God i Bin Helpim Mipela
EM STORI BILONG FRANCISCO COANA
Brata bilong mi i tok: “Sapos yu no bihainim tok bilong gavman, bai ol i kilim yu i dai!”
Mi bekim tok: “Em bai gutpela, winim i stap bilong mi long dispela ples nogut.”
DISPELA tok i kamap namel long mi na bikpela brata bilong mi long Septemba 1975. Em i bin kam bilong bringim kaikai long mi taim mi kalabus long biktaun Maputo (long dispela taim ol i kolim Maputo olsem Lorenko Markes), long sauten Mosambik. Mipela 180 manmeri i stap long wanpela rum kalabus, na klostu olgeta ol i Witnes Bilong Jehova. Brata bilong mi em i kros long mi, olsem na em i no givim dispela kaikai em i bin kisim i kam!
Bilong helpim yu long save long as na brata bilong mi em i kros, mi laik stori long olsem wanem mi kam long dispela kalabus.
Mi Go Bikpela Long Lotu
Mama i karim mi long 1955, long ples Kalanga long provins Manika, na famili bilong mipela i bilong lotu Presbitirian. Dispela hap i no longwe long biktaun Maputo. Maski papa i no save go long lotu, mama i save go na em i save kisim 5-pela pikinini bilong em i go long lotu long olgeta Sande. Taim mipela i liklik yet, em i lainim mipela long mekim Beten Bilong Bikpela, na planti taim mi kolim dispela beten. (Matyu 6:9-12) Taim mi liklik manki yet, mi kamapim ol askim long mama, olsem: “Bilong wanem yumi save dai?” na “Inap oltaim oltaim ol manmeri i mas i dai?”
Mama i tok, indai em i wanpela hap bilong laik bilong God, na ol man i mekim pasin nogut ol bai i go long bikpaia na ol man i mekim gutpela pasin ol bai i go long heven. Maski mi no bekim wanpela tok, mi bel hevi long tok bilong em. Mi tingting planti long ol samting nogut bilong indai, na mi tingting planti moa yet taim papa bilong mi em i dai, taim mi gat 10-pela krismas tasol. Bihain mi gat laik tru long save long i stap bilong ol man i dai pinis, na gutpela samting bai painim ol o nogat.
Lainim na Bihainim Tok i Tru
Bihain liklik long taim papa i dai, wanpela tisa i mekim wok long buk From Paradise Lost to Paradise Regained bilong skulim klas bilong mipela. Dispela buk, em Sosaiti Was Taua i wokim, i stap long tok Sulu, em wanpela tok ples bilong Saut Afrika. Tisa i larim mi i ritim dispela buk long haus, na maski mi no save gut long tok Sulu, mi amamas long save mi kisim long ol skripsa dispela buk i makim.
Taim mi gat 16 krismas, ol i singautim brata bilong mi i go long ami. Dispela brata i save lukautim famili long ol samting bilong skin. Olsem na long dispela taim mi kirap na wok long wanpela kampani bilong wokim sanda, na long nait mi go long skul tek. Long taim bilong malolo long belo long ples wok, mi lukim wanpela Witnes Bilong Jehova, em Teófilo Chiulele i save ritim Baibel oltaim. Taim Teófilo i lukim olsem mi laik save long samting em i ritim, em i kirap toktok wantaim mi.
Bihain narapela Witnes, em Luis Bila, em i kirap stadi long Baibel wantaim mi. Mi amamas long kisim save olsem ol man i dai pinis ol i no save long wanpela samting, na bihain ol bai kirap bek na kisim laip gen. (Saveman 9:5, 10; Jon 5:28, 29) Wantu mi raitim pas i go long mama, na stori long ol bekim bilong Baibel long ol askim mi bin kamapim long em. Em i amamas long save olsem mi bin painim ol gutpela bekim.
Mi pilim tru long bel ol samting mi kisim save long en, olsem na mi redi long autim dispela tok long ol narapela. Long skul ol i larim mi long mekim ol tok bilong Baibel, tasol long haus lotu, nogat. I no longtaim na ol i no laik mi kam moa long haus lotu. Famili bilong mi yet ol i kirap mekim nogut long mi, maski mama i amamas long nupela bilip bilong mi. Bikpela brata bilong mi em i paitim mi nogut tru. Taim pasin birua bilong ol i no daunim mi, famili i kirap na tok bilas long mi, na ol i mekim moa yet taim ol i lukim mi beten long taim bilong kaikai. Olsem na mi beten long ples waswas paslain long mi kam kaikai. Mi pilim olsem “God yet i save helpim mi.”—Song 54:4.
