God Em I Husat?

1, 2. Planti taim ol man i laik save long wanem samting?

OL PIKININI i save givim planti askim. Ating yu stori long ol long wanpela samting, tasol ol bai askim, ‘Wai?’ Na taim yu traim bekim askim bilong ol, ating ol bai askim yet, ‘Tasol wai?’

² Maski yumi yangpela o lapun, yumi olgeta i save mekim ol askim. Ating yumi gat ol askim long wanem samting yumi bai kaikai o werim o wanem samting yumi bai baim. O ating yumi laik save i gat wanem as na yumi stap na wanem samting bai kamap long bihain. Tasol taim yumi no painim ol gutpela bekim bilong ol dispela askim, ating yumi no wok moa long painim bekim bilong ol.

3. Bilong wanem planti manmeri i ting olsem ol i no inap painim bekim bilong ol bikpela askim?

³ Olsem wanem? Baibel i bekim ol dispela bikpela askim yumi gat? Sampela manmeri i ting Baibel i bekim ol dispela askim, tasol ol i ting i hatwok long kliagut long ol tok bilong en. Ol i ting olsem ol pris o pasto na ol tisa i gat bekim bilong ol dispela askim. Na sampela i sem long tok olsem ol i no save long bekim bilong ol dispela askim. Tasol yu gat wanem tingting?

4, 5. Yu gat wanem ol bikpela askim? Bilong wanem yu mas wok long painim bekim bilong ol dispela askim?

⁴ Ating yu laik save long bekim bilong ol askim olsem: Yumi stap bilong mekim wanem? Wanem samting bai painim mi taim mi dai? Wanem ol pasin bilong God? Jisas, dispela Tisa i gat biknem i tok: “Wok yet long askim, na yupela bai kisim; wok yet long painim, na yupela bai lukim; wok yet long paitim dua, na dua bai op long yupela.” (Matyu 7:7) Olsem na no ken givap, wok yet long painim ol bekim em yu inap bilip long ol.

⁵ Yes, sapos yu “wok long painim” ol bekim bilong ol askim, yu inap painim ol insait long Baibel. (Provep 2:1-5) Ol dispela bekim i no hatwok long kliagut long en. Ol samting yu lainim bai helpim yu long i stap amamas nau na bilip na wet long ol gutpela samting bai kamap bihain. Orait yumi ken skelim wanpela askim em planti man i no kliagut long en.

GOD I SAVE TINGIM YUMI O EM I MAN NOGUT?

6. Bilong wanem sampela manmeri i ting God i no save tingim ol hevi i painim ol?

⁶ Planti man i ting olsem God i no save tingim yumi. Ol i ting olsem sapos God i tingim yumi, i stap bilong ol manmeri bilong graun bai narapela kain. Yumi lukim woa, pasin birua, na ol hevi long olgeta hap. Ol manmeri i save sik, karim pen, na dai. Sampela i tingting olsem, ‘Sapos God i tingim yumi, bilong wanem em i no mekim wanpela samting bilong pinisim olgeta dispela pen na hevi?’

7. (a) Long wanem rot ol bikman bilong lotu i skulim ol manmeri olsem God i save mekim nogut long ol man? (b) Bilong wanem yumi ken bilip tru olsem em i no asua bilong God na ol samting nogut i kamap?

⁷ Sampela taim ol bikman bilong lotu i save mekim ol manmeri i ting olsem God i save mekim nogut long ol man. Taim wanpela hevi i kamap, ol i save tok em laik bilong God. Ol i save tok em i laik bai dispela samting i kamap. Taim ol i tok olsem, ol i sutim tok long God olsem em asua bilong em. Tasol Baibel i kamapim klia olsem God i no as bilong ol pasin nogut. Jem 1:13 i tokim yumi olsem God i no save traim man long mekim pasin nogut. Dispela skripsa i tok: “Taim traim i painim wanpela man, em i no ken tok: ‘God i traim mi.’ Ol samting nogut i no inap traim God, na tu, God i no save traim man.” Dispela i makim olsem tru God i larim ol samting nogut i kamap, tasol em i no save mekim ol i kamap. (Ritim Jop 34:10-12.) Orait yumi skelim wanpela tok piksa.

