Bilong Wanem Yumi Mas Bihainim Krais?
“Sapos wanpela man i laik bihainim mi, orait em i mas daunim laik bilong em yet, . . . na em i mas bihainim mi.”—LU. 9:23.
1, 2. Bilong wanem em i bikpela samting long yumi tingim as na yumi mas bihainim Krais?
JEHOVA i amamas tru long lukim yupela ol nupela lain na ol yangpela i bung wantaim lain bilong em hia long graun bilong lotuim em! Taim yupela i wok yet long stadi long Baibel, kam oltaim long ol miting Kristen, na save gut moa long ol tok i tru i stap long Baibel, yupela i mas tingim tru singaut bilong Jisas, olsem: “Sapos wanpela man i laik bihainim mi, orait em i mas daunim laik bilong em yet, na em i mas karim diwai [“pos,” NW] bilong en long olgeta de, na em i mas bihainim mi.” (Lu. 9:23) Jisas i tok yu mas i gat laik long daunim laik bilong yu yet na bihainim em. Olsem na em i bikpela samting long yumi mas skelim i gat wanem as na yumi mas bihainim Krais, olsem “man God i bin makim.”—Mt. 16:13-16.
2 Olsem wanem long yumi ol lain i kirap pinis long bihainim lek mak bilong Jisas Krais? Baibel i kirapim yumi long ‘mekim dispela pasin moa moa yet.’ (1 Te. 4:1, 2) Maski yumi bin kisim tok i tru long nau o long planti yia i go pinis, pasin bilong tingim i gat wanem as na yumi laik bihainim Krais, dispela bai helpim yumi long bihainim tok bilong Pol na bihainim Krais moa yet long olgeta wokabaut bilong yumi. Orait nau yumi ken skelim 5-pela as na yumi mas i gat laik long bihainim Krais.
Pas Gut Moa Wantaim Jehova
3. Long wanem tupela rot yumi inap kisim save long Jehova?
3 Taim aposel Pol i “sanap namel long ol kaunsil long maunten Areopagus” na i toktok long ol Atens, em i tok: “[God] yet i bin makim taim bilong ol i ken i stap, na em i bin putim mak bilong graun bilong ol. God i laik bai ol manmeri i ken kam long em na save tru long em, olsem na em i putim ol i stap, bai ol i ken wok long painim em. Tasol em i no i stap longwe long yumi olgeta wan wan.” (Ap. 17:22, 26, 27) Yumi inap painim God na save gut long em. Olsem, taim yumi lukim na tingim tingim ol samting God i bin wokim, yumi inap kisim bikpela save long ol pasin bilong God na long save bilong em long mekim ol samting. (Ro. 1:20) Na tu, Jehova i bin kamapim klia ol pasin bilong em long Tok bilong em, em Baibel. (2 Ti. 3:16, 17) Taim yumi ‘tingting long olgeta samting em i bin mekim’ na ‘tingim ol strongpela wok em i bin mekim,’ bai yumi save gut moa long Jehova.—Sng. 77:12.
4. Olsem wanem pasin bilong bihainim Krais inap helpim yumi long pas gut moa wantaim Jehova?
4 Wanpela gutpela rot bilong save gut moa long Jehova na pas gut wantaim em, em long rot bilong bihainim Krais. Tingim bikpela biknem Jisas i gat taim em i stap wantaim Papa bilong em “taim graun i no kamap yet”! (Jo. 17:5) Em i “as bilong olgeta samting God i bin wokim.” (KTH 3:14) Em i “fesbon bilong olgeta samting God i bin wokim,” olsem na em i bin stap longpela taim tru long heven wantaim Papa bilong em, Jehova. Taim Jisas i no kamap man yet long graun, em i no bin stap nating tasol wantaim Papa bilong em, nogat, em i bin mekim ol samting. Em i poroman bilong God, em i amamas long wok wantaim God i Gat Olgeta Strong, na tupela i pas gut tru wantaim. Jisas i lukim pasin bilong Papa long mekim ol samting, em i luksave long ol bikpela pasin na tingting bilong Em, na em i tingim tingim na bihainim olgeta samting em i lainim long Papa bilong em. Dispela samting i mekim na dispela Pikinini i kamap wankain olsem Papa—olsem na Baibel i tok Jisas em i “piksa tru bilong dispela God ol man i no inap lukim.” (Kl. 1:15, NW) Taim yumi bihainim gut Krais, yumi inap pas gut moa wantaim Jehova.
