Wanem Samting i Mekim na i Stap Bilong Yumi i Gat As Tru Bilong En?
TAIM ol i askim Jesse, em wanpela sumatin bilong haiskul i gat 17 krismas, long as bilong i stap bilong yumi, em i tok: “Taim yu stap laip yet, yu mas wok strong oltaim long kisim amamas.” Tasol Suzie i gat narapela tingting. Em i tok: “Mi bilip olsem yumi yet i mas mekim ol samting na bai i stap bilong yumi i gat as bilong en.”
Olsem wanem? Yu bin tingting olsem i gat wanem as na yumi stap? I gat wanpela samting tasol bilong olgeta man na ol i stap? O ating Suzie i tok stret—olsem em samting yumi yet i mekim na i stap bilong yumi i gat as bilong en? Maski ol lain bilong nau i kisim moa save long wokim ol nupela kain samting, i olsem i gat samting insait long bel i gat laik tru long painim as bilong i stap bilong yumi. Ating yumi olgeta i bin tingting, ‘I gat wanem as na yumi stap?’
Ol saientis long nau i bin wok strong tru long painim bekim bilong dispela askim. Orait ol i painim wanem bekim? David P. Barash, em profesa bilong ol samting bilong tingting na ol animal samting, em i tok: “Yumi stap laip, tasol dispela yet i no mekim na i stap bilong yumi i gat as bilong en.” Ol saveman bilong ol samting i stap laip, em ol i bilip olsem ol samting i kamap long rot bilong evolusen, ol i ting i gat wanpela wok tasol bilong ol samting i gat laip: em bilong i stap laip na kamapim pikinini. Olsem na Profesa Barash i tok: “Heven na graun em i bikpela ples tru na i no gat as bilong en na i no save tingim ol man, olsem na em wok bilong yumi ol man long makim ol samting na bai i stap bilong yumi i gat as bilong en.”
As na Yumi Stap Laip
Orait yu ting yumi stap bilong mekim olsem tasol—olsem yumi olgeta wan wan i mekim ol samting yumi yet i laikim? Yumi no bilong mekim nating tasol long graun i no gat wok bilong en o i no gat as na em i stap, nogat. Long bipo yet Baibel i kamapim klia, i gat as na yumi stap. Yumi no bin kamap nating tasol. Baibel i soim olsem Man Bilong Wokim olgeta samting em i bin wok inap planti tausen yia long redim graun bambai em i ken putim man long en. Ol dispela samting i no kamap nating tasol. God i tingim gut na mekim na bai “olgeta dispela samting i gutpela.” (Stat 1:31; Aisaia 45:18) Bilong wanem God i mekim olsem? Long wanem, em i tingting pinis long ol samting ol man i mas mekim.
Tasol God i no bin makim ol samting bai painim olgeta wan wan man long bihain, olsem God i stiaim olgeta samting long i stap bilong ol, o i gat samting long skin i mekim, nogat. Tru, ol pasin i stap long skin taim mama i karim yumi em i save stiaim yumi liklik, tasol yumi yet i save bosim planti samting yumi mekim. Yumi olgeta i stap fri long makim wanem rot bai yumi bihainim.
Tru, yumi yet i gat wok long makim ol samting bai yumi mekim long i stap bilong yumi, tasol nogut yumi mekim pasin kranki na givim baksait long Man Bilong Wokim yumi. Planti ol i kisim save pinis olsem ol i mas pas gut wantaim God na bai i stap bilong ol i gat as tru bilong en. Dispela i kamap ples klia long nem bilong God, Jehova, insait bilong en i olsem “Em i Mekim i Kamap.” (Kisim Bek 6:3, NW; Song 83:18, NW ) Olsem: Em i save truim olgeta promis em i mekim, na oltaim em i save mekim tru olgeta samting em i tingting pinis long mekim. (Kisim Bek 3:14, NW; Aisaia 55:10, 11) Tingim dispela samting. Nem Jehova i olsem wanpela tok tru antap em i mekim long yumi olgeta, olsem: Inap oltaim oltaim em i As tru bilong pasin bilong mekim ol samting i gat as bilong en.