8, 9. Bilong wanem i no stret long tok olsem God i as bilong ol hevi i painim yumi? Stori long dispela.

⁸ Tingim wanpela pikinini man i bikpela pinis na i stap yet wantaim papamama bilong em. Papa bilong em i laikim em tru na i skulim em long wokim ol gutpela disisen. Orait bihain, em i bikhet long papa bilong em na i lusim papa na famili bilong em. Em i mekim ol pasin nogut na hevi i bungim em. Olsem wanem? Bai yu sutim tok long papa bilong em long ol samting nogut i painim pikinini, long wanem, papa i no bin pasim em taim em i laik lusim famili? Nogat, a? (Luk 15:11-13) Olsem dispela papa, God i no bin pasim ol man em long laik bilong ol yet ol i bikhet na mekim pasin nogut. Olsem na taim wanpela hevi i kamap, yumi mas tingim olsem God i no mekim dispela samting i kamap. I no stret long tok God i as bilong ol hevi i painim ol man.

⁹ I gat as na God i no pasim yet ol samting nogut long kamap. Long Sapta 11 yu bai kisim save long tok Baibel i mekim long dispela samting. Tasol yu ken bilip tru olsem God i laikim yumi na em i no as bilong ol hevi i save painim yumi. Em dispela Man tasol inap long stretim ol hevi!—Aisaia 33:2.

10. Bilong wanem yumi ken bilip tru olsem God bai pinisim ol samting nogut em ol man nogut i bin kamapim?

¹⁰ God em i holi. (Aisaia 6:3) Olgeta samting em i save mekim i klin na i gutpela. Olsem na yumi ken bilip tru long em. Ol man i no olsem. Sampela taim ol i save mekim ol samting i no stret. Maski wanpela bikman bilong gavman i no save giaman, tasol em i no gat strong long stretim ol hevi ol man nogut i save kamapim. I no gat wanpela i gat olgeta strong olsem God i gat. Em inap stretim na em bai stretim ol samting em ol man nogut i bin kamapim. Em bai pinisim tru pasin nogut.—Ritim Song 37:9-11.

GOD I TING OLSEM WANEM TAIM HEVI I PAINIM OL MAN?

11. God i ting olsem wanem long pen na hevi yu karim?

¹¹ God i ting olsem wanem long ol samting i wok long kamap long graun na long ol samting i painim yu? Baibel i tok God “i save laikim stretpela pasin.” (Song 37:28) Olsem na em i tingim tru ol samting i stret na ol samting i no stret. Em i nolaik tru taim ol man i karim pen na hevi. Baibel i tok “bel bilong em i hevi tru” taim em i lukim pasin nogut i pulap long graun long bipo. (Stat 6:5, 6) Tingting bilong God i no senis. (Malakai 3:6) Baibel i tok olsem God i save wari tru long yupela.—Ritim 1 Pita 5:7.

12, 13. (a) Bilong wanem yumi laikim ol arapela na tingim ol? Yumi ting olsem wanem long ol pen na hevi i kamap long dispela graun? (b) Bilong wanem yumi ken bilip tru olsem God bai pinisim olgeta pen na hevi na pasin i no stret?

¹² Baibel i tok tu olsem God i wokim yumi man i olsem em yet. (Stat 1:26) Dispela i makim olsem God i wokim yumi na putim ol gutpela pasin wankain olsem bilong em long yumi tu. Olsem na taim yu lukim ol man i no gat asua i karim pen na hevi na yu pilim nogut long dispela, orait God tu i pilim nogut moa taim em i lukim ol dispela hevi! Olsem wanem yumi inap save long dispela?

