Sapta 6
Krais Jisas—God i Salim Em i Kam?
1, 2. (a) I gat wanem samting na yumi ken save, Krais Jisas em i wanpela man tru em i bin i stap long bipo? (b) Ol man i gat wanem ol askim long Jisas?
PLANTI manmeri i bin harim tok long Krais Jisas. Em i bin tanim tingting bilong planti man. Na ol yia bilong yumi tu yumi save makim olsem “paslain long taim bilong Krais” (B.C.E.) na “kirap long taim bilong Krais i kam inap long nau” (C.E.).
2 Olsem na Jisas em i wanpela man tru em i bin i stap long graun long bipo. Wanpela bikpela buk (Encyclopædia Britannica) i tok: “Ol birua bilong lotu Kristen long bipo tu ol i save Jisas em i [bin i stap tru long graun].” Orait, Jisas em i husat? Tru God i salim em i kam? Olsem wanem na planti manmeri ol i save long em?
BIPO EM I STAP LONG HEVEN
3. (a) Maria bai karim pikinini bilong husat, olsem ensel i tok? (b) Olsem wanem Maria, wanpela nupela meri singel, em inap karim Jisas?
3 Jisas em i narapela kain long ol narapela man bilong graun. Wanpela nupela meri singel em i no bin slip wantaim wanpela man em i karim em. Nem bilong dispela meri em Maria. Wanpela ensel i tok, dispela pikinini “bai i stap bikpela man. Na bai ol i kolim em Pikinini bilong God Antap Tru.” (Luk 1:28-33; Matyu 1:20-25) Tasol meri i no bin slip wantaim wanpela man, olsem wanem em inap karim pikinini? Long rot bilong spirit holi Jehova i kisim laip bilong Jisas long heven na em i putim long bel bilong Maria. Dispela em i wanpela strongpela wok o mirakel! God yet i bin wokim namba wan meri, olsem na em inap mekim na bai wanpela meri i karim pikinini maski dispela pikinini i no gat papa long graun. Baibel i tok: “Taim inap pinis, orait God i salim Pikinini bilong en i kam. Meri i karim em.”—Galesia 4:4.
4. (a) Taim Jisas i no kamap man yet long graun, em i stap we? (b) Jisas i tok wanem na yumi ken save, bipo em i stap long heven?
4 Olsem na taim Jisas i no kamap man yet long graun, em i bin i stap long heven. Em i wanpela strongpela spirit. Em i gat bodi bilong heven olsem God na yumi no inap lukim em. (Jon 4:24) Planti taim Jisas i stori long bikpela namba em i bin holim long heven. Wanpela taim em i beten olsem: “Papa, bipo graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi.” (Jon 17:5) Na em i tokim ol man: “Yupela i bilong daunbilo. Mi bilong antap.” “Sapos yupela i lukim Pikinini Bilong Man i go antap long dispela ples bipo em i stap long en, bai olsem wanem?” “Ebraham i no kamap yet na mi stap.”—Jon 8:23; 6:62; 8:58; 3:13; 6:51.
5. (a) Bilong wanem Baibel i kolim Jisas olsem “Tok bilong God”? na “namba wan Pikinini”? na “dispela wanpela Pikinini”? (b) Jisas i mekim wanem wok wantaim God?
5 Taim Jisas i stap yet long heven ol i kolim em Tok bilong God, long wanem em i maus bilong God long heven. Em i “namba wan Pikinini” bilong God. Baibel i kolim em “dispela wanpela Pikinini.” (Jon 1:14; 3:16; Hibru 1:6) Em olsem: God i wokim dispela Pikinini paslain long olgeta narapela pikinini spirit bilong em. Em i namba wan samting God i wokim. God wanpela tasol i wokim “dispela wanpela Pikinini.” Baibel i tok, dispela “namba wan Pikinini” em i wok wantaim God long wokim olgeta narapela samting. (Kolosi 1:15, 16) Olsem na taim God i tok: “Yumi wokim man bai em i kamap olsem yumi,” em i toktok wantaim dispela Pikinini bilong em. Yes, pastaim Jisas i bin wok wantaim God long wokim olgeta samting! Taim em i no kam daun yet long graun, em i bin i stap long heven wantaim Papa bilong em. Tasol yumi no save hamas yia em i bin i stap!—Jenesis 1:26; Provep 8:22, 30; Jon 1:3.