Bihain ol i no larim Luis i kam moa long haus bilong mipela bilong stadi long Baibel wantaim mi. Olsem na mipela i stadi long haus bilong em. Taim mi kirap na i go long ol miting bilong kongrigesen na mekim wok autim tok, ol i lokim dua na mi no inap i go insait long haus taim mi kam bek. Olsem na long sampela nait mi slip long haus bilong narapela narapela Witnes.
Bihain, long Me 13, 1973, mi kisim baptais long wara bilong makim olsem mi dediket pinis long God Jehova. Long dispela taim, Mosambik i stap aninit long gavman bilong Potugal, na em i tambuim wok bilong ol Witnes Bilong Jehova long Potugal na long ol kantri em i bosim. Long Oktoba 1, 1974, mi kamap wanpela painia, em nem bilong ol Witnes i save autim tok long olgeta de. Mi laik kamap misineri, olsem na mi kirap stadi long tok Inglis bambai mi inapim mak bilong i go long Wastaua Baibel Skul Bilong Gileat, long Yunaitet Stets bilong kamap misineri.
Bihainim Savepasin Long Wok Autim Tok
Long ol dispela yia ol i tambuim wok bilong mipela, lain polis bilong gavman bilong Potugal, em PIDE, ol i kalabusim planti Witnes, long wanem, ol i autim tok. Olsem na bilong ol i no ken luksave long mipela, mipela i bihainim savepasin. Olsem: Mipela i autim tok long wanpela haus na bihain mipela i go long narapela haus long narapela hap. Narapela pasin mipela i mekim i olsem: Tupela bilong mipela i go long wanpela pak long taim bilong malolo long belo o long apinun. Wanpela i sindaun klostu long wanpela man na kirap ritim niuspepa. Bihain liklik narapela brata i kam na sindaun, na em i lukluk long niuspepa na i tok: “Man, planti manmeri tru i dai! Tasol yu save taim gavman bilong God i bosim graun, ol man bai i no i dai moa?”
Orait, mipela i kirap toktok na brata i bin ritim niuspepa i askim narapela brata long truim tok bilong em long Baibel. Bihain mipela i pasim tok long bung long de bihain bilong toktok moa. Long dispela rot mipela inap kirapim man i sindaun klostu long mipela long toktok wantaim mipela long ol tok profet bilong Baibel, na mipela i kirapim planti Baibel-stadi. Mipela i tok tenkyu long God long em i helpim mipela.
Taim Bilong Bikpela Traim
Long Epril 25, 1974, gavman dikteta long Potugal i pinis, na planti senis i kamap long wok politik bilong ol kantri em Potugal i bosim. Long Mosambik, ol man i stap long kalabus long wok politik bilong ol, na ol Witnes i kalabus, long wanem, ol i no insait long wok politik, gavman i larim dispela tupela lain i ken lusim kalabus. Tasol inap 14 mun bihain, long Jun 25, 1975, Mosambik i kisim independens long Potugal. Inap sampela de bihain, pasin bilong birua long ol Witnes i kirap gen. Ol i kirapim ol man bilong ples long bung wantaim na holim olgeta Witnes ol inap painim. Ol i tok, mipela i ‘wokman bilong gavman Potugal em dispela gavman i bin lusim mipela long Mosambik.’
Long Septemba, ol i subim mi long i go long wanpela miting bilong ol man bilong ples. Taim mi kamap long dispela miting, mi lukim olgeta brata i insait long grup bilong mi bilong stadi long Baibel ol i stap. Ol man i tokim mipela long singaut na mekim ol tok bilong litimapim gavman. Long gutpela pasin mipela i tok nogat, na ol i kisim mipela i go long kalabus na putim mipela long dispela rum kalabus mi stori long en long kirap bilong dispela stori.