¹³ Baibel i tok “God em i pasin laikim.” (1 Jon 4:8) Pasin laikim i as bilong olgeta samting God i save mekim. Yumi gat pasin laikim, long wanem, God i gat dispela pasin. Tingim dispela samting: Sapos yu gat strong long pinisim olgeta pen na hevi na pasin i no stret long dispela graun, bai yu mekim? Yes, bai yu mekim, long wanem, yu laikim ol man. Olsem wanem long God? God i gat strong, na em i laikim yumi, olsem na em bai pinisim olgeta pen na hevi na pasin i no stret. Yu ken bilip tru olsem olgeta tok promis bilong God i stap long kirap bilong dispela buk bai kamap tru! Tasol bilong yu ken bilip long ol dispela tok promis, yu mas kisim sampela save moa long God.

GOD I LAIK BAI YU SAVE LONG EM

14. Wanem nem bilong God? Bilong wanem yumi mas yusim dispela nem?

¹⁴ Sapos yu laik kamap pren bilong wanpela man, wanem namba 1 samting yu bai tokim em? Nem bilong yu, a? Yu ting God i gat nem? Planti lotu i tok God o Bikpela em i nem bilong em, tasol ol dispela tok i no nem bilong em. Ol i biknem tasol, olsem “king” na “presiden.” God i tokim yumi long nem bilong em, em Jehova. Buk Song 83:18 i tok: “Ol manmeri i ken save olsem yu, nem bilong yu, Jehova, yu wanpela tasol yu God Antap Tru na yu bosim olgeta hap bilong graun.” Ol man i bin raitim tok bilong Baibel ol i bin mekim wok long nem bilong em planti tausen taim. Jehova i laik bai yu save long nem bilong em na yusim dispela nem. Em i tokim yu long nem bilong em na bai yu ken kamap pren bilong em.

15. Wanem mining bilong nem bilong Jehova?

¹⁵ Nem bilong God, em Jehova, i gat bikpela insait bilong en. Em i makim olsem em i ken inapim olgeta tok promis em i mekim na em i ken kamapim olgeta samting em i tingting pinis long mekim. I no gat wanpela samting bai pasim em. Jehova wanpela tasol i ken i gat dispela nem.a

16, 17. Wanem mining bilong (a) “God i Gat Olgeta Strong”? (b) “King bilong oltaim oltaim”? (c) “Man Bilong Wokim olgeta samting”?

¹⁶ Olsem yumi ritim pinis, Buk Song 83:18 i tok long Jehova olsem: “Yu wanpela tasol yu God Antap Tru.” Na tu, Buk Revelesen 15:3 i tok: “Jehova God, yu God i Gat Olgeta Strong, ol wok bilong yu i bikpela na i gutpela tru. Yu King bilong oltaim oltaim, olgeta pasin bilong yu i stretpela na i tru olgeta.” Wanem mining bilong dispela biknem “God i Gat Olgeta Strong”? Em i makim olsem Jehova i gat bikpela strong moa winim olgeta samting long heven na graun. Na dispela biknem “King bilong oltaim oltaim” i makim olsem em i bin stap oltaim. Buk Song 90:2 i kamapim klia olsem em i bilong oltaim oltaim. Man! Dispela em i narakain tru!

¹⁷ Jehova wanpela tasol em i Man Bilong Wokim olgeta samting. Revelesen 4:11 i tok: “Jehova, yu God bilong mipela, i stret tru long yu kisim glori na ona na strong, long wanem, yu bin wokim olgeta samting. Na long laik bilong yu yet yu bin wokim ol na ol i stap.” Yes, olgeta samting yu ken tingim, ol ensel long heven, ol sta i stap long skai, ol prut i kamap long ol diwai, ol pis i stap long solwara, Jehova i wokim olgeta bilong ol!

YU INAP KAMAP PREN BILONG JEHOVA?

