 10-14; Revelesen 21:1, 4, 5.
Sampela Samting Moa i Kamap Bilong Givim Tingting long Yumi
14. Olsem wanem na taim Bikpela Tait i pinisim ol pasin nogut dispela i bilong liklik taim tasol?
14 Bikpela Tait i pinisim olgeta samting nogut ol spirit nogut na ol man i bin mekim, na nau Jehova i kolim gen lo em i bin givim long Adam long pastaim. Jehova i tokim Noa wantaim ol pikinini bilong em: “Karim planti pikinini bambai ol lain bilong yupela i pulapim olgeta hap long graun.” (Jenesis 9:1) Ol i bihainim dispela lo, long wanem Jenesis sapta 10 i kolim 70 “lain man” ol i kamap bihain long bikpela tait na dispela namba “70” i makim samting i gutpela tru o em inap tru. Tasol ol man i karim hevi yet long sin ol i kisim long Adam. Na ol i stap aninit long ol spirit nogut na dispela samting tu i pulim ol man long bihainim gen pasin i no stret, olsem pasin pamuk na pasin sem samting.
15. Strafe bilong God i painim Sodom na dispela i lainim yumi long wanem samting?
15 Bihain “pren” bilong Jehova, em Ebraham, na pikinini bilong brata bilong Ebraham, em Lot, tupela i go sindaun long ples Kenan. Lot i laik i go sindaun long hap bilong Jodan, long wanem dispela hap graun i gutpela olsem “naispela gaden bilong Yawe.” Tasol yu ting pasin bilong ol man bilong dispela hap i gutpela? Nogat tru! Lot i go sindaun namel long biktaun Sodom, na biktaun Gomora i stap klostu. Ol man bilong dispela hap ol i save mekim pasin sodom. Dispela pasin nogut i gat sem em i pulap long dispela tupela taun. I no gat 10-pela stretpela man i stap. Olsem na Jehova i “bekim pe nogut long ol long paia i stap oltaim.” Ol dispela taun nogut i no ken kamap bek. Nogat tru! Jisas i stori long strafe bilong God i painim ol man bilong Sodom, na em i stori long ol samting i bin kamap “long taim bilong Noa,” em i stori olsem bilong helpim yumi bambai yumi was gut!—Jenesis 13:10; 18:32; Jut 7; Luk 17:26-30.
16. Ol spirit nogut i mekim wanem na yumi mas sakim ol bambai yumi inap sanap strong long bilip?
16 Tru tumas, Seten wantaim ol spirit nogut ol i wok strong yet! Ol i stap olsem long “hul tudak nogut tru” na ol i no inap tanim i kamap man, tasol ol dispela spirit nogut i tingting strong long paulim ol man; ol i laik paulim tru ol wokboi bilong Jehova. (2 Pita 2:4-6) Ol spirit nogut i kirapim Kenan long mekim pasin i no stret long tumbuna bilong em, Noa. (Jenesis 9:22-25) Na ol i as bilong ol pasin nogut na pasin sem i kamap olsem ‘pasin bilong ples Kenan,’ olsem na bihain dispela graun i ‘trautim’ ol man i stap long en. (Levitikas 18:3-25) Olsem tasol ol spirit nogut i kirapim ol man long nau long mekim pasin pamuk na kain kain pasin i gat sem, em ol dispela kain pasin i kamap insait long planti lain long nau. Sapos yumi laik i stap strong long bilip yumi mas sakim ol samting ol dispela ensel nogut i mekim bilong kirapim ol man long “bihainim pasin pamuk” na “pilai nogut wantaim ol arapela manmeri nabaut.”—Jut 3, 6, 7.
Mekim 01 Samting Bilong i Stap Laip
17. Yumi ken mekim wanem olsem Noa wantaim lain bilong em i mekim na bai yumi kamapim long ples klia olsem yumi no bilong dispela graun?
