FRAN PES STORI

Yu Ting God i Stap Tru? Hau Dispela Save i Helpim Yu?

Planti man i ting ol man i no inap bekim dispela askim olsem God i stap o nogat. Na sampela i ting i no stret long givim dispela askim. Hervé i go bikpela long Frans i tok: “I no olsem mi no bilip long God o mi gat tupela tingting long God. Bikpela samting em mi laik yusim savetingting na bai mi ken stap gut maski mi no wanpela bilipman. Olsem na mi ting i no bikpela samting long bilip long God.”

Planti man i gat wankain tingting olsem John, em wanpela man i stap long Amerika. Em i tok: “Mi go bikpela insait long famili i no bilip long God. Taim mi yangpela mi no gat 2-pela tingting olsem God i stap o nogat. Tasol sampela taim mi save tingting long dispela.”

Olsem wanem? Yu save tingting planti olsem God i stap o nogat? Na sapos olsem, orait yumi stap laip bilong mekim wanem? Ating yu harim ol man i tok i no gat Krieta, olsem na yu hatwok long kliagut long sampela samting yu kisim save long en. Olsem, yu luksave long ol samting i gat laip i no kamap long rot bilong ol samting i nogat laip. O yu kisim save olsem ol samting long graun i wok gut tru na dispela i helpim ol man na ol animal, na ol gras na diwai samting long i stap laip.—Lukim blok “Kisim Sampela Save Moa.”

Ol dispela samting yu kisim save long en i olsem ol sainbot i stiaim yu i go long wanpela samting i dia tumas. Yu ken bilip tru olsem God i stap, na sapos yu kisim save long Em ol gutpela samting bai painim yu. Yumi ken stori long 4-pela bilong ol dispela samting.

1. AS BILONG LAIP

Wanpela man i ritim wanpela bikpela buk na pes bilong en i soim olsem em i tingting planti

Em i bikpela samting long kisim save long as na yumi stap laip. Tingim, sapos God i stap tru orait yumi mas kisim save long Em, long wanem, em i bin wokim olgeta samting i stap long heven na graun.

Baibel i tok God i As bilong olgeta samting i gat laip. (Revelesen 4:11) Olsem wanem dispela save inap helpim i stap bilong yumi? Skelim tok Baibel i mekim long dispela.

God i wokim ol man i narapela kain long ol animal. Baibel i tok, God i wokim ol man olsem em yet. Dispela i makim olsem ol man inap kamapim ol pasin bilong God. (Stat 1:27) Na tu, Baibel i tok ol man inap stap pren bilong God. (Jems 2:23) Olsem na i stap bilong yumi bai i gat as bilong en sapos yumi pas gut wantaim Krieta bilong yumi.

Wanem gutpela samting i kamap taim yumi stap pren bilong God? Ol man i stap pren bilong God i ken beten na kamapim tingting bilong ol long God. Na God i tok promis olsem em bai harim beten bilong ol na helpim ol. (Song 91:15) Taim yumi stap pren bilong God, bai yumi save long tingting bilong em long planti samting. Na dispela bai helpim yumi long kliagut long ol bekim bilong ol bikpela askim bilong laip.

Sapos God i stap tru orait yumi mas kisim save long Em, long wanem, em i bin wokim olgeta samting i stap long heven na graun

2. STAP BEL ISI

Pes bilong dispela man i soim olsem em i stap bel isi

Sampela man i lukim ol man long graun olgeta i karim ol pen na hevi, na dispela i mekim na ol i no bilip long God. Ol i givim ol askim olsem, ‘Wai na Krieta i gat olgeta strong i larim ol man i karim ol pen na hevi?’

Baibel i helpim yumi long save olsem i no laik bilong God long ol man i karim ol pen na hevi. Taim God i wokim fes man na meri, ol i stap gut long ples paradais we i nogat pen na hevi. Na tu, taim God i wokim ol man em i wokim ol bilong i stap laip oltaim. (Stat 2:7-9, 15-17) Olsem wanem? Yu ting em ol stori nating? Tingim, sapos Krieta i gat olgeta strong i stap na em i as bilong pasin laikim, orait i stret long ting olsem em i wokim ol man bilong i stap gut long wanpela ples paradais.

Tasol bilong wanem ol man long graun olgeta i karim pen na hevi? Baibel i tok God i wokim ol man bilong i stap fri long makim wanem rot ol i laik bihainim. God i no wokim yumi olsem ol masin na em i fosim yumi long bihainim ol tok bilong em, nogat. Adam na Iv, em ol tumbuna papamama bilong yumi i makim rot ol yet i laik bihainim na ol i sakim wok bos bilong God. (Stat 3:1-6, 22-24) Olsem na yumi ol tumbuna pikinini bilong tupela i karim planti hevi.

Maski i olsem, yumi stap bel isi long kisim save olsem God i no wokim ol man bilong karim ol pen na hevi, nogat. Olsem na yumi bilip na wet long gutpela taim bai kamap bihain we olgeta pen na hevi bai pinis.

3. WETIM OL GUTPELA SAMTING

Bihain tasol long Adam na Iv i sakim tok bilong God, Em i tok promis olsem sampela haptaim i mas lus na bihain em bai inapim samting em i tingting pinis long mekim long graun. God i gat olgeta strong, olsem na i no gat wanpela samting inap pasim em long mekim olsem. (Aisaia 55:11) Klostu nau God bai inapim samting em i tingting pinis long mekim long graun. Em bai pinisim olgeta pen na hevi, na mekim graun i kamap ples paradais na ol man bai stap wanbel wantaim.

