Kisim Skul Long Tok Bilong God

Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. God em i husat?

God tru em Man Bilong Wokim olgeta samting. Baibel i kolim em olsem “King bilong oltaim oltaim,” na dispela i makim olsem em i no gat kirap bilong en na em bai i no gat pinis bilong en. (Revelesen 15:⁠3) God em i As bilong laip, olsem na yumi mas lotuim em wanpela tasol.​—⁠Ritim Revelesen 4:⁠11.

2. God i gat wanem kain pasin?

I no gat wanpela man i bin lukim God, long wanem, em i wanpela Spirit. Em i no gat bodi olsem ol man bilong graun. (Jon 1:18; 4:24) Ol samting God i wokim i kamapim long ples klia ol pasin bilong em. Olsem, taim yumi lukim olkain gutpela prut na plaua samting, yumi kisim save long pasin laikim na savetingting bilong God. Ples antap na graun em i bikpela tru na dispela i soim yumi strong bilong God.​—⁠Ritim Rom 1:⁠20.

Yumi inap kisim sampela save moa long ol pasin bilong God long Baibel. Olsem, Baibel i tokim yumi long ol samting em i laikim na ol samting em i no laikim, pasin em i mekim long ol manmeri, na ol samting em i mekim taim ol narapela narapela samting i kamap.​—⁠Ritim Song 103:​7-10.

3. Yu ting God i gat nem?

Jisas i tok: “Papa bilong mipela long heven, nem bilong yu i mas i stap holi.” (Matyu 6:⁠9) Maski God i gat planti biknem, em i gat wanpela nem tasol. Long olgeta wan wan tokples i gat narapela narapela pasin bilong kolim dispela nem. Long Tok Pisin yumi save kolim “Jehova” o sampela taim “Yawe.”​—⁠Ritim Kisim Bek 3:​15, futnot.

Planti Baibel i rausim nem bilong God na putim Bikpela o God. Tasol taim ol i bin raitim Baibel long bipo, nem bilong God i stap inap olsem 7,000 taim. Jisas i kamapim nem bilong God taim em i skulim ol manmeri long Tok Bilong God. Em i helpim ol manmeri long kisim save long God.​—⁠Ritim Jon 17:⁠26.

4. Yu ting Jehova i save tingim yumi?

Jehova yet i save harim beten bilong yumi, na dispela i soim olsem em i tingim tru yumi. (Song 65:⁠2) Olsem wanem? Ol pen na hevi i stap nau i makim olsem God i no tingim yumi? Sampela man i tok olsem God i larim ol pen na hevi i painim yumi bilong traim yumi, tasol dispela em i no tru. Baibel i tok: “God I Gat Olgeta Strong i no inap mekim pasin nogut. Nogat tru.”​—⁠Jop 34:10; ritim Jems 1:⁠13.

God i larim yumi man yet long makim wanem samting yumi laik mekim. Olsem wanem? Yumi amamas long i stap fri bilong makim olsem yumi laik lotuim God? (Josua 24:15) Planti pen na hevi i stap, long wanem, planti man i save mekim ol pasin nogut long ol narapela. Jehova i bel hevi long lukim kain pasin i no stret.​—⁠Ritim Stat 6:​5, 6.

Klostu nau, long rot bilong Jisas, Jehova bai pinisim pen na hevi, na ol manmeri husat i save mekim ol dispela pasin. Tasol inap sampela haptaim Jehova i larim pen na hevi i stap. Stori i kamap bihain long dispela bai kamapim klia as na God i larim pen na hevi i stap.​—⁠Ritim Aisaia 11:⁠4.

5. God i laik yumi mas mekim wanem?

Jehova i wokim yumi na yumi inap kisim save long em na laikim em. Em i laik yumi mas kisim stretpela save long em. (1 Timoti 2:⁠4) Taim yumi stadi long Baibel, yumi inap kisim save long God olsem wanpela Pren bilong yumi.​—⁠Ritim Sindaun 2:​4, 5.

Jehova i bin givim laip long yumi, olsem na yumi mas laikim em moa yet winim ol narapela. Yumi ken soim olsem yumi laikim tru God long rot bilong toktok wantaim em long beten na mekim ol samting em i laik yumi mas mekim. (Sindaun 15:⁠8) Jehova i laik yumi mas laikim ol narapela na mekim gut long ol.​—⁠Ritim Mak 12:​29, 30; 1 Jon 5:⁠3.

Bilong kisim sampela save moa, lukim sapta 1 bilong dispela buk, em ol Witnes Bilong Jehova i wokim. Tru Tru BAIBEL I TOK WANEM?

[Piksa long pes 17]

Yu ting i gat as bilong larim pen na hevi i stap inap sampela haptaim?