17 Yumi stap long taim nogut, olsem wanem yumi ken painim rot bilong abrusim bagarap? Orait, olsem wanem Noa wantaim lain bilong em i abrusim bagarap? “Noa i bilip long God. . . . Long dispela bilip bilong en Noa i olsem i kotim pinis olgeta manmeri bilong graun.” (Hibru 11:7) Olsem tasol long nau, ol Witnes Bilong Jehova i “no bilong dispela graun” nogut. Na yumi kamapim bilip bilong yumi—yumi dediket long Jehova na kisim baptais na kamap disaipel bilong Krais Jisas.—Jon 17:14, 16; Matyu 28:19.
18. Noa i wokim sip na dispela i olsem piksa bilong wanem samting long nau?
18 Yumi insait long dispela wok Jehova i makim bilong nau, em bikpela wok bilong spirit Krais Jisas i bosim, em Man I Winim Noa. Sip bilong Noa i olsem ples bilong i stap gut na abrusim bagarap, olsem na dispela sip i makim gutpela paradais bilong spirit, em kirap long yia 1919 Jehova i bin wokim i kamap namel long ol man i lotuim em. Em i olsem piksa bilong gutpela i stap bilong ol long nau, olsem ol i kamap wanbel gen wantaim God. Na em i olsem piksa bilong ol samting Jehova i mekim bilong lukautim lain bilong Man I Winim Noa bambai ol i no ken bagarap long taim bilong “bikpela hevi tru.”—Matyu 24:21; 1 Korin 3:9, 11; 2 Korin 12:3, 4; Revelesen 7:13, 14.
19. Noa i piksa long husat? Meri bilong em i makim husat? Ol pikinini man bilong em wantaim meri bilong ol i makim husat? Wok ol i mekim i makim wanem samting?
19 Baibel i tok, “Yawe i amamas long Noa.” Olsem na Noa i makim gut Krais Jisas, em i wokabaut stret long ai bilong God na bihainim pasin daun hia long graun; em i no mekim wanpela samting long tingting bilong em yet! (Jenesis 6:8; Matyu 17:1, 5; Jon 8:28) Tupela wantaim i man bilong tokaut long stretpela pasin—tupela i gutpela piksa bilong olgeta witnes bilong Jehova. Na yumi save, meri bilong Noa, em i makim lain remnan ol i stap nau long graun, em i aninit long man bilong em na em i stap olsem gutpela piksa. (2 Pita 2:5; Luk 4:14-19; Efesas 5:21 24) Na taim yumi tingim bikpela wok tru lapun Noa i mas mekim bilong wokim sip bilong lukautim ol man, yumi save, em i amamas long tripela strongpela pikinini man bilong em wantaim meri bilong ol, ol i helpim em! Ol i olsem piksa bilong ‘bikpela lain’ long nau, em ol i mekim bikpela wok bilong spirit taim dispela samting Bikpela Tait i makim em i kam klostu.—Revelesen 7:9, 15.
20, 21. (a) Long “nupela graun” wanem ol bikpela amamas i wetim ol man i lotuim Jehova? (b) Nau tu yu inap kisim wanem amamas?
20 Taim God i stretim pinis ol samting hia long graun na i redi bilong ol i mekim graun i kamap gutpela ples paradais gen, orait inap liklik taim dispela lain, em pikinini bilong Noa wantaim meri bilong ol i piksa long en, ating bai ol i kamapim ol pikinini long stretpela pasin. Na bihain God bai wokim mirakel na kirapim bek ol man i dai pinis na bai ol manmeri i pulap long graun inap tru. Olgeta manmeri i kamap ol “arapela sipsip” bilong Jisas, skin na tingting bilong ol bai kamap gutpela olgeta. Na taim Krais i givim Kingdom i go long han bilong Papa bilong em na ol dispela manmeri i winim pinis laspela traim, orait bai God i kolim ol stretpela man na ol inap kisim laip i stap oltaim.—Jon 5:28, 29; 10:16; 1 Korin 15:24-26; Sam 37:29; Revelesen 20:7, 8.