TAIM EM I STAP LONG GRAUN
6. (a) Wanem samting i kamap paslain liklik long taim mama i karim Jisas? Na bihain liklik? (b) Mama i karim Jisas we? Jisas i go bikpela long wanem ples?
6 Ol i bin makim Maria bilong maritim Josep. Taim Josep i harim tok olsem Maria i gat bel, em i ting Maria i bin slip wantaim wanpela man, na Josep i no laik maritim em. Tasol Jehova i tokim Josep, spirit holi bilong Em i kamapim dispela pikinini i stap long bel bilong Maria. Olsem na Josep i kisim Maria na Maria i kamap meri bilong em. (Matyu 1:18-20, 24, 25) Bihain tupela i go long Betlehem na Maria i karim Jisas. (Luk 2:1-7; Maika 5:2) Jisas i bebi yet na King Herot i laik kilim em i dai. Tasol Jehova i toksave long Josep na Josep i kisim meri pikinini na ranawe i go long Isip. Bihain King Herot i dai pinis na Josep tupela Maria i kisim Jisas i go bek long taun Nasaret long hap bilong Galili. Jisas i go bikpela long dispela ples.—Matyu 2:13-15, 19-23.
7. (a) Taim Jisas i gat 12-pela krismas, wanem samting i kamap? (b) Jisas i lain long mekim wanem wok?
7 Taim Jisas i gat 12-pela krismas em i go wantaim papamama na ol brata susa bilong em long Jerusalem bilong lukim bikpela de lotu ol i kolim Pasova. Em i stap tripela de long haus lotu, na em i harim tok bilong ol tisa na givim sampela askim long ol. Olgeta manmeri i kirap nogut long save bilong em. (Luk 2:41-52) Jisas i go bikpela long Nasaret na em i lain long mekim wok kamda. Ating waspapa bilong em Josep i bin lainim em long dispela wok.—Mak 6:3; Matyu 13:55.
8. Taim Jisas i gat 30 krismas, wanem samting i kamap?
8 Taim Jisas i gat 30 krismas bikpela senis i kamap long em. Em i go long Jon Bilong Baptais na tokim em long givim baptais long em. Jon i putim em i go insait olgeta long Wara Jodan. Baibel i tok: “Jisas i kisim baptais pinis, na kwiktaim em i lusim wara na i kam antap. Na heven i op, na em i lukim Spirit bilong God i kam daun olsem wanpela pisin na i kam i stap long Jisas. Na wanpela maus i singaut long heven olsem, ‘Dispela em i Pikinini bilong mi. Mi laikim em tumas. Bel bilong mi em i gutpela long em.’ ” (Matyu 3:16, 17) Nau Jon i save tru, God i bin salim Jisas i kam.
9. (a) Wanem taim tru Jisas i kamap Krais? Olsem wanem na em i kamap Krais long dispela taim? (b) Taim Jisas i kisim baptais, em i givim skin bilong em bilong mekim wanem?
9 Jehova i kapsaitim spirit bilong em long Jisas na makim em bilong kamap king long kingdom bilong em long bihain. Taim spirit i makim em, nau Jisas i kamap “Mesaia” o “Krais.” Insait bilong dispela tok Hibru na tok Grik i olsem: “Makim.” Olsem na Jisas i kamap Jisas Krais o dispela man God i makim. Pita i tok long “Jisas bilong Nasaret” na em i tok: “God i makim em olsem: Em i givim Holi Spirit na bikpela strong long em.” (Aposel 10:38) Na taim Jisas i kisim baptais, em i givim skin bilong em yet long God bilong mekim dispela wok God i salim em bilong mekim. Wanem dispela bikpela wok?
BILONG WANEM EM I KAM LONG GRAUN?
10. Jisas i kam long graun bilong autim wanem ol tok i tru?
10 Jisas i tokim namba wan gavman Pontias Pailat: “Mama bilong mi i karim mi na mi kam long graun bilong dispela tasol: Mi gat wok long autim tok tru.” (Jon 18:37) Tasol God i salim Jisas bilong autim wanem ol tok i tru? Namba wan tok em olsem: Em i mas tokim ol man long Papa bilong em. Em i lainim ol disaipel bilong em long beten long Papa bilong em, olsem: “Nem bilong yu i mas i stap holi.” (Matyu 6:9) Na em i beten na em i tok: “Mi telimautim pinis nem bilong yu long ol man yu bin givim mi long dispela graun.” (Jon 17:6) Na em i tok: “Mi mas telimautim gutnius bilong kingdom bilong God . . . God i salim mi na mi kam bilong mekim dispela wok.”—Luk 4:43.