Bihainim Moa Yet Pasin Bilong Jehova
5. Wanem samting bai helpim yumi long bihainim Jehova moa yet? Bilong wanem i olsem?
5 God i wokim yumi ‘i kamap olsem em yet,’ bambai yumi inap kamapim ol pasin bilong God. (Stt. 1:26) Aposel Pol i tokim ol Kristen olsem ‘ol i stap pikinini bilong God, olsem na ol i mas bihainim ol pasin em yet i save mekim.’ (Ef. 5:1) Pasin bilong bihainim Krais i helpim yumi long bihainim pasin bilong Papa bilong yumi long heven. Dispela i olsem, long wanem, Jisas i kamapim gut tru ol pasin na ol tingting bilong God, na em i skulim yumi gut long Jehova, winim olgeta narapela man. Taim Jisas i stap long graun, em i no tokaut tasol long nem bilong Jehova. Nogat. Em i kamapim ples klia ol pasin bilong God. (Ritim Matyu 11:27.) Jisas i mekim olsem long rot bilong ol tok na wok bilong em, na long rot bilong ol tok em i skulim ol man long en na pasin bilong em yet.
6. Ol tok Jisas i skulim ol man long en i kamapim klia wanem ol laik na tingting bilong Jehova?
6 Long rot bilong ol tok em i skulim ol man long en, Jisas i kamapim klia ol samting God i laik bai yumi mas mekim na tingting em i gat long ol man i lotuim em. (Mt. 22:36-40; Lu. 12:6, 7; 15:4-7) Olsem, taim em i kolim tok bilong wanpela bilong ol Tenpela Lo—“yupela i no ken mekim pasin pamuk”—Jisas i kamapim tingting bilong God long samting i kamap insait long bel bilong man paslain tru long em i mekim pasin pamuk. Em i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Kis. 20:14; Mt. 5:27, 28) Jisas i kamapim pasin bilong ol Farisi long kolim wanpela tok bilong Lo, olsem “yu mas laikim tru ol wantok, na yu mas bel nogut long ol birua bilong yu.” Na bihain long en, Jisas i tokaut long tingting bilong Jehova, olsem: “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.” (Mt. 5:43, 44; Kis. 23:4; Wkp. 19:18) Taim yumi save long ol tingting tru bilong God na ol samting em i laik bai yumi mas mekim, dispela i helpim yumi long bihainim moa yet pasin bilong em.
7, 8. Yumi kisim wanem save long Jehova long rot bilong pasin bilong Jisas?
7 Long rot bilong ol pasin bilong em, Jisas i kamapim klia Papa bilong em i wanem kain. Taim yumi ritim ol Gutnius i stori long pasin bilong Jisas long sori long ol man i sot long ol samting, pilim hevi bilong ol man i karim pen, na tok strong long ol disaipel bilong em i krosim ol pikinini, orait bai yumi ken luksave olsem Papa i pilim wankain. (Mk. 1:40-42; 10:13, 14; Jo. 11:32-35) Tingim olsem wanem ol samting Jisas i mekim i kamapim klia ol bikpela pasin bilong God. Ol mirakel Krais i mekim i soim bikpela strong bilong em. Tasol em i no yusim dispela strong bilong inapim ol laik bilong em yet o bilong bagarapim ol narapela. Nogat. (Lu. 4:1-4) Taim em i rausim ol gridi bisnisman long tempel, dispela i kamapim klia olsem em i nolaik tru long pasin i no stret! (Mk. 11:15-17; Jo. 2:13-16) Em i skulim ol man na i mekim ol gutpela tok bambai ol man i ken pilim ol tok long bel, na dispela i soim olsem savetingting bilong em i “winim tru [savetingting bilong] Solomon.” (Mt. 12:42) Baibel i mekim naispela tok long pasin laikim em Jisas i kamapim taim em i givim laip bilong em bilong helpim ol narapela. Baibel i tok: “Dispela pasin bilong laikim ol arapela i winim tru ol arapela pasin bilong laikim ol arapela manmeri.”—Jo. 15:13.
8 Long olgeta tok na pasin em Pikinini Bilong God i mekim em i makim stret Jehova, olsem na em inap tok: “Man i lukim mi, em i lukim Papa.” (Ritim Jon 14:9-11.) Yumi mas bihainim Krais bambai yumi ken bihainim pasin bilong Jehova.
