“Gol” Bilong Hap Not
WANPELA MAN LONG POLAN I RAITIM DISPELA STORI BILONG KIRAP!
KIRAP long bipo yet, ol man i tok wanpela kain ston ol i kolim emba, em i olsem gol bilong hap Not. Long Rom bilong bipo, ston emba em wanpela gutpela samting ol i save baim. Ol man i tok olsem King Niro i bin salim wanpela bikman long i go baim ston emba long Polan. Ol man bilong wok bisnis long ston emba ol i save kisim wanem samting olsem pe bilong en? Ol i save kisim ol mani gol na silva na ol narapela samting bilong yusim long olgeta de. Ol i tok tu olsem dispela wok bilong raun na baim ston emba i bin opim rot bilong lotu Kristen long i go kamap long Polan long yia 200 C.E. samting.
Sampela man i ting olsem ston emba i gat strong bilong wokim majik o marila samting. Olsem na ol i save wokim ol paspas long ston emba—ol i ting dispela bai mekim na ol gutpela samting tasol bai painim ol, na em bai lukautim ol long taim nogut, na helpim ol long painim abus na winim pait. Na tu, ol i bin yusim ston emba bilong lotuim ol man i dai pinis. Ol i save wokim ol liklik piksa samting long ston emba, olsem ol het bilong tamiok na ol narapela piksa tu bilong lotuim san na ol tumbuna, na bilong helpim ol meri long karim planti pikinini.
Na ston emba i bin mekim bikpela wok tu long kirapim ol man long kamapim ol marasin bilong ples samting. Ol i ting olsem sapos man i pasim bis emba long nek bilong em, dispela bai oraitim sik bilong het i pen, nek i pen, na sua insait long nek, na ol paspas bai oraitim ol pen long bun na skru. Ol i save mekim wok tu long ol kain kain gris, na ol marasin i gat strongpela smel bilong oraitim sik, na ol ston emba ol i bin putim insait long wain samting. Na long nau tu, sampela man i ting olsem ston emba inap long oraitim ol sik samting.
Tru tumas, ston emba i givim biknem long Man bilong wokim olgeta samting, em God Jehova. I gat gutpela as na man bilong raitim Song i tok: “Bikpela, yu bin wokim planti samting. Yu gat bikpela save na yu wokim olgeta dispela samting. Ol samting yu bin wokim i pulap tru long dispela graun.”—Song 104:24.
[Piksa Kredit Lain long pes 11]
All images: Dziȩki uprzejmości DEJWIS COMPANY; Gdańsk-Polska