11. (a) Bilong wanem Jisas i tingim wok bilong em i bikpela samting tru? (b) Jisas i no surik liklik long mekim wanem? Olsem na yumi mas mekim wanem?
11 Dispela wok bilong autim tok long nem na kingdom bilong God, yu ting Jisas i tingim em i bikpela wok? Em i tokim ol disaipel: “Kaikai bilong mi em i olsem: Mi bihainim laik bilong dispela em i bin salim mi na mi kam. Na mi mas pinisim wok bilong em.” (Jon 4:34) Bilong wanem Jisas i tingim dispela wok i bikpela samting olsem kaikai? Long wanem, long rot bilong Kingdom bai God i truim olgeta gutpela tok promis em i bin mekim long ol man. Dispela kingdom bai pinisim olgeta pasin nogut na stretim bek nem bilong Jehova. (Danyel 2:44; Revelesen 21:3, 4) Olsem na Jisas i no surik liklik long autim tok long nem na kingdom bilong God. (Matyu 4:17; Luk 8:1; Jon 17:26; Hibru 2:12) Oltaim em i save autim tok i tru, maski ol man i laikim dispela tok o nogat. Em i makim gutpela pasin yumi mas bihainim sapos yumi laik bai God i amamas long yumi.—1 Pita 2:21.
12. Jisas i kam bilong mekim wanem narapela bikpela wok?
12 Tasol Jisas i mas kapsaitim blut bilong em, em i mas i dai, bambai yumi inap i stap oltaim aninit long kingdom bilong God. Olsem tupela aposel bilong Jisas i tok: “Blut bilong em i kapsait na klinim yumi na nau God i kolim yumi stretpela manmeri.” “Blut bilong Jisas, Pikinini Bilong God, em i save tekewe olgeta sin bilong yumi na yumi kamap klin.” (Rom 5:9; 1 Jon 1:7) Olsem na wanpela bikpela wok Jisas i kam bilong mekim, em olsem: Em i kam “bilong givim laip bilong em bilong baim bek planti manmeri.” (Matyu 20:28) Tasol wanem insait bilong dispela tok “baim bek”? Bilong wanem Jisas i mas i dai bambai yumi inap kisim laip?
EM I DAI BILONG BAIM BEK YUMI
13. (a) Pe bilong baim bek man i helpim man olsem wanem? (b) Jisas i givim wanem pe bilong baim bek yumi long pekato na i dai?
13 Long nau, taim ol man nogut i stilim wanpela man, ol i save kalabusim em na tokim ol pren bilong em ol i mas baim bek em, nogut ol i kilim em i dai. Olsem na pe bilong baim bek man i save helpim man bambai em i ken lusim kalabus na em i no ken i dai. Orait, Jisas i kamap man long graun na givim nambawan gutpela laip bilong em olsem pe bilong baim bek ol manmeri, em ol i kalabus long pekato na i dai. (1 Pita 1:18, 19; Efesas 1:7) Olsem wanem ol i kalabus na em i mas baim bek ol?
14. Bilong wanem Jisas i mas baim bek yumi?
14 Long wanem, Adam, em i tumbuna papa bilong yumi olgeta manmeri, em i bikhet long God. Em i sakim lo bilong God na em i kamap sinman, long wanem “sin em i pasin bilong sakim lo.” (1 Jon 3:4; 5:17) Adam i no inap long kisim gutpela presen God i laik givim long em, em laip i stap oltaim. (Rom 6:23) Em i no inap i stap oltaim long gutpela ples paradais long graun, na olgeta pikinini bilong em tu i lus long kisim dispela gutpela samting. Tasol ating yu laik save, ‘Bilong wanem olgeta pikinini bilong em i mas i dai? Ol i no mekim rong. Adam i mekim rong.’