18. Bilong wanem sampela man i ting ol i no inap kamap pren bilong God? Baibel i tok wanem long dispela samting?

¹⁸ Taim sampela man i ritim stori long ol narakain pasin bilong Jehova, ol i pret na ol i ting olsem ‘God i gat bikpela strong, na em i bikpela man, na em i antap tumas, bilong wanem na em bai tingim mi?’ Tasol yu ting God i laik bai yumi gat dispela kain tingting? Nogat tru. Jehova i laik i stap klostu long yumi. Baibel i tok God “i no stap longwe long yumi olgeta wan wan.” (Aposel 17:27) God i laik bai yu go klostu long em, na em i tok promis olsem ‘em bai kam klostu long yu.’—Jems 4:8.

19. (a) Olsem wanem yu inap kamap pren bilong God? (b) Yu laikim tru wanem pasin bilong Jehova?

¹⁹ Olsem wanem yu inap kamap pren bilong God? Jisas i tok: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.” (Jon 17:3) Wok yet long kisim save na bai yu save long Jehova na Jisas. Na bai yu kisim laip oltaim. Olsem, yumi kisim save pinis olsem “God em i pasin laikim.” (1 Jon 4:16) Tasol em i gat planti narapela gutpela pasin tu. Baibel i tokim yumi olsem Jehova “i gat pasin marimari na pasin sori, em i no save belhat kwik na i pulap tru long gutpela pasin laikim na pasin i tru.” (Kisim Bek 34:6) Jehova i ‘gutpela tru na i redi long fogivim ol sin.’ (Song 86:5) God i no save les kwik na em i save stap gut long narapela. (2 Pita 3:9; Revelesen 15:4) Yu bai kisim save moa long ol gutpela pasin bilong em taim yu ritim Baibel.

20-22. (a) Olsem wanem yu inap i go klostu long God sapos yu no inap lukim em? (b) Yu mas mekim wanem sapos sampela i laik pasim yu long stadi long Baibel?

²⁰ Olsem wanem yu inap go klostu long God sapos yu no inap lukim em? (Jon 1:18; 4:24; 1 Timoti 1:17) Taim yu ritim Baibel na kisim save long Jehova, yu bai save gut long em olsem wanpela Man i stap tru. (Song 27:4; Rom 1:20) Taim yu kisim save moa long Jehova, yu bai laikim em moa na yu bai i go klostu long em.

²¹ Yu bai kliagut olsem Jehova em i Papa bilong yumi. (Matyu 6:9) Em i givim yumi laip, na tu, em i laik bai yumi stap gut. Gutpela papa i laik bai ol pikinini bilong em i stap gut olsem. (Song 36:9) Yes, Baibel i tok yu inap kamap pren bilong Jehova. (Jems 2:23) Tingim, Jehova, Man Bilong Wokim heven na graun i laik yu kamap pren bilong em!

²² Ating sampela i laik bai yu stop long stadi long Baibel. Ating ol i ting olsem yu bai senisim lotu bilong yu. Tasol no ken larim wanpela i stopim yu long kamap pren bilong Jehova. Em i nambawan gutpela Pren yu inap kisim.

23, 24. (a) Bilong wanem yu mas wok yet long mekim ol askim? (b) Yumi bai skelim wanem samting long neks sapta?

²³ Taim yu stadi long Baibel, bai yu no kliagut long sampela tok. Yu no ken sem long givim ol askim o askim wanpela long helpim yu. Jisas i tok yumi mas i gat pasin daun olsem ol liklik pikinini. (Matyu 18:2-4) Ol pikinini i save givim planti askim. God i laik bai yu painim ol bekim. Olsem na yu mas stadi gut long Baibel na bai yu ken save samting yu wok long lainim em i tru o nogat.—Ritim Aposel 17:11.

²⁴ Nambawan rot bilong kisim save long Jehova em long stadi long Baibel. Long neks sapta bai yumi kisim save long wai na Baibel i narapela kain long olgeta narapela buk.