Pret Long God, Man Nogat−Bilong Wanem?
BAIBEL i tok: “Sapos man i pret long ol arapela man, dispela i olsem wanpela umben em i taitim pinis na i pasim em yet. Tasol sapos man i bilip strong long [Jehova], bai em i stap gut.” (Provep 29:25) Dispela tok bilong Baibel i makim dispela kain pasin bilong pret em inap bagarapim tingting bilong man−em pasin bilong pret long ol man. Baibel i tok, dispela kain pret i olsem umben. Bilong wanem i olsem umben? Long wanem, taim pis i go insait pinis long umben em i kalabus pinis. Em i laik ranawe, tasol em i no inap mekim, long wanem umben i holimpas em. Em i no inap mekim wanpela samting.
Sapos yumi pret long man, yumi kain olsem dispela pis. Ating yumi save long ol samting yumi mas mekim. Na ating yumi laik mekim.Tasol pret i kalabusim yumi. Yumi no inap mekim wanpela samting.
Pasin Bilong Pret long Man i Olsem Umben
Orait, nau yumi ken tingim sampela man em Baibel i stori long ol na pasin bilong pret long ol man i bin kalabusim ol. Long taim bilong Josua, ol i bin salim 12-pela man i go lukstil long ples Kenan na bihain bai ol Isrel i go insait na kisim ples. Ol dispela man bilong lukstil i kam bek na ol i tok, graun long dispela ples i gutpela na i kamapim planti kaikai, olsem God i tok pinis. Tasol 10-pela man bilong lukstil ol i pret, long wanem ol i lukim ol man bilong dispela ples ol i strongpela man. Pasin bilong pret long ol man i kalabusim ol, olsem na taim ol i stori long ol Isrel long strong bilong ol dispela man, ol i stori olsem ol lain bilong Kenan i gat bikpela strong tumas. Taim ol Isrel i harim stori bilong ol, olgeta i pret. Ol Isrel i no laik bihainim tok bilong God na go insait na kisim graun bilong ol Kenan. Olsem na inap 40 yia ol i raun long ples nating na ol man i bikpela pinis long dispela taim ol i dai long ples nating.−Nambas 13:21–14:38.
Jona tu i pret long ol man. God i salim em i go autim tok long bikpela taun Niniva, tasol “em i painim wanpela sip i laik i go long Tasis. Em i baim sip na i goap long en. Em i laik lusim [Jehova] na ranawe i go.” (Jona 1:3) Bilong wanem em i ranawe? Ol Niniva i gat nem olsem ol strongpela man bilong pait na bagarapim man, na Jona i save long dispela samting. Em i pret long ol man na em i ranawe. Em i no laik i go long Niniva. Tru, bihain em i go mekim dispela wok long Niniva, tasol pastaim Jehova i mas mekim narapela kain pasin long em bilong stretim tingting bilong em.−Jona 1:4, 17.
Sampela king tu ol i save pret long ol man. Wanpela taim King Sol i sakim stret wanpela tok bilong God. Em i laik haitim rong bilong em na em i tokim Samuel: “Yes. Mi mekim sin pinis, na mi sakim tok bilong Bikpela na tok bilong yu tu. Mi bin pret long ol soldia bilong mi, olsem na mi bihainim tok bilong ol.” (1 Samuel 15:24) Sampela handet yia bihain, taim ol Babilon i kirapim pait long Jerusalem, wanpela gutpela profet, em Jeremaia, em i givim gutpela tingting long King Sedekaia. Em i tok, Sedekaia i mas givim Jerusalem long ol birua na bai ol i no ken kapsaitim blut bilong planti manmeri long Jerusalem. Tasol Sedekaia i no laik mekim. Bilong wanem em i no laik mekim? Em i tokim Jeremaia: “Mi pret long ol Juda em ol i ranawe pinis i go long ol Babilon, nogut ol i putim mi long han bilong ol birua na ol i mekim nogut long mi.”−Jeremaia 38:19, NW.
Na wanpela aposel tu inap pret long ol man. Long de Jisas i mas i dai em i tokim ol disaipel, olgeta bai ol i lusim em. Tasol Pita i strong long tok olsem: “Bikpela, mi redi pinis long i go wantaim yu long kalabus. Mi redi long i dai tu wantaim yu.” (Luk 22:33; Matyu 26:31, 33) Tasol sori tru! Sampela aua bihain Pita i pret na em i tok, em i no save long Jisas! Em i pret long ol man na dispela pret i daunim em! Tru tumas, pasin bilong pret long ol man, dispela kain pret inap bagarapim tingting bilong man.
Yumi Mas Pret long Husat?
Yumi ken mekim wanem na bai yumi no pret long ol man? Yumi mas bihainim narapela kain pasin bilong pret, em i gutpela na i stret. Aposel Pita yet i tok yumi mas bihainim dispela kain pasin bilong pret. Pita i tok: “Yupela i mas pret long God.” (1 Pita 2:17) Na ensel em Jon i lukim long Revelesen, em i singaut na tokim ol man: “Yupela i mas pret long [God] na litimapim nem bilong em.” (Revelesen 14:7) Saveman King Solomon em tu i tok yumi mas i gat dispela kain pret, em i tok: “Orait, yumi harim pinis olgeta tok, na yumi ken tok olsem: Yumi mas pret long trupela God na bihainim ol lo bilong em. Long wanem, dispela tasol em i wok bilong man.” (Eklisiastis 12:13, NW ) Tru tumas, yumi mas pret long God−em wanpela wok bilong yumi.