15. Adam yet i mekim rong na bilong wanem ol pikinini bilong em i mas karim hevi long dispela?
15 As bilong dispela samting i olsem: Adam i kamap sinman na taim em i kamapim pikinini dispela sin na i dai tu i kisim yumi olgeta pikinini bilong em. (Jop 14:4; Rom 5:12) Baibel i tok: “Yumi olgeta man yumi bin mekim sin.” (Rom 3:23; 1 King 8:46) Bilipman Devit tu em i tok: “Taim mama i karim mi, mi kamap man bilong mekim pasin nogut. Mi stap yet long bel bilong mama, na mi man bilong sin.” (Sam 51:5) Yumi olgeta yumi kisim sin long Adam na yumi dai. Orait, olsem wanem ofa bilong Jisas inap helpim yumi olgeta long lusim kalabus bilong sin na i dai?
16. (a) Bilong baim bek yumi God i mekim wanem na em i bihainim lo bilong em olsem ‘laip i pe o bekim bilong laip’? (b) Bilong wanem Jisas wanpela tasol inap givim pe bilong baim bek yumi?
16 God i bihainim wanpela lo em i bin givim long ol Isrel, olsem: ‘Laip i pe o bekim bilong laip.’ (Eksodas 21:23; Diuteronomi 19:21) Adam i gutpela man olgeta, tasol em i sakim tok na gutpela laip bilong em long paradais i lus. Olgeta pikinini bilong em tu ol i lus long dispela samting. Krais Jisas em i gutpela man olgeta na em i givim gutpela laip bilong em bilong baim bek olgeta samting Adam i lusim. Jisas “i lusim laip bilong em yet [olsem pe i stret tru] bilong baim bek olgeta man.” (1 Timoti 2:5, 6) Jisas em i gutpela man olgeta olsem Adam long pastaim, olsem na Baibel i kolim em “Adam bilong bihain tru.” (1 Korin 15:45) No gat wanpela man bilong graun inap baim bek yumi. Jisas tasol inap mekim, long wanem em i gutpela man olgeta wankain olsem Adam long pastaim, em tu i pikinini bilong God.—Sam 49:7; Luk 1:32; 3:38.
17. Wanem taim Jisas i givim pe long God bilong baim bek yumi?
17 Jisas i gat 33 yia hap na em i dai. Tasol long namba tri de God i kirapim bek em long matmat. Na fopela ten de bihain em i go bek long heven. (Aposel 1:3, 9-11) Em i kamap spirit gen. Em i kisim pe bilong blut bilong em i go na em i “kamap ples klia long ai bilong God.” (Hibru 9:12, 24) Long dispela taim em i givim dispela pe long God bilong baim bek yumi. Nau rot i op bilong ol manmeri i ken lusim kalabus na kisim laip. Tasol wanem taim bai dispela pe i helpim yumi?
18. (a) Long nau tu pe bilong baim bek yumi em inap helpim yumi olsem wanem? (b) Dispela pe bai helpim yumi olsem wanem long bihain?
18 Long nau tu ofa bilong Jisas inap helpim yumi. Em inap helpim yumi olsem wanem? Sapos yumi bilip long en yumi inap i stap klin long ai bilong God na bai em i lukautim yumi. (Revelesen 7:9, 10, 13-15) Taim yumi no kisim save yet long God, ating yumi planti manmeri yumi bin mekim sampela bikpela rong. Na nau tu yumi save popaia. Tasol Krais i givim pinis pe bilong baim bek yumi na long dispela as yumi inap beten askim God long lusim tingting long ol popaia bilong yumi, na yumi ken save em bai harim beten bilong yumi. (1 Jon 2:1, 2; 1 Korin 6:9-11) Na bihain ofa bilong Krais bai opim rot na bai yumi inap kisim laip i stap oltaim. (2 Pita 3:13) Long dispela taim bihain olgeta manmeri i bilip long ofa bilong Krais bai ol i lusim tru kalabus bilong pekato na i dai. Bai ol inap i stap oltaim na i stap gutpela olgeta!
