Jisas Krais Em i Husat?

WANPELA yangpela man Juda nem bilong em Andru, em i amamas tru taim em i harim tok bilong Jisas bilong Nasaret long namba wan taim! Baibel i tok Andru i ran i go long brata bilong em na i tok: “Mipela i lukim pinis Mesaia [o Krais].” (Jon 1:41) Long tok Hibru na tok Grik dispela tok ol i tanim olsem “Mesaia” na “Krais,” i makim “Man God i Makim.” Jisas em dispela Man God i Makim​—⁠dispela Bikman em God i bin promis long salim i kam. (Aisaia 55:⁠4) Baibel i gat ol tok profet i makim em, na ol Juda long dispela taim i wetim em.​—⁠Luk 3:⁠15.

Olsem wanem yumi ken save tru olsem Jisas em dispela Man God i Makim? Orait yumi ken tingim samting i bin kamap long yia 29 C.E. taim Jisas i gat 30 krismas. Em i go long Jon Bilong Baptais bambai Jon i ken baptaisim em long wara Jordan. Baibel i tok: “Jisas i kisim baptais pinis, na kwiktaim em i lusim wara na i kam antap. Na heven i op, na em i lukim Spirit bilong God i kam daun olsem wanpela bilong ol dispela kain pisin ol i kolim balus, na i kam i stap long em. Na long heven wanpela maus i singaut olsem, ‘Dispela em i Pikinini bilong mi. Mi laikim em tumas. Bel bilong mi em i amamas long em.’ ” (Matyu 3:​16, 17) Taim Jon i harim dispela tok amamas, em i save Jisas em i dispela Man God i Makim. Taim God Jehova i kapsaitim holi spirit bilong em long Jisas, em i makim Jisas long kamap King long Kingdom bilong Em bai kamap bihain. Long dispela rot Jisas i kamap Jisas Krais, o Man God i Makim. Tasol olsem wanem Jisas em i Pikinini Bilong God? Em i bin kamap long wanem taim?

Em i Bin Kamap “Long Bipo Tru”

Yumi ken brukim i stap bilong Jisas i go 3-pela hap. Namba wan hap i bin kirap paslain long taim mama i bin karim em long graun. Maika 5:2 i tok, em i bin kamap “long bipo tru.” Jisas yet i tok: “Mi bilong antap”​—⁠em heven. (Jon 8:23) Em i bin i stap long heven olsem wanpela strongpela spirit.

Olgeta samting God i bin wokim i gat kirap bilong en, olsem na i gat haptaim we God wanpela tasol i bin i stap. Tasol long bipo bipo yet, God i kirap wokim ol samting. Em i bin wokim husat pastaim? Laspela buk bilong Baibel i tokaut olsem Jisas em i “as [“namba wan,” NW ] bilong olgeta samting God i bin wokim.” (KTH 3:14) “God i bin wokim em [Jisas] paslain long olgeta narapela samting.” Dispela tok i stret, “long wanem, long rot bilong em olgeta narapela samting i bin kamap long heven na long graun, ol samting yumi inap lukim na ol samting yumi no inap lukim.” (Kolosi 1:​15, 16, NW ) Em nau, Jisas tasol em samting God yet i bin wokim. Olsem na Baibel i tok: “God i gat wanpela Pikinini tasol i stap.” (Jon 3:16) Na dispela namba wan Pikinini i gat wanpela nem olsem “Tok.” (Jon 1:14) Bilong wanem? Long wanem, taim em i no kamap yet olsem man long graun, em i stap long heven na i mekim wok olsem mausman bilong God.

“Tok” i bin stap wantaim God Jehova long “bipo bipo tru,” taim God i bin wokim “skai na graun.” Em dispela man God i bin tokim em: “Nau yumi wokim ol manmeri bai ol i kamap olsem yumi yet.” (Jon 1:1; Stat 1:​1, 26) Namba wan Pikinini bilong God i bin stap na mekim wok wantaim Papa bilong em. Sindaun 8:​22-31 i makim em na i tok: “Mi stap wantaim [God] na em i makim mi olsem saveman i bosim wok. Olgeta de mi bin mekim em i amamas, long wanem, mi bin amamas tumas long lukim ol samting em i bin wokim.”

