Pret Em Nogut Tasol?
PASIN bilong pret inap mekim na bai man i no amamas moa na em i no wetim wanpela gutpela samting i kamap. Sampela man i tok, pasin bilong pret inap bagarapim tru tingting, na bai man i no inap tingting gut. Na ol i tok, dispela samting inap bagarapim ol man moa yet, winim sik nogut bilong skin. Tru tumas, pret em i strongpela samting. Tasol olsem wanem? Pret em nogut tasol, o sampela taim i gutpela sapos yu pret?
Orait, yumi ken tok piksa olsem: Yu raun long ka long wanpela rot yu no save long en. Rot i go antap long maunten na i baut baut. Tudak i painim yu long rot na liklik ren ais i kam daun. Nau rot i wel na taia bilong ka i no holim gut rot, na yu save yu kam antap tru long maunten na i gat ais long rot.
Nau yu mas was gut tru. Taim rot i baut yu draiv isi isi, long wanem i gat ais long rot na nogut ka i sut i go long sait na yu kapsait i go daun long maunten. Na ples i tudak pinis na yu no inap lukim gut rot−yu no save wanem samting moa i stap na em inap bagarapim yu. Em nau, yu pret. Lewa bilong yu i sut na maus bilong yu i drai. Ai bilong yu i op tru, na maski wanem samting pastaim yu bin tingting long en, nau yu no tingim moa. Yu tingting tasol long stiaim gut ka bambai bagarap i no ken painim yu.
Bihain rot i go daun na i gat ol lait long rot na i no gat ais. Nau bel bilong yu i stap isi. Yu no bin kisim bagarap−yu pret nating tasol!
Tasol tru yu pret nating? Nogat. I stret yumi mas pret liklik long kain taim olsem. Dispela kain pasin bilong pret inap helpim yumi na bai yumi was gut na tingting gut na yumi abrusim bagarap. Tru tumas, sampela taim i gutpela sapos yumi pret. Dispela kain pret i no save bagarapim tingting bilong yumi. Nogat. Sampela taim pasin bilong pret inap helpim yumi na bai yumi tingting gut.
Baibel i stori long pasin bilong pret, na i kolim tupela kain pret. Wanpela kain i save bagarapim tingting bilong man, na wanpela kain i gutpela na i stret, na yumi mas i gat dispela kain pret bambai yumi inap kisim laip. Orait, wanem dispela tupela kain pret? Olsem wanem yumi ken bihainim gutpela pasin bilong pret na sakim dispela kain pret i nogut? Tok i kamap bihain long dispela bai stori long dispela samting.