Sapos yumi pret long God, dispela inap helpim yumi. Man bilong raitim sam long bipo em i tok: “Tru tumas, [God] i redi pinis long kisim bek ol manmeri i [pret] long em.” (Sam 85:9) Na wanpela savetok long Baibel i tok: “Sapos yu [pret] long Bikpela na yu bihainim em oltaim, bai yu stap longpela taim long graun.” (Provep 10:27) Tru tumas; sapos yumi pret long Jehova, dispela kain pret i gutpela na i samting bilong helpim yumi. Tasol ating yu bai tok, ‘Jehova em i God bilong pasin sori, olsem na bilong wanem yumi mas pret long em?’
Bilong Wanem Yumi Mas Pret long God Bilong Pasin Sori?
Wanpela kain pasin bilong pret i save mekim man i guria olgeta na em i no inap mekim wanpela samting, na sampela taim i kalabusim man. Tasol pasin bilong pret long God i narapela kain. Dispela kain pret i olsem pasin bilong pikinini i pret long papa bilong em, maski em i laikim tumas papa, na em i save papa i laikim tumas em.
Pasin bilong pret long God i olsem yumi daun tru long dispela Bikpela Man Antap em i bin wokim olgeta samting, long wanem yumi save em i as bilong stretpela pasin, na stretpela kot, na em i gat bikpela save na pasin bilong sori. Yumi pret long mekim pasin God i no laikim, long wanem em i Nambawan Bikpela Jas na em i gat strong bilong givim gutpela pe long man o givim strafe long man. Aposel Pol i tok: “Sapos God i gat laip em i holimpas yumi bilong bekim pe nogut long yumi, bai em i samting bilong pret nogut tru.” (Hibru 10:31) Yumi no ken ting yumi inap kisim nating sori bilong God; na yumi no ken ting kot bilong God em i samting nating. Olsem na Baibel i tok: “Sapos yu laik kisim gutpela tingting, orait pastaim yu mas [pret] long Bikpela.”−Provep 9:10.
Tasol yumi mas save, maski Jehova i gat strong bilong givim strafe long ol man i sakim tok bilong em−olsem em i bin mekim planti taim−em i no laik kilim man i dai na em i no save mekim hatpela pasin. Nogat. Em i God bilong pasin sori tru. Tasol em i Papa bilong yumi, na olsem ol papa long graun i save mekim, sampela taim em i kros long yumi, na i stret em i mekim olsem. (1 Jon 4:8) Olsem na sapos yumi pret long em, dispela kain pret i gutpela. Dispela kain pret inap kirapim yumi long bihainim ol lo bilong em, em i bin putim bilong helpim yumi. Sapos yumi bihainim ol lo bilong God, bai yumi stap amamas; tasol sapos yumi sakim ol lo bilong God, oltaim samting nogut bai painim yumi. (Galesia 6:7, 8) Long strong bilong spirit holi, man bilong raitim sam em i tok: “Ol manmeri bilong Bikpela, yupela i mas [pret] long em. Ol man i [pret] long em ol i no sot long wanpela samting.”−Sam 34:9.
Yu Save Pret long Husat?
Tasol sapos yumi pret long God, olsem wanem dispela inap helpim yumi na bai yumi no pret long ol man? Sampela taim ol man i tok bilas long yumi o mekim nogut long yumi, long wanem yumi bihainim stretpela pasin, na dispela i putim hevi long yumi. Tasol sapos yumi pret long God, dispela inap helpim yumi long sanap strong na bihainim yet pasin i stret, long wanem yumi pret long mekim pasin God i no laikim. Na yumi laikim tumas God, na dispela samting i kirapim yumi long mekim pasin em i laikim. Na tu yumi save, sapos yumi mekim pasin i stret, bai God i mekim gut long yumi, na dispela i kirapim yumi long laikim em moa yet na yumi laik tru long bihainim laik bilong em. Olsem na sapos yumi gat stretpela tingting long God, dispela i helpim yumi na sapos yumi pret liklik long ol man, yumi inap daunim dispela pret.
Planti man i pret long ol wanlain bilong ol na dispela i subim ol long mekim pasin i no stret. Planti yangpela long skul ol i save smok, mekim tok swea, hambak long ol i bin mekim maritpasin (ating ol i bin mekim tru o ol i giaman tasol ), na sampela ol i dring bia o wiski samting, o kisim ol drak. Bilong wanem ol i mekim? I no olsem ol i laik mekim. Nogat. Ol i pret long ol wanlain bilong ol na ol i mekim. Nogut ol i no bihainim pasin wankain olsem bilong ol wanlain na ol i tok bilas long ol. Sapos ol man i lap nogut na tok bilas long wanpela yangpela, i hatwok long em i karim dispela hevi, wankain olsem sapos ol i paitim em.