Jisas Em Man Jehova i Makim
9. Long wanem taim na olsem wanem Jisas i kamap Man God i Makim?
9 Tingim samting i bin kamap long Oktoba samting long 29 C.E., taim Jisas i gat 30 krismas na em i kam long Jon Bilong Baptais. Baibel i tok: “Jisas i kisim baptais pinis, na kwiktaim em i lusim wara na i kam antap. Na heven i op, na em i lukim Spirit bilong God i kam daun olsem wanpela bilong ol dispela kain pisin ol i kolim balus, na i kam i stap long em.” Long dispela taim, em i kamap Krais o Mesaia. Long dispela taim, Jehova yet i tokaut olsem Jisas em i dispela Man em i makim. Em i tok: “Dispela em i Pikinini bilong mi. Mi laikim em tumas. Bel bilong mi em i amamas long em.” (Mt. 3:13-17) Dispela i wanpela gutpela as na yumi laik bihainim Krais!
10, 11. (a) Olsem wanem Baibel i yusim dispela tok “Krais” long Jisas? (b) Bilong wanem yumi mas bihainim Jisas Krais?
10 Baibel i yusim dispela tok “Krais” long narapela narapela rot bilong makim Jisas, olsem Jisas Krais, Krais Jisas, na Krais. Jisas yet i kolim pastaim dispela tok “Jisas Krais”—nem i stap paslain long biknem. Taim em i beten long Papa, em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jo. 17:3) Dispela i kirapim yumi long tingim man God i bin salim na em i kamap Man God i Makim. Taim biknem i stap paslain long nem, olsem “Krais Jisas,” dispela i kirapim yumi long tingim namba, o wok, Jisas i holim. (2 Ko. 4:5) Taim Baibel i kolim Krais tasol na i no kolim nem bilong em Jisas, dispela em i narapela rot bilong kamapim klia wok Jisas i mekim olsem Mesaia.—Ap. 5:42, NW.
11 Maski Baibel i yusim dispela biknem “Krais” olsem wanem long Jisas, em i kamapim klia dispela bikpela tok i tru: Pikinini Bilong God i bin kam long graun olsem wanpela man na em i tokaut long laik bilong Papa bilong em, tasol em i no wanpela man nating o wanpela profet tasol, nogat; em i kam bilong kamap Man Jehova i Makim. Yumi mas bihainim dispela Man.
Jisas Tasol i Rot Bilong Kisim Bek Yumi
12. Jisas i tok wanem long aposel Tomas, em dispela tok i gat mining long yumi?
12 Tok Jisas i mekim long ol gutpela aposel bilong em inap sampela aua tasol paslain long em i dai, i kamapim narapela as na yumi mas wok yet long bihainim Mesaia. Jisas i tokim ol olsem em bai lusim ol na i go redim ples bilong ol. Bilong bekim askim Tomas i mekim long dispela samting, Jisas i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jo. 14:1-6) Long dispela taim Jisas i toktok long 11-pela gutpela aposel. Em i tok promis long ol bai stap long heven, tasol tok bilong em i gat mining tu long ol lain i wet long kisim laip oltaim long graun. (KTH 7:9, 10; 21:1-4) Bilong wanem i olsem?
13. Olsem wanem Jisas em i “rot”?
13 Jisas Krais em i “rot.” Long rot bilong em tasol yumi inap go klostu long God. Dispela i tru long ol samting bilong beten, long wanem, long rot bilong Jisas tasol yumi ken save olsem Papa bai givim yumi ol samting yumi askim em na i stret wantaim laik bilong Em. (Jo. 15:16) Tasol Jisas em i “rot” long wanpela narapela samting tu. Sin i mekim na ol lain manmeri i stap longwe long God. (Ais. 59:2) Jisas i givim “laip bilong em bilong baim bek planti manmeri.” (Mt. 20:28) Olsem na Baibel i tok: “Blut bilong Jisas . . . i save rausim olgeta sin bilong yumi na yumi kamap klin.” (1 Jo. 1:7) Pikinini i bin opim rot long yumi ken kamap wanbel wantaim God. (Ro. 5:8-10) Yumi mas bilip long Jisas na bihainim em, long dispela rot yumi inap i stap gut long ai bilong God.—Jo. 3:36.
