Stretpela Save Long God na Krais

God Em i Husat?

Wanem Nem Bilong God? God yet i tok: “Mi Jehova. Dispela em nem bilong mi.” (Aisaia 42:8) Nem bilong God i stap klostu 7,000 taim long Baibel. Tasol planti Baibel i rausim dispela nem na putim biknem, olsem “Bikpela.” God i laik bai yu stap pren bilong em, olsem na em i kirapim yu long “singaut long nem bilong em.”—Buk Song 105:1.

Ol Biknem Bilong Jehova. Baibel i kolim ol biknem long Jehova olsem “God,” “God i Gat Olgeta Strong,” “Krieta,” “Papa,” “Bikpela,” na “Nambawan Bikpela.” Long Baibel i gat planti beten em ol i kolim tupela nem wantaim, wanpela biknem bilong soim rispek long em na nem bilong em, Jehova.—Daniel 9:4.

God i Wanem Kain Man? God em i spirit na yumi no inap lukim em. (Jon 4:24) Baibel i strongim dispela tok olsem “i no gat wanpela man i bin lukim God.” (Jon 1:18) Baibel i kamapim filings bilong em. Ol man inap mekim em i bel hevi, o ol inap “givim amamas long em.”—Provep 11:20; Buk Song 78:40, 41.

Ol Gutpela Pasin Bilong God. God i save mekim wankain pasin long ol man bilong olgeta kantri na bekgraun. (Aposel 10:34, 35) Na tu, em “i gat pasin marimari na pasin sori, em i no save belhat kwik na i pulap tru long gutpela pasin laikim na pasin i tru.” (Kisim Bek 34:6, 7) Tasol moa yet yumi laikim fopela bikpela pasin bilong God.

Bikpela Strong. Em i “God i Gat Olgeta Strong,” na strong bilong em i no gat mak bilong en, em inap mekim olgeta samting em i promis long en.—Stat 17:1.

Savetingting. Savetingting bilong God i winim olgeta man. Olsem na Baibel i tok em “wanpela tasol i gat savetingting.”—Rom 16:27.

Stretpela Pasin. Oltaim God i save mekim stretpela pasin. Olgeta samting em i mekim i “gutpela olgeta” na “oltaim em i save mekim pasin i fea.”—Lo 32:4.

Pasin Laikim. Baibel i tok “God em i pasin laikim.” (1 Jon 4:8) God i no kamapim tasol dispela pasin—em i pasin laikim. Bikpela pasin laikim bilong em i stiaim olgeta samting em i mekim, na dispela i helpim yumi long planti rot.

Pasin Pren Bilong God Wantaim Ol Man. God em Papa bilong yumi long heven i gat pasin laikim. (Matyu 6:9) Sapos yumi bilip long em, yumi inap kamap pren bilong em. (Buk Song 25:14) God i singautim yumi long go klostu long em long beten na “putim olgeta hevi . . . long han bilong em” bikos em “i save wari” long yumi.—1 Pita 5:7; Jems 4:8.

Hau God na Krais i Narapela Narapela?

Jisas i No God. Jisas i narapela kain—em i samting God yet i bin wokim. Em risen na Baibel i kolim em Pikinini Bilong God. (Jon 1:14) Bihain long Jehova i wokim Jisas, em i makim fesbon bilong em olsem “wanpela saveman bilong wok,” na em i wokim olgeta narapela samting na ol man.—Provep 8:30, 31; Kolosi 1:15, 16.

I no gat wanpela taim Jisas Krais i tok em i God. Em i tok: “Mi mausman bilong [God], na dispela Man i bin salim mi i kam.” (Jon 7:29) Taim Jisas i toktok long wanpela bilong ol disaipel bilong em, em i kolim Jehova olsem “Papa bilong mi na Papa bilong yupela na God bilong mi na God bilong yupela.” (Jon 20:17) Bihain long Jisas i dai, Jehova i kirapim bek em na em i kisim laip long heven na God i givim em bikpela namba na em i sindaun long rait sait bilong God.—Matyu 28:18; Aposel 2:32, 33.

Jisas Krais Inap Helpim Yu Long Go Klostu Long God

Jisas i kam long graun long skulim yumi long Papa bilong em. Jehova yet i tok long Jisas: “Dispela em i Pikinini bilong mi, mi laikim em tumas. Harim tok bilong em.” (Mak 9:7) Jisas i save gut long God winim ol narapela. Em i tok: “I no gat wanpela man i save gut long Papa, nogat, Pikinini tasol i save, na man em Pikinini i gat laik long soim Papa long em, em tasol i save.”—Luk 10:22.

Jisas i kamapim gut ol pasin bilong God. Jisas i bihainim gut ol pasin bilong Papa bilong em, olsem na em inap tok: “Man i lukim mi, em i lukim Papa tu.” (Jon 14:9) Jisas i kirapim ol man long i go klostu long God taim em i kamapim pasin laikim bilong Papa bilong em long rot bilong ol tok na pasin bilong em. Em i tok: “Mi yet mi rot na tok i tru na laip. I no gat man inap kam long Papa long narapela rot, nogat, long rot bilong mi tasol.” (Jon 14:6) Na tu, em i tok: “Ol man i lotu tru long Papa, ol bai lotuim em long spirit na long pasin i tru. Tru tumas, Papa i painim ol kain man olsem long lotuim em.” (Jon 4:23) Tingim! Jehova i painim ol man olsem yu, em ol i laik kisim stretpela save long em.