Mipela i pas pas long dispela rum kalabus, na mipela i no inap surik liklik. Bilong sampela i ken slip long plua, ol narapela i mas sindaun o sanap. I gat wanpela toilet tasol, na planti taim em i pas, olsem na ol samting bilong en i save kam antap na kapsait na kamapim smel i nogut tru. Mipela kaikai spageti i gat planti gris na bun bilong pis na ol bikpela lang nogut i sindaun long en, na mipela i no inap wasim han paslain long mipela i kaikai. Inap 19 de, mipela 180 manmeri i karim bikpela hevi olsem long dispela ples nogut. Bihain ol i kisim mipela i go long wanpela hap em ol Witnes tasol i stap, em ol man, meri, na pikinini. I stap bilong mipela long kalabus i nogut olgeta, olsem na insait long sampela mun planti pikinini i dai.
Bihain, gavman i pasim tok long rausim ol Witnes i go long Kariko, em wanpela longwe ples i stap long hap not. Ol i laik mipela i stap longwe long ol narapela man. Long dispela taim i gat inap 7,000 Witnes long Mosambik, na planti bilong ol i bin kisim baptais long 1974 na 1975. Mi save olsem mipela i mas i gat ol buk na nius bilong Baibel taim mipela i stap long dispela longwe ples, olsem na mi askim ol bikman long larim mi i go long haus bilong kisim sampela kaikai na klos samting. Polisman i go wantaim mi, em i no lukim mi taim mi rausim ol bisket long sampela katon na putim ol buk na nius bilong Baibel long as bilong en. Long kain taim olsem mipela i no pret. Mipela i bilip olsem God bai helpim mipela.—Hibru 13:6.
I Stap Bilong Mipela Long Ol Kem
Mipela i kamap long Kariko long Janueri 1976, na painim planti Witnes bilong Malawi i stap long dispela hap long ol kem ol i bin wokim. Kirap long 1972 i go inap long 1975, winim 30,000 manmeri, ol pikinini tu, ol i bin ranawe lusim Malawi, long wanem, ol man i birua long lotu bilong ol na mekim nogut tru long ol. Gavman i orait long ol i ken kam long noten Mosambik olsem ol refyuji, na taim mipela i kamap, ol i singautim mipela long i stap long haus bilong ol na ol i givim hap bilong liklik kaikai bilong ol long mipela.
Planti bilong mipela i no gat save long wokim haus, olsem na ol brata bilong Malawi ol i lainim mipela long wokim haus na ol brik, na long mekim wok long ol brik wantaim ol samting bilong bus. Na ol i lainim mipela tu long wokim gaden na ol narapela wok bilong lukautim mipela. Olsem na mi lain long mekim wok kamda, na wok gaden, na samapim klos. Dispela save mipela i kisim i helpim planti bilong mipela, taim mipela i go bek long ples long bihain.
Namba wan samting mipela i tingting planti long en em long stap strong long ol samting bilong spirit, na mi mas tok olsem mipela i no sot long kaikai bilong spirit. Olsem wanem mipela i no sot? Olsem mi stori pinis, taim ol i salim mipela i go long dispela longwe ples, planti bilong mipela i wokim tingting na bringim ol buk na nius bilong Baibel wantaim ol narapela kago bilong mipela. Na tu, ol Witnes long Saut Afrika ol i prinim ol nius Wastaua i liklik tru, olsem na i no hatwok long kisim ol nius i kam long ol kem.
Long Disemba 1, 1978, bihain long mipela i bin wok long kisim tok orait long gavman inap planti taim, namba wan marit i kamap long kem. Long dispela de mi maritim Alita Chilaule, em papa bilong em i wanpela bilong namba wan lain i bin kisim baptais long Maputo, long 1958. Taim pikinini bilong mipela, em Dorcas na Samuel, ol i kamap, mipela i lainim ol long laikim tru Jehova, na oltaim mipela i kisim ol i go wantaim mipela long ol miting Kristen. Bihain, mipela i kamapim narapela pikinini, nem bilong em Jaimito.
Pasin Bilong Mipela Long Autim Tok
Ol Witnes i kisim tok orait long lusim ol kem na i go maketim ol samting—kaikai bilong gaden tu. Planti bilong mipela i autim tok long kain taim olsem. Mi putim pe bilong sol i antap tru bambai i no gat wanpela man i baim, na mi ken maket i stap na autim tok. Tasol planti man mi bungim ol i laikim tok bilong Kingdom, na mi kirapim planti Baibel-stadi.