14. Olsem wanem Jisas em i “as bilong tok tru”?
14 Jisas em i “as bilong tok tru,” long wanem, oltaim em i tokaut long tok i tru na i bihainim tok i tru, na tu, olgeta tok profet ol i bin raitim long Mesaia—em ol i planti tru—ol i kamap tru long em. Aposel Pol i tok: “I gat planti promis bilong God i stap, na Krais i save tok ‘Yes’ long dispela olgeta promis.” (2 Ko. 1:20) Na tu, Krais Jisas i kamap truim bilong ‘piksa bilong ol gutpela samting i laik kamap bihain’ em Lo Bilong Moses i stori long en. (Hi. 10:1; Kl. 2:17) Jisas em i dispela man olgeta tok profet i tok long en, na ol i kamapim klia bikpela wok Jisas bai mekim bambai ol samting Jehova i tingting pinis long mekim i ken kamap. (KTH 19:10) Bilong kisim ol gutpela samting God i tingting pinis long givim long yumi, yumi mas bihainim Mesaia.
15. Olsem wanem Jisas em i “as bilong laip”?
15 Jisas em i “as bilong laip,” long wanem, em i bin baim ol manmeri long blut bilong em, na laip oltaim em i presen God i givim long rot bilong “wok bilong Jisas Krais, Bikpela bilong yumi.” (Ro. 6:23) Na tu, Jisas em i “as bilong laip” long ol manmeri i dai pinis. (Jo. 5:28, 29) Tingim tu ol samting em bai mekim taim em i stap hetpris long Taim Bilong Wan Tausen Yia Bilong Krais i Stap King. Yes, ol manmeri i stap long graun aninit long wok king bilong em, em bai kisim bek ol long sin na dai!—Hi. 9:11, 12, 28.
16. I gat wanem as na yumi mas bihainim Jisas?
16 Bekim Jisas i givim long Tomas i gat bikpela mining long yumi. Jisas em i rot, as bilong tok tru, na as bilong laip. Em i dispela man God i bin salim i kam long graun bilong kisim bek ol manmeri. (Jo. 3:17) Na long rot bilong em tasol ol man inap go long Papa. Baibel i tok klia: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.” (Ap. 4:12) Olsem na maski yumi bin bilip long wanem samting long bipo, em i savetingting long yumi bilip long Jisas, bihainim em, na long dispela rot yumi ken kisim laip.—Jo. 20:31.
God i Tokim Yumi Long Harim Tok Bilong Krais
17. Bilong wanem em i bikpela samting long yumi putim yau long tok bilong Pikinini Bilong God?
17 Pita, Jon, na Jems i lukim bodi bilong Jisas i kamap narakain. Long dispela taim, ol i harim nek i kam long heven na i tok: “Dispela em i Pikinini bilong mi. Mi makim em pinis bilong mekim wok bilong mi. Yupela harim tok bilong em.” (Lu. 9:28, 29, 35) Em i bikpela samting tru long yumi bihainim dispela tok olsem yumi mas putim yau long tok bilong Mesaia.—Ritim Aposel 3:22, 23.
18. Olsem wanem yumi inap harim tok bilong Jisas Krais?
18 Bilong harim tok bilong Jisas, yumi mas ‘lukluk i go long Jisas, na tingim gut pasin bilong em.’ (Hi. 12:2, 3) Olsem na i gutpela yumi “holim strong long tingting” ol stori bilong Jisas yumi ritim long Baibel na long ol buk na nius em “wokboi i gat gutpela tingting” i kamapim, na ol tok i kamap long ol miting Kristen i stori long Jisas. (Hi. 2:1; Mt. 24:45) Yumi ol sipsip bilong Jisas, olsem na yumi mas givim bel long harim tok bilong em na bihainim em.—Jo. 10:27.
19. Wanem samting bai helpim yumi long wok yet long bihainim Krais?
19 Olsem wanem? Yumi inap wok yet long bihainim Krais, maski wanem ol hevi i painim yumi? Yes, yumi inap, sapos yumi “tingim gut ol dispela gutpela tok” na bihainim save yumi kisim na “bilip strong long Krais Jisas na givim bel bilong [yumi] long em.”—2 Ti. 1:13.
Yu Lainim Wanem Samting?
• Sapos yumi bihainim Krais, bilong wanem dispela i mekim na yumi pas gut moa wantaim Jehova?
• Bilong wanem yumi mas bihainim Jisas bambai yumi ken bihainim pasin bilong Jehova?
• Olsem wanem Jisas em i ‘rot, as bilong tok tru, na as bilong laip’?
• Bilong wanem yumi mas harim tok bilong Man Jehova i Makim?
[Piksa long pes 29]
Ol tok Jisas i lainim ol man long en i kamapim gutpela tingting bilong Jehova
[Piksa long pes 30]
Yumi mas bihainim Man Jehova i Makim
[Piksa long pes 32]
Jehova i tok: “Dispela em i Pikinini bilong mi . . . yupela harim tok bilong em”