Man i bikpela pinis tu, sapos em i pret long man, dispela inap subim em long mekim pasin i no stret. Olsem: Sapos long ples wok bos i tokim wanpela wokman long giamanim man na singaut long bikpela pe moa bilong mekim wanpela wok, o bos i tokim em long raitim sampela tok giaman long pepa bilong takis bambai kampani i no ken tromoi bikpela takis tumas, ating wokman Kristen bai ting sapos em i no bihainim tok bilong bos bai bos i rausim em long wok. Em nau, sapos em i pret long man, dispela inap subim em long mekim rong.
Long kain taim olsem, sapos Kristen i pret long God na tingim gut ol lo bilong God, bai em i no larim pasin bilong pret long ol man i kalabusim em. Na sapos em i givim bel tru long God, dispela bai pasim em na em i no ken mekim pasin God i tambuim. (Provep 8:13) Na sapos em i bilip tru long God em i save, sapos em i bihainim tok bilong maus bilong bel olsem em i bin lainim long tok bilong Baibel, na em i mekim pasin i stret, orait maski wanem samting i painim em long dispela rot, bai God i sambai long em. Aposel Pol i gat strongpela bilip olsem, na em i tok: “[God] i save strongim mi, na long strong bilong em mi inap mekim olgeta samting.”−Filipai 4:13.
Baibel i stori long planti man na meri ol i bin i stap gut long Jehova, maski wanem kain bikpela traim i bin painim ol. “Sampela i kisim hevi long ol birua i tok bilas long ol, na wipim ol, na pasim ol long sen, na putim ol long kalabus. Ol birua ol i tromoi ston long ol. Ol i traim ol nogut tru. Ol i kisim so na katim bodi bilong ol i kamap tupela hap. Ol i kilim ol i dai long bainat.” (Hibru 11:36, 37) Tasol ol i no larim pasin bilong pret long ol man i bosim tingting bilong ol. Nogat. Ol dispela bilipman bilong bipo i bihainim savepasin em bihain Jisas i tokim ol disaipel long en, em i tok: “Yupela i no ken pret long ol man i save kilim i dai bodi, tasol i no inap [pinisim laip] bilong yupela. Nogat. Yupela i mas pret long [God] em inap bagarapim [laip] wantaim bodi long [Gehena].”−Matyu 10:28.
Ol Kristen bilong pastaim i bihainim dispela tok bilong Jisas na ol i pret long God, long man nogat. Dispela i helpim ol long karim kain kain hevi na traim bambai ol inap “mekim wok bilong autim gutnius.” (Failimon 13) Aposel Pol i bin sanap strong olsem. Long namba tu pas em i raitim long ol Korin, em i kamapim long ples klia olsem em i pret long God na dispela samting i bin helpim em long karim kain kain hevi. Planti taim ol man i bin putim em long kalabus, na paitim em, na tromoi ston long em, na em i laik bagarap long sip, na kain kain samting nogut i bin painim em long rot, na planti taim em i wok nait na em i no slip, na planti taim em i stap hangre, na em i dai long wara, na em i sot long klos. Tasol em i karim olgeta dispela traim na hevi na em i sanap strong.−2 Korin 11:23-27.
Ol dispela Kristen bilong pastaim ol i pret long God na dispela i strongim ol, olsem na taim ol i stap aninit long Bikpela Gavman Rom na ol man i mekim nogut tru long ol, ol i bin sanap strong. Namel long yia 1000 na yia 1400 ol man i bin kukim sampela bilipman long paia long wanem ol i holimpas bilip, tasol ol bilipman i no pret. Long taim bilong Namba Tu Pait Bilong Olgeta Hap, maski ol man i putim ol Kristen long ol kalabus nogut na kilim sampela i dai, tasol ol i redi long karim dispela hevi; ol i no laik mekim pasin God i tambuim. Tru tumas, pasin bilong pret long God em i strongpela samting! Dispela samting i bin strongim ol Kristen bilong pastaim na maski wanem kain hevi na traim i painim ol, ol i no pret long ol man. Na long nau tu, maski wanem wanem samting i painim yumi, sapos yumi pret long God, dispela inap strongim yumi.
Long nau Seten i wok strong tru long subim yumi long mekim pasin God i no laikim. Olsem na ol Kristen tru i mas kisim strongpela tingting wankain olsem bilong aposel Pol, em i tok: “Yumi no man bilong surik na lus. Nogat. Yumi man bilong bilip na kisim laip.” (Hibru 10:39) Pasin bilong pret long Jehova em inap givim strong long yumi. Sapos yumi pret long Jehova, dispela inap helpim yumi na “yumi ken strongim bel bilong yumi, na yumi ken tok olsem: ‘Bikpela i save helpim mi. Mi no ken pret. Bai ol man inap mekim wanem samting long mi? Nogat!’ ”−Hibru 13:6.
[Piksa long pes 7]
Pol i pret long God na dispela i strongim em long karim olgeta hevi, maski ol man i paitim em, o putim em long Kalabus, o em i laik bagarap long sip.−2 Korin 11:23-27