19. (a) God i wokim rot bilong baim bek yumi na dispela samting i mekim wanem long yu? (b) Bilong tenkyu long God na Krais, yumi mas mekim wanem
19 Yu ting olsem wanem long dispela pe bilong baim bek yumi? Ating yu pilim tru gutpela samting God i mekim, em i givim Pikinini bilong em bilong helpim yu. (Jon 3:6; 1 Jon 4:9, 10) Na tingim tu sori bilong Krais. Long laik bilong em yet em i kam long graun na em i dai bilong helpim yumi. Yumi mas tenkyu tru long em, a? Bilong mekim olsem, Pol i tok: “Yumi no ken tingting moa long yumi yet na wokabaut. Nogat. Yumi ken tingting long dispela man i senisim yumi na i dai pinis, na i kirap bek tu. Yumi ken tingting long em na wokabaut.” (2 Korin 5:14, 15) Bai yu mekim wok bilong God na Krais na bai ol i ken save yu tenkyu long ol?
BILONG WANEM JISAS I WOKIM OL MIRAKEL?
20. Jisas i oraitim sik bilong wanpela lepraman na dispela samting i lainim yumi olsem wanem long Jisas?
20 Planti man i save long ol mirakel bilong Jisas. Em i sori tru long ol manmeri i gat hevi. Em i laik helpim ol na em i mekim wok long dispela strong God i bin givim long em. Wanpela man i gat sik lepra i kam long Jisas na em i tok: “Sapos yu laik, yu inap mekim mi kamap klin.” Jisas i “sori tumas long em, na i putim han long em, na i tokim em, ‘Mi laik. Yu kamap klin.’ ” Na skin bilong dispela man i orait bek!—Mak 1:40-42.
21. Jisas i mekim wanem bilong helpim ol bikpela lain manmeri ol i kam bung?
21 Na Baibel i stori moa long sori bilong Jisas, olsem: Ol manmeri “i bringim ol lek nogut, na ol aipas, na ol bun krungut, na ol mauspas, na planti arapela sikman tu, na ol i putim klostu long lek bilong Jisas. Na em i oraitim ol. Olsem na ol manmeri ol i tingting planti. Long wanem ol i lukim ol mauspas i toktok, na ol bun krungut i orait nau, na ol lek nogut i wokabaut, na ol aipas i lukluk. Olsem na ol i litimapim nem bilong God bilong Isrel.”—Matyu 15:30, 31.
22. I gat wanem samting na yumi ken save Jisas i sori tru long ol manmeri na em i helpim ol?
22 Jisas i sori tru long ol dispela manmeri i karim pen na hevi na em i laik tru long helpim ol. Em i tokim ol disaipel: “Mi sori long dispela ol manmeri. Ol i stap wantaim mi tripela de pinis na ol i no gat kaikai. Mi no laik salim ol i go bek hangre. Nogut ol i dai long rot.” Olsem na Jisas i kisim sevenpela bret tasol na sampela liklik pis na givim kaikai long dispela bikpela lain manmeri ol inap olsem “4,000 man. Na ol i no kaunim ol meri na pikinini.”—Matyu 15:32-38.
23. Wanem samting i kirapim Jisas na em i kirapim bek pikinini man bilong wanpela meri wanpis?
23 Na wanpela taim Jisas i go long Nen na Baibel i stori olsem: “Ol i karim wanpela daiman i kam. Mama bilong dispela daiman em i gat dispela wanpela pikinini tasol. Na man bilong en em tu i dai pinis bipo. . . . Bikpela i lukim dispela meri, na bel bilong en i sori long em.” Em i pilim tru hevi bilong dispela meri. Olsem na em i tokim dispela daiman: “Yu kirap.” Na olaman! “Dispela man i dai pinis, em i kirap na . . . Jisas i givim em long mama bilong en.” Mama bilong em i amamas tru! Sapos kain samting olsem i bin painim yu, bai yu tu yu amamas, a? Stori bilong dispela mirakel i go nabaut long planti hap, olsem na planti man i save long Jisas.—Luk 7:11-17.
24. Ol mirakel bilong Jisas i makim wanem samting bilong bihain?
24 Tasol ol dispela strongpela wok o mirakel bilong Jisas i helpim ol man inap liklik taim tasol. Ol man em i oraitim sik bilong ol, bihain sik i painim ol gen. Na ol man em i kirapim bek ol, bihain ol i dai gen. Tasol ol dispela mirakel i soim ol man, tru tumas God i bin salim Jisas i kam na em i Pikinini Bilong God. Na long strong bilong God olgeta hevi bilong ol man bai pinis. Ol dispela mirakel i makim ol samting bai kamap taim kingdom bilong God i bosim graun. Ol man i hangre bai ol i gat kaikai. Ol man i gat sik bai ol i orait bek. Ol man i dai pinis bai ol i kirap bek! Sik na i dai na ol narapela hevi bai pinis olgeta. Em bai gutpela tru!—Revelesen 21:3, 4; Matyu 11:4, 5.
