Yu Ting Ol Kalabus Inap Senis Tru?

“I no gat wanpela man inap subim narapela long senisim pasin bilong em. Senis tru mas i kamap long bel bilong man, na strongpela laik bilong em yet i mas kamapim.”​—⁠VIVIEN STERN, A SIN AGAINST THE FUTURE​—⁠IMPRISONMENT IN THE WORLD.

BIKPELA samting bilong helpim ol kalabus long senisim tru pasin bilong ol, em skul ol i kisim na senis bilong tingting. I gat sampela manmeri i givim bel tru long wok bilong skulim na helpim ol kalabusman. Planti kalabus i amamas long gutpela wok bilong ol dispela manmeri i bihainim pasin bilong tingim ol narapela.

Ating sampela man i tok i no gat rot bilong stretim wok bilong haus kalabus, na i hatwok tru long ol man i stap long kain ples olsem long senisim pasin bilong ol. I tru, wok bilong stap tasol long kalabus i no inap kirapim man long bihainim nupela tingting, tasol skul bilong Baibel i bin kamapim bikpela senis long i stap bilong sampela. Dispela i makim olsem senis inap kamap long sampela kalabusman.

Long nau, helpim ol i kisim long Baibel i strongim sampela kalabusman long mekim ol senis i kirapim ol long bihainim stretpela tingting na wokabaut. Ol i mekim olsem wanem? Ol i bihainim dispela tok bilong Baibel: “Yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.” (Rom 12:⁠2) Dispela i kamap olsem wanem?

Wok Bilong Baibel

Planti man i ting lotu i bikpela samting bilong helpim ol kalabus long tanim bel na hevi long ol rong ol i bin mekim bipo. Tasol wanpela hevi bilong dispela i olsem, senis man i mekim taim em kalabus, dispela inap lus nating taim ol i larim em long go fri. Wanpela kalabusman i stori long dispela samting na tok: “Planti man i painim Krais long hia​—⁠tasol taim ol i lusim kalabus, ol i lusim Krais long hap ol i bin painim em!”

Save ol man i kisim pinis i kamapim klia olsem senis tru i mas kamap insait​—⁠long bel na tingting bilong dispela man nogut​—⁠na pasin bilong pilim tru rong bilong ol na tanim bel i mas stap olsem as bilong dispela senis. Skul bilong Baibel inap helpim man long save God yet i gat wanem tingting long pasin nogut na bilong wanem dispela pasin i no stret. Dispela inap stap olsem strongpela as bilong helpim man na em bai i no laik mekim moa dispela pasin.

Ol Witnes Bilong Jehova i wokim kain skul bilong Baibel olsem long planti haus kalabus long olgeta hap bilong graun, na wok i karim gutpela kaikai. (Lukim pes 10.) Wanpela kalabusman i tok: “Ol i helpim mipela long save Baibel i tok wanem long as na yumi stap, na ol gutpela blesing ol man inap kisim long bihain.” Em i tok moa olsem: “Em i narapela kain skul tru!” Narapela man i stap kalabus i tok: “Nau mipela wok long larim Baibel i stiaim mipela long ol samting mipela laik mekim. . . . Mipela i luksave long sampela senis bilong mipela yet. Mipela save wanem samting i bilong stap olsem namba wan bikpela samting long laip bilong yumi.”

Tru, ol samting i gat wok long senis i no stap insait long ol haus kalabus tasol. Taim i no gat wok moa long ol haus kalabus, dispela em i samting tru tru bilong stretim hevi. Wanpela gutpela tok bilong Baibel i bin kirapim tru bel bilong planti kalabus em dispela tok promis bilong God: “Ol man nogut bai i bagarap olgeta. . . . Ol stretpela man bai i kisim graun God i givim ol, na bai ol i stap oltaim long en.”​—⁠Song 37:​9, 29.

Taim truim bilong dispela samting i kamap, wanpela gavman i no inap bagarap bai i sori long ol man, na strong long ol man i mas bihainim ol stretpela lo bilong God. Em wok bilong Kingdom bilong God long heven Krais i bosim​—⁠em gavman ol Kristen i bin lain long beten long en. (Matyu 6:10) Long dispela nupela taim, olgeta manmeri bai senisim pasin bilong ol long rot bilong lainim ol nambawan gutpela lo bilong God. Bai i gat bikpela truim bilong dispela tok: “Olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” (Aisaia 11:⁠9) Dispela bai mekim wanem? Ol manmeri bilong bihainim lo bilong dispela nupela taim bai “ol i sindaun gutpela tumas na amamas i stap.”​—⁠Song 37:⁠11.

