“Kam Long Mi na Bai Mi Givim Malolo Long Yupela”

“Wanem Taim Yumi Inap Mekim Gutpela Pasin Long Ol Arapela, Yumi Mas Mekim”

AUTIM tok na skulim ol man long gutnius bilong Kingdom bilong God em nambawan bikpela wok bilong Jisas. (Mak 1:14; Luk 8:⁠1) Ol disaipel bilong Jisas i laik bihainim pasin bilong em, ol i tingim wok bilong skulim ol man long tok bilong Baibel long Kingdom i bikpela samting long i stap bilong ol. (Luk 6:40) Tru tumas, ol Witnes Bilong Jehova i save belgut long lukim olsem tok bilong Kingdom i save givim malolo long ol man i kisim dispela tok, wankain olsem long taim Jisas i bin stap long graun.​​—⁠Matyu 11:​28-30.

Jisas i skulim ol man long tok bilong God na em i mekim ol narapela gutpela wok, olsem oraitim ol man i gat sik na givim kaikai long ol man i hangre. (Matyu 14:​14-21) Na olsem tasol, ol Witnes Bilong Jehova i save skulim ol man long Baibel tasol ol i mekim ol wok tu bilong helpim ol manmeri i sot o i no gat helpim. Long wanem, Baibel i helpim ol Kristen long “mekim olgeta kain gutpela wok” na em i kirapim ol long “mekim gutpela pasin long ol arapela.”​​—⁠2 Timoti 3:​16, 17; Galesia 6:⁠10.

‘Ol Brata i Bin Kam Helpim Mipela’

Long Septemba 1999, bikpela guria i seksekim Taiwan na bikpela bagarap i kamap. Sampela mun bihain, bikpela ren long Veneswela i mekim na graun i bruk i kam daun na bikpela bagarap nogut tru i kamap. I no longtaim i go pinis, bikpela tait wara i bagarapim kantri Mosambik. Long dispela tripela bagarap, ol Witnes Bilong Jehova i go hariap long ol dispela hap na ol i bringim kaikai, wara, marasin, klos, haus sel na ol praimas samting bilong ol man i kisim bagarap. Ol volantia i gat save long wok dokta samting ol i wokim wanpela liklik haus sik bilong helpim ol man i kisim bagarap, na sampela volantia i sanapim ol nupela haus bilong ol man haus bilong ol i bagarap.

Ol man i kisim bagarap i pilim tru helpim ol i kisim long dispela taim stret. Taim graun i bruk long Veneswela, haus bilong Malyori i bagarap. Em i tok: “Taim mipela i sot tru, ol brata bilong mipela i bin kam helpim mipela.” Taim ol volantia i wokim pinis nupela haus bilong Malyori wantaim famili bilong em, em i tok: “Mipela i givim bikpela tenkyu tru long Jehova long ol samting em i mekim bilong helpim mipela!” Na taim tait wara i bagarapim olgeta samting bilong ol brata long Mosambik na ol i kisim ki bilong ol nupela haus bilong ol em ol volantia i wokim, olgeta i kirap mekim singsing bilong Kingdom, “Jehova Em i Ples Hait Bilong Yumi.”a

Ol volantia tu i kisim nupela strong taim ol i helpim ol lain i sot long ol samting. Marcelo i wok olsem nes long refiuji kem long Mosambik, na em i tok: “Mi amamas long helpim ol dispela brata em ol i bin kisim hevi nogut tru.” Huang, em wanpela volantia long Taiwan, em i tok: “Mi amamas long insait long wok bilong givim kaikai na haus sel long ol brata i sot. Dispela i strongim tru bilip bilong mi.”

Wanpela Volantia Program i Wok Gut

Wok volantia i helpim tu planti tausen kalabusman i stap long olgeta hap. Olsem wanem em i mekim olsem? Insait long sampela yia i go pinis, ol Witnes Bilong Jehova i bin givim ol buk na nius bilong Baibel bilong helpim olsem 30,000 kalabusman insait long 4,000 haus kalabus long Amerika. Na sapos inap, ol Witnes yet i save go long ol haus kalabus bilong stadi wantaim ol kalabusman long Baibel na mekim ol miting Kristen wantaim ol. Yu ting dispela i save helpim ol kalabusman?

Sampela kalabusman i stadi long Baibel ol i kirap tokim ol narapela kalabus long ol gutpela tok bilong Baibel ol i lainim. Olsem na long sampela haus kalabus long olgeta hap bilong graun, nau i gat ol grup bilong ol kalabusman em ol i save lotuim Jehova wantaim. Long yia 2001, wanpela man i stap kalabus long Oregon, Amerika, em i tok: “Grup bilong mipela i wok long kamap gutpela. Mipela i gat 7-pela pablisa bilong Kingdom na mipela i mekim 38 Baibel-stadi. Winim 25 man i save kam long pablik-tok na Stadi Wastaua, na 39 i bin kam long bung bilong Memorial [bilong tingim indai bilong Krais]. Klostu nau tripela moa bai kisim baptais!”

Ol Gutpela Samting na Amamas

Ol ofisa bilong haus kalabus i lukim olsem dispela volantia program i kamap gutpela. Samting ol ofisa bilong kalabus i kirap nogut moa long en, i olsem dispela volantia program i helpim ol kalabusman longpela taim. Wanpela ripot i tok: “Insait long dispela tenpela yia dispela program i wok i stap, i no gat wanpela bilong ol kalabusman em ol i bin kisim baptais insait long kalabus na kamap Witnes Bilong Jehova i bin kam bek gen long kalabus taim em i lusim pinis kalabus​​—⁠tasol long ol narapela grup bilong ol kalabusman, inap olsem 50-60 pesen i save kam bek long kalabus.” Ol gutpela samting i kamap long wok volantia ol Witnes i mekim i kirapim wanpela pris bilong haus kalabus long Idaho long raitim pas i go long hetkota bilong ol Witnes Bilong Jehova olsem: “Mi yet mi no wanbel long ol tok bilong lotu bilong yupela, tasol mi kirap nogut long oganaisesen bilong yupela.”

Taim ol volantia i mekim wok bilong helpim ol lain i stap long kalabus, dispela i helpim ol tu. Wanpela brata i mekim miting wantaim wanpela grup bilong ol kalabusman na ol i mekim wanpela singsing bilong Kingdom long namba wan taim, na bihain dispela brata i tok: “Taim mi lukim 28 man i bung wantaim na mekim singsing bilong litimapim nem bilong Jehova, dispela i strongim mi. Na ol i singsing strong! Em i wanpela gutpela samting tru long i stap wantaim ol long dispela taim!” Wanpela volantia i save go long ol haus kalabus long Arizona i tok: “Em i wanpela gutpela samting tru long insait long dispela bikpela wok!”

Ol Witnes i wok volantia long olgeta hap i wanbel long tok bilong Jisas, em i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Ol i wanbel tu long tok olsem taim ol i bihainim tok bilong Baibel long mekim gutpela pasin long olgeta man, dispela i givim nupela strong long ol.​​—⁠Sindaun 11:⁠25.

[Futnot]

[Piksa long pes 8]

Veneswela

[Piksa long pes 8]

Taiwan

[Piksa long pes 8]

Mosambik