Sapos man i bilip olsem Man Bilong Wokim yumi em i stap tru, dispela i mekim bikpela samting long tingting bilong man long i stap bilong em. Linet, em i gat 19 krismas, em i tok: “Taim mi lukim olgeta gutpela samting Jehova i bin wokim na em i gat wanem wok bilong ol, dispela i soim mi olsem, i gat as na em i bin wokim mi tu.” Amber tu i tok: “Taim ol man i tok, ol i no save tru olsem God i stap o nogat, mi save tingting olsem, mi save tru long dispela. Ol samting Jehova i bin wokim i kamapim klia tru olsem em i stap.” (Rom 1:20) Tasol sapos yumi save tasol olsem God i stap, dispela i no inap. Yumi mas wok long kisim pasin bilong pas gut wantaim em.
Stap Pren Bilong God
Long dispela samting tu Baibel inap helpim yumi. Ol sapta i stap paslain long Baibel i kamapim klia tru olsem God Jehova em i gutpela Papa. Taim em i wokim Adam na Iv em i no larim ol i stap na ol i no save em i husat, nogat. Oltaim em i save toktok wantaim tupela. Em i no larim ol i stap nating long Iden na ol yet i mas painim rot bilong stiaim wokabaut bilong ol na em i mekim ol samting bilong em yet, nogat. Em i tokim ol klia long olsem wanem ol i ken i stap gutpela tru. Em i givim gutpela wok long ol, na em i wokim rot bambai ol i ken kisim skul i go i go. (Stat 1:26-30; 2:7-9) Gutpela papa i gat save na pasin sori, em i save mekim olsem, a? Orait nau tingim dispela i makim wanem samting. Denielle i tok: “Taim mi save olsem Jehova i wokim graun na wokim bodi bilong yumi na bai yumi inap amamas long ol samting em i bin wokim, dispela i soim mi olsem em i laik bai yumi stap amamas.”
Na tu, wankain olsem ol narapela gutpela papa, Jehova i laik bai yumi olgeta pikinini bilong em i pas gut wantaim em. Olsem na Aposel 17:27 i tokim yumi: “Em i no i stap longwe long yumi olgeta wan wan.” Dispela i save mekim wanem long yumi? Amber i tok: “Taim mi kisim save long Jehova, dispela i helpim mi na mi save tru olsem i no gat wanpela taim mi stap wanpis tru. Maski wanem samting i kamap, oltaim mi inap i go long em bilong kisim helpim.” Na taim yu wok long save gut long Jehova, bai yu lukim olsem em i save mekim gut long ol man, na mekim pasin i stret na gutpela pasin long ol. Yu inap bilip na wet long em. Jeff i tok: “Taim Jehova i kamap pren tru bilong mi, mi save i no gat narapela man inap helpim mi gut taim mi mas kisim helpim.”
Tasol sori tru, planti man i bin mekim tok nogut long Jehova. Ol i tok em yet i as bilong ol pen na hevi i painim ol man na ol hevi ol man bilong lotu i save kamapim. Ol pait nogut tru i bin bagarapim planti manmeri, ol i tok em asua bilong Jehova. Tasol Lo 32:4, 5 i tok: “Pasin bilong en i gutpela na stretpela tasol. Tasol yupela . . . i manmeri bilong mekim sin tasol. Olsem na yupela i no inap i stap lain pikinini bilong God.” Gutpela yumi yet i skelim na painim tok i tru bilong dispela samting.—Lo 30:19, 20.