Dispela save yu kisim i helpim yu olsem wanem? I gat planti gutpela tok promis i stap long Baibel, tasol bai yumi skelim 2-pela tok promis bilong God.

OL MAN NOGUT BAI PINIS, NA OL MAN I STAP BEL ISI. “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:10, 11.
OL MAN BAI I NO SIK NA DAI MOA. “I no gat man . . . bai i tok olsem, ‘Mi gat sik.’” (Aisaia 33:24) “Em bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.”—Aisaia 25:8.

Bilong wanem yumi inap bilip long ol tok promis bilong God long Baibel? Long wanem, God i truim pinis planti tok profet bilong em. Olsem na maski yumi gat ol hevi, yumi inap bilip na wetim ol gutpela samting bai kamap long bihain. Olsem wanem? God bai mekim sampela samting moa bilong helpim yumi?

4. MEKIM OL GUTPELA DISISEN

Taim hevi i kamap, God i save stiaim na helpim yumi long mekim ol gutpela disisen. Planti taim yumi mekim ol liklik disisen, tasol sampela i bikpela disisen na ol inap mekim sampela samting long i stap bilong yumi long bihain. Long kain taim olsem, Krieta tasol inap givim gutpela savetingting long yumi. Jehova i gat bikpela savetingting, long wanem, em i save long olgeta samting i kamap long bipo, na tu, ol samting bai kamap bihain. Na God i bin wokim yumi ol man, olsem na Em i save long ol samting i gutpela bilong helpim yumi.

God Jehova i kirapim ol man i raitim Baibel long kamapim tingting bilong Em. Baibel i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—Aisaia 48:17, 18.

God i gat olgeta strong, na em i save amamas long yusim strong bilong em long helpim yumi. Baibel i mekim ol tok bilong soim olsem God i laikim tru yumi olsem papa i laikim tru ol pikinini bilong em na em i laik helpim yumi. Baibel i tok: “Papa long heven bai givim holi spirit long ol man i askim em!” (Luk 11:13) Holi spirit em dispela strong bilong God i save stiaim na strongim yumi.

Yu inap kisim helpim long God olsem wanem? Baibel i tok: “Man i laik i go klostu long God em i mas bilip olsem God i stap na God i save givim gutpela pe long ol man i wok strong long painim em.” (Hibru 11:6) Bilong bilip tru olsem God i stap, yu yet i mas kisim sampela save moa.

YU LAIK KISIM SAMPELA SAVE MOA?

Em tru olsem yu mas lusim bikpela haptaim long kisim save long tok i tru bilong God, tasol taim yu mekim olsem gutpela samting bai painim yu. Tingim ekspiriens bilong Xiujin Xiao, em i bon long Saina na nau em i stap long Amerika. Em i tok: “Mi bilip long evolusen, tasol mi gat planti askim long Baibel. Na dispela i kirapim mi long stadi long Baibel wantaim ol Witnes Bilong Jehova. Long laspela yia bilong mi long kolis mi bisi tru, olsem na mi lusim liklik haptaim long kisim save long Baibel. Tasol mi no stap amamas. Taim mi kirap long givim bel long stadi long Baibel, nau bel bilong mi i stap isi na mi amamas.”

Yu laik kisim sampela save moa long Krieta bilong yumi, em God Jehova? I gutpela yu lusim sampela haptaim long kisim sampela save moa.

Baibel i Tok Wanem Long God?

Planti man i kirap nogut taim ol i kisim save long God long rot bilong Baibel.

Krieta bilong yumi em Man i stap tru na Em i gat ol pasin bilong em yet. Na tu, em i gat nem, nem bilong em Jehova.a—Aisaia 42:8, NW.
I no gat man i wokim God Jehova, Em i bilong i stap oltaim.—Song 93:2; Aisaia 40:28.
Sampela lotu i skulim ol man olsem God i mekim wok jas long hatpela pasin. Tasol tru tru God i as bilong pasin laikim.—1 Jon 4:8.
God i tingim tru ol man na Em i tokim ol long ol samting ol i mas mekim bilong i stap gut.—Saveman 12:13; Maika 6:8.

Baibel i no kamapim olgeta samting long God em yumi mas save long en. Baibel i tok yumi save long “liklik hap tasol bilong bikpela strong bilong God.”—Jop 26:14.

a Planti Baibel i yusim biknem “BIKPELA” bilong makim dispela tok Hibru YHWH. Long tok Inglis planti taim ol i tanim olsem “Jehovah” o “Yahweh.”

Kisim Sampela Save Moa

Dispela tupela buklet i kamapim klia olsem Krieta i stap na em i gat bikpela save.

The Origin of Life—Five Questions Worth Asking

Dispela buklet i stap long 47 tokples

Ol i kisim dispela hap tok long pes 12: “Bilip bilong evolusen i strongim dispela tok olsem ol samting i gat laip i kamap nating na God i no bin wokim ol dispela samting. Tasol ol saientis i mekim planti wok painimaut long ol samting i gat laip na ol i luksave olsem i gat Krieta i stap.”
Was Life Created?

Dispela buklet i stap long 80 tokples

Ol i kisim dispela hap tok long pes 24: “Planti man i tok saiens i no sapotim ol tok bilong Baibel olsem Krieta i wokim ol samting i gat laip. Tasol dispela em tingting ol saveman bilong lotu i gat long saiens. Ol wok painimaut bilong saiens i stret wantaim ol tok bilong Baibel.”