Wanpela Baibel-stadi bilong mi em i toktok wantaim dairekta bilong wanpela kampani i stap klostu long taun Milange, na em i laik harim tok bilong Baibel. Taim stadi i toksave long mi long dispela samting, mi raitim pas i go long dispela dairekta. Em i singautim mi long kam long haus bilong em. Olsem na mi haitim ol nius bilong Baibel aninit long klos mi pasim, na kisim ol sia samting mi bin wokim na mi mekim olsem mi go salim ol dispela samting.
Taim mi kamap long haus bilong em, ol soldia i was long haus, olsem na mi tingting planti. Tasol dairekta i tokim ol soldia olsem em i no laik sampela man i kam lukim em taim em i toktok wantaim mi. Mipela i kirap stadi long Baibel long 5 klok long apinun, na em i gat laik tru long kisim save, olsem na mipela i stadi i go inap long 5 klok long moningtaim! Bihain em i tok, ol Witnes long Potugal i ken salim ol buk na nius bilong mipela i go long em, long wanem, gavman i no tambuim em long kisim ol pas samting. Taim ol buk samting i kam, em i givim long mi na mi kisim i go long kem.
Tru, taim mipela i autim tok, planti taim polis i holim sampela bilong mipela. Tasol taim planti man i laik harim tok bilong Kingdom, mipela i bilip olsem God i wok long helpim mipela, olsem em i bin helpim ol Kristen long taim bilong ol aposel.—Aposel, sapta 3-5.
Lusim Kem na Go Bek Long Maputo
Long Septemba 1985, mipela i beten na skelim gut ol samting bilong i stap bilong mipela, na mipela i stretim rot bambai planti Witnes i ken lusim ol kem. Maski sampela i no lusim ol kem long Kariko na ol i stap longwe long ol narapela Witnes inap 7-pela yia moa, ol narapela i ranawe i go long Malawi na Sambia. Mitupela meri bilong mi i go wantaim ol pikinini bilong mipela long wanpela taun i stap klostu, em Milange. Long dispela taun mi kisim wok mani na haus, na mipela i mekim yet wok autim tok. Long yia bihain, mipela i go bek long Maputo.
Pastaim mipela i stap wantaim ol wanblut. I hatwok long kisim wok mani, tasol bihain mi inap kisim wok. Bilong helpim famili long kisim mani, Alita i maketim ol pinat em i bin kukim long paia. Save bilong mi long tok Inglis i bin kamap gutpela, olsem na mi putim aplikesen bilong kisim wok long Haus Embasi Bilong Briten. Mi winim tes na kisim wok, na pe mi kisim i gutpela, winim pe mi kisim bipo inap 20 taim! Mi pilim tru olsem Jehova i bin helpim mi, na mi beten na tok tenkyu long em.
Skelim Gut Ol Wok
Long Februeri 11, 1991, gavman bilong Mosambik i tok orait long mipela ol Witnes Bilong Jehova i ken kamap olsem wanpela lain lotu. Mipela i no inap lusim tingting long dispela de! Long yia bihain, ol i singautim mi long kamap memba bilong komiti i bosim wok bilong ol Witnes long Mosambik. Long dispela taim, ol pikinini bilong mipela ol i gat 12-pela, 9-pela, na 6-pela krismas tasol. Nait olgeta mi beten long Jehova bilong kisim gutpela tingting bilong skelim gut ol samting bambai mi inap lukautim gut famili na mekim wok bilong oganaisesen.
Mipela inap baim wanpela liklik haus i gat wil, na mipela i mekim wok long en bilong mekim wok bisnis. Mipela i givim wok long sampela painia long wokim na salim ol sanwis, na dispela bisnis i wok gut. Olsem na mi gat taim long mekim nupela wok bilong mi long oganaisesen. Mipela i mas kisim haus tu, long wanem, mipela i no inap rentim moa dispela haus mipela i stap long en. Olsem na mi raitim wanpela pas i go long ol bikman bilong gavman bilong kisim haus, na mi stori long i stap bilong famili bilong mi. I no longtaim na ol i tok orait long mi ken kisim haus. Ol nius samting i stori long dispela, long wanem, mi namba wan man bilong Mosambik i baim haus long gavman.
Mitupela Alita i bin kisim ol gutpela pikinini i bihainim tok mipela i mekim bilong skulim ol long ol samting bilong spirit. (Lo 6:6-9) Em pasin bilong mipela long skelim teks bilong de long 5:40 long moningtaim, na bihain mipela i ritim Baibel wantaim. Ol pikinini i mas i stap long skul long moning tru, olsem na ol i lain pinis long mekim ol dispela samting long moningtaim. Long Fraide long 6 klok long apinun, mipela i mekim famili-stadi na ol pikinini i toktok wantaim mipela long ol tok bilong Baibel em ol i bin stadi long en namel long wik. Na long dispela taim tu, mipela i mekim traim long pasin bilong autim tok long ol haus.