[Blok/Ol Piksa long pes 10]

I Opim Rot Bilong Kisim Bilip

Winim 20 yia pinis, ol Witnes Bilong Jehova i mekim wok volantia na ol i wokim wanpela skul bilong Baibel long bikpela haus kalabus long Atlanta, Georgia, long Amerika. Insait long dispela hap taim, inap olsem 40 kalabus i bin kisim baptais na kamap Witnes Bilong Jehova. Na 90 narapela ol kalabus, ol tu i kisim helpim long rot bilong stadi oltaim long Baibel.

I no long taim i go pinis na Kirap! i bin toktok wantaim sampela tisa bilong Baibel em ol i givim bel long wok long dispela haus kalabus.

◼ Bilong wanem skul bilong Baibel i gutpela long kirapim sampela ol kalabus long senisim pasin bilong ol?

David: Planti kalabus em ol man ol narapela i no bin mekim pasin sori long ol, em hevi ol i karim kirap long taim ol i stap pikinini yet. Olsem na taim ol i kisim save olsem God i laikim ol tru, na ol i prea long em na kamapim gut bel bilong ol, na God i harim prea bilong ol​—⁠ol i tingim God i olsem man tru tru. Na bel i kirapim ol long laikim em tru.

Ray: Mi bin stadi wantaim wanpela kalabus em sampela i mekim nogut long em taim em i liklik. Taim mi askim em long wanem samting i kirapim em long laikim Jehova, em i tok olsem taim yu lainim ol tok tru bilong Baibel, yu bai kisim save olsem Jehova i save pilim tru tingting bilong yu. Dispela i bin kirapim em long kisim save moa long pasin bilong dispela God bilong sori.

◼ Sampela bai tok ol kalabus i givim bel long lotu, long wanem, ol i tingting long narapela samting​—⁠ol i laik bai kot i tekewe sampela yia bilong ol, o ol i mekim nating bilong inapim taim tasol. Yu gat wanem tingting long dispela?

Fred: Taim ol kalabus i kam long skul bilong mipela, mipela i no kirapim nating bel bilong ol. Mipela stadi long Baibel tasol. Kwiktaim ol i kisim save olsem ol bai lainim ol samting bilong Baibel, na em tasol. Sampela i bin kam askim mi long helpim ol long kot bilong ol. Tasol mi no toktok wantaim ol long dispela samting. Dispela i mekim na ol man i wok long kam oltaim long stadi, em ol man i gat laik tru long lainim ol tok bilong Baibel.

Nick: Wanpela samting mi luksave long en, em ol senis sampela man i mekim taim ol i stap long kalabus. Sampela i bin kisim baptais na stap olsem wokman bilong God. Na ol i karim bikpela hevi long ol pasin ol narapela kalabus i mekim long ol. Dispela i givim hatwok tru long ol. Sapos Baibel i no bin kirapim tru bel bilong ol, ol bai i no inap stap gut long God taim ol dispela hevi i painim ol.

Israel: Planti em ol man i gat laik tru long kisim save long Jehova, na toktok bilong ol i kamapim klia ol i pilim tru samting ol i laik kisim. Yu inap save long laik tru i stap long bel bilong ol.

Joe: Ol kalabus i kamap Kristen tru, ol i bin tingim gut ol samting na ol i save bilong wanem wokabaut bilong ol i bin go nogut. Na tu, ol i save i gat as bilong bilip olsem senis inap kamap​—⁠i olsem wanpela i opim rot bilong ol long kisim bilip. Na nau ol inap wetim truim bilong ol tok promis bilong Jehova long ol samting em bai kamapim bihain.

◼ I gat wanem as na wok bilong stap kalabus tasol i no inap senisim pasin bilong ol raskol?

Joe: Wok bilong kalabus i no bilong senisim pasin bilong man, nogat. Em bilong pasim ol raskol na bai ol i stap longwe long ol narapela manmeri. Dispela samting i mekim, olsem na ol i no senisim pasin bilong ol.

Henry: Wok bilong kalabusim man i no inap senisim tingting i stap long bel bilong em. Planti bilong ol dispela lain i stap long kalabus, ol bai mekim gen wankain pasin nogut taim ol i lusim kalabus.

[Piksa long pes 8, 9]

Planti kalabus i bin kisim helpim na ol i lainim ol tok tru bilong Baibel