God Jehova na Pikinini bilong em i bin wok wantaim, olsem na yumi save tupela i save gut tru long narapela narapela! Pikinini Bilong God i bin stap planti milion milion yia wantaim Jehova, na dispela i stiaim tru ol tingting na pasin bilong em. Dispela Pikinini bilong harim tok i kamap wankain stret olsem Papa bilong em, Jehova. Olsem na Kolosi 1:15 (NW ) i tok Jisas “em i piksa tru bilong dispela God yumi no inap lukim.” Dispela em wanpela as na i bikpela samting long yumi mas kisim save long Jisas bilong inapim yumi long ol samting bilong spirit na bilong inapim laik bilong yumi long save gut long God. Olgeta samting Jisas i bin mekim long graun i stret tru wantaim ol samting Jehova i laik bai em i mas mekim. Olsem na taim yumi wok long kisim save long Jisas, yumi wok tu long kisim sampela save moa long Jehova. (Jon 8:28; 14:​8-10) Tasol olsem wanem Jisas i bin kam long graun?

Em i Stap Man Long Graun

Namba tu hap bilong i stap bilong Jisas i kirap long taim God i salim Pikinini bilong em i kam long graun. Jehova i mekim olsem long rot bilong wanpela mirakel​—⁠em i kisim laip bilong Jisas long heven na putim i go insait long bel bilong gutpela meri Juda i no bin slip wantaim man, nem bilong em Maria. Jisas i no kisim sin, long wanem, papa bilong em i no wanpela man bilong graun. Holi spirit, o strong, bilong Jehova i kam long Maria, na strong bilong Jehova i “karamapim” em, na dispela i mekim na em i gat bel. (Luk 1:​34, 35) Olsem na Maria i karim wanpela pikinini i nambawan olgeta. Josep, em wanpela kamda, i kisim Jisas olsem pikinini bilong em, na em i kamap bikpela long wanpela haus nating, na taim Maria i karim em pinis, Josep na Maria i kamapim sampela pikinini moa.​—⁠Aisaia 7:14; Matyu 1:​22, 23; Mak 6:⁠3.

I no gat planti stori bilong taim Jisas i stap pikinini yet, tasol yumi ken tingim wanpela bikpela samting i bin kamap. Taim Jisas i gat 12-pela krismas, papamama i kisim em i go long Jerusalem bilong lukim Pasova i save kamap long olgeta yia. Taim Jisas i stap long Jerusalem, em i bin lusim bikpela haptaim bilong i stap long tempel, na em i “sindaun i stap namel long ol tisa. Em i wok long harim tok bilong ol, na long askim ol tu.” Na “ol i kirap nogut long save bilong en na long tok em i bekim long ol.” Tru tumas, taim Jisas i yangpela, em inap kamapim olkain askim bilong ol samting bilong spirit i kirapim tru tingting bilong ol man, na tu, em inap kamapim ol gutpela bekim ol narapela i kirap nogut tru long en. (Luk 2:​41-50) Taim em i wok long kamap bikpela long taun Nasaret, em i lain long mekim wok kamda​—⁠ating waspapa bilong em Josep i lainim em.​—⁠Matyu 13:⁠55.

Jisas i sindaun long Nasaret i go inap long taim em i gat 30 krismas. Orait nau em i go long Jon bilong kisim baptais. Taim em i baptais pinis, Jisas i kirap mekim wok bilong em long autim tok. Inap 3 na hap yia, em i raun long olgeta hap bilong kantri bilong em na autim gutnius bilong Kingdom Bilong God. Em i kamapim klia olsem God i bin salim em i kam. Em i mekim olsem wanem? Em i wokim planti mirakel​—⁠em ol strongpela wok ol man bilong graun i no inap tru long mekim.​—⁠Matyu 4:17; Luk 19:​37, 38.