Laik Bilong God Bai Kamap
Tasol maski yumi tingting long mekim wanem, i no gat wanpela samting bai pasim God long inapim tru ol samting em i tingting pinis long mekim long dispela graun na ol man. Em inap mekim, long wanem, em i Man Bilong Wokim olgeta samting. Orait em i tingting pinis long mekim wanem? Jisas Krais i toktok long dispela samting taim em i mekim tok long maunten, em i tok: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” Bihain em i givim tok long aposel Jon na i makim olsem God i strong long “bagarapim ol man i bin bagarapim graun.” (Matyu 5:5; KTH 11:18) Jisas i bin i stap wantaim God taim God i bin wokim ol samting, olsem na em i save, kirap long pastaim tru God i tingting pinis long wanpela lain manmeri i gutpela olgeta ol bai stap oltaim oltaim long graun long ples Paradais. (Stat 1:26, 27; Jon 1:1-3) Na God i no save senisim tingting. (Malakai 3:6) God i tok promis long yumi olsem: “Tru tumas, samting mi tingting pinis long mekim, em bai mi mekim.”—Aisaia 14:24.
Long taim bilong yumi, God i kirap pinis long kamapim wanpela lain i stap wanbel, na ol i no gat pasin bilong mangal long mani na tingim ol yet tasol olsem planti lain bilong dispela graun i mekim, nogat; ol i save laikim tumas God na ol narapela man. (Jon 13:35; Efesus 4:15, 16; Filipai 2:1-4) Ol manmeri insait long dispela lain ol i wok olsem volantia na ol i wok strong na givim bel tru long wok bilong ol—em bilong autim gutnius bilong Kingdom Bilong God paslain long pinis bilong dispela taim nau yumi stap long en. (Matyu 24:14; 28:19, 20) Long 230 kantri samting, winim 6 milion Kristen ol i kirap pinis long lotuim God wantaim, olsem wanpela lain brata i stap long olgeta hap na ol i stap wanbel na narapela i laikim tru narapela.
I Stap Bilong Yu i Mas i Gat As Bilong En
Sapos yu laik bai i stap bilong yu i gat as tru bilong en yu mas save, God Jehova i singautim yu long bung wantaim lain bilong em—“ol stretpela manmeri” bilong em—nau long dispela taim. (Aisaia 26:2) Tasol ating bai yu tingting olsem: ‘I stap bilong ol insait long dispela lain Kristen i wanem kain? Mi laik insait tru long dispela lain?’ Orait harim tok bilong sampela yangpela long dispela samting:
Quentin: “Kongrigesen em ples mi ken stap long en bilong lukautim mi long ol samting bilong dispela graun. Mi save Jehova i insait long ol samting mi save mekim, na dispela i helpim mi long save olsem em i stap tru na em i laik bai mi stap amamas.”
Jeff: “Kongrigesen em nambawan ples mi ken go long en bilong strongim bel bilong mi. Ol brata na sista i stap na ol i redi long helpim mi na mekim gut long mi. Ol i olsem hap famili tru bilong mi.”
Linet: “Taim mi lukim wanpela i kisim tok i tru bilong Baibel na em i pasim tok long bel long mekim wok bilong Jehova, dispela em i samting bilong amamas tru, winim ol narapela samting, na i save mekim bel bilong mi i gutpela tru.”
Cody: “Sapos mi no save long Jehova, i stap bilong mi bai i no gat as bilong en. Bai mi drip nabaut tasol olsem planti ol i save mekim na traim ol kain kain samting bilong painim amamas, tasol bai mi no inap painim. Tasol Jehova i bin givim rot long mi bambai mi ken pas gut wantaim em, na dispela i mekim na i stap bilong mi i gat as bilong en.”
Mipela laik singautim yu long skelim dispela samting. Bai yu kisim save olsem, taim yu wok long go klostu long Man Bilong Wokim yu, em God Jehova, i stap bilong yu tu bai i gat as tru bilong en.
[Ol Piksa long pes 31]
Taim yumi pas gut wantaim God, yumi pilim olsem i stap bilong yumi i gat as bilong en
[Piksa Kredit Lain long pes 29]
NASA photo