Olgeta pikinini bilong mipela ol i baptais pinis. Kirap long 1994, Dorcas na Samuel i bin mekim wok painia, na kirap long taim Jaimito i kisim baptais, em i bin mekim wok painia haptaim. Ol pikinini i skul yet, na olgeta i bin putim mak long mekim bikpela wok moa bilong spirit long bihain. Alita i skelim gut taim bilong em, na em i mekim wok painia na ol wok bilong haus. Inap planti yia—ol dispela yia tu mi bin i stap long ol kem—mi bin mekim wok painia. Tasol kirap long 1993, long olgeta de mi save wok long brens-ofis bilong ol Witnes Bilong Jehova long san.
Kisim Yet Ol Blesing i Kam Long God
Long 1997, mi kisim wanpela gutpela blesing tru na mi go skul inap 2-pela mun long skul bilong ol brata bilong Komiti Bilong Brens. Dispela skul i kamap long Yunaitet Stets long Wastaua Edukesen Senta long Patesen, Nu Yok. Olsem na mi kisim gen gutpela pe long wok bilong mi long lainim tok Inglis. Taim mi go bek long ples, mi inap i go lukim sampela wokman bilong Jehova long ol narapela kantri, na dispela i mekim na mi amamas tru long lain brata bilong yumi i stap long olgeta hap!
Dispela pasin sori i stap namel long ol trupela Kristen i bin pulim planti tausen manmeri moa long bung wantaim ol Witnes long Mosambik. (Jon 13:35) Taim mipela i kalabus long ol kem, inap 7,000 Witnes i bin autim tok, tasol nau inap 29,000 Witnes i autim gutnius bilong Kingdom bilong God long olgeta hap bilong Mosambik. Ol i bilong 665 kongrigesen. Long 1958, i gat 4-pela kongrigesen tasol.
Long 1993, mipela i kisim tok orait long wokim brens-ofis long Maputo em inap long 75 brata sista i ken wok long en na lukautim wok bilong trupela lotu i wok long i go bikpela long Mosambik. Bihain long 4-pela yia, wok bilong sanapim brens-ofis i pinis. Long Disemba 19, 1998, mipela i amamas tru taim 1,098 manmeri bilong planti kantri ol i bung long taim bilong dediketim dispela gutpela brens-ofis. Long program bilong dediketim brens-ofis, mi toktok wantaim sampela brata sista i bin i stap inap planti yia long ol kem long Kariko. Mi askim ol brata i bin stap long ol kem long apim han bilong ol, na bel bilong ol brata sista i stap long dispela bung i kirap tru taim ol i lukim planti handet han i go antap.
Long de bihain, inap 8,525 i bung long Haus Kibung Bilong Matola bilong harim sampela tok ol i bin mekim long program bilong dediketim brens-ofis, na ol gutpela ripot i kam long ol narapela kantri, na ol tok bilong Baibel em ol brata bilong hetkota bilong ol Witnes long Bruklin, Nu Yok, ol i mekim.
Tru, kirap long taim mi bin kisim save long tok i tru bilong Baibel taim mi yangpela yet, famili bilong mi i bin birua long mi, na ol man i tok ol bai kilim mi i dai, na ol man i bin mekim nogut tru long mi na sampela taim dispela i mekim na mi bin ting olsem i gutpela moa long i dai. Tasol mi amamas, long wanem, ol dispela samting i painim mi i bin helpim mi long pas gut moa wantaim Jehova. Olsem man bilong raitim Song i tok: “God yet i save helpim mi. Tru tumas, Bikpela i save lukautim mi na mi stap gut.” (Song 54:4) Em i nambawan gutpela samting long mi na famili bilong mi i ken lotuim Jehova wantaim lain bilong em i stap long olgeta hap.
[Piksa long pes 19]
Ol Witnes i sanap long ai bilong Haus Kingdom ol i bin wokim taim ol i stap long ol kem
[Piksa long pes 20]
Mipela i mekim famili-stadi
[Piksa long pes 21]
Lain i bin stap long ol kem bilong Kariko ol i apim han