Na tu, Jisas em i man bilong pasin isi na bel sori. Pasin isi bilong em i kamap ples klia long tingting bilong em long ol man na pasin em i mekim long ol. Jisas i save mekim gutpela pasin long ol man na i no hatwok long i go toktok wantaim em, olsem na ol manmeri i laik go long em. Ol pikinini tu i stap bel isi taim ol i stap wantaim em. (Mak 10:​13-16) Jisas i rispek long ol meri, maski sampela man long taim bilong em ol i ting ol meri i samting nating. (Jon 4:​9, 27) Em i helpim ol rabisman na ol lain i stap tarangu na bai ol i ken kisim “malolo.” (Matyu 11:​28-30) Pasin bilong em long skulim man i klia tru, i no hatwok long kisimgut, na i helpim ol. Na ol samting em i skulim ol man long en i kamapim klia olsem em i gat bikpela laik tru long ol i ken kisim save long God tru, Jehova.​—⁠Jon 17:​6-8.

Jisas i mekim wok long holi spirit bilong God bilong wokim ol mirakel, na long pasin sori em i oraitim ol man i gat kain kain sik. (Matyu 15:​30, 31) Wanpela man i gat sik lepra i kam long em na i tok: “Sapos yu laik, yu inap long mekim mi i kamap klin.” Orait Jisas i mekim wanem? Em i putim han long dispela man na i tok: “Mi laik. Yu kamap klin.” Em nau, sik bilong dispela man i pinis!​—⁠Matyu 8:​2-4.

Tingim tu wanpela taim bikpela lain manmeri i kam long Jisas na i stap wantaim em inap 3-pela de na ol i no gat kaikai. Em i sori tru long ol na em i wokim mirakel na givim kaikai long “4,000 man. Na ol i no kaunim ol meri na pikinini.” (Matyu 15:​32-38) Long narapela taim Jisas i mekim i dai traipela win na bikpela si i laik bagarapim ol pren bilong em. (Mak 4:​37-39) Em i kirapim bek ol man i dai pinis.a (Luk 7:22; Jon 11:​43, 44) Na Jisas i orait long givim laip bilong em i gutpela olgeta bambai ol man i gat sin inap wetim gutpela samting bai kamap bihain. Tru tumas, Jisas i laikim tru ol man!

Long Nau Jisas i Stap We?

Jisas i dai long diwai pos taim em i gat 33 na hap krismas.b Tasol indai i no pinisim i stap bilong em. Namba 3 hap bilong i stap bilong Jisas i kirap 3-pela de bihain, taim God Jehova i kirapim bek Pikinini bilong em olsem wanpela spirit. Taim Jisas i kirap bek pinis, em i kamap long planti handet man i bin i stap long dispela taim. (1 Korin 15:​3-8) Bihain long dispela, em i “sindaun long han sut bilong God” na wetim taim bilong kisim namba olsem king. (Hibru 10:​12, 13) Taim dispela taim i kamap, Jisas i kirap mekim wok olsem King. Olsem na yumi mas ting olsem wanem long Jisas long nau? Yumi mas tingim em olsem wanpela man i karim bikpela pen na ol man i kilim em i dai? O yumi mas tingim em olsem wanpela man yumi mas lotu long em? Long nau Jisas i no wanpela man bilong graun, na em i no God i Gat Olgeta Strong. Em i wanpela strongpela spirit na em i stap King. Klostu nau em bai kamapim long ples klia wok king bilong em long dispela graun bilong yumi i gat planti hevi long en.

Long rot bilong tok piksa, Kamapim Tok Hait 19:​11-16 i stori long Jisas Krais i stap King na i sindaun long waitpela hos na i kam bilong skelim ol man long kot na mekim pait long stretpela pasin. Em i gat “wanpela bainat i sap tru, em i kam ausait long maus bilong [em].” Em nau, long bikpela strong bilong em, Jisas bai bagarapim ol man nogut. Na olsem wanem long ol manmeri i wok strong long bihainim pasin em i bin mekim taim em i stap long graun? (1 Pita 2:21) Em wantaim Papa bilong em bai lukautim ol long taim bilong “pait long dispela bikpela de bilong God I Gat Olgeta Strong”​—⁠em Baibel i kolim Armagedon​—⁠na bai ol i ken i stap oltaim oltaim long graun aninit long Kingdom Bilong God long heven.​—⁠KTH 7:​9, 14; 16:​14, 16; 21:​3, 4.