MAN BILONG BOSIM KINGDOM BILONG GOD
25. I stap bilong Jisas i gat wanem tripela hap bilong en?
25 I stap bilong Pikinini Bilong God i gat tripela hap bilong en. Pastaim em i stap wantaim Papa bilong em long heven na yumi no save hamas yia em i bin i stap. Bihain em i kamap man long graun na em i stap long graun inap 33 yia hap. Na bihain em i kamap spirit gen na em i go bek long heven. Taim em i kirap bek na em i go bek long heven, em i kisim wanem wok?
26. Jisas i stap gut long wok bilong em long graun, olsem na em inap kamap wanem samting?
26 Jisas em i bilong kisim wok king. Ensel i tokim Maria: “Em bai i stap king . . . oltaim.” (Luk 1:33) Taim Jisas i stap long graun, oltaim em i tokim ol man long kingdom bilong God. Em i lainim ol disaipel long beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i bihainim long heven.” Na em i kirapim ol long “wok pastaim long painim kingdom bilong God.” (Matyu 6:10, 33) Jisas i stap gut long wok bilong em long graun, olsem na em inap tru long kamap king long kingdom bilong God. Taim em i go bek long heven, yu ting wantu em i kirap mekim wok king?
27. (a) Jisas i go bek long heven na em i mekim wanem? (b) Taim Jisas i kamap king long kingdom bilong God, wanem namba wan samting em i mekim?
27 Nogat. Pol i kolim tok bilong Sam 110:1 na em i tok: “Krais em i mekim wanpela ofa tasol bilong tekewe sin, . . . Em i mekim olsem, na em i sindaun long han sut bilong God. . . . na i wetim taim bilong God i putim ol birua bilong en i go aninit long em.” (Hibru 10:12, 13) Jisas i wetim Jehova i givim tok long em, olsem: ‘Yu go daunim ol birua.’ (Sam 110:2) Taim Jehova i tok olsem, orait, Jisas i kirap rausim Seten wantaim lain ensel bilong em long heven. Baibel i stori long dispela pait, olsem: “Nau God bilong yumi em i kisim bek pinis yumi, na strong bilong em i kamap pinis long ples klia, na [God] i stap king! Na Krais bilong en i kisim pinis bikpela namba! Long wanem dispela man bilong kotim ol brata bilong yumi, . . . nau ol ensel ol i tromoi em i go daun pinis.” (Revelesen 12:10) Narapela sapta bipo i stori olsem dispela pait i kamap pinis long heven na Krais Jisas i kamap king pinis. Nau em i mekim wok namel long ol birua bilong em.
28. (a) Liklik taim bai Krais i mekim wanem? (b) Yumi mas mekim wanem na bai em i lukautim yumi?
28 Liklik taim tasol na Krais wantaim ol ensel long heven bai ol i pinisim olgeta gavman nau ol i stap long graun. (Danyel 2:44; Revelesen 17:14) Baibel i tok, Krais i holim wanpela “bainat i sap tumas,” na bai em i “kilim ol lain manmeri long dispela bainat.” (Revelesen 19:11-16) Orait, yumi mas bilip long Krais Jisas na taim dispela bikpela bagarap i kamap, bai em inap lukautim yumi. (Jon 3:36) Yumi mas kamap disaipel bilong em na daun long em, em i King bilong yumi long heven. Bai yu mekim olsem?
olsem Pol i tok?
[Piksa long pes 58]
Jisas i lusim wok kamda bambai em i ken kisim baptais na spirit bilong Jehova i ken makim em
[Piksa long pes 63]
Jisas i gutpela man olgeta, wankain tru olsem Adam long pastaim
[Ol Piksa long pes 64]
Jisas i sori tru long ol sikman na ol man i hangre na em i helpim ol
[Piksa long pes 67]
Jisas i kirapim bek man i dai pinis na dispela i makim ol samting em bai mekim taim kingdom bilong God i bosim graun