21 Bikpela amamas tru i wetim ol man i stap gut long Jehova na lotuim Em! Na nau tu ol i kisim bikpela amamas taim ol i givim bel long ‘wokim sip’ bilong nau bambai ol i no ken bagarap. Orait, dispela wok bilong ol i kamap gutpela o olsem wanem? Tok i kamap bihain long dispela bai bekim dispela askim.
BAI YU BEKIM OL DISPELA ASKIM OLSEM WANEM?
◻ Ol samting i bin kamap paslain long Tait ol i bilong givim wanem toksave long yumi?
◻ Tok bilong Matyu 24:37-39 i mas lainim yumi long wanem samting?
◻ Bilong wanem em i bikpela samting long yumi mas ‘nolaik tru long pasin nogut’?
◻ Yumi ken mekim wanem na bai yumi insait long wok i kain olsem wok bilong Noa long wokim sip
[Blok long pes 11]
KAIN OLSEM ‘TAIM BILONG NOA’
“Inap 40 pesen tasol bilong ol sumatin bilong hai-skul . . . ol i ting i no stret long man na meri singel i slip wantaim na mekim maritpasin.”—Nius Saturday Oklahoman & Times, bilong Desemba 29, 1984
[Blok long pes 12]
Yumi Mas Bihainim Ol Lo Bilong Baibel o Nogat?
Wanpela pris bilong misin Episkopol em i putim yau taim wanpela Witnes i bin mekim tok paslain long taim ol i laik planim wanpela man i dai pinis. Bihain long dispela, pris i singautim tupela man bilong Sosaiti Was Taua long bung wantaim ol bikpela man bilong lotu long Bruklin Haits, Nu Yok, bilong toktok wantaim.
Bihain ol i kamapim tingting bilong ol long dispela pasin bilong tupela man i slip wantaim. Ol Witnes i tokaut stret olsem Baibel i tambu tru long dispela kain pasin na ol Witnes i save rausim ol man i mekim ol kain pasin nogut olsem. (Rom 1:24-27; 1 Korin 6:9, 10; Jut 7) Ol Witnes i askim ol dispela bikpela man bilong lotu long kamapim tingting bilong ol long dispela samting na ol i bekim tok olsem:
Pasto bilong Misin Kongrigesenel i tok: “Mi ting misin bilong mipela tu i gat wanpela i tok mipela i mas rausim ol man i mekim dispela pasin, tasol mi no inap tingim wanpela taim mipela i bin strong long bihainim tok bilong dispela lo!”
Pris bilong Misin Episkopol i tok: “Sapos mipela i strong long bihainim dispela lo, bai i no gat wanpela man i kam long lotu.”
Pris bilong Misin Katolik i tok: “Sapos mipela i strong long bihainim dispela lo, bai mipela i no gat wanpela pris i stap.”
Maski ol misin i ting olsem wanem long dispela lo, tasol ol Witnes Bilong Jehova ol i amamas long bihainim, na ol i strong long kongrigesen i mas i stap klin. Ol i “no bilong dispela graun.”—Jon 15:19.
[Blok long pes 13]
KAIN OLSEM ‘TAIM BILONG NOA’
“Long taun Nu Yok, long Manhaten, ol i opim wanpela nupela skul bilong ol sumatin bilong hai-skul i save mekim pasin sodom.” Tisa bilong dispela skul i tok: “Mipela ting i gutpela sapos ol dispela manki na yangpela meri i save mekim pasin sodom ol i gat skul bilong ol yet na bai ol narapela skulmanki i no ken tok bilas long Ol.”—Nius The New York Times, bilong Jun 6, 1985
[Blok long pes 14]
KAIN OLSEM ‘TAIM BILONG NOA’
“Asde lain bilong Lotu Rivasait ol i orait long wanpela nupela lo bilong lotu, em i tok tupela man o tupela meri i ken sindaun wantaim olsem tupela marit na i stap Kristen yet.”—Nius New York Post, bilong Jun 3, 1985