Taim Jisas i stap King na kamapim bel isi long graun, em bai wokim ol bikpela mirakel tru bilong helpim olgeta manmeri! (Aisaia 9:​6, 7; 11:​1-10) Em bai oraitim ol sik na pinisim dai. God bai mekim wok long Jisas bilong kirapim bek planti bilion manmeri i dai pinis, na givim rot long ol bilong i stap oltaim oltaim long graun. (Jon 5:​28, 29) Sindaun bilong yumi aninit long Kingdom bai i nambawan tru. Olsem na em i bikpela samting tru long yumi mas wok yet long kisim save long Baibel na save gut moa long Jisas Krais.

[Ol Futnot]

[Blok long pes 7]

YU TING JISAS EM GOD I GAT OLGETA STRONG?

Planti man bilong lotu i tok Jisas em i God. Sampela i tok God em i wanpela God Triwan. Dispela bilip i tok, “Papa em i God, Pikinini em i God, na Holi Spirit em i God. Tasol i no gat tripela God, i gat wanpela God tasol.” Ol man i tok tripela wantaim “i stap oltaim na ol i gat wankain bikpela namba.” (The Catholic Encyclopedia) Yu ting kain tingting olsem i stret?

God Jehova em i Man Bilong Wokim olgeta samting. (KTH 4:11) Laip bilong em i no bin i gat kirap bilong en na em i no inap i dai, na em i gat olgeta strong. (Song 90:⁠2) Tasol laip bilong Jisas i bin i gat kirap bilong en. (Kolosi 1:​15, 16) Jisas i kolim God olsem Papa bilong em, na i tok: “Papa i stap namba wan tru na i winim mi.” (Jon 14:28) Jisas i tok tu olsem i gat sampela samting em na ol ensel i no save long en​—⁠Papa wanpela tasol i save.​—⁠Mak 13:⁠32.

Na Jisas i beten long Papa bilong em olsem: “Yu no ken bihainim laik bilong mi. Nogat. Yu mas bihainim laik bilong yu tasol.” (Luk 22:42) Sapos Jisas i no beten long wanpela Man i winim em, orait em i beten long husat? Na God yet i bin kirapim bek Jisas long matmat​—⁠Jisas yet i no bin mekim dispela samting. (Aposel 2:32) Em nau, yumi save Papa na Pikinini i no gat wankain namba paslain long taim Jisas i kam long graun o long taim em i stap long graun. Orait olsem wanem long taim Jisas i kirap bek pinis na i go long heven? Long 1 Korin 11:3 Baibel i tok: “Het bilong Krais em God.” Long olgeta taim Pikinini bai i stap aninit long God. (1 Korin 15:28) Olsem na Baibel i soim olsem Jisas i no God i Gat Olgeta Strong. Em i Pikinini Bilong God.

Holi spirit em ol i tok em namba 3 man bilong God Triwan, em i no wanpela man, nogat. Man bilong raitim song i beten long God olsem: “Yu save givim win [“spirit bilong yu,” NW ] long ol na ol i kisim laip.” (Song 104:30) Dispela spirit i no God yet, nogat; em i wanpela strong God i save yusim bilong mekim ol samting em i laikim. Long rot bilong en God i bin wokim san, mun na ol sta samting, na graun, na olgeta samting i stap laip. (Stat 1:2; Song 33:⁠6) God i bin yusim holi spirit bilong givim tingting long ol man i bin raitim Baibel. (2 Pita 1:​20, 21) Olsem na dispela tok bilong God Triwan i no wanpela tok Baibel i skulim yumi long en.c Baibel i tok: “Bikpela, em wanpela tasol em i God bilong yumi.”​—⁠Lo 6:⁠4.

[Futnot]

[Piksa long pes 5]

Taim Jisas i kisim baptais, em i kamap Man God i Makim

[Piksa long pes 7]

Jisas i yusim strong bilong em long mekim wok God i bin givim em

[Piksa long pes 7]

Long nau, Jisas i wanpela strongpela King